Read Mmen Matyò 16 Bible Online

Matyò 16 - Mmen bible

Matyò 16

¹Ghɨə Falàsîə è ghɨə Sandùsî yîghe tè pə̀yn sê Njisə̀s kyiŋə èndom se mɔ̀m ə vəyn. Ghənə pìə se vəyn nə È chwite ghənə èchwîə mə è ndò pə̂yn ekwùtwəyn.

²Pîza Njisə̀s ə pə̀ynsə̀ nə, “Zhwize nə̀ piə e sâŋà ndò, ə ghàyn pi nə, ‘Ghâsènì nə kyîə ètuʼ echûŋ eyisəʼə kûmə̀ nə wuləke pâŋə̀ ndò’

³Tuʼve ə pɨsə̂ zo nâʼà è pɨ̂sə̀pɨ̂sə̀, gha pìə nə, ‘Ghole nə̀ tso, kûmə̀ nə wuləke pâŋə̀ ndò fɨnə fɨ̂mə̀.’ Ghàyn kàʼa ə ghàyn sɨŋ kə tuʼe nə̀ nə̂ ə və nyi mə ghàyn naynə̂ àwulə, pîza ghàyn vayn kaʼa ghàyn fe kê ə̀ghɛ ghɛ ə ghe kyânə̀ ndâyn.

⁴E pofə zàyn sê ngwàʼ zɨnə fa fetuʼ! Ghàyn kɔ̀ŋə̀ va se zɨtê se Zhə̀fè, Ghàyn pfɨfə chwìə èghɛ ekayntəze. Pîza ghàyn nə̀ fe va zə̂ynzè ètsɛ̂ kə va chwìə èghɛ ekayntə ə fɨ̀aʼtè Njonàzè.” È və zà ghənə ə ndò.

⁵Njisə̀s è chùmtè èpàm sə vəynse tè tyàŋ mɨ̂sè ènjwî pîza chùmtè èpàm sə vəynse ə lɛ̀sə̀ se njìə apayn ə kwaŋke.

⁶Njisə̀s ə pìə sê ghənə nə, “Ghàyn tɔʼne kûmə̀ fèsə̀ʼ fə ghɨə Falàsîə yî ghɨə Sandùsîə.”

⁷Chùmtè epàm sə vəynse ə ke zhə̀tə̀ se kàtè əghɛ è ngɨŋ sə ghənə̂sè pîə nə, “È wàmne nyi kûmə̀ nə ghâsènì pâʼà pə̀yn è payn əkwaŋ kyîke.”

⁸Njisə̀s ə kê èghɛ zɛ ə ghənə kâtə̀, ə pfɨfə sê ghənə nə, “Kûmə̀ ghè ə ghàyn kâtə̀ ghɛ sê ngɨŋ saynse nə ghàyn fə paʼà njì payn əkwaŋke ə? Kûmə̀ ghè ə ghàyn kyi pomə̂ etətə̂ zə!

⁹Se zaʼâ zôyn ghàyn pa nyîəmə̀ zɨə kê va ə? Ghàyn ə lɛ̀sè kə M tè pɨaʼle pɨaynve etwɔ̂yn ə pfɨtə̂ ə̀ghɨ kam setâyn ə? Kə ghənə tè zhi mɨ̂sè, fɨazhiə vɛ ə ve tè pise, ghàyn tè lwiynse ekwà èshɔ̀ʼɔ?

¹⁰Ghàyn ə lɛ̀sè ghɨ ghɛ kam sekyàʼ ə m tè pfɨtê èsene pɨaynve esɛ̀mbɛ̂ za ə? Kə ghənə tè zhi mɨ̂sè, fɨazhiə vɛ ə ve tè pise ghàyn tè lwiynse ekwà èshɔ̀ʼɔ?

¹¹Kə M tè tsàyn se ghàyn nə ghàyn ə tɔʼnə̀ è fèsə̀ʼ, M tè wàmnə̀ chîəva kûmə̀ àpayn ə kwaŋke. Ghàyn e tɔ̂ʼnə̀ è fèsə̀ʼ fə ghɨə Falàsîə è ghɨə Sandùsîə.”

¹²Chùmtè èpàm sə vəynse ə se kê nə è fè paʼà wàmnè kûmə̀ fèsə̀ʼ fə apayn əkwaŋke pîza è tè pɨlə wâmnə̀ kûmə̀ èzaʼlê ə ghɨə Falàsîə è ghɨə Sandùsîə.

¹³Njisə̀s ə ndò ə ndùə apàs ə tɔ̂ŋ ə Kàysalyà Filìpây elùʼ vɛ ə è tè pfɨf sê chùmtè èpàm sə vəynse nə, “Ghɨ pîə nə Va wùə nyi nde?”

¹⁴Ghənə ə pə̀ynsə̀ nə, “Yîghe pîə nə ò nyi Njɔyn Fo M̀mò, yîghe e pîə nə ò nyi fɨ̀aʼtè Èlanjà, yîghe e pîə nə ò nyi fɨ̀aʼtè Njèlìmayà, polə za ə ò nyi kepî wùə èmɔ̀ʼ əfètə̂ sè fɨ̀aʼtè.”

¹⁵Njisə̀s ə pìə sê ghənə nə, “Nâʼà ghàyn pìə nə m nyi nde?”

¹⁶Shimùyn Pità ə pìə nə, “Ò nyi vɛ ə chɔʼ ndə̂m, ə Va Fèzhə̀ fɛ ə fe ndamə.”

¹⁷Njisə̀s ə pə̀ynsə̀ se vəyn nə, “Pɔsê nyì sê ghò ə Shimùyn va Njonà. Ə vachi wùə m̀sɔ̀ŋ kə è tsàyn zɨnə mə sê ghò, pîza ə nyi Pɨ̀a vɨm vɛ ə è nyi ekwùtwəyn kə è nə̀yn nə ò pi zamə.

¹⁸M pîə sê ghò Pità nə, ò nyi anayn, mə fa etûə anayn M nə̀ pɛ ndɛ àtsɨ̂ynte zɨ̂mzè. Mə pî àtyaʼ ekwuke vayn kaʼa ə ke nəʼse zə̂ynzè.

¹⁹M nə̀ fo àchɔʼ elùʼ efɔ̂yn ekwùtwəynke sê ghò. Ə ò kwiynse pî ghè ə chi, ə tə kwiynsê ekwùtwəyn. Ə ò pomə pîghè ə chi, ə tə pomə̂ ekwùtwəyn.”

²⁰Njisə̀s ə fo fɨ̀as sê chùmtè èpàm sə vəynse nə kə ghənə tsayn sê wùə nə zhi nyi vɛ ə chɔʼ ndə̂m.

²¹Se zhə̀tè fumə ashìŋə̀ se ndù əshi, Njisə̀s ə zhə̀tə̀ se tsàyn sê chùmtè èpàm sə vəynse nə, “M kyi se ndù ə Njèlusalɛ̀m. Ə̀ nyì fumə kə m nə̀ zɨə ngəʼ ètsɨə ə chəʼse əgho, è ghɨ kɔʼsə nə eshyə̀ engaŋtə, è tyə̀ynsè sə alàŋsè. È və pìə nə ə nə̀ zhwiə Mi, epàm mə̂ m̀tuʼ mta, ə m kɛse zômə̀.”

²²Pità ə njìə fɨə è Njisə̀s etipì sè zɔ̂ sê vəyn piə nə, “Zhə̀fè vayn pomə̂ ekyì eghɛ zɨ̂yn, ə Pɛ̂pɛ! nə ze kyayn sê ghò.”

²³Njisə̀s ə kə̀mnə̀ ə pìə sê Pità nə, “Ndò ə Mì ekyàʼ ə ndə̂plè! Ò tàmtə̀ Mi nə kə M nəyn kwaʼtè ə Fezhə̀zè kûmə̀ ghè? Kûmə̀ nə kwâʼtè zɛ nə zɨ̂yn pâʼà ndò se Zhə̀fè, pîza sê wùə m̀sɔ̀ŋ.”

²⁴Njisə̀s ə ke pì sê chùmtè èpàm sə vəynse nə, “Ə nâʼà pîndè ə ghàyn ə fètəyn kyiŋə se chùmtə Mi, ə è və kyi se lɛ̀sè ə ngɨŋə̂ vəyn, ə è pɨ̀aʼà wâmnè ə vəynke ə è chùmtè Mi.

²⁵Kûmə̀ nə ghɨ ghɛ ə mɔ̂msè se sɔzà ə ngɨŋə̂ ghənə̂ nə̀ njisə̀ zə̂ynzè, pîza ghɨ ghɛ njîsè ndamə ghənə̂zè kûmə̀ Mi tə kyîə zəynze.

²⁶Wùə kàʼa è kyi mâʼte èkwə̀ ezhoghɛ è kyi ghaʼze ekɨ̂m ə mbi pîza ə njìsə̀ ngɨŋə̂ vəyn ə? Mə wùə kàʼa è fo nâʼà ghè se kɛsə̂ kyiə endam ə vəynze ə?

²⁷Kûmə̀ nə Va wùə se nyi ke se pə̀yn ə pɨ̀a vəyn epomsê è tsì sə vəynse. Ə nyì fumə ashìŋə̀ ə è nə̀ mâʼtə̀ nâʼà pîndè tɔynə̂ efɨ̀aʼ zɛ è nyi mə è və nə̀yn.

²⁸M pîə sê ghàyn səmɔʼ nə, ghɨ yiə nyi fâyn mə tə kwu va, ə̀ tsɛ̂ kə va mə ghənə ə fe Vâ wùə è pə̂ è fɔ̂yn ə vəynze ə chi.”