Read Mmen Matyò 14 Bible Online

Matyò 14 - Mmen bible

Matyò 14

¹Fumə ashìŋə̀, Ɛlɔ̀t vɛ è tè saʼa ndaʼa ə Ngalìlîzè ə zɨə ə̀ghɛ ghɛ Njisə̀s tè nə̂.

²Ɛlɔ̀t ə ke pì sê ghɨ efɨaʼa vəynghe nə, “Ə̀ vɨ̀nə nyì ke nâʼà Njɔyn Fo M̀mò kə è kɛse zômə̀. Ə̀ za nyi eghɛ zɛ ə è kyi tyaʼa sə̂ nə̂ ə̀ghɛ kayntə.”

³Ɛlɔ̀t tè pi nyî kûmə̀ nə è tè nyi mə è və tom ghɨə nə ko Njɔyn fo m̀mò, ghənə ə kolə̂ vəyn, ə ndə̀mə̀ vəyn ə ndɛ ə̀ chaʼ. È tè nəyn zɨnə mə kûmə̀ Ɛ̀londyàs, kə ànyìə vəyn Filìp tè malə sə shi.

⁴Ɛlɔ̀t tè ndəm Njɔyn ə ndɛ chaʼ kûmə̀ nə Njɔyn tè tsàyn sê vəyn nə, “Ò kyi va tyaʼa se malə Ɛ̀londyàs mə nyi zhwiə ànɛ̂”

⁵Ɛlɔ̀t tè kyiŋə se zhwiə Njɔyn pîza è tè nyiə fânə̀ ə̀ghɨ Njûsə̀, kûmə̀ nə ghɨə Njûsə̀ tè pomə ndô nə Njɔyn nyi fɨ̀aʼtè.

⁶Pîza Ɛlɔ̀t ə pa zhwiə Njɔyn. Zɨnə tè kyayn ə fetuʼ fɛ Ɛlɔ̀t tè pɨaʼte zhize se kwàʼtə fetuʼ fɛ ə tè piə vəyn ətəyn. Fumə fetuʼ, vayn zhɔyn ə̀ Ɛ̀londyàs ə pə̀ pɨnə əghɨə ətəynghe əshi ə̀kɨ̂m. Zɨnə mə ə nə̀ Ɛlɔ̀t è saŋnə̂ nâʼà sə ŋaŋ.

⁷È və ke tsɨ̀nè sê vayn èzhɔyn ə̀təyn nə, “M kânə̀ nə m nə̀ fo nâʼà pî ghè vɛ ə ò pfɨf nə m fo.”

⁸Nyiə vəyn ə tsà èghɛ zɛ ə è kàʼa è pi. È və ke tsàyn se Ɛlɔ̀t nə, “Fo tuə Njɔyn fo m̀mòke sê mi akaŋ zôyn.”

⁹Wiynə Fɔ̀yn Ɛlɔ̀tvè ə pɔylə̂, Pîza kûmə̀ m̀kâyn mɛ ə è njì ə ghɨ motə pə ghəshi ə̀kɨ̂m, è və tsɛsə̀ àlâŋ nə ə pəyn ètuə Njɔyn fo m̀mòke ə fo sê vayn èzhɔyn vɛ.

¹⁰È və tomə ə̀ghɨ ə ndɛ chaʼ nə ndu təynka àtuə Njɔynke.

¹¹Ə tè pəyn ètu ə təynke ə akaŋ ə fo sê vayn zhɔyn ə̀təyn, è və pɔŋə fo kəynke sê nyìə vəyn.

¹²Chùmtè èpàm sə Njɔynse ə ndùə njiə epfɨyn ə vəynve ə pfɨ̀mə̀ ə se nduə tsàyn eghɛ zɛ ə ze kyâyn sê Njisə̀s.

¹³Kə Njisə̀s zɨ ghɛ zɛ ə ze kyâyn sê Njɔyn, È və njiə ə ngwùʼ ə ndò fumə, ə ndùə elùʼ mə è nyì ke və̂yn nɨŋ. Pîza kə nɔ̂ynkè tè zɨ nə Njisə̀s ə kàynè ndo əfètə̂ ngwùʼ èghaʼâ, ghənə ndò ə tɔ̂ŋ ə chùmtə̀ ndûə vəyn fumə è gholghe.

¹⁴Njisə̀s ə fɨə ə ngwùʼ èghaʼâ ə pə̀ kə è fɨyn fe nɔ̂yn ə ghɨ̀ kɛ, təm ə vəynghe ə lwinə è kosê esəyn sê ghənə È və tsuʼə tèzaf tə ghənə̂tè.

¹⁵Zhwikwɨləve ə kwəynə, chùmtè èpàm sə Vəynse ə pə̀ se Vəyn ə pìə nə, “Shîŋə̀kè ə tsɛ̀ ə̀ vɨnə̀ e fɨyn nyi èluʼ mə wùə ndamə va ətəyn. E tsɔ̂fə̀ nə ò pi nə ghɨ ghɨnə kɛse nji ndu ə setə̀ʼ kə kaʼa zhɔyn fɨake fu ə zhi.”

¹⁶Njisə̀s ə pìə sê ghənə nə, “Ghənə kyi va se kwɨlə̂, nâʼà ghàyn è ngɨŋ saynse fo fɨake ə ghənə zhi.”

¹⁷Ghənə ə pì nə, “Ghàs fâyn kyi ke èsene epɨaynve etwɔ̂yn è mbwɔ̀ve pɨ̀a.”

¹⁸Njisə̀s ə pìə nə, “Ghàyn pəyn è vəynve sê Mi”

¹⁹Kə chùmtè èpàm sə vəynse pə̂yn è səyne epɨanə ətəynve è mbwɔ̀vè È və pìə sê ghɨ ghɛ nə ghənə tsɨsə ndu ewə̀yn. È ve njìə èsene epɨayn ətəynve etwɔ̂yn è mbwɔ̀ vɛ è pɨ̀a ə naynə̂ kɔʼsə̂ è Kwùtwəyn ə fo àzɔ̀ŋnè sê Zhə̀fè. È və pɨaʼlə̂ vəynve ə fo nə chùmtè èpàm sə vəynse chyate sê nɔ̂yn ətəynve.

²⁰Ghənə ə zhi kolə nâʼà ə̀kɨ̂m, chùmtè èpàm sə vəynse ə komtə̂ èpɨaʼle vɛ ə ve faŋ, ve ə lwinə ekwà njòse pɛ̀.

²¹Ghɨ ghɛ ə ghe tè zhi fɨazhiə ətəynve tè zaʼâ ndùə sèkam sê tâyn, mə taŋa va zənə è mɨ̂ətə̀m.

²²Kè sə ashìŋə̀, Njisə̀s ə piə sê chùmtè èpàm sə vəynse nə se nji ə ngwùʼ èghaʼâ ə tyâŋə̀ ndùə engyinə̂ e njwì vîve sə shi, è və faŋə epàm ə pìə nə ghɨghe ndo kwɨlə̂.

²³Kə è tè pi mɨsè nə ghɨ ghɛ ndo kwɨlə̂, è və ndò ə kɔʼɔ etûə pfɨ̀yn kè və̂yn nɨŋ se tsə̀m. Zhwikwɨləve ə kwəynə, Njisə̀s e nyi fumə və̂yn nɨŋ.

²⁴Pîza, ə̀ tè nyì fa ashìŋə̀ chùmtè èpàmse nyi sə tyà ə fètəyn ènjwì ə ngwùʼ èghaʼâ, fof etɛke nə̂ʼsə̀ ngwùʼ èghaʼâ ə̀təyn kûmə̀ nə fofa tè pə èndomve ə ghənə shi.

²⁵Ə təyn ə̀shi epɨsə̀pɨsə̀, Njisə̀s ə pə̀ sê chùmtè èpàm sə vəynse mə è kwìə pə̂ etuə m̀mò.

²⁶Kə ghənə fe kə Njisə̀s kwìə etûə m̀mò, fâynzè ə ko ghənə, ghənə pɨa piə nə, “Ə̀ nyi wùəchi!”

²⁷Pîza kè sə ashìŋə̀ Njisə̀s ə wàmnə̀ sê ghənə ə pìə nə, “Ghàyn kyi təmə, ə̀ nyi Mi; kə ghàyn fayn.”

²⁸Pità ə pə̀ynsə̀ nə, “Pɛ̂pɛ, ə ə̀ nyì ghô, o tsɛ̀sə̀ àlâŋ nə m kwi etûə m̀mò m pəyn elùʼ vɛ ò nyi.”

²⁹Njisə̀s ə pìə nə, “Pə.” Pità ə fɨə ə ngwùʼ èghaʼâ ə zhə̀tə̀ se kwì etuə m̀mò pə̂ sê Njisə̀s.

³⁰Pîza ə pə̀ kə è fe fof etɛke tsɛ̂, fâynzè ə ko vəyn è və zhə̀tə̀ se mɨlə̂ ə tsô. È və pɨa chîə sê Njisə̀s nə, “Pɛ̂pɛ, tsàmtè mi!”

³¹Kè sə ashìŋə̀, Njisə̀s ə nɛ̀sə̀ àgho ə kyiə vəyn ə pfɨfə sê vəyn nə, “Pomə zɛze tətə̂ ghè nyiə, Ə̀ nəyn ghɛ kə təm ghe ghə tə chyasə ə?”

³²Kə Njisə̀s yî Pità tè kɛse nji ə ngwùʼ èghaʼâ, fof kɛ ə mìə kə ndò.

³³Chùmtè epàm sɛ ə se tè nyi ə ngwùʼ èghaʼâ e sè ngɨmnə̂ Njisə̀s piə nə, “Ò nyì ke nâʼà Va Fèzhə̀ səmɔʼ.”

³⁴Ghənə ə tyàŋà mɨ̂sə̀ ènjwî ə zaʼâ apàs endaʼa Njɛ̀nɛsalɛ̀tkè.

³⁵Kə ghɨ ghɛ ə ghe tè nyì fu fe kê Njisə̀s, tomə ndùə pôlə̀ tendaʼ nə tɛ tèkɨ̂m ə pə̀ è ghɨ ghəkɨ̂m ghɛ ə tè zafə sê vəyn.

³⁶Ghɨ ghɛ ə ghe tè pəyn è ghɨə zafə sê Njisə̀s ə chyatə̂ vəyn nə è za ə ghɨ ə zafə ətəynghe kom ke nâʼà èghaŋ ə sendzɨs ə vəynze. Kə ghɨ ghɛ ə tè zafə ə̀kɨ̂m kòm sɔŋ ə sendzɨs ə vəynze, ə tɛ kə ndò.