Read Mmen Matyò 12 Bible Online

Matyò 12 - Mmen bible

Matyò 12

¹Kə shîŋə̀ nə kɛ tsɛ̀, Njisə̀s è chùmtè èpàm sə vəynse e tɔynə̂ tsɛ afùʼ ə se sɔ̀fà. Ə̀ tè nyi etuʼ endaʼ. Chɨ̀ŋ tè nyiə zafə sèchùmtè èpàm sə vəynse. Ghənə ə ke zhə̀tè sə̂ lɔytə̂ sèsɔ̀f kɛsə̂ kwɨlə.

²Kə ghɨə Falàsîə tè fe zɨnə mə, ə pìə sê Njisə̀s nə, “Fe ghɛ zɛ ə chùmtè èpàm sɛse nə̂ etuʼ endaʼ, Saʼze pomə̂ va ə!”

³Njisə̀s ə pfɨfə sê ghənə nə, “Ghàyn pâʼà tɔŋɔ zɨ ə ŋwàʼlè ə Fèzhə̀ ghɛ zɛ ə Fɔ̀yn Ndàfît tè nəyn kə chɨ̀ŋ tè zafə vəyn yî ghɨə vəynghe ə?

⁴Ə nyaʼ nə è və nji ə ndɛ̂ Fèzhə̀, ə vəyn è ghɨə vəynghe ə zhiə àpayn ə kwaŋke mə ə̀ nyi efo sê Zhə̀fè, pî kə saʼze tè tyə̀nə nə ghənə kyi va se zhiə kəynke mə Zhə̀fè paʼà fo tyaʼa nə ghənə zhi ə̀ tsɛ̂ kə va ghɨə kɔʼsə nə eshyə̀.

⁵Mə ghàyn pâʼà tɔŋɔ zɨ kèpi esaʼ ə Mosîszè nə nâʼàpî etuʼ endaʼ èkè ghɨ kɔʼsə nə eshyə̀ ə Ndɛ Ètsə̀mə tè kəmə alâŋ etuʼ endaʼke, kûmə̀ àfɨ̂aʼ kɛ ə ghənə nə̂ pîza ə̀ zɛ mə va pi ə Zhə̀fè shi ə̀?

⁶M pîə sê ghàyn zôyn nə ghɛze nyiə nyi fâyn, tsɨ̂ə tsɛ̂ Ndɛ Ètsə̀mə.

⁷Ə nyi mə nyàʼ kə Zhə̀fè nyi mə Fə pì nə, ‘Ghɛ zɛ M kyiŋə sê ghɨghe ə̀ nyi ekosê esəyn ə̀ vachi è se ə se nyàmzè’ Ə ghàyn lotə zɨə ke ghɛ ghɨ̀nə̀, ə ghàyn ə vayn kàʼa tɔŋtə̂ ə̀ghɨ nə ghɨ epiə mə ghənə va əghɨ piə.

⁸Ghàyn e ke nə, Va Wùə nyîə kyi àtyaʼ etuə ètuʼ endaʼve.”

⁹Njisə̀s ə ndò fumə elùʼ ə ndùə ə ndɛ ə̀ atsɨ̀ynte.

¹⁰Wùə vîvè e nyi fu mə kɔyn ə vəynke ə kwu. Ghɨ yîghe nyi fumə kyiŋə se ghâmə̀ Njisə̀s nə È və nə̀yn pi, ghənə ə ke pfɨf sê vəyn nə, “Saʼ e pomə̂ ndò nə ə tsuʼ wùə etuʼ endaʼà?”

¹¹Njisə̀s ə pə̀ynsə̀ nə, “Ə̂ wùə sê ghàyn kyi ndzè ə vəyn, è zə pfɨ̀ə epə etuʼ endaʼ, ə è tàʼa fɨsə zə̂yn fumə ə?

¹²Wùə za kɔʼnə̂ tsɛ̂ va ndzè ə? E za tyə̀nə̀ nə Saʼ e pomə̂ ndò nə ə nə̂ chùŋ etuʼ endaʼ.”

¹³Njisə̀s ə ke pì sê wùə nə vɛ ə kɔynke tè nyi mə kə kwu nə, “Nɛ̀se kɔyn kɛke.” Wùə ətəyn ə nɛ̀sə̀, kè sə ashìŋə̀, kɔyn ətəynke ə tɛ nyi kepî àchûŋ kə kə mɔ̀ʼɔke.

¹⁴Ghɨ Falàsî ghɛ ə ndò ə zhə̀tə̀ se pɨaʼtê endom vɛ ghənə kaʼa zhwi Njisə̀s ətəyn.

¹⁵Kə Njisə̀s tè zɨ nə ə pɨaʼtə̂ se zhwiə vəyn, È və ndò fumə elùʼ. Kə È tè ndò fumə elùʼ nɔ̂yn ə ghɨ̀kè e chûmtə̀ vəyn. È və tsuʼə ə̀ghɨ zafə ghəkɨ̂m

¹⁶ə fo fɨ̀as sê ghənə nə kə wùə nə tsayn èghɛ sê wùə kûmə̀ èkyì ə wûə vɛ Zhi nyi və̂ynvè.

¹⁷È tè nəyn nyi se lwiynsê eghɛ zɛ ə Zhə̀fè tè pi tɔynə̂ Fɨ̀aʼtè Èsayà nə:

¹⁸“Nayne kə, ə̀ vɨ̀nə nyi wùə èfɨ̀aʼa vɨ̂m vɛ ə m chɔʼ, M kɔŋə̀ ndò vəyn kɛsə̂ saŋnə̂ ghasè vəyn. M tə tomə Sèzuʼ sɨmse ə sə nyi yîghə̀ vəyn, ə è tsɛse saʼə səmɔʼe sê ghɨatumə.

¹⁹È kwɨlə va choe yîghə̀ ghɨ, tsɨ̂ynə̀ wâmnə̀ va ndô wùə tə zɨə va kyə̀ vəyn afàf.

²⁰È tə kəmə va Sɛfe mə fə ngɨmə̂, è tə ndɨmə va lâm ashîŋə̀ kɛ è kyiŋə se ndɨmə̂ È tə nə̀ zɨnə mə se zaʼâ kə ghɛ echûŋə̀ ghə nyi ghɛ ə ghe chisə.

²¹Ghɨə atum ghəkɨ̂m tə ndəmə̀ kə èkwaʼtè elɨmtə ə ghənə̂zè sê Vəyn.”

²²Ghɨ əmɔ̀ʼɔghe ə ke pə̀yn è wùə sê Njisə̀s mə è və fòf vayn kàʼa è wamne kûmə̀ nə è tè nyiə kyi èpamə̂ ə satàynzè. Njisə̀s ə tsuʼə wùə ətəyn è və zhə̀tə̀ fe, fɨnə wâmnə̀.

²³Nɔ̂ynvè tè nyi è kaynze eghɛ zɛ ə Njisə̀s nə̀yn. Ghənə è ngɨŋ sə ghənə̂sè ə zhə̀tə̀ se pì nə, “Ə vɨ̀nə kàʼa nyi Vâ ə fèghàŋfə Fɔ̀yn Ndàfîtfè mə?”

²⁴Kə ghɨə Falàsîə tè zɨ ghɛ ətəyn, ə pìə nə, “È chûmə̀ fɨsə̂ tèpamə̂ tə satàyn nə tɨ̂nə̀ nyi ke kûmə̀ nə Peelzepùl, fɔ̀yn se pamə̂ tə satàyntè ə fo vəyn è tyaʼke nə è nəyn nyiə mə.”

²⁵Njisə̀s tè nyîə ke èghɛ zɛ ə ghənə tè kwàʼtə, ə pìə se ghənə nə, “Pî èndaʼ èkè zɛ ə ze chyâsə̀ ngɨŋə̂ ghənə m nɔ̀ynə̀ m nɔ̀ynə̀ nâʼà pî zɨ̂yn zə e nô zə mɔ̀ʼe tə ndamə va sə aghaf etyâkè. Ə̀ nyi pî tɔ̂ŋ èkè kɨ̀sə esas ə ndɛ zɛ ze chyâsè ngɨŋə̂ ghənə̂ m nɔ̀ynə̀ m nɔ̀ynə̀ nâʼà pî zɨ̂yn ze nô zə mɔ̀ʼe tə tyəmə̂ va.

²⁶Ə Satàyn nò kəpî Satàyn, ə nyi mə è nò ngɨŋ ə̂ vəyn. Ə luʼ efɔ̀yn ə vəyn və nyi kàʼa ve tyəm zayn?

²⁷Ghàyn pi nə M chûmə̀ fɨsə̂ tèpamə̂ tə satàyntè kûmə̀ nə ə̀ fo Peelzepùl ètyaʼa nə M nəyn nyiə mə. Ə M fɨaʼà ə Peelzepùl atyaʼ se chùmə fɨsə tepamə̂ tə satàyntè ə ghɨghe mwìyn, ə̂ sè nyi mə ghɨ ghayn ghɛ ə ghe chûmə̀ fɨsə pamə̂ tə satàyntè ə ghɨghe mwìyn fɨ̀aʼà ə ndè atyaʼa? Ə̀ nyi ghənə kə ghənə nə̀ nə̂ nə ghàyn pfɨ saʼ.

²⁸Ə̀ fo chîə va Peelzepùl ètyaʼa sê Mi, pîza M fɨaʼà atyaʼa Sezuʼ ə Fezhə̀sè sə̂ chûmə̀ fɨsə̂ tèpamə̂ tə satàyntè ə ghɨghe ewìyn. Zɨnə kyànə̀ se tyə̀nə̀ sê ghàyn nə fɔ̂yn ə Fezhə̀vè ə pə̀yn ə ghàyn əfètəyn.

²⁹Nâʼà wùə vîvè vayn kàʼa è kəm nji ə wùə àtyaʼ ə ndɛ ə è nji fɨa vəynve ə̀ tsɛ̂ kə va mə è və kyi kol chi wùə àtyəʼə̂ təyn sə shi, tsɔ̀fə kə è se njì efɨa vəynve ekɨ̂m.

³⁰Nâʼà pîndè vɛ ə è va sê Mi ə zə tyə̂nə̀ nə è lotə̂ nô mi. Nâʼà pîndè vɛ ə è tsàmtə̀ va Mi se zùŋtè pɨlə tsâmtə̀ kə se chyâsè.

³¹Kûmə̀ zɨnə mə, M tsâ se ghàyn nə, Zhə̀fè tə lɛsə̀ fo ə̀ghɨ nâʼàpî ə pi èkè zɛ ə ghənə nyi mə nə̀yn è nâʼàpî èsôylè èkè zɛ ə ghənə nyi mə ə sòylè Zhə̀fè. Pîza ə pì nâʼàpî ndè ghɛ epi kûmə̀ sèzuʼ se Ŋwaʼase, ə tə tàʼa lɛ̀sə fo vəyn.

³²Ə̂ pîə pîndè ghɛ epize kûmə̀ Va Wùə, Zhə̀fè kàʼa fe lɛ̀sè fo vəyn, pîza mə ə pìə pîndè ghɛ epize kûmə̀ Sezuʼ se ŋwaʼase, ə fe tə tàʼa lɛ̀sə fo vəyn zôyn, pî ashìŋə̀ kɛ ə ke nyi se pə̀yn ə shi.”

³³“Sə kyi àtam echûŋkè, ò kyi sə̂ kyi fèkaʼ fechûŋfè; ə ò kyi kâʼfe pife, ə kaʼ fɛ ə fe mu tam ətəynke ə nyi fèkaʼ fe pife. Ə kê fèkaʼ tɔynə̂ atam kɛ ə fe muə.

³⁴Mbam sepi sɨ̂nə̀, ghàyn kaʼa ə pi zayn ghɛ echûŋə̀ mə ghàyn nyi ə ghɨ epighə? Choze wâmnə̀ kə èghɛ zɛ ə ze nyi mə zə lwiyn ətəm.

³⁵Wùə èchùŋ nə̀ chùŋ kûmə̀ nə chûŋə̀ təyn pə̂ ə və təm elùʼ vɛ ə nyi mə ndə̀m chùŋ. Wùə èpi e nə̂ ə̀ghɛ piə kûmə̀ nə ghe pə̂ ə və təm elùʼ vɛ ə nyi mə ndə̀m pi.

³⁶M tsâ sê ghàyn səmɔʼ nə ə̀ tə nə̂ ə nyi ə fetuʼ fə saʼfe ə nâʼà pîndè tsayn ghɛ epi zɛ ə è nyi mə è və tyəmə pîə.

³⁷Nâʼà pî èghɛ èkè zɛ ə ghàyn tə pîə, ə̀ nyi eghɛ təyn ə ze tə nə̂ nə ghàyn zhiə ndò saʼ mə ghàyn pfɨ̀ə ndo.”

³⁸Tyə̀ynsè sə alàŋ shîse è ghɨə Falàsî əmɔ̀ʼɔ ə piə sê Njisə̀s nə, “Tyə̀ynsè, nə̀yn ghɛ ekayntə zhîze se tyə̀yn sê ghàs sə chwìə nə tyaʼ kɛke ndo ke nâʼà sê Zhə̀fè.”

³⁹Pîza Njisə̀s ə pə̀ynsə̀ nə, “Ə̀ nyi ke ngwàʼ e pi nyi kə zɨ̀nə̀ ə è fànə va Zhə̀fè ə è kàʼa e zə pfɨfə chwìə. Pîza è nə̀ fe va chwìə zhîzè, ə̀ tsɛ̂ kə va chwìə èghɛ ekayntə fɨ̀aʼtè Njonà.

⁴⁰Njonà tè nyi ə mbwɔ̀ èghaʼâ ke ndwɔ̀ sə mtuʼ mta. Kè eghɨ ə̀ nyi nyiə mə kə Va Wùə tè nyi etyiə m̀chi sə mtuʼ mta.

⁴¹Ə̀ tə nə̂ ə nyi etuʼ ə saʼe, ə ghɨ Ninevìə ndwite ə te shyə̀ paʼsə̂ kə è ghâŋ fə mbi fɨ̂nə̀. Ghənə tə tyəmə̂ sètsɛ̀ sə saʼ sɛ ə setə nə̂ nə ghâŋ fə ghɨ̀ fɨ̂nə̀ pfɨ saʼ kûmə̀ nə kə Njonà tè ndàʼa tom ə̀ Fèzhə̀ sê ghɨ Nenevìə, ghənə ə pə̀ynsə̀ ə̀təm ə ghənə̂ ghe piə. Pîza, wùə nə̂ nyi fayn zôyn mə è nyiə tsɨ̂ə tsɛ Njonà pîza ghàyn zɨtə̂ va sê vəyn.

⁴²Ə̀ tə nə̂ ə nyi etuʼ ə saʼ, wùzhɔyn vɛ ə è tè saʼa ndaʼa Shapàzè, tə ndwîə eshyə̀ paʼsə̂ kə èghâŋ fə mbi fɨ̂nə̀ ə tyəm tsɛ̀ èsaʼ zɛ ə è nə̀ nə̂ nə ghənə pfɨ saʼ. Ghənə tə pfɨ̂ə saʼ kûmə̀ nə shîŋə̀ kɛ ə Sòlomùyn tè zaʼlə, wùzhɔyn ə̀təyn ə pə̀ sə tyà elùʼ vɛ ə mbi mîə se pə zɨtə əghɛ tɔfə ghɛ ə Sòlomùyn tè zaʼlə. Pîza ndàyn wùə nyîə nyi fàyn mə è nyiə tsɨ̂ə tsɛ̂ Sòlomùyn.”

⁴³Njisə̀s ə kwəynsə̂ nə, “Shîŋə̀ kɛ zuʼse pise ndô fɨ ə wùə ewìyn, se kwîə ka endaʼa ashishize kyiŋə eluʼ se zɨ̀tè ətəyn. Mə ə se tàʼa fe eluʼ emɔ̀ʼ,

⁴⁴sə pìə sê ngɨŋ ə̂ vəyn nə, ‘M nə̀ kɛsə̂ ndùə ə ndɛ zɛ ə m tè fɨ ətəyn.’ Shɨ̂ŋə̀ kɛ ə se kɛsə pə̂yn ə fe ndɛ ə̀təyn è nyi èzom, zo, mə fɛtê zəs.

⁴⁵Sə kɛsə̂ ndùə njiə pə̀ sèzuʼ se pi sə mɔ̀ʼɔ̂se, esɛ̀mbɛ̂, se pofə tsɛ̂ pîə səynse, ə se nji ə wùə təyn ewìyn ə sə ndamə fu. Famə ashìŋə̀ ə̀ wùə ə̀təyn ə pofə tsɛ̂ kə è tè nyì sə shi. E za nyi nə ə̀ zɨnə nyi eghɛ zɛ ə ze tə kyânə̀ sê ngwàʼ èpi zɨnə zôyn.”

⁴⁶Kə Njisə̀s tè pa wâmnə̀ sê nɔ̂ynvè, nyìə vəyn è ghɔnyiə vəynghe ndômə̀ ə pə̀ tyəmə̂ ə pɨəyn sè kyiŋə nə yîghə̀ Njisə̀s wamne.

⁴⁷Wùə èmɔ̀ʼ fumə əfètə̂ ànɔ̀yn ə pìə sê vəyn nə, “Nyì vɛ̂vè è ghɔnɛ̂ghè tyəm əpɨəyn kyiŋə se wàmnè è ghò.”

⁴⁸Njisə̀s ə pfɨfə sê vəyn nə, “Nyì vɨm nyi nde, ghɔnyì ghɨmghe nyi ghə̀ ndè?”

⁴⁹È və sɔ̀ʼɔ̀ ndûə sè chùmtè èpàm sə vəynse ə pìə nə, “Nayne kə! Nyì vɨ̂mvè è ghɔnyì ghɨmə nyi əghɨ ghɨ̀yn.

⁵⁰Nâʼà pîndè vɛ ə è nə̀yn ghɛ zɛ ə pɨa vɨ̂mvè ekwùtwəyn kyiŋə, ə̀ nyi ànyì vɨ̂m ve ndômə̀ è ve zhɔyn è nyì vɨ̂mvè.”