Read Mmen Matyò 21 Bible Online

Matyò 21 - Mmen bible

Matyò 21

¹Kə Njisə̀s yî chùmtè èpàm sə vəynse tè ndù paʼsə̂ ə Njèlusalɛ̀m, ə pə̀ ə tə̀ʼ ə Petfàs ə pfɨ̀yn ə Sèolìf ə tomə sèchùmtè èpàm sə vəynse sepɛ̀,

²ə pìə sê ghənə nə, “Ghàyn nji ndu fa əfètə̂ tə̀ʼ ə̂ ghàyn əshi. Ghàyn nə̀ piə njiə ndûə kə nyî ə fènjàkâs kə ə faŋa è vayn ə ngwùŋ ə̀təyn. Ə ghàyn sɔ pəyn è səynse sê Mi.

³Ə wùə pfɨf sê ghàyn nə ghàyn sɔ̀ kûmə̀ ghè ə? ghàyn ə pìə sê vəyn nə, ‹Pɛ̂pɛ nyîə kyiŋə səynse. Ə ghàyn pì zamə, kè sə ashìŋə̀ ə wùə ə̀təyn za sê ghayn.›”

⁴Ghɛ nə zɨ̂nə̀ tè kyànə se lwiynsê eghɛ zɛ ə Zhə̀fè tè pi tɔynə ə fɨ̀aʼtè nə:

⁵“Pì sê ghɨ tə̀ʼ ə̀ Zayɔ̀nə̀ nə, Ghàyn fe, fɔ̀yn vâyn vɨ̀nə è pə̀ sê ghàyn è ngɨmnêzè, tsɨs etûə njàkâs, e kwuŋ ə njàkâs endomə̀vè.”

⁶Chùmtè epàm sə təynse ə ndùə ə nə̀ kə èghɛ zɛ ə Njisə̀s pì nə ghənə nəyn.

⁷Ghənə ə pə̀ è njàkâs ə̀təyn paʼsə̂ è vayn ə lafsə̂ è laf ə ghənə̂kè, Njisə̀s ə kɔʼɔ tsɨsə̂ ətu.

⁸Nɔ̂yn ə ghɨ̀kè e sè chɔʼtə̂ àlaf ə ghənə̂kè, maʼà endom È ve tyâŋə̀ ətu. Yîghe e kyimtə̂ sèngɔyn sə mkàʼsè, ndə̂mə̀ endom.

⁹Nɔ̂yn kɛ ə ke tè ndùə ə vəyn əshi è kɛ ə ke tè pə epàm ə zhə̀tə̀ sè pɨa pîə kə nə, “Òsanà, tsîtèzè nyì sê Va Fɔ̀yn ə̀ ndɛ ə̀ fèghàŋ ə Ndàfît! Pɔsê e nyi sê vɛ è pə̀ e zə ə Pɛ̂pɛze! Òsanà, tsîtèzè nyì sê Zhə̀fè elùʼ engaŋtəve!”

¹⁰Kə Njisə̀s tè nji ə Njèlusalɛ̀m, tɔf ə ghɨ̀ zə fɨ nâʼà èkɨ̂m. Ghɨghe pfɨfə nə, ə̀ vɨ̀nə nyi nde?

¹¹Nɔ̂yn ə ghɨ̀ kɛ ə pə̀ynsə̀ kə nə, “Ə̀ nyi Njisə̀s ə fɨ̀aʼtè vɛ è ndò ə tə̀ʼ ə Nazalɛ̀t apàs endaʼ ə Ngalìlîkè.”

¹²Epàm ətəyn, Njisə̀s ə njiə ə Ndɛ Ètsə̀mə sè chûmə̀ fɨsə̂ ə̀ghɨ ghɛ ə ghe tè zhɔnə, pəʼlə̂ nâʼà ə̀kɨ̂m. È və pɨŋsə̂ maʼà èlwɔ̂ŋ əghɨ̀ ghɛ ə ghe tè kwiynə kɛve ə pɨŋsə̂ maʼà kəpî mkyə̂ mə ghɨ̀ ghɛ ə tè pəʼlə kwɨ̀lə̂m.

¹³È və pìə sê ghənə nə, “Ə nyaʼ ə Ŋwàʼlè ə̀ Fèzhə̀ nə, Zhə̀fè pi nə, ‘Ə tə nə̂ ə tɔŋtə̂ ndɛ zɨ̂m nə ndɛ ètsə̀mə.’ Pîza ghàyn ghe kɛse zôyn sə ‹Elùʼ ə ghɨ̀ echɔŋəve.›”

¹⁴Ghɨ fofə, è m̀ngə̂s ə pə̀ sê vəyn fu, È və tsuʼə ghənə.

¹⁵Pîza, ghɨ kɔʼsə nə eshyə̀ ngaŋtəghe, è tyə̀ynsè sə alàŋsè e nyɔ̂ʼsə̀ ètɔŋ kə ghənə fe ghɛ ə kayntə ghɛ è nə̂ fɨnə zɨə kə mɨə̀tə̀m tè pɨa pîə fu nə, “Tsîtèzè nyì sê Va fèghàŋ fə ndɛ ə Fɔ̀yn Ndàfîtfè!”

¹⁶Ghənə ə pfɨfə sê Njisə̀s nə, “Ò zɨə ndò ghɛ zɛ ə mɨə̀tə̀m mîə pì ə?” Njisə̀s ə pə̀ynsə̀ sê ghənə nə, “Ghàyn pâʼà tɔŋɔ luʼ ə Ŋwàʼlè ə̀ Fèzhə̀ zɛ ə nyâʼ ətəyn nə, ‹Zhə̀fè pɨaʼte mmɨ̂ətə̀m è ghɔyn epɔ nə ə tsìtə̀ zhi nâʼà àchûŋ.›”

¹⁷Njisə̀s ə ndò zâ ghənə ə fɨə Njèlusalɛ̀m ə ndùə pɨənə̂ ə tə̀ʼ ə̀ Petanì.

¹⁸Nâʼà è pɨ̂sə̀pɨ̂sə̀, kə Njisə̀s tè ndo ndûə ə Njèlusalɛ̀m, chɨ̀ŋ tè nyîə zafə Vəyn.

¹⁹È və fe fèkâʼ fə sefîkfè endom, ə njiə ndûə esâs ə̀təyn pîza ə tàʼa fe atam kyîke fu etûə fèkàʼ ə̀ tsɛ̂ kəva sɛ̂tè ə se pì sê kâʼ fə ətəynfe nə, “Ò tə fɨnə muə va twɔmve!” Kè sə ashìŋə̀, kâʼ fə sèfîkfə təynfe ə zomə.

²⁰Chùmtè èpàm sə vəynse ə fe èghɛ nə zɨ̂nə̀ sè nyi è kayn ə ke pfɨf sê Njisə̀s nə, “Kâʼ fə sèfîkfè kwì zayn se zom kè sə fe zhwiə?”

²¹Njisə̀s ə pə̀ynsə̀ sê ghənə nə, “M piə sê ghàyn səmɔʼ nə, ə ghàyn kyi pomə̂zè mɛnə̂ chîəva ndô, ə ghàyn ə nyi se kàʼa ghàyn nəyn ghɛ zɛ ə m nə̂yn sê kâʼ fə sèfîk fɨ̂nə̀ ə fɨyn pi nâʼà sê pfɨ̀yn èngaŋtə zɨ̂nə̀ nə, ‘Mùʼə ə ndùə tânə̀ ə enjwì ə fengwaŋve,’ ə è nəyn ke kə ghàyn pì.

²²Ə ghàyn kyi pomə̂zè, ə ghàyn kyi nâʼàpî àkè kɛ ə ghàyn pfɨf e tsə̀m.”

²³Njisə̀s ə kɛsə̂ ə ndûə njiə ə Ndɛ Ètsə̀mə sè zaʼlə̂ ə̀ghɨ fu, ghɨ kɔʼsə nə eshyə̀ ə ngaŋtəghe è chəʼsə Isìlâysè ə pə̀ pfɨfə sê vəyn nə, “Ò kyi atyaʼ àkè se nə̀yn ə ghɛ ghɨ̀yn ə? Ə̀ fo nde tyaʼ nə kɨ̂yn sê ghò ə?”

²⁴Njisə̀s ə pìə sê ghənə nə, “M nə̀ pɔŋə pfɨfə èghɛ èmɔ̀ʼ sê ghàyn, ə ghàyn pə̀ynsè, ə m ke tsàyn sê ghàyn tyaʼ kɛ m kyi sə̂ nə̂ ə̀ghɛ nə ghɨ̂yn ətəyn.

²⁵Njɔyn tè fo mmo mə è njì ghayn tyaʼke ə? Ə̀ tè fo Fèzhə̀ sê vəyn mə, mə əghɨ ə?” Ghənə zhə̀tə̀ se saʼnê è ngɨŋ sə ghənə̂sè pîə nə, “Ə ghâsènì pì nə, ‘Ə fo Fèzhə̀ tyaʼa sê vəyn,’ ə è pfɨf nə, ‘Kûmə̀ ghè ə ghàyn tè tàʼa pomə̂ se Njɔyn ə?’

²⁶mə ə ghâsènì pì nə, ‘Ə tè fo əghɨ tyaʼa sê vəyn,’ ghɨ kaʼa ghe mɔm ghɛ sê ghâsènì kûmə̀ nə ghənə əkɨ̂m tè ke ndô nə Njɔyn tè nyi fɨ̀aʼtè èghaʼâ.”

²⁷Ghənə ə pìə sê Njisə̀s nə, “Ghàs ke va.” Njisə̀s ə pìə sê ghənə nə, “M nə̀ pɔŋɔ tsâ va luʼ vɛ ə m njî tyaʼa sə̂ nə̂ əghɛ nə ghɨ̂yn ətəyn.”

²⁸Njisə̀s ə fɨnə pfɨfə sê ghɨ eshyə̀ engaŋtə è chəʼse ndaʼse nə, ghàyn fe zàyn ngàyn zɨ̀nə? Wùə tè nyi kyi ə̀ghɔyn əpɛ̀. Ə ndùə sê ve ndumə ə pìə nə, ‘Vayn vɨ̂m ve ndômə̀, Səʼ fə̀ afùʼ ə mtama ndâyn.’

²⁹Vâyn endômə̀ ə̀təyn ə pə̀ynsə̀ nə, ‘M kɔ̂ŋə̀ va se səʼ. Pîza ə nə̀ kɛsə̂ kwiynə̂ èkwâʼtè ə vəynze ə səʼə.

³⁰Pɨ̀a vəyn ə fɨnə ndùə sê Kùmtè ə vâ vəynke ə fɨnə pîə kə èghɨ kə è fə pì sê və shi. È və pomə, pîza ə tàʼa səʼ.’

³¹Njisə̀s ə pfɨfə sê wùə èshyə̀ èngaŋtə nə, Ə̀ nyi nde ə ghɔyn ghɨ̂yn əfètəyn ə̀pɛ̀ ə è nə̀yn ghɛ zɛ pɨ̀a tè kyiŋə ə? Ghənə pə̀ynsə̀ nə, “Ə nə̀yn və shi.” Njisə̀s ə ke pì sê ghənə nə, “M pîə sê ghàyn səmɔʼ nə, ghɨ ghɛ ə ghe tənə tâksè è kwàlàvè tə njiə elùʼ efɔ̂yn ə Fezhə̀vè sə ghàyn sə shi.

³²M pîə nyî kûmə̀ nə Njɔyn Fo M̀mò tè pə̀yn sê ghàyn tyə̂nə̀ èndom echûŋ vɛ kə ghàyn chumte, ghàyn ə tàʼa pomə̂ se vəyn, Pîza, ghɨ ghɛ ə ghe tənə tâksè è kwàlàvè ə pomə̂. Pî kə ghàyn tè fe zɨnə mə, ghâ tàʼa kwiynê, ə tàʼa pomə̂ se vəyn.”

³³Njisə̀s ə fɨnə pîə nə, “Ghàyn zɨte kwəynsê ngàyn ə̀ mɔʼɔ̂, ‘Wùə vîvè tè kyi eluʼ ə zho ètwɔm ətəyn, ə lò kyîŋə̀ nga mbàyn ə̀təyn, ə tɨmə èpə zɛ kə ə nûʼə̀ ètwɔm ətəyn fɛtə mlɨ̂, ə pɛ àpfɨ̀ə e tsɨ̀ŋnəke əfètə̂ àfùʼ ə ke fo afûʼ ətəynke sê ghɨ nə fɨaʼà, chyâtə̀ fo vəyn è fɨa vɛ ə ve fɨə ətəyn, ə ndò ndûə èkwî.

³⁴Shîŋə̀ ə kwiə ke ə kwəynə, è və tomə ə̀ghɨ vəyn ghe fɨaʼa nə ghənə ndu pi sê ghɨ fɨaʼa ghɛ ə è tè fo fûʼ nə kɛ sê ghənə nə ghe fo və vəyn nə etwɔm.

³⁵Ghɨ ə fɨaʼa təynghe ə ndùə kyîə ə̀ghɨ ghɛ ə pusə èmɔ̀ʼ, ə zhwiə ve kòmtə, ə fɨnə tɨmnə̂ zhwiə və mɔ̀ʼɔ è chîə.

³⁶Pɛ̀ àfùʼ ə̀təyn ə fɨnə tomə kwəynsə̂ ə̀ghɨ efɨaʼa ə vəyn ghəmɔ̀ʼɔ, ghe tsɨ̀ə tsɛ̂ ghɛ ə è tè tom sə shi, ghɨ afùʼ ghɛ ə nə̀ kə sê ghənə kə fə nə̀yn sê ghəshiə

³⁷È və tomə kwûŋsə̀ vâyn èndômə̀ ə̀ vəyn sê ghənə, ə pìə nə, ‘Ghənə nə̀ kɔʼsə̂ vayn vɨ̂mè.’

³⁸Pîza, ghɨ fɨaʼa nə ghɛ ə fe kə vâ vəyn pə̂, ə pìə sê ngɨŋ sə ghənə̂sè nə, ‘Ə̀ vɨ̂nə nyì ke nâʼà va pɛ̀ àfùʼ. Ghàyn pəyn ə ghâsènì zhwi vəyn ə kyi fɨa ə vəynve.’

³⁹Ghənə ə kyîə vəyn ə màʼà fɨsə̂ vəyn fumə afùʼ ə zhwiə vəyn.”

⁴⁰Njisə̀s ə pfɨfə sê ghɨ kɔʼsə nə eshyə̀, è ndumnə nə, “Zôyn ə pɛ̀ àfùʼ ə̀təyn pə̂yn, ə è pi nə ghe sê ghɨ ghɛ ə fɨaʼà fumə afùʼə?”

⁴¹Ghənə ə pìə sê vəyn nə, ə ze kyâyn nyî ə pɛ̀ àfùʼ ə̀təyn zhwite ghɨ piə nə ghɨ̂yn ə è fo fɨsê afûʼ ətəynke sê ghɨ ndôghè, ə ghənə ə fə̂, fo və vəynve nə efɨa ashìŋə̀ ə kwiəke.

⁴²Njisə̀s ə pìə sê ghənə nə, “E za nyi nə ghàyn pâʼà tyəmə̂ tɔŋɔ zɨə eluʼ ə Ŋwàʼlè ə̀ Fèzhə̀ vɨnə ə ve pîə nyiə nə: ‘Chi zɛ ə ghɨ fɨaʼa tè tə ə kɛsê sə echi epòlə̀ ə ndɛze. Ə̀ nəyn Pɛ̂pɛ nyî Ə̀ nyi eghɛ ekayntəze sê ghâsènì.”

⁴³Njisə̀s ə kwəynsə̂ nə, “Ə tə fiə tsɨsə̀ eluʼ vayn sê ghàyn ghɛ ə ghàyn saʼa fɔ̂yn ə Fezhə̀vè ə fo sê ghɨ ghɛ ə ghe nyi chichi.”[8]

⁴⁴

⁴⁵Kə ghɨ kɔʼsə nə eshyə̀ engaŋtəghe è ghɨə Falàsîə ə zɨə sè ngàyn sə Njisə̀sè, ə kê kə ndò nə è wàmnə̀ kûmə̀ ghənə.

⁴⁶Ghənə e kyiŋə èndom se kyîə vəyn pîza fânə̀ ànɔ̂yn kɛ ə ke tè nyì fu, kûmə̀ nə ghɨ anɔ̀yn ə təynghe tè fe Njisə̀s kə fɨ̀aʼtè.