Read Mizo_Old_version LEHKHABU PAKHATNA SAMUELA 7 Bible Online

LEHKHABU PAKHATNA SAMUELA 7 - Mizo_Old_version bible

LEHKHABU PAKHATNA SAMUELA 7

¹Tichuan, Kiriath-jearim khuaa mite chu an zu kal a, LALPA bâwm chu an la chho va, tlânga Abinadaba inah chuan an la lût a, a fapa Eleazara chu LALPA bâwm enkawltu atân an tihrang a.

²Tin, heti hi a ni a, Kiriath-jearim-a bâwm a awm chhûng chu rei tak a ni a, kum sawmhnih zet a ni. Tin, Israela chhûngte zawng zawngin LALPA chu an lunglên leh ta a.

³Tin, Samuela chuan Israela chhûngte zawng zawng hnênah chuan, “In thinlung takzeta LALPA lam lo hawi in nih tak tak chuan, ram dang pathiante leh Astorethi-te chu in zîng ata dah bo daih ta che u, in thinlung chu LALPA tân buatsaih ula, ama rawng chauh bâwl rawh u; tichuan, Philistia mite kut ata hi a chhanchhuak dâwn che u nia,” tiin a sawi a.

⁴Tin, Israel mite chuan Baala-te leh Astorethi-te chu an dah bo ta a, LALPA rawng chauh chu an bâwl ta a.

⁵Tin, Samuela chuan, “Israel mi zawng zawngte chu Mizpe-ah ko khâwm vek ula, LALPA hnênah ka ṭawngṭaisak ang che u,” a ti a.

⁶Tichuan, Mizpe-ah an kal khâwm ta a; tin, tui an chawi a, LALPA hmaah chuan an leihbua a. Chumi ni chuan chaw an nghei a, chutah chuan, “LALPA chungah chuan kan lo sual ta a ni,” an ti a. Tin, Samuela chuan Mizpe-ah chuan Israel mite ro a rêlsak a.

⁷Tin, Philistia miten Mizpe-ah Israel mite an awm khâwm tih an hriat chuan Israel mite bei tûrin Philistia lalhote chu an thawk chho va. Chu chu Israel miten an lo hriat chuan Philistia mite chu an hlau va.

⁸Tichuan, Israel mite chuan Samuela hnênah, “Philistia mite kut ata min chhandam tûra LALPA kan Pathian min auhsak chu bâng suh khai,” an ti a.

⁹Tin, Samuela chuan berâmno hnute hne lai a la a, pumhâl hlan atân LALPA hnênah a hlân a. Tichuan, Israel mite tân Samuela chuan LALPA chu a au va; tin, LALPA chuan a chhâng a.

¹⁰Samuelan hâlral thilhlan a hlan lai tak chuan Philistia mite chuan Israel mite chu beih tumin an rawn hnaih a. Nimahsela, chumi ni chuan LALPAN Philistia mite chungah khawpui nasa tak maiin a rîktîr ta dur dur mai a, a tibuai ta nuaih nuaih a, Israel mite hmaah chuan an tlâwm ta dêr mai a.

¹¹Tin, Israel mite chu Mizpe aṭang chuan an chhuak a, Philistia mite chu an ûm a, Beth-kar hnuai an thlen thlengin an that zêl a.

¹²Chutichuan, Samuela chuan lung a la a, Mizpe leh Sen inkârah chuan a phun a. “Hei leh chen hi LALPAN min pui a ni,” tiin, a hmingah chuan Ebenezer a vuah a.

¹³Chutichuan, Philistia mite chu an tlâwm ta a, Israel-te ramah chuan an kal leh ta lo va; tin, LALPA kut chuan Philistia mite chu Samuela dam chhûng zawng chuan a tai ta reng a.

¹⁴Tin, Philistia miten Israel mite khua an lâkte chu Ekron aṭanga Gath thlengin Israel mite an pe kîr leh a, a ram chu Israel miten Philistia mite kut ata an chhanchhuak a. Tin, Israel mite leh Amor mite chu inremin an awm a.

¹⁵Tin, Samuela chuan a dam chhûngin Israel mite ro a rêl a.

¹⁶Tin, kum tinin Bethel leh Gilgal leh Mizpe hi a kan vêl ṭhîn a; chûng hmunahte chuan Israel mite ro a rêl ṭhîn a.

¹⁷Tin, a in awmna a nih avângin Rama khuaah chuan a haw ṭhîn a; chutah chuan Israel mite ro a rêl a, chutah chuan LALPA tân maichâm a siam a.