Read Mizo_Old_version LEHKHABU PAKHATNA SAMUELA 5 Bible Online

LEHKHABU PAKHATNA SAMUELA 5 - Mizo_Old_version bible

LEHKHABU PAKHATNA SAMUELA 5

¹Chutichuan, Philistia mite chuan Pathian bâwm chu an la a, Ebenezer ata chu Asdod khuaah an kalpui ta a.

²Tin, Philistia mite chuan Pathian bâwm chu an la a, Dagona biak inah an la lût a, Dagona kiangah chuan an dah a.

³Tin, Asdod khuaa mite chu a tûk zing taka an han thawh chuan, ngai teh, LALPA bâwm hmaah chuan Dagona chu a hmaia lei siin a lo tlu dêr mai a. Tichuan, Dagona chu an la a, a awmna hmunah chuan an dah leh a.

⁴Tin, a tûk leh zîng taka an han thawh chuan, ngai teh, LALPA bâwm hmaah chuan Dagona chu a hmaia lei siin a lo tlu dêr mai a. Dagona lu leh a kutphah bâwr khing hnih chhum chu kawngka bulah chuan a lo lum reng mai a; Dagona taksa chauh chu a lo awm ta mai a.

⁵Chumi avâng chuan Dagona puithiam te, Dagona biak ina lo kal ṭhîn rêng rêngte pawhin Asdod khuaa Dagona kawngka bul chu tûn thlengin an rap ngam lo a ni.

⁶Chutichuan, LALPA kut chuan Asdod khuaa mite chu a delh ta hle mai a, chhiatna a thlensak ta hlawm a; Asdod khua leh a chhehvêlte chu ngâwtin a hrem ta bawk a.

⁷Tichuan, Asdod khuaa miten chutiang chu a nih an lo hriatin, “Israel-te Pathian bâwm chu kan hnênah awm reng teh suh se, kan chung leh kan pathian Dagona chunga a kutthlâk a na êm mai,” an ti a.

⁸Chutichuan, Philistia lal zawng zawngte chu an hnênah an ko khâwm a, “Israel-te Pathian bâwm chu engtin nge kan tih ang?” an ti a. Tin, anni chuan, “Israel-te Pathian bâwm chu Gath khuaah va kalpui rawh u,” tiin an chhâng a; tichuan, Israel-te Pathian bâwm chu an va kalpui ta a.

⁹Tin, heti hi a lo ni a, chutia an kalpui lai chuan LALPA kut chuan khua chu a tibuai ta nuaih nuaih mai a; khuaa mihringte chu a lian a têin a hrem a, ngâwtna hri an chungah a lêntîr a.

¹⁰Tichuan, Pathian bâwm chu Ekron-ah an thawn lêt a, a va thlen chuan Ekron khuaa mite chu, “Israel-te Pathian bâwm chu keimahni leh kan mite tihlum tûrin kan hnênah an rawn la ta,” tiin an au ta chiam mai a.

¹¹Chutichuan, Philistia lal zawng zawngte chu an ko khâwm a, “Israel-te Pathian bâwm hi kal botîr ula, keimahni leh kan mite min tihhlum loh nân a awmhmun pângngaiah kal leh rawh se,” an ti a. Khaw pum puiah chuan thihna khawp buai nuaih nuaihna a awm a; Pathian kut chuan chu khua chu a delh hle mai si a.

¹²Tin, a thi lote chu an ngâwt hlawm a; tichuan, chu khaw au thâwm chuan vân khi a han thleng a.