Read Mmen Matyò 13 Bible Online

Matyò 13 - Mmen bible

Matyò 13

¹Kèpî fumə fetuʼ Njisə̀s ə ndò ə ndɛ ə ndùə tsɨsə̂ etipì ènjwì ə Ngalìlîvè zaʼlə̂ ə̀ghɨ fu.

²Ghɨ ghɛ ghe tè pə̀yn fu tè tsɨ̀ə tsɛ̂sə̀ ndò. Zɨnə mə ə nə̀ Vəyn è və njiə ə ngwùʼ èghaʼâ ə tsɨsə̂ ətəyn, nɔ̂ynkè ə tyəmtə̂ etipì zɨtə̂ sê Vəyn.

³È və tsà ghənə è ghɛ etsɨə ghe ə sengàyn. Ə tsà ngàyn sê ghənə nə. “Wùə àfùʼ vîvè tè səʼ se màʼa ə ngwàʼ ə̀ vəyn,

⁴kə è màʼ ngwàʼ ə̀təyn afùʼ, zhîzè ə tàyntə̀ aghòl endomke, nɨ̂ŋmè ə pə̀ tsoftə̂ kwɨlə nâʼà èkɨ̂m.

⁵Shi yîghe ə tàyntə̀ elùʼ enyɔyn, mə nyì ke fèfɨ̂atə̀ fə mchife. Ə zàŋsə̀ fôlə̀ kûmə̀ nə chîm tè nyùʼte nyi ke ndò.

⁶Pîza kə chwì tè payn, ə nyɔ̀ʼɔ̀ èfɨa ətəynve və kwuə, kûmə̀ nə ghaŋtə ghənə̂tè tè pâʼà tɔ̀ʼ nji əchi.

⁷Shi yîghe ə tàyntə̀ əfètə̂m m̀sòlèndzɔŋ, m̀sòlèndzɔŋ mətə̂m ə ndəmə̂ kɔʼɔ ə kolə èfɨa nə vɛ ə ve tè ndəmə.

⁸Shi yîghe ə tàyntə̀ mchi mêchùŋə̀m, ngwàʼ ə̀təyn ə kɔʼɔ ə pɔŋə nâʼà àchûŋ. Puʼ tîte kyi ə̀shi ewə̀ atu, yîghe m̀ghɨm tufə, ghəmɔ̀ʼɔ m̀ghɨm ta.”

⁹Njisə̀s ə kwùŋsə̀ nə, “Nâʼà pîndè vɛ ə è kyi tôŋneve, è və tɔ̀ʼɔ̀ zɨtə̂.”

¹⁰Kə shîŋə̀ nə kɛ tsɛ̀ Chùmtè èpàm sə Njisə̀sè ə pə̀ ə vəyn etipì ə pfɨfə sê vəyn nə, Ò zaʼlə̂ ə̀ghɨ ə sengàyn kûmə̀ ghe?

¹¹Njisə̀s ə pìə sê ghənə nə, “Zhə̀fè fo ghàyn ètyaʼa nə ghànə ke ə̀ghɛ e ndətə efɔ̀yn ekwùtwəynə, pîza ə tàʼa fo atyaʼ nə kɨ̂yn se ghɨ mɔ̀ʼɔ.

¹²Nâʼà pîndè vɛ ə è zɨə ke ghɛ e ndətə efɔ̀yn ekwùtwəynə, Zhə̀fè nə̀ pâʼsə̂ è zɨə ke ətəynze kə è və kyi èzɨə keze se tsɨ̀. Pîza nâʼà pîndè vɛ ə è kyi va zɨə ke nə zɨ̂yn, Zhə̀fè nə̀ fiə tsɨsə̀ pî fè fɨatə̀ fɛ ə è kyi.

¹³M wàmnə̀ sê ghənə ə sengàyn kûmə̀ nə ghənə fe ndò pîza zɨə kê va.

¹⁴Zɨnə̀ ə lwiynsê ghɛ zɛ ə Zhə̀fè tè tom tɔynə̂ ə fɨ̀aʼtè Èsayà nə, ‹Ghàyn tə nə̂ ə zɨtə̂ kə nâʼà ə̀ghɛ, pîza zɨə kê va, ghàyn tə nə̂ ə fe, fe kwəynsə̂ pîza fe kê va fɨake.

¹⁵M pîə zɨnə kûmə̀ nə ghɨ ghɨ̀nə vayn kàʼa fɨyn zaʼlê nâʼà èghɛ mə ghənə kɨmtê tôŋne ə ghənəvè è shiə ghənə̂ghè. Mə ghənə vayn zɨ vayn kàʼa fe nâʼà àfɨa kyîke. Ə ze fə va zamə, mə ghənə nyi fe, ə fe kê. Ghənə tə zɨtə̂ è tôŋne ə ghənə̂vè, ə təmə ghənə̂ zɨ kê. Mə ə ghənə nə̂yn zɨnə mə, ə kə̀mnə̀ pə̂ sê Mi, ə m tsuʼ ghənə.›”

¹⁶Njisə̀s ə tsà kwəynsə̂ sê chùmtè èpàm sə vəynse nə, “Pîza pɔsêzè nyì sê ghàyn kûmə̀ nə ghàyn fe ndò ghɛ ghɛ ə ghàyn nyì se fe, zɨə ghɛ ə ghàyn nyì se zɨ.

¹⁷M piə sê ghàyn səmɔʼ nə fɨ̀aʼtè se ghaʼa se tsɨəse è ghɨə Fezhə̀ etsɨə tè nyîə kɔ̂ŋɔ̀ nâʼà sə ŋaŋ se fe əghɛ ghɛ ə ghàyn fe, pîza ə tàʼa fe è kɨsè se zɨ əghɛ ghɛ ə ghàyn zɨə, pîza ə tàʼa zɨ.”

¹⁸“Ghàyn zɨte zôyn ə zaʼle ghɛ zɛ ə ngàyn ə̀ zho nə̂ ngwàʼ chwìtə̀.

¹⁹Ghɨ ghɛ ə zɨə tom kûmə̀ èfɔ̂yn ə Fezhə̀e zɨə kê va nyi kə ngwàʼ zɛ ə è tàyntè aghòl endomke. Ndə̂plè ə pə̀ njiə ndô èghɛ zɛ ə fə zho ə ghənə təm.

²⁰Ngwàʼ zɛ è tàyntè ə fètə̂ m̀chi mê ènyɔnə̀m nyi kə ghɨ ghɛ ə fiə tom ə̀ Fèzhə̀ è təmə saŋnəghe kè sə ashìŋə̀ kɛ ghənə zɨ zə̂ynzè.

²¹Pîza tom nə zɛ ə pâʼà lotə njiə tyə̂m ə ghənə ətəm. Ghənə ə pomə̂ zə̂ynzè kè sə fendiŋə̀ fe tətə̂fè pîza Shɨ̂ŋə̀ kɛ ə tsôsvè kɨ̀sə etsə̂fsè pə̀yn kûmə̀ tom ə̀təyn, ghənə ə kɛsə̂ ndûə epàm.

²²Ngwàʼ zɛ ə è tè tàynte əfètə̂m m̀sòlèndzɔŋ nyi kə wùə vɛ è zɨə ghɛ ə Fezhə̀zè, ghɛ mbiə è kɔŋè kûmə̀ èghaʼ ə mbize ə lwiynsə̂ ə̀təm ə vəynghe. Zɨnə mə ə nə̀ vəyn è vayn kaʼa è kwiyne ə və sepi.

²³Pîza ngwàʼ zɛ ə è tè tàynte mchi mêchùŋə̀m nyi kə ghɨ ghɛ zɨə ghɛ ə Fezhə̀zè, ə zɨə kê zəynze. Kyì ə ghɨ̀ ghɨ̂yn nə̂ əghɛ əchûŋə̀ kè kə epuʼ ə sɔ̀f zɛ ə ze kɔʼ, zə mɔ̀ʼɔ ze kyi ə̀shi ewə̀ atu, zə mɔ̀ʼɔze kyi ə̀shi m̀ghɨm tufə, zə mɔ̀ʼɔze kyi m̀ghɨm ta.”

²⁴Njisə̀s ə mɛ̀ ngàyn ə̀mɔ̀ʼɔ̂ nə, “Fɔ̂yn ə Fezhə̀e nyì kepî kə wùə vɛ ə è zho ngwàʼ èchùŋ ə və afùʼ,

²⁵pîza, fumə epàmə àshîŋə̀ tuʼfe mɔ̀ʼ è tuʼve mə nâʼà pîndè pɨəynə̂ ndò, pàyn ə̀ vəyn ə pə̀ ə zho àwə̂yn epike əfètə̂ ngwàʼ nə zɛ,

²⁶Ngwàʼ ə̀təyn ə folə̀ tuə ngwàʼ və zhə̀tə̀ se fɨ, ghɨghe ə ke fe nə yîyn ə pike pɔŋɔ ndəmə̂ kɔʼɔ əfètə̂ təyn.

²⁷Ghɨ fɨaʼa pɛ̀ àfùʼ ghɛ ə pə̀ se vəyn ə pìə nə, ‘Pɛ̂, ə̀ tè nyi ngwàʼ èchùŋ kə Ò tè zho ə gho afùʼ; yîyn epike ətəyn ndò ghayn zə?’

²⁸È və pə̀ynsə̀ nə, ‘Ə̀ tè nyi pàyn vîvè èmɔ̀ʼ kə è tè zho wə̂yn ətəynke’ Ghɨ e fɨaʼa ətəynghe ə pfɨfə sê vəyn nə, ‘Ò kɔ̀ŋə̀ ndò nə ghàs ndu chɔʼtê tsɨsè èwə̂yn ətəyn və̂?’

²⁹È və pìə nə, ‹ngâŋngaŋ, ghàyn kàʼa ghàyn ndu se chɔʼtê, ə ghàyn ə chɔʼtə̂ paʼsə̂ è sɔ̀fsè.

³⁰Ghàyn za ə sɔ̀f sə təynse ə ndəmə̂ paʼsə̂ ndûə kə yî ghə̀ yîynkè se zaʼâ ə fetuʼ fe kwiəfe. Fumə ashìŋə̀ ə m tsayn sê ghɨ kwiə nə ghənə sote tsɨsè chi èwə̂yn sə shi ə kol mkaʼâ ə nyɔʼ. Epàm ətəyn ə se kwiə sesɔ̀f se ndə̀m ə mì etwəyn.›”

³¹Njisə̀s ə mɛ̀ kwəynsə̂ ngàyn ə̀mɔ̀ʼɔ̂ sê nɔ̂yn kɛ nə, “Fɔ̂yn ə Fezhə̀e nyi kepî kə feshîlə̀ fə ngwàʼ ə̀ fèkàʼ fîfe ə tɔŋtə nə mostà kə wùə njìə è və zho ə və afùʼ.

³²Shiə mostà nə zɨ̂yn tətə̂ tsɛ ndò shiə ngwàʼ ghəkɨ̂m, pîza mə shîŋə̀ kɛ ə ze ndəmə kɔʼ kâʼfə təynfe e ghaʼa tsɛ̂ m̀kâʼ mê tətə̂ mè m̀kɨ̂m. Nɨ̂ŋmè e pə̂ pɛ sèndɛ ə fəynfə sengɔyn.”

³³Njisə̀s ə fɨnə mɛ̀ ngàyn zhîzè sê ghənə ə pìə nə, “Fɔ̂yn ə Fezhə̀e nyi kepî kə fèsə̀ʼ ə wùzhɔyn njî, è və fɨ̀aʼsə̀ m̀pfɨ̂ŋ mə kwaŋə̀m kàŋə̀mè m̀ta è və fiyəsə ətəyn m̀ mə kɔʼɔ tsɨ̂ə kə nyî.”

³⁴Njisə̀s tè zaʼlê əghɛ nə ghɨyn sê ghɨ nâʼà əkɨ̂m kə sengàyn, È tè piə va ghɛ sê ghənə emɔ̀ʼ ndɔ̀ʼɔ è mɛ̀ sə ngàyn.

³⁵È tè nə̂ nyi se lwiynsê əghɛ ghɛ ə Zhə̀fè tè pi tɔynə̂ ə fɨ̀aʼtè nə, “M tə nə̂ mə wàmnə̀ sê ghənə ə sengàyn. M tə zaʼlə̂ ə̀ghɛ sê ghənə mə wùə pâʼà tyəmə̂ ke nâʼà se etuʼ vɛ ə tè pom mbi.”

³⁶Kə Njisə̀s tè ndo za ànɔ̂yn ətəynke ə njiə ə ndɛ, chùmtè èpàm sə vəynse ə pə̀ sê vəyn ə pìə nə, “È tsayn sê ghənə ghɛ zɛ ə ngàyn èwə̂yn epive tè tyə̀ynə.”

³⁷Njisə̀s ə pə̀ynsə̀ sê ghənə nə, “Wùə vɛ ə è tè zho ngwàʼ èchùŋ tè nyi Va wùə.

³⁸Fûʼ ətəynke e nyi mbi, ngwàʼ èchùŋ zɛ e nyi əghɨ ghɛ ə ghe nyi etyə̀ èfɔ̀yn ə Fezhə̀vè, yîyn epike e nyi ə̀ghɨ ghɛ ə ghe nyi ə̂ ndə̂plè etyə̀.

³⁹Pàyn ə wùə vɛ ə è tè zho wə̂yn epi kɛ e nyi ndə̂plè, shîŋə̀ kwiəke e nyi kwùŋse ə mbi, ghɨe kwiəghe e nyi sètsì.

⁴⁰Kè kə zûŋtə̀ wə̂yn epive ə nyɔ̀ʼɔ̀ ewùs, ə̀ nyì kepî èghɛ zɛ ə ze tə kyânə̀ sê ghɨə ndə̂plə̀ shîŋə̀ kɛ ə mbi tə pə̂ ə kwùŋse.

⁴¹Va wùə tə tomə sètsì sə vəynse nə se nji fɨsê ə̀ghɨ ghɛ ə ghe nə̂ nə ghɨghə nə̂ pi è ghɨ mɔ̀ʼɔ ghɛ ghe nə̂ pi.

⁴²Ə màʼà ndzɨsə̂ ghənə elùʼ ewùs, elùʼ vɛ ghənə nə chîə, kwulə ə̀sɔŋ ə ghənə̂ghè.

⁴³Fumə ashìŋə̀, ə ghɨə Fezhə̀ ghɛ ə ghe nyi chichi tə nə̂ ə panə kə kə chwì ə pɨ̀a ghənə̂ efɔ̀yn. Ə̂ kyi nâʼà pîndè tôŋneke, è və tɔ̀ʼɔ̀ zɨtə̂.”

⁴⁴“Luʼ efɔ̀yn ekwùtwəynve nyi kə eghaʼ zɛ ə ndətè afùʼ, mə shîŋə̀ kɛ ə wùə èmɔ̀ʼ kyiŋ è və ndə̀tə̀ zəynze tɔynə̂ ə vəyn saŋnê, è və pəʼlə̂ nâʼà efɨa vəynve ekɨ̂m kə è kàʼa è zhɔyn fûʼ ətəynke.

⁴⁵Fɔ̂yn ekwùtwəynve nyi kepî nyi kə wùə è pəʼlə, ə è kyiŋə chîə chûŋ ghɛ ə ghe tɛ èkɛve.

⁴⁶Ə è fe chi echûŋ zhîze kə pəʼlə mə ze tɛ ndò èkɛve, ə è kɛse kwɨlə pəʼlə̂ nâʼàpî ghè vɛ è kyi, ə è ndu zhɔyn zəynze.”

⁴⁷Njisə̀s ə mɛ̀ kwəynsə̂ ngàyn ə̀mɔ̀ʼɔ̂ nə, “Fɔ̂yn ekwùtwəyn fɨyn nyi kepî kə fèlàm ezhoghɛ wùə màʼ ə tsô ə ko tèkyì tə embwɔ̀tè ətəyn kè tekɨ̂m.

⁴⁸Ə fèlàm fə təynfe lwiyn, ghənə shɨ̀nə̀ fɨsə̂ etipì ə tsɨsə̂ se komtə̂ fɨsê embwɔ̀ ətəynve. Vɛ ve tsɔ̂fə̀ kə kwɨl, ə ndə̀mə̀ vəynve ətɔ̀yn nə̀ lɔpà, vɛ ə ve tsɔ̂fə̀ va kə kwɨl, ə màʼà.

⁴⁹Ngàyn zɨ̀nə tyə̀ynə kə kwùŋse ə̀ mbi tə pə̂ ə è zə nyi. Tsìsè tə pə̂ ə se chitê fɨsê ə̀ghɨ piə əfètə̂ ghɨə chichighe,

⁵⁰ə màʼa ndzɨsê ghənə elùʼ ewùs, elùʼ vɛ ə ghənə tə nə̂ chîə kwɨlə ə̀sɔŋ ə ghənə̂ghè.”

⁵¹Njisə̀s ə pfɨfə sê chùmtè èpàm sə vəynse nə, ghənə zɨə kê têndò ghɛ nə ghɨyn ə. Ghənə ə pə̀ynsə̀ se vəyn nə ghənə zɨə kê ndò.

⁵²È və pìə sê ghənə nə, “E tyə̀nə̀ nə nâʼà pî tyə̀ynsè àlâŋ èkè vɛ ə è pə̀yn sə chùmtè èpàm efɔ̀yn ekwùtwəynve nyi kə pɛ̀ ndɛ vɛ è njìə fɨsə fɨa efe è ve mɨve elùʼ vɛ ə è ndə̀mə̀ vəynve.”

⁵³Njisə̀s tè mɛ̀ mɨ̀se sengàyn nə sɨ̂nə̀ ə ndò fumə elùʼ

⁵⁴ə kɛse kwɨlə̂ ə vəyn ə tɔ̂ŋ ə zhə̀tə̀ se zaʼlê əghɨ ə se ndɛ sə atsɨ̀yntese. Ghɨ ghɛ ə tè zɨ kə è zaʼlə̂ tè nyi èkaynze. Sè pfɨfə nə, “È njì ghayn kyì etɔf eghaʼâzè nyiə? È kwì zayn sə̂ nə̂ ə̀ghɛ kayntə ghɨnə?

⁵⁵Ə̀ vɨnə va ke nâʼà vâ wùə vɨ̀nə è kɔmə fɨave nyîə? Ə va Mèli kə è piə və? Ghɔnyiə vəynghe va Njə̂m, è Njosɛ̀f, è Shimùyn è Njondàs ə̀?

⁵⁶Piə ghɔnyìə vəynghe zəynghe əkɨ̂m ndamə kə nâʼà fa tə̀ʼ? È njì ghayn tɔfe è tyaʼa sə̂ nə̂ ə̀ghɛ ekaynə ghɨyn ə?”

⁵⁷Ghənə ə ke zhə̀tè se pàyn ə Njisə̀s. Njisə̀s ə pìə sê ghənə nə, “Ə ndamə ngɨmnə̂ fɨ̀aʼtè ə̀ Fèzhə̀ naʼàpî ghayn ə̀ tsɛ̂ kə va ə vəyn ə tɔ̂ŋ è sas ə ndɛ ə ghənə̂zè.”

⁵⁸Kə ghənə tè tàʼa pomə Njisə̀s, È və tàʼa nə̀yn əghɛ əkayntəghe fumə.