Read Mmen Matyò 17 Bible Online

Matyò 17 - Mmen bible

Matyò 17

¹Epàm ə mtuʼ mtufə, Njisə̀s ə njiə Pità è Njə̂m yî ànyìə vəyn Njɔyn ə kɔʼɔ è ghənə etûə pfɨ̀yn è ngaŋtə kə nyi, mə nyì ke ghənə fu.

²Ghənə ə naynə̂, ə fe kə wiynə Njisə̀sè kwiyne, kyaʼ ə vəynze nyaynə̂ kə ezhwi. Ndzɨs sə vəynse ə kɛsə̂ sè fɨfə kə nyi fɨnə nyaynə̂.

³Kè nyî, Mosîs yî Èlanjà ə fɨ ə ghənə ekyàʼ sè wàmnə̀ sê Njisə̀s.

⁴Pità ə ke pì sê Njisə̀s nə, “Pɛ̂pɛ e tsɔ̂fə̀ ndò kə ghâsènì nyì fâyn. Ə ò kɔ̀ŋə̀ ə m pɛ pfɨ̀mè m̀ta fâyn, ə̀ o kyi fèmɔ̀ʼ, Mosîs e kyi fèmɔ̀ʼ, Èlanjà e kyi fə̀mɔ̀ʼ.”

⁵Kə è tè pa wâmnə̀, mbàʼ sefɨfə nyaynəse ə tso ə ghənə ətu ə kɨyte ghənə, Kyə̀ ə fɨə fu ə fètə̂ sèmbàʼ pîə nə, “Ə̀ vɨ̂nə nyi Vayn vɛ M kɔ̂ŋə̀, È nə̀ M saŋnə̂. Ghàyn zɨə sê vəyn.”

⁶Kə chùmtè èpàm sə Njisə̀sè tè zɨə kyə̀ nə zɛ, fâyn zə ko ghənə, ghənə ə pfɨ̀lə̀ ə chi è kyaʼtè.

⁷Njisə̀s ə pə̀ kûmə̀ ghənə ə pìə nə, “Ghàyn ndwi, kə ghàyn fayn.”

⁸Ghənə ndwìsə̀ ètu ə ghənə̂vè ə tàʼa fe wùə ə̀ tsɛ̂ kə va Njisə̀s.

⁹Kə ghənə tè kɛsə tso pə̂ fumə ə pfɨyn, Njisə̀s ə fo fɨ̀as sê ghənə nə, “Kə ghàyn tsayn ghɛ zɛ ə ghàyn fe sê wùə se zaʼâ kə Zhə̀fè zomse Vâ wùə.”

¹⁰Chùmtè èpàm sə Njisə̀sè ə pfɨfə sê vəyn nə, “Kûmə̀ ghè ə tyə̀ynsè sə alàŋsè tè pi nə ə̀ kyi Èlanjà se pə̀yn sə shi tsɔ̀fə vɛ ə nyi mə ə kɨmnê ə?”

¹¹Njisə̀s ə pə̀ynsə̀ sê ghənə nə, “E nyi səmɔʼ nə Èlanjà pə̂ ndò sə shi, nyi se nə̀yn nə nâʼàpî àkè ə nyi èpɨaʼtêzè.

¹²Pîza M piə sê ghàyn səmɔʼ nə Èlanjà se nyi mə è və tè kàynè pəyn pîza ghɨghə tàʼa fe kê vəyn, pîza nə̂ se vəyn nâʼà pi èghɛ èkè ə ghənə tè kɔ̀ŋə. Ə̀ nyi kepî èghɨ kə Va Wùə tə fe tsôsè ə ghənə ə gho.”

¹³Chùmtè èpàm sə vəynse ə ke zɨə kê nə È fe wàmnə̀ sê ghənə kûmə̀ Njɔyn Fo M̀mò.

¹⁴Kə Njisə̀s yî chùmtè èpàm sə vəynse kɛse pə̂yn sê nɔ̂ynkè, wùə ə pə̀ sê Njisə̀s ə tɨmə ə̀ ndzɨs ə Və shi,

¹⁵ə pìə nə, “Pɛ̂pɛ, kose səyn sê vayn vɨ̂m vê ndômə̀ vɨ̀yn. È kyi ezaf apfɨ̀zè, fe ngəʼ nâʼà sə ŋaŋ. È zàŋsə̀ pfɨ̂ə njiə ewùs è kɨsè mmò shîŋə̀ tekɨ̂m.

¹⁶M tè pəyn è vəyn sê chùmtè èpàm sɛse, è və ghaʼa ghənə se tsuʼ.”

¹⁷Njisə̀s ə pə̀ynsə̀ nə, “Ə̀ nyi ngwàʼ e pi èkè zɨ̂yn ə è làʼà pomə̂zè nyiə? M nə ndamə tânə̀ zàyn ghâsènì ə? M nə̀ kolə tânə̀ zàyn təmə è ghàyn ə? Pə̀yn è va ətəyn fayn sê mi.”

¹⁸Njisə̀s ə kàyntə̀ ə̀ghɛ sê pamə̂ tə satàyn nə tɛ, se ə fɨə ə vâ ətəyn ewìyn, kè fumə ashìŋə̀ è və tɛ.

¹⁹Chùmtè èpàm sə Njisə̀sè ə nyaʼtə̂ pə̀ se vəyn ə pfɨfə nə, “Kûmə̀ ghè ə ghàs tè vayn kaʼa chum fɨsê tèpamə̂ tə satàyn tə təyn tə?”

²⁰Njisə̀s ə pə̀ynsə̀ nə, “Ə̀ nyi kûmə̀ nə pomə zayn nyiə ndɛnə. M piə sê ghàyn səmɔʼ nə ə ghàyn kyi pomə̂zè, ze ndɛnə pi kə eshi ə ngwàʼ ə mostàzè, ghàyn kàʼa ghàyn pi sê pfɨ̀yn zɨ̂yn nə è ndò fa elùʼ ə è ndu ndom fɛ̂, ə è nəyn ke za. Ə ghɛ zhîze ə tɛ ghaʼa va ghàyn.

²¹Ghàyn kàʼa ə ghàyn chùm fɨse èkyî ə sezuʼ se pise nyi kə sɨ̂nə̀ kè ezhoghɛ ghàyn tsə̀mə̀ fɨnə pamə ècho.”[6]

²²Njisə̀s yî chùmtè èpàm sə vəynse tè zùŋte elùʼ emɔ̀ʼ apàs endaʼ ə Ngalìlîkè, È və pìə sê ghənə nə, “Ə nə̀ fo Va wùə ə ghɨghə gho,

²³ə ghe zhwi vəyn, pîza epàm ə mtuʼ mta, ə Zhə̀fè zomse Vəyn.” Chùmtè èpàm sə vəynse zɨə zɨnə mə saŋnə̂ va.

²⁴Njisə̀s yî chùmtè èpàm sə vəynse ə pə̀ endaʼ ə Kàpanùmzè. Ə tè nyì fumə ə ghɨ ghɛ ə ghe tè fitə kɛ tâks ə Ndɛ Ètsə̀mə tè pə̀yn sê Pità ə pfɨfə sê vəyn nə, “Piə tyə̀ynsè vâyn maʼà ndò tâks ə Ndɛ Ètsə̀mə?”

²⁵Pità ə pə̀ynsə̀ nə, “Èn è màʼà ndò.” Ə pə̀ kə Pità njiə ə ndɛ ndɔ̀ʼɔ ə è nyiəm wâmnè, Njisə̀s ə pfɨfə sê vəyn nə, “Ò kwàʼtə̀ nə ghe ə Shimùyn, ə̀ màʼà ndè ngwàʼ kɨ̀sə setaks sê fɔ̂yntə mbitə? Ə ghɨ endaʼa təynghe mə əghɨ etumghə?”

²⁶Pità ə pə̀ynsə̀ nə, “Əghɨ etumə.” Njisə̀s ə pìə se vəyn nə, “E za nyi nə ghɨ tèndâʼà nə tɨ̂yn kyi va sə̂ ndâʼà.

²⁷Pîza ghàs kɔ̀ŋə̀ va se nə̀yn nə ghɨ ghɨ̀nə nyɔʼse tɔŋe. Ndù ènjwì ə màʼa fèchyaʼ. Mbwɔ̀ kɛ ə ò ko sə shi, ŋaʼse cho ə kəynke, ə ò koyte kɛve ə ve kwəyn kə ghâsènì ndaʼ tâks ə təyn. Njì vəynve ə ndùə ndâʼà sê ghâsènì.”