Read Mmen Matyò 20 Bible Online

Matyò 20 - Mmen bible

Matyò 20

¹Njisə̀s ə mɛ̀ ngàyn nə, “Fɔ̂yn ə Fezhə̀vè nyì kepî kə pɛ̀ àfùʼ vîvè ə è tè pɨs fɨ se ndùə kyiŋə əghɨ nə ghe səʼ fɨaʼ ə və afùʼ etwɔmke.

²Ghənə ə pomə̂ èkɛ vɛ ə è nə̀ ndaʼà ghənə ətəyn ə fetuʼ, è və tomə ghənə ə və afùʼ.

³Pɛ̀ àfùʼ ə̀təyn ə kɛsə̂ fɨə ndûə echô àfàf ə tezhwi tepole mɔ̀ʼ ə fe ə̀ghɨ mɔ̀ʼɔ ghe tyəm fu, nə̂ va ghɛze.

⁴È və pìə sê ghənə nə, ‘Ghàyn pɔŋ səʼ ndu ə ghâ fɨ̂aʼà ə mìə afùʼ etwɔmke ə m nə ndaʼ ghàyn èkɛ vɛ ə ve kwəynə.’

⁵Ghənə ə səʼə. È və nə̀ kəpî zamə ashìŋə̀ kɛ chwì kɔʼ tɛ è kɨ̂sè ə tezhwi teta.

⁶Ə nə̀ nə̂ ə nyi ə tezhwi tetâyn ezhwikwɨlə, e və fɨnə fɨə ndûə afàf ə fe əghɨ̀ əmɔ̀ʼɔghe e tyəm fu səndô, e və pfɨfə sê ghənə nə, ‘Kûmə̀ ghè ə ghàyn tyəm fâyn sə fetuʼ fefɨ̂plèfè fɨ̂aʼà va fɨake ə?’

⁷Ghənə pə̀ynsə̀ nə, ‘Ə̀ nyi kûmə̀ nə wùə paʼà njì ghàs efɨ̀aʼ.’ È və pìə sê ghənə nə ghənə pɔŋ səʼ ə fɨ̂aʼà ə vəyn afùʼ.

⁸Shîŋə̀ ezhwikwɨləke ə kwəynə, pɛ̀ àfùʼ ə̀təyn ə pìə sê tuə ghɨe fɨaʼa vəynke nə, ‘Tɔŋɔ ghɨ efɨaʼa ə ndàʼà èkɛ ə ghənə̂vè. Zhə̀te èghɨ ghɛ m tè njì kwûŋsè efɨ̀aʼ ə ndùə mɨ̂sə̀ è ghɛ m tè njì efɨ̀aʼ səshi’

⁹È və ndàʼà əghɨ ghɛ ghe tè zhə̀te fɨ̂aʼà ə tezhwi tetâyn ezhwikwɨlə èkɛ ə fetuʼe.

¹⁰Ghɨ ghɛ ə tè nji efɨ̀aʼ sə shi ə pə̀ nə ndaʼ ghənə, kwaʼtə̀ nə ə nə̀ ndaʼà ghənə èkɛ ə və tsɨ̂ə tsɛ və ghɨ̀ ghɛ ə tè zhə̀te fɨ̂aʼkè ə tezhwi tetâyn ezhwikwɨlə, pîza ə ndàʼà kəpî ghənə èkɛ əfetuʼe.

¹¹Kə ghənə tè fi kɛ ətəynve, ə zhə̀tə̀ se ghàm ə pɛ̀ àfùʼ.

¹²Ghənə tè pîə nə, ‹Ghɨ ghɨ̀yn ə ghe pə̂yn kwûŋsè fɨ̂aʼ ke sə chwìə emɔ̀ʼ, ò vêo ndàʼ ghənə kèpi kə ò ndàʼ ghàs, mə ghàs ə zɨsê fɨ̂aʼ tuʼfe fɨ̂flèfè etyə̀ chwì.›

¹³Pɛ̀ àfùʼ nə vɛ ə pìə sê wùə èmɔ̀ʼ ə ghənə fètəyn nə, ‹Zɨte ə soyn, m pâʼà chɔŋtê ghò. Nâʼà sə kàyn piə ò fe pomə nə m ndaʼ gho sə ekɛ ə fetuʼve ə?

¹⁴Zôyn fi ndâʼ zɛze ə kwɨlə̂. Ə̀ kɔ̀ŋ mi se ndàʼ ə wùə vɛ ə m tè njì kwûŋsè kèpî kə m ndâʼ ghò.

¹⁵M kyi va tyaʼa se nə̀yn eghɛ zɛ m kɔ̂ŋə̀ se nə̀yn è kɛ vɨmve ə̂? Mə ò ghə̀ʼə̀ ndò kûmə̀ nə m kyi ətəm əchûŋ ghə?›”

¹⁶Njisə̀s ə mɨ̀sə̀ ngàyn zɨ̀nə̀ pîə nə, “Ghɨ ghɛ ə nyi ashi zôyn tə pə̂ ə nyi èpam, ghɛ ə ghe nyi epàm zôyn tə pə ə nyi àshi.”

¹⁷Njisə̀s è chùmtè èpàm sə vəynse tè kɔʼɔ ndûə ə Njèlusalɛ̀m. Kə ghənə tè kɔʼɔ ndûə, È və tɔŋtə̂ kɨŋtə̂ pə̂ è ghənə ə nyaʼtə̂ pîə sê ghənə nə,

¹⁸“Ghàyn zɨte ghâsènì kɔʼɔ ndûə ə Njèlusalɛ̀m zôyn, elùʼ vɛ ə nə̀ fo tsɛsə̀ Va Wùə sê ghɨ kɔʼsə nə eshyə̀ engaŋtə è tyə̀ynsè sə alàŋsè. Ghənə nə̀ tsɛsə̀ èsaʼ nə è kyi se kwu.

¹⁹Ə nji fo vəyn sê tûm nə ve nyəʼse vəyn ə pus vəyn è wàynsè, ə fɨyn payntê vəyn ə awâmnè, epàmə̂ m̀tuʼ mtam ə Zhə̀fè zomse Vəyn.”

²⁰Epàm ətəyn, zhwìə Zepɛndì ə ke pə̀yn sê Njisə̀s è ghɔ vəyn ghendômə̀ ghəpɛ̀, ə pə̀ ə tɨmə ə̀ndzɨs ə vəyn əshi ə chyatə̂ vəyn nə, È nəyn zhi èghɛ echûŋzè.

²¹Njisə̀s ə pfɨfə sê vəyn nə, “Ò kyiŋə nə zhi ghayn ghe sê gho ə?” È və pìə nə, “Tsɨ̀ne sê mi nə, ashìŋə̀ kɛ ə ò nyi ə ghò efɔ̀yn, ghɔyn ghɨm ghɨnə̀ ə̀pɛ̀ tə tsɨsə̂ èmɔ̀ʼ ə ghò akɔyn ə zhiəke, è və mɔ̀ʼɔ̂ ə ghò akɔyn ə ekôkè.”

²²Pîza Njisə̀s ə pə̀ynsə̀ sê ghɔyn endômnè ətəynghe nə, “Ghàyn ke va ghɛ zɛ ə ghàyn pfɨfə. Ghàyn nyi kàʼa ə ghàyn fe ngəʼ zɛ ə m tə fe ə?” Ghənə pə̀ynsə̀ sê Njisə̀s nə, “Èn.”

²³Njisə̀s ə pìə sê ghənə nə, “Səmɔʼ, ghàyn tə fe ndò ngəʼ zɛ ə m nyi se tə fe, pîza ə va chi eluʼ vɨmve se chɔʼɔ wùə vɛ ə è tə tsɨsə ə mi ekɔyn etwɔ è kɨ̂sè ə mì ekɔyn ekôvè. Pîza luʼ ətəyn nyi sê ghɨ ghɛ ə Pɨ̀a vɨ̂m pɨaʼte ndə̂m sê ghənə.”

²⁴Kə chùmtè epàm sə vəyn sə mɔ̀ʼɔ sɛ èghɨm zɨ ghɛ ətəyn, ə nyɔ̂ʼsə̀ ètɔŋ sê ghɔnyì nə ghɛ ə̀ pɛ̀.

²⁵Njisə̀s ə tɔŋɔ zûŋtə̀ ghənə əkɨ̂m ə pìə sê ghənə nə, “Ghàyn ghe ke nə fɔ̂yntè è ghɨ ghɛ ə saʼa mbi zɨ̀yn njìə atyaʼ ə ghənə̂kè sə̂ saʼa ə̀ghɨ ghənə̂ghè ə?

²⁶Pîza, e nə̀ nə ze ə vachi zamə ə ghàyn ə fètəyn. Nâʼàpî ndè vɛ ə è kyiŋə sə̂ nyi wùə èngaŋtə ə ghàyn əfètəyn kyi sə̂ nyi wùə èfɨ̀aʼa sê ghàyn,

²⁷mə naʼapi ndè ə ghàyn ə fètəyn vɛ è kɔ̀ŋə̀ sə̂ nyi əshi, kyi sə̂ nyi àkɔs se ghàyn.

²⁸E za nyi kepî eghəs kə Va Wùə tè tàʼa pə̀yn nə ə fɨ̂aʼà sê vəyn. È tè pə̀yn sə̂ fɨ̂aʼà sê ghɨ, se fɨnə fo ngɨŋə̂ ə̀ vəyn se sɔzà əghɨ tsɨəghe.”

²⁹Kə Njisə̀s yî chùmtè èpàm sə vəynse tè ndô pə̂ ə Njèlikò, nɔ̂yn ə ghɨ̀kè e chûmtə̀ ghənə.

³⁰Ghɨə fofə tè nyì əpɛ̀ tsɨs etipìə èndom. Kə ghənə tè zɨ nə Njisə̀s tsɛ̀ ndò, ghənə ə pɨa pîə nə, “Vâ fèghàŋ fə ndɛfə Ndàfîtfè, kose səyn sê ghàs!”

³¹Nɔ̂yn ə ghɨ̀ kɛ ə ke tè nyì fumə e kɨ̂ytə̀ ghənə pîə nə ghənə kɨme mɔŋ, pîza ghənə tɔ̀ʼɔ̀ pɨa ndûə kə èshike pîə nə, “Va fèghàŋ fə ndɛfə Ndàfîtfè, Pɛ̂pɛ, kose səyn sê ghàs!”

³²Njisə̀s ə tyəmə̂ ə tɔŋɔ ghənə ə pfɨfə nə, “Ghàyn kyiŋə nə m ghaynghe sê ghàyn ə?”

³³Ghənə ə pìə nə, “Pɛ̂pɛ, nə̀yn nə shi ghasghe ə fe tèluʼ.”

³⁴Njisə̀s ə kosə̂ èsəyn sê ghənə ə ndə̀mə̀ ə̀gho əvəynghe ə ghənə əshi. Kè sə ashìŋə̀, ghənə zhə̀tə̀ se fe teluʼ ə ndò sè chûmtə̀ ndùə vəyn.