Read Mmen Matyò 22 Bible Online

Matyò 22 - Mmen bible

Matyò 22

¹Njisə̀s ə fɨnə mɛ̂ ngàyn sê ghənə ə pìə nə,

²“Ə kaʼa ə səyne fɔ̂yn ə ekwùtwəyn è fèmɛngâyn fə fɔ̀yn vîvè ə è tè pɨaʼte zhi ə malə̂zè sê va vəyn ve ndômə̀.

³Ə tomə ə̀ghɨ fɨaʼa ə vəynghe nə ghe ndu tsayn se ghɨ ghɛ ə tè tɔŋə fumə ə malə̂, pîza ghɨ ətəynghe ə tə nə ghe pə̂ va.

⁴È və fɨnə tomə kwəynsə̂ ə̀ghɨ fɨaʼa ə vəyn ghə mɔ̀ʼɔ nə ghe ndu pi sê ghɨ ghɛ ə tè ndàmne nə, ə pɨaʼtê mɨ̂sè zhize, ə kàytə̀ sèmbɔ̀ŋ è nyam se ghaʼlə̂sè, nâʼà pîghè e sè nyi ke se zhi, nə ghənə pəyn elùʼ e zhiəve.

⁵Pîza ghɨ ghɛ ə tè tɔŋɔ ə tàʼa ndə̀mə atu eghɛ nə zɛ, nâʼàpi ndè e fɨə ndùə kə vəyn elùʼ. Ghɨə mɔ̀ʼɔghe ə səʼə ə ghənə mfùʼ, yîghe ə ndò ndûə ə ghənə ətelùʼ tepəʼləte.

⁶Yîghe kyiə ə̀ghɨ fɨaʼa nə ghɛ ə pusə zhwiə ghənə.

⁷Fɔ̀yn ə zɨə eghɛ ətəyn, ə zafsə̂ èndwɔ̂ nâʼà sə ŋaŋ ə tomə sèsokə̀ʼ sə vəynse. Kə ghənə ndû tâyn pî zɨyn, ə zhwitə̂ ə̀ghɨ ghɛ ə tè zhwi ghɨ ə fɨaʼa ghɛ ə nyɔ̀ʼɔ̀ èndaʼa ə ghənə̂zè.

⁸È və ke tɔŋə̂ əghɨ fɨaʼa vəynghe ə pìə sê ghənə nə, ‘Zhiə malə̂zè nyi mə pɨaʼte ndəm, pîza ghɨ ghɛ ə M ndâmnè kɔʼɔ kwəynə va se zhi zəynze.

⁹Zôyn ghàyn fɨ ndu efàf ə tendom teghaʼlə̂tè ə ndamne nâʼàpî ndè vɛ ə ghàyn fe.’

¹⁰Ghɨ fɨaʼa nə ghɛ ə fɨə ndùə efàf ə zùŋtə̀ nâʼà ə̀ghɨ ə̀kɨ̂m ghɛ ə ghənə tè fe, ə ghe chûŋə̀ è ghe piə, se zaʼâ kə ndɛ ə̀ malə̂ ə̀təyn lwiyn.

¹¹Pîza kə Fɔ̀yn tè pə̀yn se fe ə ghɨə ndamnəghe ə fe wùə fumə ndɔ̀ʼɔ è maʼa ndzɨs sə malə̂sè.

¹²È və pìə se vəyn nə, ‘Soyn, ò kwì zayn se tsɛ nji fàyn ndɔ̀ʼɔ ò maʼ ndzɨsə malə̂sè ə?’ Wùə ə̀təyn e kyi va ghɛze se pì.

¹³Fɔ̀yn ə ke pì sê ghɨ vəyn ghe fɨaʼa nə, ‹Ghàyn kol kɔyntə vəynte è fɨəyntə vəynte ə maʼa fɨsê vəyn elùʼ alɨm, elùʼ vɛ ə è nə̀ nə̂ ə è və chîə, kwɨlə ə̀sɔŋ.›”

¹⁴Njisə̀s ə kwùŋsə̀ nə, “Zhə̀fè ə tɔŋə̂ ghɨ tsɨə nə ə nyi ə vəyn etyə̂ àlâŋ, pîza ə kwùʼə̀ chɔʼɔ fɨsə̂ kə ə̀shi əghɨ̀ghè nyî.”

¹⁵Ghɨə Falàsîghə ndò sè nə̂ èpɨaʼtê endom se nə̀yn nə Njisə̀s wàmnə tsas, ə kyi vəyn.

¹⁶Ghənə ə ke tomə se chùmtè èpàm sə ghənə̂sè è ghɨə anɔ̀yn ə Ɛlɔ̀tkè sê Njisə̀s. Kə ghənə ndû tâyn ə pìə se Vəyn nə, “Tyə̀ynsè, ghàs ke ndô nə ò wàmnə̀ kə səmɔʼ, zaʼlə̂ kə èghɛ zɛ ə ze nyi səmɔʼ kûmə̀ àlâŋ ə Fèzhə̀kè se ghɨə, fɨmsə̂ va ngɨŋ zɛ̂zè kûmə̀ ə̀ghɛ ghɛ ə ghɨ kwaʼtə̀, pî ə̀ghɨ ghɛ ə ghənə nyi ghənə kûmə̀ nə ghənə vayn kaʼa kwiyne zaʼlê zɛze.

¹⁷Tsàyn sê ghàs nə ə ghò ekwâʼtè lâŋkè pomə̂ ndò nə ə maʼà tâks sê fɔ̀yn èghaʼâ ə Lûm mə, mə ke pomə̂ va ə?”

¹⁸Njisə̀s ə kê èghɛ epi zɛ ə ghənə tè pɨaʼtə ə ke pì sê ghənə nə, “Ghàyn ghe kaŋkaŋə nə ghɨ̂yn! Kûmə̀ ghè ə ghàyn mɔ̀msə̀ se mɔ̀m ə mi ə?

¹⁹Ghàyn tyən pəyn èkɛ akas vɛ ə mâʼà tâks ətəyn sê mi.” Ə pə̀ è kɛ akasve sê vəyn.

²⁰È və pfɨfə sê ghənə nə, “Ə̀ nyi ekyâʼ è zə nde ze nyiə?”

²¹Ghənə ə pə̀ynsə̀ nə, “Ə̀ nyi zə Kaysàzè.” Njisə̀s ə ke pì sê ghənə nə, “Ghàyn fo sê Kaysà fɨa vɛ ə kyi Kaysà, ə fo sê Zhə̀fè fɨa vɛ ə kyi Fezhə̀.”

²²Kə ghənə tè zɨ zɨnə mə, cho ə ghənə̂ghè ə zomə, ghənə ndò zâ vəyn.

²³Kèpî fumə fetuʼ, ghɨə Sandùsîə ə pə̀ sê Njisə̀s, ə ghɨ ghɛ ə ghe pomə va nə wùə tə zômə̀ ndò, ə pfɨfə sê vəyn nə,

²⁴“Tyə̀ynsè, piə lâŋ ə Mosîskè pì sê ghàs nə, ‘Ə ànyì ə̀ wùə kwu, kyi zhwi pîza kyi va ghɔnə, ə ànyìə wùə èkwuə ə kyi se njiə zhwiə kwu ə̀təyn, nə yî vəyn piə ghɔynghe sê ànyìə vəynvê kwuə nə vɛ ə’

²⁵Zôyn, ghɔnyì yîghe tè ndamə fâyn ə̀sɛ̀mbɛ̂, və shi ə njìə zhwi ə kwuə kyi va ghɔnə, ə zà zhwîə vəyn sê ànyìə vəyn.

²⁶Vɛ mə ə kwuə kəpî ndɔ̀ʼɔ è piə vayn yîə zhwiə kwu nə vɛ. Kyì eghɛ nə zɨ̂nə mə ə kyànə̀ kəpî sê kòmte ànyìə vəyn nə vɛ, se tso zaʼâ ə ghənə esɛ̀mbɛ.

²⁷Epàm ə̂təyn, wùzhɔyn ə̀təyn ə pɔŋɔ kwuə.

²⁸Zôyn, ə̀ tə nə̂ ə nyi etuʼ vɛ ə zômə̀, ə wùzhɔyn ə̂təyn ə nyi zhwîə ndè, kûmə̀ nə ghɔnyì nə ghɛ ə̀kɨ̂m ə tè malə̂ vəyn sə zhwiə?”

²⁹Njisə̀s ə ke pì sê ghənə nə, “Ghàyn ə pì pofsê kûmə̀ nə ghàyn zɨə kê va ghɛ zɛ ə Ŋwàʼlè ə̀ Fèzhə̀ pìə, fɨnə zɨə kê va nə tyaʼa Fezhə̀kè nyì zaynzə.

³⁰Ə̀ tə nə̂ ə nyi ezhoghɛ əghɨ zômə̀, ə wùə ə njiə va zhwi, wùə e pomə̂ va ndom. Ghɨ tə nə̂ ə nyi kə setsì ekwùtwəyn mə malə̂ va.

³¹Ghàyn pâʼà tɔŋɔ̂ ghɛ zɛ ə Zhə̀fè pì sê ghàyn kûmə̀ èzômə̀ ə? Zhə̀fè tè pi kûmə̀ ghə̀ pɨ̀a ghasènìghə shiə nə,

³²‘M nyi Fezhə̀ fə Aplàghâmfè, nyi Fezhə̀ fə Azɨ̀kfè, nyi Fezhə̀ fə Njàkɔ̂pfè.’ Zhə̀fè nyi Fezhə̀ fə ghɨ̀ ghɛ ə pa ndamə, ə̀ va Fèzhə̀ fə ghɨə ghɛ ə nyi mə ə kwutê.”

³³Ə pə̀ kə nɔ̂ynkè zɨ zaʼlê ə Vəynze, nyi è kaynze.

³⁴Kə ghɨə Falàsîə zɨ nə Njisə̀s ə kɨmsê cho ə ghɨə Sandùsîə, ghənə ə tsɨ̀yntə̀ pə̂.

³⁵Wùə èmɔ̀ʼ ə ghənə əfètəyn, ə nyi tyə̀ynsè àlâŋ ə mɔ̀msə̀ se tam echo Njisə̀szè è pfɨfze nə,

³⁶“Tyə̀ynsè, ə nyi esaʼ èkè əfètə̂ tèsaʼ tə Mosîstè ə ze ngaŋtə tsɛ̂ lwɔ̂ŋ vekɨ̂m ə?”

³⁷Njisə̀s ə pə̀ynsə̀ nə, “Ə̀ nyi zɛ ə ze piə nə, ‘Ò kyi sə̂ kɔ̂ŋɔ̀ Pɛ̂pɛ Zhə̀ fɛfe è təm ghɛghe ə̀kɨ̂m, è zuʼ sɛse sekɨ̂m, è kwâʼtè zɛze ekɨ̂m.’

³⁸Ə̀ zɨnə nyi zɛ ə ze ngaŋtə tsɛ̂ ə̀ fɨyn nyi àlâŋ ə shike.

³⁹Kùmtè alàŋ kɛ ə ke ngaŋtə e nyi kepî zamə nə, ‘Ò kɔ̂ŋɔ̀ èkɔ vɛve kè eghɨ kə ò kɔ̂ŋɔ̀ ngɨŋ zɛ̂zè.’

⁴⁰Saʼ tə Mosîstè nâʼà tèkɨ̂m è zaʼlê ə sèfɨ̀aʼtè se ghaʼâsè tè nyɨ̀ŋə zaʼnə̂ fa elwɔ̀ŋ èpɨ̀a.”

⁴¹Ghɨə Falàsîə tè pa nyi ke ə ghənə anɔ̀yn, Njisə̀s ə ke pfɨf sê ghənə nə,

⁴²“Ghàyn kwàʼtə̀ nə ghe kûmə̀ vɛ ə chɔʼ ndəm ə? È ndò ə ndè fèghàŋfə nde fə?” Ghənə ə pə̀ynsə̀ nə, “È ndò pə̂yn ə feghàŋfə ndɛ fə fɔ̀yn Ndàfîtfè.”

⁴³Njisə̀s ə pfɨfə sê ghənə nə, “E za nyi za, Zuʼse ə ŋwaʼase ə kwiə zàyn se fɨnə nə̀yn nə è tɔŋtə va vəyn nə vɨ̂yn nə Pɛ̂pɛ ə? Ndàfît ə pìə nə:

⁴⁴‘Pɛ̂pɛ Zhə̀fè tè pì sê Pɛ̂pɛ vɨm nə, Tsɨsə apàs ekɔyn e twɔ kɨma se zaʼâ kə m ndəm pàyn sɛse əghò etyə̂ ə̀ghòl.’

⁴⁵Ə Ndàfît è ngɨŋə̂ vəyn tɔŋtə vəyn nə Pɛ̂pɛ, ə vɛ ə chɔʼ ndə̂m ə fɨyn nyi zàyn Va və ə?”

⁴⁶Wùə e sè fɨnə pə̀ynsə̀ va Njisə̀s. Se zhə̀tè fumə ə fetuʼ, wùə ə tàʼa fɨnə tyəmə mɔ̀msè se pfɨf epfɨf sê Njisə̀s.