Read Mmen Matyò 18 Bible Online

Matyò 18 - Mmen bible

Matyò 18

¹Fumə ashìŋə̀ chùmtè èpàm sə Njisə̀sè ə pə̀ se vəyn ə pfɨfə nə, “Ə̀ ngaŋtə̂ tsɛ̂ ndè elùʼ efɔ̂yn ekwùtwəyn və?”

²Njisə̀s ə tɔŋɔ pə̂ wâ nə è pəyn tyə̂m ə ghənə ə fètəyn,

³ə pìə nə, “M pîə sê ghàyn səmɔʼ nə, ə̀ tsɛ̂ kə va mə wùə ə kwiynê ndam ə vəyn sə̂ nyi ke kə vayn vɨ̂nə̀, è vayn kaʼa è tə nji elùʼ efɔ̀yn ekwùtwəynve.

⁴Wùə vɛ è ngaŋtə elùʼ efɔ̀yn ekwùtwəynve, ə nyi vɛ ə è tsose ngɨŋə̂ vəyn ə chi sə nyi kə vayn vɨ̂yn.

⁵Mə ə̂ fi ndzɨse pîndè kyì ə vayn vɨ̂yn ə Mì ezə, ə nyi mə è fi ndzɨsê Mi.

⁶Ə̀ nə̀yn pîndè nə kyì ə vayn nə vɨ̂yn pfɨ ə vəyn epomə̂, ə zə tsɔ̂fə̀ nə ə kolə chi eghaʼâzè ə vəyn emì ə ndu mâʼà vəyn ə enjwì ə fengwaŋve mə ve lɔŋə̂ kə nyî.

⁷Ngəʼ èghaʼâ nyì sê mbi kûmə̀ tèmɔ̂m tɛ ə te nə̂ nə ghɨghə nə̂ pi. Mɔ̂mtè kyi se pə̀yn, pîza ngəʼ èghaʼâ nyì sê wùə vɛ ə è nə̀ nə̂ nə wùə nəyn pi.

⁸Ə gho kɛke kɨ̀sə aghol kɛke nə̂yn nə ò nəyn pi, o kà mâʼà. E tsɔ̂fə̀ nə ò kyi ndam zɛ ə ze tə mîə va mə ò kyi va ghoke kɨ̀sə aghol tsɛ, kə o kyi ə̀gho ə̀pɛ̀ è gholghe əpɛ̀ ə ò ndu elùʼ ewùs vɛ ve ndɨmə va.

⁹Kèpî endom nə vɨ̂yn ə shi zɛze nə̂yn nə o nəyn pi, o fɔ̀ fɨsə̂ zəynze ə màʼà. E tsɔ̂fə̀ nə ò kyi ndam zɛ ze tə mîə va è shize emɔ̀ʼ tsɛ̂ kə ò kyi ə̀shi ə̀pɛ̀, ə maʼa ghô əfètə̂ èlùʼ ewùs.

¹⁰Ghàyn tɔ̀ʼnə̀ nə kə wùə lɛ wâ kûmə̀ nə è kɔʼnə̂ va. M pîə sê ghàyn səmɔʼ nə ekwùtwəyn, tsì sɛ ə se naynə ghɔyn nə ghɨ̂yn nyì yî Pɨ̀a vɨm.[7]

¹²Ghàyn kwàʼtə̀ nə wùə kàʼa è ghayn ghɛ ə è kyi ndzèsè wəve, emɔ̀ʼ ə njìsə̀ ə? Ə e kyâyn zâ, ə è za səmɔ̀ʼɔ sɨ̂nə̀ m̀ghɨm poləmɔ̀ʼ njòse poləmɔ̀ʼ elùʼ vɛ ə se zhiə etûə pfɨ̀yn ə è və kwîə kyiŋə zɛ è njìsè zâ.

¹³M tsâ se ghàyn səmɔʼ nə è kyiŋ fe ə è və saŋnə̂ nâʼà àchûŋ tsɛ̂ kə è saŋnə kûmə̀ sə mɔ̀ʼɔ sɛ m̀ghɨm poləmɔ̀ʼ njòse poləmɔ̀ʼ ə se tàʼa njisə̀ za.

¹⁴E za nyì kepî èghəs kə Pɨ̀a vâynvè e ekwùtwəyn kɔ̂ŋɔ̀ va nə nâʼà vayn emɔ̀ʼ fa fètə̂ ə̀ghɔyn etətə̂ njìsè.”

¹⁵Njisə̀s ə fɨnə pîə nə, “Ə ànɛ̂ nə̀yn pofse sê ghò, o ndùə fe vəyn elùʼ mə ə̀ nyì ke ghàyn vəyn ə̀pɛ̀ ə tsà èghɛ zɛ è pofse. Ə è fe ke nə zhiə ə nə̀yn pofsê, ə nyi mə ə fɨyn pɨaʼtê.

¹⁶Pîza mə è tàʼa zɨtê se ghò, o njìə wùə èmɔ̀ʼ kɨ̀sə ə pɛ̀ ə ghàyn ndu fe vəyn, kə nâʼàpî èghɛ èkè zɛ ò pì, əghɨghe əpɛ̀ kɨ̀sə ta ə nyi tsɛ̀ èsaʼ kè kə ŋwàʼlè ə̀ Fèzhə̀ nyi mə è zə pì.

¹⁷Mə è tàʼa zɨtê sê ghənə, o njìə ndûə è vəyn sê ghɨ ə ndɛ ə̀ Fèzhə̀ghè. Mə è tàʼa pa zɨtê sê ghɨghe ə ndɛ ə Fèzhə̀, o njìə vəyn kə wùə vɛ ə è tàʼa tyəmə kê Fezhə̀, pî kə wùə ètənə nə̂ sètaks.

¹⁸M pîə sê ghàyn səmɔʼ nə, nâʼàpî ghè vɛ ə ghàyn pomə ə chi, ə pomə̂ ekwùtwəyn, ə fo àtyaʼ nâʼàpî sê ghè ə chi, ə fo kepî zamə ekwùtwəyn.

¹⁹M pîə kwəynsə̂ sê ghàyn səmɔʼ nə, ə ghàyn ə pɛ̀ pomə nâʼàpî èghɛ èkè ə pfɨfə etsə̀m, ə pɨ̀a vɨ̂mvè ekwùtwəyn fo sê ghàyn.

²⁰Kûmə̀ nə ə ghɨ tsɨsə nâʼàpî ghayn se zaʼâ ə̀ pɛ̀ kɨ̀sə əta ə Mì ezə, M mə nyi ə ghənə fètəyn.”

²¹Pità ə ke pə̀yn sê Njisə̀s ə pfɨfə nə, “Pɛ̂pɛ, ə ànyì vɨ̂m nə̂ ndôŋtə̀ ndûə kə pi sê mi, m mə nyi kàʼa m lɛse fo vəyn se zaʼâ shîŋə̀ teshàʼa? Se zaʼâ shîŋə̀tè esɛ̀mbɛ mə?”

²²Njisə̀s ə pìə sê vəyn nə, “Ngâŋngaŋ, ə va chi ke shîŋə̀te esɛ̀mbɛ̂. Ò kyi se lɛ̀sè ə fo vəyn shîŋə̀tè m̀ghɨ̂m èsɛ̀mbɛ njòsè esɛ̀mbɛ.

²³Ə̀ nyi zama kə ze nyi efɔ̀yn ekwùtwəyn. Zhə̀fè saʼa kə fɔ̀yn vɛ ə È tɔŋɔ ghɨ vəynghe fɨaʼa se naynə andàŋ kɛ ə ghənə kyi sê vəyn pɛ̀ èfɨa.

²⁴Ə pə̀ kə è zhə̀tə̀ se andàŋ kɛ ə ghɨ efɨaʼa tè kyi sê Vəyn, ə pə̀ è wùə vîvè sê vəyn, e ve kyi vəyn èkɛve pàŋ ècho se tsɨəse.

²⁵Wùə ə̀təyn tè vayn kàʼa è ndaʼ ndàŋ ətəynke. Fɔ̀yn nə vɛ ə tsɛ̀sə̀ àlâŋ nə ə pəʼle vəyn sə akɔ̀s, è zhwiə vəyn, è ghɔ vəynghe se paʼsə̂ nâʼàpî è ghè vɛ ə è kyi, kə ndaʼ zhi fumə ekɛ.

²⁶Wùə ə̀təyn ə tɨmə ə̀ndzɨs ə fɔ̀yn ə̀təyn əshi sè chyatə̂ vəyn pîə nə, ‘Kol təmə kè sə fendiŋə̀ nyi, ə m nə̂ ndaʼ mɨ̂sè àndàŋ kɛ m kyi sê ghò nâʼà àkɨ̂m.’

²⁷Fɔ̀yn ə̀təyn ə kosə̂ èsəyn sê wùə ə̀təyn ə lɛ̀sə̀ fo vəyn andàŋ kɛ ə è kyi ə zà vəyn nə è ndo.

²⁸Wùə ə̀təyn ə ndò ə pîə è ndùə ndò ə fe wùə èfɨ̀aʼa ə̀mɔ̀ʼɔ̂ mə yîghə̀ ghənə tè fɨ̀aʼa əmɔʼ è ve kyi vəyn è fɨatə̀ fekɛfe. È və kyîə kə ndò vəyn eshyàʼ ə pìə nə è ndàʼ kɛ ə vəyn.

²⁹Wùə ə̀təyn ə tɨmə ə̀ndzɨs ə və əshi chyatə̂ vəyn pîə nə, ‘Kol təmə kè sə fendiŋə̀ nyi, m nə̂ kɛse ndaʼ ghò.’

³⁰Pîza è və tə kə ndò ə pɨlə ndûə fâ vəyn ə ndɛ ə̀chaʼ se zaʼâ kə è ndaʼ vəyn tsɔ̀fə ə zâ fɨsə vəyn.

³¹Kə ghɨə fɨaʼa mɔ̀ʼɔ̂ tè fe ghɛ zɛ ə ze kyâyn, təmə ghənə̂ghè e saŋnə̂ va, ghənə ə ndùə se fɔ̀yn ə tsà ə̀ghɛ ə̀kɨ̂m kə ghe kyâyn.

³²Fɔ̀yn ə tɔŋɔ wùə nə vɛ ə vəyn ə ndɛ ə pìə sê vəyn nə, ‘Ò nyi ke nâʼà àfɨa pike! Mə tè lɛ̀sè fô ghô è ndàŋ kɛ ə ò tè kyi akɨ̂m kûmə̀ nə o tè chyatê mi.

³³Ò tè nyì se kyî ekosê esəyn sê wùə vɛ ə ghâyn vəyn fɨaʼà əmɔʼ kè kə m tè kyi sê ghò’

³⁴Fɔ̀yn ə̀təyn ə fɨsə̂ èndwɔ̂ ə tomə wùə èfɨ̀aʼa ə̀təyn ə ndɛ ə̀chaʼ nə ə tsəfse vəyn se zaʼâ kə è kɛse ndaʼ naʼàpî ghè vɛ ə è tè kyi se ndàʼ.”

³⁵Njisə̀s ə kwùŋsə̀ nə, “Ə̀ nyì kepî zamə kə pɨ̀a vɨmvè ekwùtwəyn tə nə̂. Ezhoghɛ ə ò tàʼa lɛ̀sə fo ànɛ̂ è təm ghɛghe əkɨ̂m. Ə Zhə̀fè tə tàʼa lɛ̀sə fo gho kèpî kə fɔ̀yn vɛ tè tàʼa lɛ̀sə fo wùə èfɨ̀aʼa ə̀ vəyn.”