Read Mizo_Old_version LEHKHABU PAKHATNA SAMUELA 6 Bible Online

LEHKHABU PAKHATNA SAMUELA 6 - Mizo_Old_version bible

LEHKHABU PAKHATNA SAMUELA 6

¹Tin, LALPA bâwm chu Philistia mite ramah chuan thla sarih a awm a.

²Tin, Philistia mite chuan, “LALPA bâwm chu engtin nge kan tih ang? A awmna pângngaia kaltîr lehna zia min hrilh teh u khai,” tiin puithiamte leh aienthiamte an ko va.

³Tin, anni chuan, “Israel-te Pathian bâwm hi in kaltîr dâwn pawhin a ruak chuan kaltîr hauh suh u, a hnênah bawhchhiat thawina hlân ngei ngei rawh u. Tichuan, tihdamin in awm ang a; tin, engtiziaa a kut chu in hnên ata sawn lo nge ni tih in hria ang,” an ti a.

⁴Chutichuan, anni chuan, “A hnêna kan bawhchhiat thawina hlan tûr chu eng nge ni ang?” an ti a. Tin, anni chuan, “Philistia lal zâtin rangkachak ngâwt lem panga leh rangkachak chaichîm lem panga; in zaa chunga hri lêng leh in lalte chunga lêng chu hmun khat a ni si a.

⁵Chuvângin, in ngâwt lemte leh in ram tichhetu chaichîm lemte siam ula, Israel-te Pathian chu chawimawi rawh u; tichuan, a kut chu in chungah te, in pathian leh in ram chungah te a tizâng duh mahna.

⁶Aigupta mite leh Pharaoan rilru an tihkhauh ang khân engati nge in rilru in tihkhauh ni? An zînga thil mak tak a tih khân mite chu an kaltîr a, an chhuak ta a ni lâwm ni?

⁷Chuvângin, tûnah hian tawlailîr thar buatsaih ula, bâwngpui pahnih, a hnute sâwr lai, nghâwngkawl la bel ngai hauh loh nên; chûng bâwngpuite chu tawlailîrah chuan bel ula; tin, a note chu in lamah rawn hruai hâwnsak rawh u.

⁸Tin, LALPA bâwm chu la ula, tawlailîrah chuan dah ula; tin, bawhchhiat thawi nâna in hlan rangkachak thil hlu chu thingremah khungin a sîrah dah ula. Kaltîr ula, thlah mai rawh u.

⁹Tichuan, amaha ramri lampang kawng zawhin Beth-semes-ah a kal emaw en teh u; a kal chuan kan chunga thil ṭha lo tak hi ama tih a lo ni ang a, a kal loh chuan min hremtu chu ama kut a lo ni lo tih kan hria ang a, kan chungah a lo awm ve hrim hrim mai a ni ang,” an ti a.

¹⁰Tin, mite chuan chutiang chuan an ti a; bâwngpui, a hnute sâwr lai pahnih an hruai a, tawlailîrah chuan an bel a, a note chu in lamah an khung a.

¹¹Tin, LALPA bâwm chu tawlailîrah chuan an dah a, rangkachak chaichîm lem leh ngâwt lem dahna thingrem nên.

¹²Tin, bâwngpuite chuan Beth-semes lam panin kawng chu an zawh ta ngat ngat a; tichuan, bû chung zêlin kawngpui chu an zawh a, ding lamah emaw, vei lamah emaw an pêng hlek lo va; tin, Philistia lalte chuan Beth-semes ramri thlengin an zui a.

¹³Tin, Beth-semes khuaa mite chuan ruamah hian an buh an lo seng a, an hawi chho va, bâwm chu an han hmu a, an lâwm ta hle mai a.

¹⁴Tin, tawlailîr chu Beth-semes khuaa mi Josua lovah chuan a lût a, lungpui lian tak awmna laiah chuan a ding ta reng a; tin, tawlailîr thing chu an ek a, LALPA biak nân bâwngpuite chu hâlral thilhlanah an hmang ta a.

¹⁵Tin, Levi chite chuan LALPA bâwm chu rangkachak thil hlu awmna thingrem nên chuan an la thla a, lungpui chungah chuan an dah a; tin, Beth-semes khuaa mite chuan chumi ni vêk chuan hâlral thilhlante leh inthawinate LALPA hnênah an hlân a.

¹⁶Tin, chu chu Philistia lal pangate chuan an en zawh hnuin, chumi ni la la chuan Ekron khaw lamah an haw leh ta a.

¹⁷Philistia miten rangkachak ngâwt lem LALPA hnêna bawhchhiat thawi nâna an hlan chu heti zât hi a ni: Asdod khaw pualah pakhat, Gaza khaw pualah pakhat, Askelon khaw pualah pakhat, Gath khaw pualah pakhat, Ekron khaw pualah pakhat;

¹⁸tin, rangkachak chaichîm lem chu khua zawng zawng, kulh nei khua leh thingtlâng lam khua pawh chhiar veka lal pangate ta, Philistia mite khaw zât a ni a; LALPA bâwm an nghahna lungpui ngei chu Beth-semes khuaa mi Josua lovah chuan tûn thleng hian a la awm reng a ni.

¹⁹Tin, LALPA bâwm chhûng an en avângin Beth-semes khuaa mite chu a hrem a. An zîngah mi sîngnga leh sawmsarih zet a hrem a ni; LALPAN a hrem nasat êm avâng chuan mite chu an ṭap a.

²⁰Beth-semes khuaa mite chuan, “He Pathian thianghlim, LALPA hmaah hian tu nge ding thei ang a, kan hnên ata hi tu hnênah nge a kal chhoh tâk ang le?” an ti a.

²¹Chutichuan, Kiriath-jearim khuaa mite hnênah chuan, “Philistia mite chuan LALPA bâwm chu an rawn dah leh ta a, lo chhuk ula, in hnên lamah la chho rawh u khai,” tia hrilh tûrin mite an tîr ta a.