Read Mmen Matyò 24 Bible Online

Matyò 24 - Mmen bible

Matyò 24

¹Njisə̀s ə fɨə apɨəyn ə Ndɛ Etsə̀məke sè ndô ndùə, chùmtè èpàm sə vəynse ə pə̀ se Vəyn ə pìə nə È fekə ndom vɛ ə pɛ ndɛ ə̀ Fèzhə̀ ətə.

²È və pìə sê ghənə nə, “Kə ghàyn fe ghɛ ghɨ̀yn ə̀kɨ̂m nyi, m pîə sê ghàyn səmɔʼ nə chi zhîze tə faŋə va etûə zə mɔ̀ʼɔze, ə tə pɨytə̀ maʼà tsosə̂ nâʼà ghəynghe əkɨ̂m.”

³Njisə̀s ə kɔʼɔ ə pfɨ̀ynə̀ Sèolìfs ə tsɨsə̂ ə chi. Chùmtè èpàm sə vəynse ə nyaʼtə̂ pə̂ se Vəyn ə pîə nə, “Tsàyn sê ghàs shîŋə̀ kɛ ə ghɛ ghɨ̀nə tə kyânə̀ ətəyn.” “Ə̀ tə nə̂ ə nyi chwìə èkè nə Ò pə̀ ndò è kɨsè nə mbi mîə ndò ə.”

⁴Njisə̀s ə pìə sê ghənə nə, “Ghàyn tɔʼne kə wùə tə kyîŋsè ghàyn.

⁵Ghɨ tə pə̂ se tsɨ̀ ə ghənə ə pîə nə, ‘Ə̀ nyi ghənə è vɛ ə chɔʼ ndə̂m.’ Ə ghənə kyiŋse tsɨ̀tsɨ̂ endom nə vɨ̂yn.

⁶Ghàyn tə zɨə ə̀ghɛ kûmə̀ tèghɔŋ ə tyà, ə ghàyn fɨyn zɨ nə tîte paʼsə̂ pə̂ ndò. Ə ghàyn zɨ za, kə ghàyn fayn kûmə̀ nə ghɛ nə ghɨ̂yn kyi se kyàyn, pîza ə̀ vachi se tyə̀yn nə mbi mîə pə̂ ndò.

⁷Ndaʼte tə nə̂ ə tə nô tîte, fɔ̂yntè e nô tîte, chɨ̀ŋ tə pə̂ ə è zə nyi, ə chike ə nəʼə̀ kə àkɨ̂m.

⁸Ghɛ nə ghɨ̂yn tə nə̂ ə nyi kə etɨ̂m əshi zɛ ə wùzhɔyn zɨə ashîŋə̀ kɛ è kyiŋə se pîə.

⁹Ghɨ tə kyîə ghàyn ə fo ə ghɨghə gho ə ghənə tsɨfse ə zhwite ghàyn. Ndâʼà tekɨ̂m tə nə̂ ə tə pânə̀ ghàyn kè kûmə̀ Mi.

¹⁰Ghɨ tsɨə tə pfɨ̂ə ə ghənə epomə̂ fumə ashìŋə̀, ghɨə tə pəʼlə̂ ə̀ghɔ nyìə ə kɛsə̂ pânə̀ sèngɨŋ.

¹¹Fɨ̀aʼtè sə akaŋse tə fɨə ə sə tsɨ̂ə kə nyi ə se kyiŋse ghɨ etsɨghe nə ghe chumte ghənə.

¹²Ghɛ ə piə tə nə̂ ə nyi mə ghə waŋ ke luʼ tekɨ̂m ə kɔ̂ŋ ə tsɨ̀tsɨ̂ze sê ghəmɔ̀ʼɔ kɛse sayn.

¹³Pîza, mə ə wəynse pîndè zɨə ngəʼze kûmə̀ Mi se nduə tàyn ə kwùŋse, ə è zhi fɨ.

¹⁴Ə tom èchùŋ zɨ̀nə̀ kûmə̀ èfɔ̂yn ə Fezhə̀vè waŋ ke luʼ tekɨ̂m ə mbi kə ghɨghe ə tendaʼ tèkɨ̂m ə ke səmɔʼ. Ə̀ nyì fumə ashìŋə̀ kə kwùŋseke tə pə̂.”

¹⁵“Ghàyn tə fe èghɛ epi zhize mə ze pə̂ èghomə̂zè ə Zhə̀fè shi. Ze tə kyanə̀ ə ndɛ ə̀ Fèzhə̀ elùʼ mə ve nyi è ŋwaʼe kè kə Fɨ̀aʼtè Ndanyìə tè tsayn nə ze nə kyânə̀. (Ghàyn ghɛ ə ghàyn tɔŋɔ ghɛ ghɨ̀yn tɔʼ zɨ kê ghəynghe achûŋ.)

¹⁶Ə ghàyn fe zamə, əghɨ ghɛ ghe nyi ə Njòndyâ tə nyɨŋ kɔʼ ə pfɨ̀yn ə ndəte fumə.

¹⁷Kə wùə mə è nyi ə vəyn etûə ndɛ kɛse tso pî se njiə fɨ èfɨake mə ke nyi ə ndɛ.

¹⁸Kə wùə mə è nyi afùʼ kɛse kwɨlə̂ se njiə fepfɨ̂ fə vəynfe.

¹⁹E tə pə ə zə pofə se zəyn ghɛ ə ghe nyi ndwɔ̂ə, è ghɛ ə ghe nyɔŋsə̂ ghɔynghe mtuʼ nə mɛ̂!

²⁰Ghàyn tsəm nə shîŋə̀ kɛ ə ghàyn tə pə ə nyɨŋə ətəyn tə pə va ashìŋə̀ egholke mə fofke nyîə nyi tsɛsè kɨ̀sə etuʼ endaʼ.

²¹Fumə mtuʼ, ghɨə tə fe ètsôs vîve ndɔ̀ʼɔ wùə tyəm fe nâʼà ə zhə̀te kə Zhə̀fè tè pom mbi se pə zaʼâ ndàyn. Tsôs vîve kə vɛ mə tə fɨnə kyàynə̀ va.

²²Pîza Zhə̀fè nyi mə è və fàftè tuʼ mə ètsòs nə mɨ̂yn. Ə È tè tàʼa nə̀yn zamə, mə wùə vîvè tə sɔ̂ fɨə va. Kûmə̀ kə ə̀ghɨ və kə È chɔʼ ndə̂m È tə fâftə̀ mtuʼ nə mɛ.

²³Fumə ashìŋə̀, ə wùə pì sê ghàyn nə, ‘Nayne kə, vɛ ə chɔʼ ndə̂m vɨ̀nə fàyn!’ kɨ̀sə è pi nə, ‘E vîə fɛ̂!’ kə ghàyn pomə ghɛ zɛ è pìə.

²⁴Kûmə̀ nə ghɨə etsɨə tə fɨə pə̂ ə tsâ nə ə nyi vɛ ə chɔʼ ndə̂m è fɨ̀aʼtè sə akaŋse ə sə tyə̂nə̀ sèchwìə sekwə̂mnəse, mɔ̂mə̀ əghɛ kayntə kè se mɔ̀msè se fe nə ghənə nyiə kaʼa ə kyiŋse nâʼàpi ə̀ghɨ ghɛ Zhə̀fè se nyi mə fe ə chɔʼ se sɔzà.

²⁵Ghàyn tɔʼ zɨtê! Mə kàynè tsayn ghɛ nə ghɨ̂yn sê ghàyn tsɔ̀fə ə ghe tə kyayn.

²⁶E za nyi nə ə ghɨə tsâyn sê ghàyn nə, ‘Nayne kə È nyi endaʼ ashəshəze’ kə ghàyn ndu fu. Pî ezhoghɛ ghənə pî nə, ‘Nayne kə È və ndə̀tè fayn’ kə ghàyn pomə,

²⁷kûmə̀ nə pə ə Va ə̀ wùəzè tə nə̂ ə ze ə nyi ke kə eghol emɨayntəze ə ze panə awulə apàs ə mbike se nduə fɨ ə tə kə mɔ̀ʼɔke.

²⁸Nâʼàpî ghayn ə wiyn ə wûə èkwuəve nyi, mbùʼə̀vè ə pə̀ zûŋtə̀ fu.

²⁹Kè kə tsôs eghaʼâ nə vɨnə tə kyânə̀ mɨ̂sə̀, ə lɨmke fɨyn cho ezhwize, ə njɔŋ ə fɨnə panə va, ə lìmè taynte tso ekwùtwəyn, ə nâʼà ètwɔʼ vɛ ə ve nyi ekwùtwəyn nəʼle ə ghənə telùʼ.

³⁰Epàm ətəyn, ə chwìə epə̂ ə Vâ wùəzè fɨ ekwùtwəyn, əghɨ tèndâʼà tə mbite nâʼà tèkɨ̂m ə nuŋnə̂ chîə è fâynzè ashìŋə̀ kɛ ghənə fe Vâ wùə, e tso pə̀ etuə sèmbàʼ ekwùtwəyn, kyi àtyaʼ epomsê eghaʼâzè.

³¹Ə tə tɔŋə èsɔŋ, ə è tom fɨsê sètsì sə vəynse ə tepòlə̀ tembi tekɨ̂m tèkyàʼ nə se kwi zûŋtè ə̀ghɨ ghɛ Zhə̀fè chitê se zhə̀tè apàs ə mbike amɔ̀ʼ se nduə tàyn ə kə mɔ̀ʼɔke.

³²Zôyn ghàyn zaʼle ghɛze sê kâʼ fə sèfîkfè. Ə ghàyn fe nâʼà pî ashìŋə̀ àkè kə fe tô pə̂, ghà kê nə pìŋ sè pfɨ̀ə pə̂ ndò.

³³Kè pî èghɨ, ə ghàyn fe ghɛ nə ghɨnə mə e kyanə̀ ə̀kɨ̂m, ə ghàyn ke nə Vâ wùə mòtə̀ kə nyî ə è pəyn pîza nyi mə È və tɨmsê se pə̀yn.

³⁴M pîə sê ghàyn səmɔʼ nə, ghâŋfə mbi ə̀ zofe vayn tə kwutə mɨ̀sè ndɔ̀ʼɔ ghɛ nə ghɨnə mə kyayn.

³⁵Kwutwəynve è chike tə tsɛ̂ ndô pîza, ghɛ zɨme tə ndamə faŋə kə ndò.

³⁶Nâʼà wùə èmɔ̀ʼ ke va tuʼfe è shîŋə̀ kɛ ə ghɛ nə ghɨnə tə kyânə̀ ətəyn, pî sètsì ekwùtwəyn, pî Vayn ke va è tsɛ̂ kə va pɨ̀a kə È ke shîŋə̀ kɛ ə ghɛ ghɨnə tə kyânə̀ ətəyn.

³⁷Pə Vâ Wùəzè tə nə̂ ə zə nyi ke kə eghɛ zɛ ə ze tè kyâyn ə Nuwà ashìŋə̀.

³⁸Kûmə̀ fumə ashìŋə̀, tsɔfə kə mo mə ègholə̀m lwiynse mbi èkɨ̂m, ghɨə tè zhiə ndo, mɨə, ndômnə̀ è zənə e malə̂ se zaʼâ əfetuʼ fɛ ə Nuwà tè nji ə ngwùʼ èghaʼâ.

³⁹Ghənə tè pâʼà ke ghɛ zɛ ə ze kyânə̀ se kɔʼɔ zaʼâ ashìŋə̀ kɛ ə mô mə ègholə̂m tè tso ə lwiynsə̂ mbi ə ndiŋsə̂ maʼà ghənə əkɨ̂m. Ə̀ nyì kepî nyiə mə kə ze tə pə̂ ə zə nyi ezhoghɛ ə Vâ wùə pə̀yn.

⁴⁰Ə̀ tə pə̂ ə nyi fumə ashìŋə̀, ə ghɨghə pɛ̀ ə fɨaʼà afùʼ, ə Zhə̀fè nji wùə èmɔ̀ʼ ə və mɔ̀ʼɔ faŋ epàm.

⁴¹Zənə tə nə̂ ə nyi elùʼ ekwuə nə apayn ə̀pɛ̀, kwûə àpayn, ə Zhə̀fè nji emɔ̀ʼ ə emɔ̀ʼ faŋ.

⁴²Ghàyn epfɨ̂tə̀, kûmə̀ nə ghàyn ke va tuʼ vɛ ə Pɛ̂pɛ vâyn tə pə̀ ətəyn.

⁴³Ə pɛ̀ ndɛ ke shîŋə̀ kɛ ə wùə èchɔŋɔ nyi se pə̀yn ətəyn etuʼve, ə è tàʼa pɨəyn, ə è kyaʼ pɨ̂əyn ə è və pfɨ̂tə̀, nə kə è pəyn kəm ndɛ̂ vəyn.

⁴⁴E za tyə̀nə̀ nə nâʼà ghàyn kyi kepî sə̂ pɨaʼtə̂ nâʼàpi ashìŋə̀ àkè, kûmə̀ nə Va wùə tə kɛsə̂ pə̀ ashìŋə̀ kɛ, ə ghàyn kwâʼtə̀ va nə è kàʼa è pəyn ətəyn.”

⁴⁵Njisə̀s ə fɨnə pfɨfə nə, “Wùə èfɨ̀aʼa vɛ è zɨə pɛ̀ efɨ̀aʼ ə̀ vəyn fɨnə tɔfə nyi vɨ̀yn və? Ə̀ nyi vɛ ə pɛ̀ efɨaʼ ə̀ vəyn pî è ndùə èkwî, è və ndə̀mə̀ nə è və nyi àtu sê ghɨ mɔ̀ʼɔ, fo èfɨazhiəve sê ghɨə ashìŋə̀ kɛ ə ghənə kyiŋə.

⁴⁶Wùə èfɨ̀aʼa ətəyn nə saŋnə ashìŋə̀ kɛ pɛ̀ efɨaʼ ə̀ vəyn pi kɛsə pə̀ ndò, e ve nə̂ eghɛ zɛ è tè pi.

⁴⁷M pîə sê ghàyn səmɔʼ nə, ə ze kyâyn nyi, ə pɛ̀ efɨaʼ nə vɛ ndəm vəyn nə è və tɔ̂ʼnə̀ è fɨa ə vəyn nâʼà èkɨ̂m.

⁴⁸Pîza ə wùə èfɨ̀aʼa vɛ nyi wùə èpi, ə è tsɨsə ə è və kwàʼtə̀ ke sə və ngɨŋ nə, pɛ̀ èfɨ̀aʼ nə ndamə tsɔ̀fə è kɛse kwɨlə̂,

⁴⁹ə è zhəte sə̂ pusə ə̀ghɨ ghɛ ə yîghə̀ ghənə fɨ̂aʼà əmɔʼ, zhiə mɨə yî ghə̀ ghɨ ghɛ ə ghe mɨ lɨ̀ m̀ ko ghənə.

⁵⁰Pɛ̀ èfɨaʼ ə vəyn tə kɛsə̂ pə̂ əfetuʼ fîfe, ashìŋə̀, mə è kwâʼtə̀ va nə è kàʼa è kɛse pəyn ətəyn.

⁵¹Ə pɛ̀ èfɨ̀aʼ ə̀təyn tsɨfse vəyn nâʼà sə ŋaŋ. Ə è tsɨfse vəyn eghɨ kèpî kə è tsɨfsè ghɨə ə kaŋkaŋə nə. Fumə ə è və chîə kwɨlə ə̀sɔŋ.”