Read Mmen Matyò 11 Bible Online

Matyò 11 - Mmen bible

Matyò 11

¹Kə Njisə̀s tè zaʼle mɨ̂sè chùmtè èpàm sə vəynse njò sepɛ̀, è və ndò fumə elùʼ sè ndàʼà sè fɨnə zaʼlə̂ èghɛ ə Fezhə̀zè ə setɔ̂ŋ sɛ ə se tè nyì paʼsê fumə.

²Kə Njɔyn Foə M̀mò tè zɨ ə ndɛ chaʼ ghɛ ghɛ ə Klâys tè nə̂ ə tomə sèchùmtè èpàm sə vəyn shîsê sê Vəyn.

³È və pìə nə ghənə pfɨf sê Njisə̀s nə, “Tsàyn sê ghàs” Ə̀ nyì ghô vɛ ə Zhə̀fè tè pi nə è nə̀ tomə ndò mə ghàs ə lɨmtə̂ wùə ndò ə?

⁴Njisə̀s ə pìə sê ghənə nə, “Ghàyn kɛse ndu tsayn sê Njɔyn ghɛ ghɛ ə ghàyn zɨ ə fɨnə fe è shi ghaynghe.

⁵Tsàyn sê vəyn nə, fòfvè kàʼa ve fe, m̀ngə̂s e kwîə, ghɨ akwùsghè e tɛ. Ghɨ ghɛ ə tè nyi mə ə kwùʼ e zɨə ə̀ghɛ, ghɨ ghɛ ə tè nyi mə ə kwutê è kɛsə̂ ndwîə, e ndàʼà tom èchùŋ sê ghɨ afɨfə.

⁶E nyi tayn zàyn saŋnêzè sê wùə vɛ è mɛnə va Mìə!”

⁷Kə chùmtè èpàm sə Njɔynse kɛsə ndô, Njisə̀s ə zhə̀tə̀ sə̂ wâmnə̀ sê nɔ̂yn ə ghɨ kɛ kûmə̀ Njɔyn. È və pfɨfə sê ghənə nə, “Kə ghàyn tè ndù sê Njɔyn endaʼ ashəshəze, ghàyn tè kwàʼtə se fe ghe fumə? E sɛ̂ əfekàʼè ə ze nə̂ʼə̀ ashìŋə̀ kɛ ə fofa tsɛ̂ mə?

⁸Ghàyn tè lote fɨ ndû se fe ghe?, ə wùə kə è laf laf e chûŋzè mə? Ngâŋngaŋ! ghɨ ghɛ ə ghe lafə endom nə vɛ ndamə ə setɔʼ.

⁹Ghàyn tsayn sê mi nə ghàyn tè fɨ ndû se fe ghe, Ə fɨ̀aʼtè mə? E nyi ke nâʼà nyi. M pîə sê ghàyn nə ghâ tè fe wùə, è tsɛ̀ fɨ̀aʼtè.

¹⁰Njɔyn tè nyi wùə vɛ ə tè wàmnə kûmə̀ vəyn kə tè nyàʼ ghɛ ghɛ Zhə̀fè tè pi nə, ‘Fekə, m tə tomə ndùətom vɨ̂mè, ə è ndu ə ghò shi ə è fɛte ndom.’

¹¹M piə sê ghàyn səmɔʼ nə wùə paʼà tyə̂m pə̂ nyi fâ chi tsɛ̂ Njɔyn Fo M̀mò, pîza naʼapi vɛ è tətə kwûŋsə̀ elùʼ efɔ̀yn ə Fezhə̀vè nə̂ tsɛ̂ vəyn.

¹²Se zhə̀tè etuʼ vɛ ə Njɔyn Foə M̀mò tè zhə̀te se ndàʼa tomə̀ Fèzhə̀ se kɔʼɔ zaʼâ fa fetuʼ, fɔ̂yn ə Fezhə̀vè ə zɨ tsôsè sə ŋaŋ ə gho ə ghɨə noghe, ghɨə eno ətəynghe è nô se kyiə fi efɔ̂yn ə Fezhə̀ nə vɨ̂yn.

¹³Fɨ̀aʼtèsè è Saʼ ə Mosîsè tè wàmnə̀ kûmə̀ kə èpə̂yn efɔ̂yn ə Fezhə̀e se zaʼâ ə Njɔyn ashìŋə̀.

¹⁴Ə ghàyn kɔ̀ŋɔ̀ se pomə ewâmnè ə ghənə̂zè, ghàyn ke nə Njɔyn nə vɨ̂yn tè nyi Èlanjà vɛ ə tè pi nə è pə̀ ndò.

¹⁵Ə̂ kyi pîndè tûŋneve, è və tɔ̀ʼɔ̀ zɨtə̂.

¹⁶Zôyn M kaʼa m səyne ghâŋ fə mbi fɨnə nâʼà è ghè? Ghənə nyi kə mmɨ̂ətə̀ m̀ tsɨs ezhɔyn, yîghe e tɔŋɔ piə se yiə

¹⁷nə, ‘Ghàs ə tɔŋ sɔŋe sê ghàyn, pîza ghàyn ghɛ tàʼa pɨyn. Ghàs ə zhəmə senjàŋ se kwuse sê ghàyn, pîza ghàyn ə tàʼa chì.’

¹⁸Kə Njɔyn Fo M̀mò tè pəyn, zhiə va fɨake, mɨə va lɨ̀m, ə piə kə ə̀kɨ̂m nə, ‘E kyi epamə̂ ə satàynzè ə və fètəyn.’

¹⁹Va wùə ə pə̀, zhiə èfɨazhiəu, mɨə m̀lɨ, ə piə nə è vɛ è zhiə tsɛ̂sə̀, mɨə tsɛ̂sə̀, fɨyn nyi è soyn yî ghɨ ghɛ ə ghe tənə tâksè è ghɨ piə mɔ̀ʼɔ̂! Pîza, Zhə̀fè tyə̀nə̀ nə tɔf eghaʼâ ə vəynze nyi ke nâʼà səmɔʼ tɔynə̂ əghɛ ghɛ ə Fe nə̂ ə ghənə tendam.”

²⁰Ghɨ ə setɔ̂ŋ sɛ ə Njisə̀s tè nə̂ ghɛ kayntə tsɨəghe ətəyn tè pâʼà kə̀mnè ə ghənə sepi. Njisə̀s e sè zɔ̂ sê ghənə,

²¹pîə nə, “Ngəʼ èghaʼâ tə nə̂ ə è zə nyi sê ghàyn ə ghɨə Kòlàzɨ̀nə̀ è kèpî ghàyn ə ghɨə Pètsayndà! Ə̂ tè nyi nə ghɛ ə kayntə ghɨ̂yn ə Zhə̀fè tè nə̀yn ə ghàyn endaʼ tè nyi nə ə nəyn endaʼ ə Tayà è Sindɔ̀nzè, mə ghənə tə màʼ ndzɨse kwuse ə fùʼə̀ àpfɨchike ə ghənə mwìyn se chwìtè nə ghənə kə̀mnè ə ghənə sepi.

²²M piə sê ghàyn səmɔʼ nə, ə tə nə̂ ə nyi etuʼ ə saʼe, Zhə̀fè tə chwîtə̀ èkosê esəyn tsɨəze sê ghɨə Tayà è ghɨə Sindɔ̀nə̀ tsɛ̂ kə Fe tə chwîtə̀ sê ghàyn.

²³Sê ghàyn kèpî ghɨə Kàpanùmə̀, ghàyn kwàʼtə̀ nə ghàyn ə kàynè zaʼâ ekwùtwəyn. Pîza ə tə maʼà tsosə̂ ghàyn əfètə̂ ewùs. Ə̂ tè nyi nə ə nəyn ghɛ ə kayntə ghɛ ə nə̀yn ə̂ ghàyn əfètəyn endaʼa Sondòm, mə ndaʼə təynze pa nyi kendò se tàyn ndàyn.

²⁴M piə sê ghàyn nə, ə tə nə̂ ə nyi etuʼ esaʼ ə Fezhə̀vè, ə Zhə̀fè chwite kosê esəyn tsɨze sê ghɨə Sondòmə̀ tsɛ̂ kə fe kaʼa Fe chwite sê ghàyn.”

²⁵Fumə ashìŋə̀ Njisə̀s ə pìə nə, “Pɨ̀a vɨ̂m, Pɛ̀ àwulə è chike, m fo àzɔ̀ŋnè sê ghò kûmə̀ kə ò ndə̀tə̀ ghɛ ghɨ̀yn sê ghɨ ghɛ ə ghənə kwâʼtə̀ nə ghe tɔfə ndò ə tyə̀nə̀ ə̀ghɛ ətəynghe sê mɨ̀ətə̀ mê tətə̂m.

²⁶Èn ə pɛ̂, ə̀ nyi nyiə mə kə Ò tè kyiŋə nə ze kyayn.

²⁷Pɨ̀a vɨ̂m və fo fɨave ekɨ̂m sê mi. Wùə vîvè fɛte keva Vayn ə tsɛ̂ kəva Zhə̀fè Pɨ̀a, wùə e fɛte ke va Pɨ̀a ə̀ tsɛ̂ kəva Vayn è ghɨ ghɛ Vayn chɔʼ se tyə̀nə paynsê ə Pɨ̀a sê ghənə.

²⁸Ghàyn pəyn sê mi, ə ghàyn əkɨ̂m ghɛ ə ghàyn nyi mə pɔ se pɨàʼà ekyə̀yn etɨlə ve ə M fo zɨ̀tèkè sê ghàyn.

²⁹Ghàyn pomə se chùmtè ə setàm sɨmse, ə ghàyn zaʼle sê Mi kûmə̀ nə m nyiə ngɨmnə̂, kyi ə̀təm epɔynə. Ghàyn pəyn ə ghàyn kyi zɨ̀tèkè.

³⁰Kûmə̀ nə zaʼlê zɨme tɛ va, kyə̀yn kɨmke e tɨ̂lə̀ va.”