Read Mmen Matyò 15 Bible Online

Matyò 15 - Mmen bible

Matyò 15

¹Ghɨə Falàsî əmɔ̀ʼɔ̂, è tyə̀ynsè sə alàŋsè ə ndò ə Njèlusalɛ̀m ə pə̀ fe Njisə̀s ə pfɨfə sê vəyn nə,

²“Kûmə̀ ghè ə chùmtè èpàm sɛse chumtə̀ va zaʼlê zɛ ə pɨ̀a ə ghâsènì ghəshiə tè zà sê ghâsènì ə? Ghənə shûə va gho ghənə̂ghè endom vɛ ghənə kyi sə̂ shûə ətəyn tsɔ̀fə se zhi.”

³Njisə̀s ə pə̀ynsə̀ nə, “Kûmə̀ ghè ə ghàyn kəmə saʼ ə Fezhə̀zè chûmtə̀ zaynze nə ezaʼlê ə?

⁴Zhə̀fè ə pi nə, ‘Ngɨmne pɛ̂ è nɛ̂,’ mə, ‘Ə̀ wàmnè pîndè pi kûmə̀ pɨ̀a kɨ̀sə nyì, ə è və kyi se kwu.’

⁵Pîza ghàyn e zaʼlə̂ nə, ə wùə kyi fɨake mə è fə nyì se tsàmtè ə pɨ̀a ətəyn kɨ̀sə nyì, pîza pîə nə è nə̀ fo kəynke sê Zhə̀fè,

⁶ə è və kyi va se kɔʼsə̂ pɨ̀a kɨ̀sə nyì èfɨa ətəynke. Ə wùə nə̀yn zamə, ə nyi mə ghàyn paʼà njì ghɛ ə Fezhə̀zè nə ə̀ nyi eghɛ kûmə̀ nə ghàyn chùmtə̀ taynte nə tezaʼlê.

⁷Ghàyn ghɨ ekaŋkaŋa nə ghɨ̂yn! Fɨ̀aʼtè Èsayà tè nyi achûŋ kə è tè pì ghɛ zɛ ə Zhə̀fè tè tom vəyn nə,

⁸‹Ghɨ ghɨnə kɔʼsə̂ mi è choze, pîza təm ə ghənə̂ghè e nyi sə tyà sê Mi.

⁹Ghənə fe kə ngəʼ səndô, pîə nə ə ngɨmnə̂ mi, kûmə̀ nə ghənə zaʼlə̂ ə̀ghɨ nə chûmtə̀ èlwɔ̂ŋ ə wùə m̀sɔ̀ŋve tsɛ̂ kə kɔʼsə lwɔ̂ŋ ə Fezhə̀vè əghɛ mə ə̀ fɛte əghɨ.›”

¹⁰Njisə̀s ə ke tɔŋɔ̂ anɔ̂yn ə ghɨ̀ kɛ, ke ə pə̀, è və pìə sê ghənə nə, “Ghàyn zɨte ə zɨ kê!

¹¹Ə̀ va chi àfɨa kɛ ə wùə zhiə ə ke nə̂ nə è və zo va ə Zhə̀fè əshi, pîza ə̀ pɨl nyi èghɛ zɛ ə ze fɨə ə wùə echo ə ze nə̂ nə è və zo va.”

¹²Kə È tè pî zɨnə mə, chùmtè èpàm sə vəynse ə pə̀ ə vəyn etipì ə pìə sê vəyn nə, “Ò vɛ ò ke nə ghɨə Falàsîghə nyɔ̂ʼsè tɔŋe eghɛ zɛ ò wàmnè ə?”

¹³Njisə̀s ə pə̀ynsə̀ nə, “Nâʼàpî fèkaʼ fèkè fɛ ə Pɨ̀a vɨm vɛ è nyi ekwùtwəyn tàʼa zho, ə nə̀ chɔʼɔ fɨsə̂ fəynfe.”

¹⁴“Kə ghàyn kyi fɨmsê pɔ̀m ghənə! Ghənə nyi etu mə ə fòf chisə̂ ə̀ghɨ ə fofə; mə shîŋə̀ kɛ ə wùə èfòfə tsɛ̂ əshi və mɔ̀ʼɔ chùmtə̀ vəyn, ə ghənə əkɨ̂m pfɨə nji epə.”

¹⁵Pità ə pìə sê vəyn nə, “Tsàyn ghɛ zɛ ə ngàyn nə zɨ̀yn zaʼlə sê ghàs.”

¹⁶Njisə̀s ə pìə sê ghənə nə, “Se kɔʼɔ zaʼâ fa ashìŋə̀ zôyn, kèpî ghàyn nyìəmə̀ zɨə kê va ghɛ ghə?

¹⁷Ghàyn pâʼà fe nə naʼapi àkè kɛ ə ke nji echo tsɛ̂ tso ndûə kə endwɔ̀, ke ə fɨnə tsɛ̂ fɨə kəndò ə vəyn ewiyn ə̂?

¹⁸Pîza, ghɛ zɛ ə ze fɨə ə wùə echo nyi mə ze ndo ə və ətəm, ə̀ ghɨnə nyi əghɛ ghɛ ə ghe nə̂ wùə e ve zo va ə Zhə̀fè əshi.

¹⁹Kwâʼtè tepite fɨə ə ghò ətəm chiynə ghò nə, ò zhwi, nyîŋə̀ è zhwîə wùə è kɨ̂sè ndom ə wùə, è chûmtè ə zəynze, è chɔŋe, è kaŋa kə ò wam ə̂ wùə tu, fɨnə pîə ə̀ghɛ piə yîghe kûmə̀ wùə.

²⁰Ə̀ ghɨnə nyi əghɛ ghɛ ə ghe nə̂ nə wùə ə zo va ə Zhə̀fè əshi. Ə̀ vachi ezhoghɛ ə è zhi fɨazhiəve ndɔ̀ʼɔ è shù gho ə ze nə̀ nə̂ vəyn nə è və zo va ə Zhə̀fè əshi.”

²¹Njisə̀s ə ndò fumə ə ndùə apàs endaʼ kɛ ə ke tè nyì paʼsê endaʼ ə Tayàzè è zə Sindɔ̀nzè.

²²Wùzhɔyn emɔ̀ʼ endaʼ ə Kanànâtzè mə è tè ndamə fu endaʼ ə fɨə pə̂ sê Njisə̀s chîə, puʼə àpɔ̂ŋ pîə nə, “Kose səyn sê mi ə Pɛ̂pɛ, Va fèghàŋ ə ndɛ Fɔ̀yn Ndàfîtfè! Vayn vɨ̂m vê èzhɔyn nyîə zɨə ngəʼ nâʼà sə ŋaŋ kûmə̀ nə pamə̂ ə satàynzè nyi ə vəyn wìyn.”

²³Pîza Njisə̀s ə paʼà pì eghɛ sê vəyn. Chùmtè èpàm sə vəynse ə pə̀ sê vəyn sè chyatə̂ vəyn pîə nə, “chùm vəyn ə ghâsènì epàm! È kwìə ə ghâsènì epàm puʼə tsɛ̂sə̀ àpɔ̂ŋ.”

²⁴Njisə̀s ə pə̀ynsə̀ nə, “Zhə̀fè tè tom Mi nə m pəyn tsâmtè ə̀ghɨə Isìlây ghɛ ə nyi kə sendzè senjisəse.”

²⁵Pîza wùzhɔyn ə̀təyn ə pə̀ tɨmə ə̀ndzɨs ə̂ vəyn əshi, pîə nə, “Pɛ̂pɛ, tsàmte mi.”

²⁶Njisə̀s ə pə̀ynsə̀ nə, “E tsɔ̂fə̀ va nə ə nji fɨazhiə m mɨ̂ətə̀vè ə maʼa sê puse.”

²⁷Wùzhɔyn ə̀təyn ə pə̀ynsə̀ nə, e nyi zamə “Pîza kè nâʼà sèpu zhiə ndò pɨaʼle vɛ ə ve tâyntə̀ ə pɛ̀ ndɛ etùə àlaŋ ashìŋə̀ kɛ è zhiə.”

²⁸Njisə̀s ə ke pə̀ynsə̀ vəyn nə, “Ò nyi wùzhɔyn èpomə èghaʼê! Ghɛ zɛ ə ò kɔ̀ŋə̀, ə nə̀ nə̂ zəynze sê gho.” Kè sə ashìŋə̀ vayn èzhɔyn ə̀ vəyn ə tɛ.

²⁹Njisə̀s ə ndò fumə ə ndùə èndomve etipîə ènjwì ə Ngalìlîvè. Ə kɔʼɔ ètwɔ̂ŋ ə tsɨsə̂ əchi.

³⁰Nɔ̂yn etsɨəve ə pə̀ sê Vəyn, pə̂ m̀ngə̂sfɨəyn, ghɨ efofə, è èngɛchi, è kwùʼvè, è ghɨə zafə mɔ̀ʼɔghe ghe tsɨ̂ə kə nyî. Ghənə tè ndə̀mə əghɨ nə ghɨ̂yn ə Njisə̀s əshi; è və tsuʼə ghənə.

³¹Ghɨ ətəynghe tè nyi è kayn kə ghe fe kə kwùʼvè wâmnə̀, m̀ngə̂s e tɛ, èngɛchive e kwîə, fòfvè e kɛsə̂ fe tèluʼ. Zɨnə mə ə nə̀ ə̀ghɨ ghe tsîtə̀ Fèzhə̀ fə ghɨ̀ ə Isìlâyfè.

³²Njisə̀s ə tɔŋɔ sèchùmtè èpàm sə vəynse ə pìə sê ghənə nə, “Sə̂yn ko mi sê ghɨ etsɨə ghɨ̂yn kûmə̀ nə ghənə ə ndam ghasè nyìə ghə̀ ghənə sə mtuʼ mta zôyn fɨyn kyi va fɨake se zhi. M kɔŋə̂ va se pì nə ghənə kwɨlə ndɔ̀ʼɔ ghənə zhi. Ghənə kaʼa pfɨŋə kyɨ̂ŋtè pfɨ endom.”

³³Chùmtè èpàm sə vəynse ə pfɨfə sê vəyn nə, “Ghàs nyiə nə̀ kyiŋə ghayn fɨazhiəve fa endaʼ ashishi nə ve tsɨ kwəyn sê nɔ̂yn ə ghɨ̀ kɨ̂ynə̀?”

³⁴Njisə̀s ə pfɨfə sê ghənə nə, “Ghàyn kyi esene epɨaynve eshɔ̀ʼɔ?” Ghənə pə̀ynsə̀ nə, “Ghàs kyi esene, èsɛ̀mbɛ è mbwɔ̀tə̀m m̀shàʼ nyî.”

³⁵Njisə̀s ə pìə sê nɔ̂yn ə ghɨ̀ kɛ nə ke tsɨsə əchi.

³⁶È və njìə èsene epɨayn vɛ, èsɛ̀mbɛ, è mbwɔ̀tə̀m, ə fo àzɔ̀ŋnè sê Zhə̀fè, ə pɨaʼlə̂ fo sê chùmtè èpàm sə vəynse, ghənə pɔŋɔ chyâtə̀ ndûə se nɔ̂yn əghɨ vɛ.

³⁷Ghɨ ə təynghe əkɨ̂m ə zhiə èfɨazhiə ətəynve ə zhiə kolə. Chùmtè èpàm sə vəynse ə komtə̂ èpɨaʼle vɛ ə ve faŋ, ve ə lwinə èkwà èsɛ̀mbɛ.

³⁸Ghɨ ghɛ ə ghe tè zhi tè nyi kam sekyàʼ, e taŋa va zənə è mɨ̂ətə̀m.

³⁹Njisə̀s ə pìə nə ghɨ ətəynghe kɛse kwɨlə̂, ə njiə ə ngwùʼ eghaʼâ ə ndùə èndomve apàs endaʼ ə Mangandànkè.