Read Mmen Matyò 19 Bible Online

Matyò 19 - Mmen bible

Matyò 19

¹Kə Njisə̀s tè wàmne mɨ̂sə̀ ə̀ghɛ nə ghɨ̂yn, ə ndò Ngalìlî ə ndùə apàs endaʼa Njòndyâkè, engyinə̂ tsô èghaʼâ ə Njondàynzè.

²Nɔ̂ynkè ə chùmtə̀ vəyn è və tsuʼə ghənə fumə.

³Ghɨə Falàsî yîghe ə pə̀ sê vəyn mɔ̂msə̀ se tam echo vəyn, ə pfɨfə nə, “Lâŋ kaske pomə̂ ndò nə wùə chyase yî zhwîə vəyn nâʼàpî ə tə̂ èghɛ èkè ə?”

⁴Njisə̀s ə pə̀ynsə̀ sê ghənə nə, “Ghàyn paʼà tɔŋɔ̂ ə Ŋwàʼlè ə̀ Fèzhə̀ nə, ə̀ tè nyi ə zhə̀te ə̀ mbi, Zhə̀fè ə pomə wùndômə̀ è wùzhɔyn ə?”

⁵Zhə̀fè tè pi nə, “Kûmə̀ zɨnə mə, wùndômə̀ tə ndô zâ pɨ̀a vəyn è nyìə vəyn, ə è ndu tsɨ̂yntè yî zhwîə vəyn, ə ghənə ə pɛ̀ kɛsə ə nyi ke sə afɨa àmɔ̀ʼ.

⁶Ə ghənə kɛsê vachi ə̀ghɨ ə̀pɛ̀ pîza nyi wùə èmɔ̀ʼ. E za nyi nə nâʼàpî ghè vɛ ə Zhə̀fè tsɨ̀yntè, kə wùə m̀sɔ̀ŋ chyase.”

⁷Ghɨə Falàsî ətəynghe ə pfɨfə sê vəyn nə, “Ə ze nyi zamə, ə̀ tè nəyn ghe nə Mosîs fo tyaʼa sê ghɨ nə wùndômə̀ kàʼa è fo ŋwàʼlè se zhwîə vəyn se chwìtè nə malə̂ ə mì tsɔ̀fə è chùmə və?”

⁸Njisə̀s ə pə̀ynsə̀ sê ghənə nə, “Mosîs tè pomə nə ghàyn kàʼa ə ghàyn chum zəyn ghaynghe kûmə̀ nə ghàyn nyi mə tɛsê təm ghaynghe sê zaʼlêzè. Pîza ze tè va zamə ə zhə̀te ə̀ mbi.

⁹M tsâ sê ghàyn nə, ə̂ chùm pîndè zhwîə vəyn ə̀ va ke nə wùzhɔyn ə̀təyn kwîə ndò, ə kyì ə wûə nə vɛ njì wùzhɔyn ə̀ ndò, ə nyi mə è və kwì kwàlə̀kè.”

¹⁰Chùmtè èpàm sə vəynse ə pìə sê vəyn nə, “Ə̂ nyi nyiə mə kə ze nyi sê wùə yî zhwîə vəyn, ə chùŋ zhîzè ə va se njiə zhwi.”

¹¹Njisə̀s ə pə̀ynsə̀ sê ghənə nə, “Zaʼlê zɨnə vachi se nâʼà pîndè, pîza kè sê ghɨ ghɛ ə Zhə̀fè nyi mə Fə fo zəyn sê ghənə.

¹²Kûmə̀ nə ghɛ tsɨ̀ə kə nyi ə ghe kaʼa ə ghe nəyn, ə wùə faŋ mə è pâʼà malə̂. Yiə nyi mə ə̀ nyì ke zamə kə tè piə ghənə, yîghe nyi mə ə nəyn əghɨ nə kə ghənə malə, yîghe tə malə̂ kûmə̀ èfɔ̂yn ə Fezhə̀vè. Nâʼà pîndè vɛ ə è kàʼa è pomə zaʼlê zɨ̀yn, pomə.”

¹³Ghɨghə ə pə̀ è mɨ̂ətə̀m sê Njisə̀s nə È tsəm sê ghənə. Pîza chùmtè èpàm sə vəynse e zɔ̂ sê ghɨ ətəynghe.

¹⁴Njisə̀s ə pìə sê chùmtè èpàm sə vəynse nə, “Ghàyn za mɨ̂ətə̀m ə m̀ pəyn sê Mi, kə ghàyn fɨyn tâmtè ghənə kûmə̀ nə fɔ̂yn ə Fezhə̀vè nyì sê ghɨ ghɛ ə ghe nyi nyiə kə ghənə.”

¹⁵È və ndə̀mə̀ ə̀gho ə vəynghe ə ghənə ewìyn ə pɔsə̂ ghənə. È və ke ndò fumə elùʼ.

¹⁶Wùə vîvè ə pə̀ sê Njisə̀s ə pìə nə, “Tyə̀ynsè, m kaʼa m nəyn kyì eghɛ echûŋ èkè se kyiə endam zɛ ə ze tə mîə va ə?”

¹⁷Njisə̀s ə pə̀ynsə̀ sê vəyn nə, “Kûmə̀ ghè ə ò pfɨfə sê Mi ghɛ zɛ ə ze tsɔ̂fə̀ ə? Ə̀ nyì ke wùə èmɔ̀ʼ kə è tsɔ̀fə̀. Ə ò kɔ̀ŋə̀ se kyi endam zɛ ə ze tə mîə va, o ndə̀mə̀ èlwɔ̂ŋ ə Fezhə̀vè.”

¹⁸Wùə ə̀təyn ə pfɨfə sê Njisə̀s nə, “Elwɔ̂ŋ èkwə̀?” Njisə̀s ə pìə nə, “Kə wùə zhwi wùə, kə wùə nyiŋə è zhwîə wùə kɨ̀sə ndom ə̀ wùə, kə wùə chɔŋ, kə wùə tyə̂m tsɛ̀ saʼ àkaŋ,

¹⁹kɔʼse pɛ̂ è nɛ̂, kɔ̀ŋ kɔ vɛve kè eghɨ kə ò kɔ̀ŋɔ̀ ngɨŋ zɛ̂zè.”

²⁰Kwuŋ endômə̀ ətəynve ə pìə sê Njisə̀s nə, “Mə ndə̀m lwɔ̂ŋ nə vɨ̂yn nâʼà èkɨ̂m. Ə̀ nyì kwəynsê ghè m kaʼa m nə ə?”

²¹Njisə̀s ə pìə sê vəyn nə, “Ə̂ ò kɔ̀ŋɔ̀ sə̂ nyi chichi ə Zhə̀fè əshi, o ndùə pəʼlə̂ èfɨa vɛve nâʼà èkɨ̂m ə fo èkɛ ətəyn sê ghɨafɨfə. Ə ò nə̀yn zɨnə mə, ə ò tə kyî èghaʼ ekwùtwəynze. Ə̂ ò se pə chûmtə̀ mi.”

²²Kə Kwuŋ endômə̀ ətəynve zɨ ghɛ nə zɛ wiynve ə kwuə vəyn, è və ndò kûmə̀ nə è tè kyi eghaʼ, ze tsɨ̂ə kə nyî.

²³Njisə̀s ə ke pì sê chùmtè èpàm sə vəynse nə, “M pîə sê ghàyn səmɔʼ nə, e tə nə̂ ə zə tɛ nâʼà sə ŋaŋ sê wùə èghaʼâ se nji elùʼ efɔ̂yn ə Fezhə̀vè.

²⁴M tsâ kwəynsə̂ sê ghàyn nə, e pɔynə̂ sê nyàm ə̀ kwaŋ se tɔynə apùʼ ə saʼke tsɛ̂ kə wùə èghaʼâ nji elùʼ efɔ̂yn ə Fezhə̀vè.”

²⁵Kə chùmtè èpàm sə vəynse zɨ ghɛ nə zɨ̂nə̀, choze ə zomə ghənə. Ghənə pfɨfə nə, “Ə̀ tə sè sɔ fɨə nâʼà ndè?”

²⁶Pîza Njisə̀s ə naynə̂ ghənə ə pìə nə, “Sê wùə m̀sɔ̀ŋ, zɨnə mə vayn kaʼa ze kyayn, pîza ghɛghe əkɨ̂m pɔynə̂ kə nyî sê Zhə̀fè.”

²⁷Pità ə pìə sê Njisə̀s nə, “Nayne kə, ghàs ə zà ghɛghe əkɨ̂m se chùmtə̀ ghô, ghàs tə kyîə ghè?”

²⁸Njisə̀s ə pìə sê ghənə nə, “M pîə sê ghàyn səmɔʼ nə, nyì se tə pə̀yn, kə Va Wùə tə nə̂ ə è və tsɨs əfekyə̀ fə efɔ̀ynfè ə Vəyn mkɔʼnè, ə ghàyn njòse pɛ̀ ghɛ ə ghàyn chûmtə̀ mi pɔŋ tsɨsə ə mkyə̀ mə̂ efɔ̀ynə̀m ə saʼa tètâŋ tə Isìlây tɨ̂nə̀ njòse pɛ̀.

²⁹Ə nâʼàpî ndè vɛ è nyi mə è və zà ndɛse, kɨ̀sə əghɔnyì ə ndômnə̀, è ghe zənə, kɨ̀sə pɨ̀a è nyì, kɨ̀sə ghɔyn, kɨ̀sə mfûʼ kûmə̀ èzə zɨme, tə kɛsə̂ kyiə əghɨ nə ghɨ̂yn è fɨa nə vɨ̂yn shîŋə̀tè wəve ə è fɨyn kyi endam zɛ ə ze tə mîə va.

³⁰Pîza tsɨ̀tsɨ̂ ə̀ghɨ̀ ghɛ ə ghe nyi əshi zôyn, tə pə̂ ə nyi epàm, ə ghɨ ghɛ ə ghe nyi epàm zôyn tə pə̂ ə nyi əshi.”