Read Mizo_Old_version LEHKHABU PAKHATNA SAMUELA 9 Bible Online

LEHKHABU PAKHATNA SAMUELA 9 - Mizo_Old_version bible

LEHKHABU PAKHATNA SAMUELA 9

¹Benjamin rama Benjamina thlah mi pakhat, mi chak huaisen tak hi a awm a, a hming chu Kisa a ni a, chu mi chu Abiela fapa a ni a, chu mi chu Zerora fapa a ni a, chu mi chu Bekoratha fapa a ni a, chu mi chu Aphia fapa a ni a.

²Tin, ani chuan fapa a nei a, a hming chu Saula a ni, tlangvâl tlâwntlai ṭha tak a ni a, Israel mite zîngah chuan a aia tlâwntlai ṭha rêng rêng an awm lo va; tu mah a koki khûm pawh an awm lo.

³Tin, Saula pa Kisa sabengtungte a bo hlawm a. Tin, Kisa chuan a fapa Saula hnênah chuan, “Tho la, chhiahhlawh pakhat hruai la, sabengtung va zawng teh khai,” a ti a.

⁴Tichuan, Ephraim tlâng ram te a fang a, Salisa ram te pawh a fang a; nimahsela, an hmu lo va. Tichuan, Saalim ram an fang leh a, chutah pawh chuan an awm lo va. Tin, Benjamin mite ram a fang leh a; nimahsela, an hmu ta chuang lo va.

⁵Zuph ram an thlen chuan Saula chuan a hnêna awm ve, a chhiahhlawh hnênah chuan, “Hawh teh, i haw leh teh tawh mai ang; chuti lo chuan, ka pain sabengtung ngaihtuah ṭhulhin keimahni min ngaihtuah dah ang e,” a ti a.

⁶Tin, ani chuan a hnênah, “Ngai teh, he khuaah hian Pathian mi a awm a, mi zahawm tak a ni a, a sawi apiang chu a lo thleng ngei ngei ṭhîn a ni. Hawh teh, chutah chuan i kal teh ang; kan kalna tûr te hi min hrilh thei mial mahna,” a ti a.

⁷Chutichuan, Saula chuan a chhiahhlawh hnênah chuan, “Nimahsela e, ngai teh, kal ta ang ila, chu mi chu eng nge kan kensak ang? Kan bâwmah chhang lah a awm tawh si lo va, Pathian mi lâwmman ken tûr a awm hauh lo mai. Eng nge kan neih aw?” a ti a.

⁸Tin, chhiahhlawh chuan Saula chu a chhâng leh a, “Ngai teh, tangkarua sekel hmun lia ṭhena hmun khat chu ka la keng a. Chu chu, kan kalna tûr min hrilh manah Pathian mi chu ka pe ang e,” a ti a.

⁹(Tûn hma lam chuan Israel-hote zînga miin Pathian râwn an duh hian, “Hawh teh, hmutheitu hnênah i kal teh ang,” an ti ṭhîn a; tûnlaia zâwlnei an tih ṭhina hi tûn hma lam chuan hmutheitu an ti ṭhîn a ni.)

¹⁰Chutichuan, Saula chuan a chhiahhlawh hnênah, “A ṭhat hlauh chu; i kal teh ang hmiang,” a ti a. Chutichuan, Pathian mi awmna khuaah chuan an kal ta a.

¹¹Khaw pan chhohnaa an han chhoh lai chuan nula tui chawi tûra lo chhuakte an han hmu a, an hnênah, “Hetah hian hmutheitu chu a awm em?” an ti a.

¹²Tin, anni chuan an chhâng a, “Awm e, in hmaah a lo kal asin. Hmanhmawh rawh u khai; vawiinah hian hmun sângah mite an inthawi avângin he khuaah hian a lo kal a ni.

¹³Khua in han luh veleh hmun sânga chaw ei tûra a kal hmain in han hmu nghâl mai ang. Inthawina chu malsâwmtu tûr a nih avângin, a thlen hma loh chuan mipui chuan chaw an ei dâwn lo a ni; chumi hnuah chuan an mi sâwmte chuan an ei ṭhîn a ni. Chuvângin, kal chho thuai ula, in han hmu nghâl mai ang,” an ti a.

¹⁴Tichuan, khuaah chuan an kal chho ta a; tin, khua an han luh chuan ngai teh, Samuela hmun sânga kal tûr chuan a tâwk a.

¹⁵Tin, Saula lo kal hma ni khatah chuan LALPA chuan Samuela chu a bekbawr a,

¹⁶“Naktûk hetih hun lai hian Benjamin ram aṭangin i hnênah mi pakhat ka rawn kaltîr dâwn a, ka mi Israel-te chunga hotu ni tûrin hriak i thih ang a, ani chuan Philistia mite kut ata ka mite a chhandam ang; an au thâwm chuan ka hnên a lo thlen tâk avângin ka mite chu ka ngaihsak a ni,” tiin.

¹⁷Tin, Samuelan Saula a hmuh chuan LALPAN a hnênah, “En teh, i hnêna ka mi sawia kha; ani hian ka mite chungah thu a nei ang,” a ti a.

¹⁸Chutichuan, Saula chuan kulh kawngkaah Samuela chu a va hnaih a. “Hmutheitu in chu khawiah nge a awm min hrilh teh khai,” a ti a.

¹⁹Tin, Samuela chuan Saula chu a chhâng a. “Keimah hi hmutheitu chu ka ni; ka hmaah hian hmun sâng lam panin kal la, vawiinah hian ka hnênah chaw i ei dâwn a ni; tin, naktûk zîngah chuan ka kaltîr ang chia, i rilrua awm zawng zawng pawh ka hrilh ang che.

²⁰Tin, i sabengtung, ni thum bo tawhte thu chu lungkham suh, an hmu tawh e. Israel-te zînga ropuina zawng zawng chu tu tân nge ni? I tân leh i pa ina mi zawng zawng tân a ni lâwm ni?” a ti a.

²¹Tin, Saula chuan a chhâng a, “Israel hnam zînga tê ber, Benjamin hnam ka ni lâwm ni? Tin, kan chhûngkua pawh Benjamin hnam chhûngkua zawng zawng zînga tê ber a ni lâwm ni? Engtiziaa hetianga ka hnêna sawi nge i nih le?” a ti a.

²²Tin, Samuela chuan Saula leh a chhiahhlawh chu a hruai a, mikhual pindanah chuan a hruai lût a, an mi sâwm, sawmthum lai zîngah chuan hmun ropui berah a ṭhuttîr a.

²³Tin, Samuela chuan chaw chhûmtu hnênah chuan, “I hnêna dah hran tûr ka tih, chanvo ka pêk che kha han la rawh khai,” a ti a.

²⁴Chutichuan, chaw chhûmtu chuan a bawp leh a chunga awm chu a rawn la a, Saula hmaah chuan a va hlui a. Tin, Samuela chuan, “En teh, ka lo dah hrana chu! Kîl la, ei rawh; hemi hun atân hian hei hi kan lo ruatsak rêng che a ni, ‘Mite ka sâwm khâwm e,’ ka ti tawh bawk si a,” a ti a. Chutichuan, chumi ni chuan Saula chuan Samuela te nên chawhlui an kîl za ta a.

²⁵Tin, hmun sâng ata khuaa an chhuk chuan, in chungah Saula chu mutna an siamsak a, a mu ta a.

²⁶Tin, zîng takah, vârṭianah an tho va; Samuela chuan in chunga awm Saula chu a ko va, “Tho la, ka kaltîr teh tawh ang che,” a ti a. Chutichuan, Saula chu a tho va, an pahnih chuan an kal chhuak a, amah leh Samuela chu an chhuak ta a.

²⁷Khaw hmâwr lam chu an zuk thlen chuan, Samuela chuan Saula hnênah, “Chhiahhlawh hi ka hma lamah kaltîr la, (ani chu a kal ta a) nang erawh chu ding rih la, Pathian thu ka han hrilh teh rih ang che,” a ti a.