Read Mmen Matyò 26 Bible Online

Matyò 26 - Mmen bible

Matyò 26

¹Kə Njisə̀s tè zaʼle mɨsè ə̀ghɛ ghɨ̀yn nâʼà ə̀kɨ̂m, È və pìə sê chùmtè èpàm sə vəynse nə,

²“Ghàyn kyi sə̂ ke nə epàm mtuʼ mpɛ̀ nə̀ nə̂ nyi è zhi efɨazhi ezaʼa tsɛve. Ə̀ nyì fumə fetuʼ kə nə̀ fo tsɛsə̀ Vâ wùə ə ghɨghe əgho nə ə paynte awâmnè.”

³Ghɨ kɔʼsə nə eshyə̀ engaŋtə è chəʼse ə kwəynə̂ ə Kayfàs, ə wùə kɔʼsə nə̂ èshyə̀ èngaŋtə kwəynə.

⁴Ə̀ nyì fumə kə ghənə tè nə̂ pɨaʼtê se nyaʼtə kyiə Njisə̀s se zhwiə vəyn.

⁵Ghənə ə pìə nə, “Ghâsènì nə̀ nə̂ va zɨnə ashìŋə̀ efɨazhiə ezaʼa tsɛve, ə̀ puzâ ə ghɨə nə ndwise nôzè.”

⁶Njisə̀s tè nyi ə Petanì ə Shimùyn ə ndɛ, ə wùə mə è və fe tsôsvè, è zafə akwùszè,

⁷Kə Njisə̀s tè zhiə wùzhɔyn ə njiə pə̂ è mbùʼtə̀fè, è ngwɨ̂l me lɨ̂mtə tsɔfə̂m ətəyn m̀ me tɛ èkɛve ə sɨ̀sə̀ ə Njisə̀s atu.

⁸Chùmtè èpàm sə Njisə̀sè ə fe zɨnə mə ə fɨsə̂ èndwɔ̂. Ə pfɨfə nə, “Kûmə̀ ghè ə pofsə kyì mngwɨl zɨnə nyiə?

⁹Ə fə kàʼa ə pəʼle ngwɨ̂l nə mɨ̂nə̀ sə ekɛ, ve tsɨ̀ə kə nyi, ə tsamte ghɨ afɨfghe ə təyn.”

¹⁰Njisə̀s ə kê èghɛ zɛ ə ghənə kwâʼtə̀ ə pìə sê ghənə nə, “Ghàyn fo ngəʼ ə ghè sê wùzhɔyn vɨ̂yn ə? Ə̀ nyi eghɛ echûŋzè kə è nə̀yn sê Mi.

¹¹Ghàyn nə kyi tsɛ ke ndò ghɨ afɨf ghə ghàyn əfètəyn, pîza m va se faŋ ghâsènì sə teshɨ̀ŋə̀ tèkɨ̂m.

¹²Ghɛ zɛ ə è nə̀yn fe nyi nə è sɨs ngwɨlə̀m ə mì ewìyn se pɨaʼtê ə mi se pfɨ̂mə̀ zɨmze.

¹³M pîə sê ghàyn səmɔʼ nə ə nə ndàʼà nâʼàpi ghayn tom èchùŋ zɨ̀nə̀ ə mbi èkɨ̂m, ghɛ zɛ ə è nə̀yn ə tsâ sə kwâʼtə̀ vəyn.”

¹⁴Wùə èmɔ̀ʼ əfètə̂ sèchùmtè èpàm njò sepɛ̀, ə vɛ ə tè tɔŋtə nə Njondàs Èskalɔ̀t ə ndùə fe ə̀ghɨ kɔʼsə nə eshyə̀ engaŋtəghe

¹⁵ə pfɨfə sê ghənə nə, “Ghàyn nə̀ fo ghè sê mi ezhoghɛ m fo Njisə̀s ə ghàyn ə gho?” Ghənə taŋtə̂ fo èkɛ ə silvàvè sê vəyn, m̀ghɨm ta.

¹⁶Se zhə̀tè fumə ashìŋə̀ se ndù əshi, Njondàs e kyiŋə àzhəm echûŋkè se fo tsɛ̀sè ə Njisə̀s sê ghənə.

¹⁷Ə fetuʼ fə shife mtuʼ mɛ ə tè zhiə payn ə kwaŋ kɛ ə tè nyi mə ə paʼà ndə̀m fèsə̀ʼ ətəyn, chùmtè èpàm sə Njisə̀sè ə pə̀ se Vəyn ə pfɨfə nə, “Ò kyiŋə nə ghàs ndu fɛte ghayn fɨazhiə ezaʼa tsɛve sê ghò ə?”

¹⁸È və pìə sê ghənə nə, “Ghàyn nji ndu sê wùə vîvè endaʼ ə ghàyn tsayn sê vəyn nə, ‹Tyə̀ynsè pi nə shîŋə̀ kɨmke ə pə̀yn, chùmtè èpàm sɨmse è mi nə̀ zhiə èfɨazhiə ezaʼa tsɛve ə ghò əndɛ.›”

¹⁹Chùmtè èpàm sə Njisə̀sè ə nə̀ kə kə è pì, ə pɨaʼte èfɨazhiə ezaʼa tsɛve fu.

²⁰Kə ə̀ tè nyi ezhwikwɨlə, Njisə̀s è chùmtè èpàmse njò sepɛ̀ ə tsɨsə̂ se zhi efɨa zhiə vɛ.

²¹Kə ghənə tè zhiə, Njisə̀s ə pìə nə, “M tsâ sê ghàyn səmɔʼ nə wùə èmɔ̀ʼ sê ghàyn nə̀ pəʼlə̂ mi.”

²²Ghɛ ətəynze ə fo ngəʼ sê chùmtè èpàm sə vəynse nâʼà sə ŋaŋ, ghənə e sè pfɨfə sê vəyn wùə èmɔ̀ʼ emɔ̀ʼ nə, “Pɛ̂, m kwaʼtə̀ nə ə̀ vachi mi.”

²³Njisə̀s ə pə̀ynsə̀ nə, “Ə̀ nyì ke nâʼà wùə mə ghasè vəyn nə̀ tsɨə kɨŋnə̂ àpayn ə kwaŋke akaŋ àmɔ̀ʼ, ə̀ nyi vɛ ə è nə̀ pəʼlə mi.

²⁴Vâ wùə nə̀ kwuə kè eghɨ kə nyi mə ə nyàʼ ə ŋwàʼlè ə̀ Fèzhə̀ pîza ngəʼ èghaʼâ nyì sê wùə vɛ ə è nə̀ pəʼlə Vâ wùə! E fe tsɔ̀fə nə ə nyi mə tè paʼà piə wùə ə̀təyn.”

²⁵Njondàs vɛ è tè pomə se pəʼle ə Njisə̀s ə pfɨfə sê vəyn nə, “Tyə̀ynsè ə nyi mi mə?” È və pə̀ynsə̀ nə, “E nyi ke za kə ò pi.”

²⁶Kə ghənə tè zhiə, Njisə̀s ə njìə àpayn ə kwaŋke ə fo àzɔ̀ŋnè sê Zhə̀fè ə pɨaʼlə̂ ə fo sê chùmtè èpàm sə vəynse ə pìə nə, “Ghàyn ko zhi. Ə̀ vɨ̂nə nyi ewiyn vɨmve.”

²⁷Epàm ətəyn, e və fɨnə njîə wà m̀lɨ̀ ə fo àzɔ̀ŋnè sê Zhə̀fè ə fo sê ghənə, ə pìə nə, “Ghàyn mɨ nâʼà ghàyn əkɨ̂m.

²⁸Ə̀ mɨ̂nə̀ nyi mndəm mɨ̂m mə nyi mkâyn me fɛ̂m. Ə tə sɨsə̀ m̀ndəm mɨ̂m mɨ̂nə̀ əghɨ etsɨəghe elùʼ kə Zhə̀fè lɛse fo sèpi sə ghənə̂sè.

²⁹M pîə sê ghàyn səmɔʼ m tə fɨnə mɨə va lɨ̀m nə mɨ̂yn se zaʼâ etuʼ vɛ kə m kɛse mɨ sə fe ghâsènì elùʼ efɔ̀yn ə Pɨ̀a vɨ̂mvè.”

³⁰Ghənə ə zhəmə njàŋ ə fɨə kɔʼɔ etûə Pfɨ̀yn ə̀ Sèolìf.

³¹Kə ghənə tè kɔʼ zaʼâ ə pfɨyn, Njisə̀s ə pìə sê chùmtè èpàmsə vəynse nə, “Ndâyn ètuʼve ghâyn əkɨ̂m nə̀ tə zâ Mi, ghàyn nə̀ tə kûmə̀ èghɛ zɛ ə ze nə̀ kyânə̀ sê mi. Ə nyi mə ə nyàʼ nə, ‘M tə zhwiə ngyəyn, ə pfɨ sə vəyn sekɨ̂m tə chyâsè.’

³²Pîza, ezhoghɛ m kɛse ndwî ekwu, m ndu ə ghâyn əshi ə Ngalìlî. Fumə ə ghàyn kwəyne è mi.”

³³Pità ə pìə sê Njisə̀s nə, “M vayn kaʼa m tə za ghò, pî ezhoghɛ ə ghɨə mɔ̀ʼɔ zâ.”

³⁴Njisə̀s ə pìə sê Pità nə, “M pîə sê ghò səmɔʼ nə ndom ə̀ mbvɨ nə̀ piə è tɔŋə ndò ètuʼve ndâyn mə o mɛ mi shîŋə̀ teta.”

³⁵Pità ə pə̀ynsə̀ nə, “M vayn kàʼa m tə pi èkyì eghɛ zâ, pi ezhoghɛ m nyi pî se kwu.” Chùmtè èpàm sə mɔ̀ʼɔse ə pìə kə pî èghɛ nə zɨnə mə.

³⁶Njisə̀s ə ndùə yî chùmtè èpàm sə vəynse elùʼ, etɔŋtə̂ nə, Ngètsemenì, è və pîə sê ghənə nə, “Ghàyn tsɨsə fâyn, m kɨŋte ndu əshi ə m tsəm fu.”

³⁷È və njìə Pità yî ghɔ Zepɛndì ghə pɛ̀. Kə è ndùə tsôsvè, è kosê esəynze ə lwinə ə vəyn ə təm.

³⁸È və pìə sê ghənə nə, “Ngəʼ nyîə nyi ə mì ətəm mə è kàʼa e zhwi mi, ghayn faŋ fâyn ə kyaʼ pɨ̂əyn ghâsènì.”

³⁹È və kɨŋtə̂ ndûə əshi sechə, ə nyɨ̀ŋə̀ ə chi è kyaʼzè ə tsə̀mə̀ nə, “Pɨ̀a vɨm, ə e pɔynə̂ o njìə tsɨsə̀ ngəʼ zɨ̀yn sê mi! ə̀ vachi èghɛ zɛ m kɔ̂ŋɔ̀ pîza zɛ ə ò kɔ̀ŋə̀.”

⁴⁰Ə pə̀ kə è tsə̀m mɨ̂sè, ə kɛsə̂ ndûə sê chùmtè èpàm sə vəyn sɛ sèta ə fe mə ghənə pɨənə̂ ndò. È və pfɨfə sê Pità nə, “Piə e za nyi nə ghàyn vayn kàʼa ghàyn pɔŋ tsɨsə èkyâʼzè ghâsènì sə chwìə emɔ̀ʼ ə?

⁴¹Ghàyn e kyaʼà, tsə̂mə̀ kə mɔ̂mè pəyn sê ghàyn. M ke nə ə̀ nyi ə ghàyn ekwâʼtè, ghàyn kɔ̀ŋɔ̀ ndò se nə̀yn kə m pî, pîza njà èwìyn e pɔylə̂.”

⁴²È və kɛse ndò ə ndùə sè tsə̂mə̀ pîə nə, “Pɨ̀a vɨ̂m, ə ò va se fiə tsɨ̀sè akɛ̀ ə ngəʼ kɨ̂nə̀ ə mì ətu, mə m paʼà pɨ̀aʼà kəynke, o nə̀ èghɛ zɛ ə ò kàʼa ò nəyn.”

⁴³È və tsə̀mə̀ zâ, ə pìə è kɛsə̂ pə̂ ndò ə fɨnə fe chùmtè èpàm sɛ e pa pɨəynə̂ kə ndò kûmə̀ nə mbɨəynse tè nyîə tsəʼə̂ ghənə.

⁴⁴Njisə̀s ə fɨnə ndûə se tsə̀m, nə ə sè nyi tèshîŋə̀ tèta, piə kə ə̀ghɛ ghɛ è fè pîə sə shi.

⁴⁵È və tsə̀mə̀ mɨ̂sə̀ ə kɛsə̂ ndûə sê chùmtè èpàm sə vəynse ə pfɨfə sê ghənə nə, “Piə e za nyi nə ghàyn pa tɔ̀ʼɔ̀ pɨəynə kə ndò, zɨ̂tə̀ ə? Ghàyn e ke nə shîŋə̀kè ə kwəyn e sè kyiŋə se fo Va Wùə ə ghɨ pighe əgho.

⁴⁶Ghàyn ndwi ə ndo. Ghàyn fe. Ə̀ vɨ̂nə pə̀ wùə vɛ ə è pəʼle mi.”

⁴⁷Njisə̀s e sè pa wàmnə̀ kə ndò, Njondàs vɛ ə è tè nyì kepî wùə èmɔ̀ʼ əfètə̂ sèchùmtè èpàm sə vəynse njò sepɛ̀, ə kɔʼɔ pə̂ yî nɔ̂yn ə ghɨ̀kè, ke tsɨ̀ə kə nyi, kyi tefɛ̂ è mbàŋsè. Ə̀ ghənə tè tom ə ghɨ kɔʼsə nə eshyə̀ engaŋtə è chəʼse ndaʼse,

⁴⁸ghənə ə pə̀ za wùə vɛ è pəʼlə vəyn e nyi mə è və fo chwìə sê nɔ̂yn ətəynke ə pìə nə, “Ə m nə̀ paŋne nâʼàpî ndè, ghàyn ə kê nə ə̀ nyi wùə vɛ ə ghàyn kyiŋə, ghàyn ə kyîə kə ndò.”

⁴⁹Njondàs ə pə̀ za ə nànə̀ ndùə kə se Njisə̀s ə tɔŋtə̂ vəyn nə, “Tyə̀ynsè, pɔ̂ynè nyì sê ghò.” Kè sə ashìŋə̀ è və paŋnə vəyn.

⁵⁰Njisə̀s ə ke pì sê vəyn nə, “Nə kə ghɛ zɛ ò pə̀yn se nə̀yn ə pə.” Kè sə ashìŋə̀, ghɨ nə ghɛ pə̀ ko Njisə̀s ə fɛtə pɨamə veyn.

⁵¹Wùə emɔ̀ʼ əfètə̂ əghɨ̀ ghɛ yî ghə̀ Njisə̀s tè nyi əmɔʼɔ ə chɔʼɔ èfɛ̂ ə vəynze ə kaʼa tənə atûŋne ə wufɨ̀aʼa ə̀ wùə èkɔʼsə nə èshyə̀ èngaŋtə kwəynəke.

⁵²Njisə̀s ə pîə sê vəyn nə, “Kɛse ndə̂m fɛ̂ zɛze apuʼle. Ə nò pîndè è fɛ̂zè, ə nyi kepî èfɛ̂ ə tə nô zhwiə vəyn ətəyn.

⁵³Ghàyn ke va nə m kaʼa m pfɨf tsâmtèzè sê pɨ̀a vɨ̂mvè, kè sə ashìŋə̀ ə è tom tsìsè sê mi kamse eghɨm njòse pɛ̀ ə se tsamte miə?.

⁵⁴Pîza, mə m nə̂yn nyi ə e tàʼa lwiynse eghɛ zɛ ə se nyi mə ə nyaʼ ə Ŋwàʼlè ə̀ Fèzhə̀.”

⁵⁵Njisə̀s ə kɛsə̂ pfɨfə sê nɔ̂yn kɛ nə, “Ghàyn nyiə fɨ pə̂yn è fɛ̂tè è mbàŋsè nyiə kə ə nyiŋə ə wùə èchɔŋɔ epàm kɨ̀se kyîə miə? Tuʼmè m̀kɨ̂m m tè nyì ə Ndɛ Ètsə̀mə zaʼlə̂ ə̀ghɨ pîza ghàyn ə tàʼa kyiə mi.

⁵⁶Nâʼà Pîza, ghɛ nə ghɨyn kyi se kyàyn se lwiynse ə tom ə Fèzhə̀ zɛ ə fɨ̀aʼtèsè tè nyaʼ ə Ŋwàʼlè ə̀ Fèzhə̀.” Kè sə ashìŋə̀, chùmtè èpàm sə vəynse ə tə zâ vəyn nâʼà ə̀kɨ̂m.

⁵⁷Ghɨ ghɛ ə ghe tè kyi Njisə̀s ə njìə ndûə è vəyn ə Kayfàs ə ndɛ, ə wùə èkɔʼsə nə èshyə̀ èngaŋtə kwəynə. Ə̀ nyì fumə kə tyə̀ynsè sə alàŋsè è chəʼse tè zùŋte luʼve emɔ̀ʼ.

⁵⁸Kə tè njiə ndô ndûə è Njisə̀s, Pità tè chûmtə̂ ndûə Vəyn sə aghaf, se zaʼâ kə ndu fɨ ə Kayfàs etipìə àpɨəyn. Kə ghənə ndû fɨ fumə, Pità ə njiə fumə apɨəyn. Ə tsɨsə̂ fu yî ghə̀ ghɨ tsɨ̂ŋnə ndɛ ètsə̀məghe, se fe kə saʼà Njisə̀s nə̀ mîə.

⁵⁹Ghɨ kɔʼsə nə eshyə̀ engaŋtəghe è ghɨ saʼa ghəkɨ̂m e sè kyiŋə èndom se pì eghɛ akaŋze kûmə̀ Njisə̀s endom kə zhwi vəyn.

⁶⁰Pîza vayn kàʼa fe zhîze, pî kə ghɨ etsɨghe tè mɔ̀msə se fɨə pə shi se wam akaŋ kûmə̀ vəyn. Ndômnè ghə pɛ̀ ə ndwìə kɔʼɔ

⁶¹ə pìə nə, “Wùə vɨ̀nə tè pi nə, ‘È nyi pɨ̀ytè ə Ndɛ Ètsə̀mə ə fètə̀m m̀tuʼ mta, ə è kɛse pɛ kɔʼsê zɨ̂ynzè.”

⁶²Kə wùə èkɔʼsə nə èshyə̀ engaŋtə kwəynə tè zɨ zɨnə mə, ə ndwìə kɔʼɔ ə pfɨfə sê Njisə̀s nə, “Ò kyi va pə̂ynse kyîke se fo se ghɛ ghɨ̀nə ə ghâmə̀ ghò sə təyn nyiə?”

⁶³Pîza, Njisə̀s ə kɨmə̂ kə mɔŋ. Wùə èkɔʼsə nə èshyə̀ èngaŋtə kwəynə ə wàmnə̀ kwəynsə̂ se vəyn nə, “Ezə Fezhə̀ fɛ ə fe ndamə, m pîə sê ghò tsàyn səmɔʼ sê ghàs nə ò nyi vɛ ə chɔʼ ndə̂m ə, ə Vâ Fèzhə̀ ə?”

⁶⁴Njisə̀s ə pə̀ynsə̀ vəyn nə, “Kè kə ò pì, pîza m tsâ sê ghàyn əkɨ̂m nə, se zhə̀tə ndù zôyn se ndù əshi, ghàyn tə fe Vâ Wùə ə è və tsɨs ə ekɔyn etwɔ ə pɛ̀ ètwɔʼ ekɨ̂mvè. Ə ghàyn fe ə è və tsɨs tso pə̂ etûə sèmbàʼ se kwùtwəynse.”

⁶⁵Zɨnə̀ ə nə̀ wùə èkɔʼsə nə̂ èshyə̀ èngaŋtə kwəynə ə pàsə̀ sèndzɨs se chwìte nə è nyîə zafsə̂ èndwɔ̂ ə tsà sê ghɨ ndɛ èsaʼa nə, “È sôylə̀ Fèzhə̀! Ghàs fɨnə kyiŋə va tsɛ̀ sə saʼ shîse! Ghàyn ə zɨ kə è sòylə̀ Zhə̀fè!”

⁶⁶È və ke pfɨf sê ghənə nə, “ghàyn kwàʼtə̀ nə ghe ə?” Ghənə pìə kə əkɨ̂m nə, “È və pfɨ̀ saʼ mə e kyi ke se kwu.”

⁶⁷Ghənə ə ke tsɨlə mtɛ̂ ə vəyn ekyàʼ ə pusə vəyn, ghɨ ghɛ ə tè wulə vəyn,

⁶⁸ə pìə nə, “Tsàyn sê ghàs ə vɛ ə chɔʼ ndə̂m! Sɨŋ nə ə̀ pus nde gho ə?”

⁶⁹Pità tè pa tsɨs ke ezhɔyn nə saʼve. Vâyn èzhɔyn vîvè mə è fɨaʼà sê wùə èkɔʼsə nə̂ èshyə̀ èngaŋtə kwəynə, ə pə̀ se vəyn ə pìə nə, “Ò tè nyì kepî ghâyn Njisə̀s, ə wùə vɛ ə è ndò pə̂yn apàs endaʼa Ngalìlîkè.”

⁷⁰Pîza, e və kwiynsə̂ kə ghənə əshi ə̀kɨ̂m ə pìə nə, “M kêva ghɛ zɛ ə ò wàmnə̀ kûmə̀ zəynze.”

⁷¹Kə è wàmnè mɨ̂sè zâ, ə ndò fɨə ndùə endom fumə echo àpɨəyn ə saʼke. Vâyn èzhɔyn èfɨaʼa ə̀mɔ̀ʼɔ̂ ə fɨnə fe vəyn ə pìə sê ghɨ ghɛ ə ghe tè nyì fu nə, “Wùə vɨ̀nə tè nyì yî Njisə̀s vɛ ə è ndò endaʼa Nazalɛ̀tzè.”

⁷²Pità ə fɨnə kwiynsə̂ ə pə̀ynsə̀ nə, “M kaynə̀ nə m keva wùə vɛ!”

⁷³Ə fɨnə môtə̀ ke nyi, ghɨ ghɛ ə ghe tè tyəm fu ə pə̀ sê Pità ə pìə nə ò lote nyi wùə èmɔ̀ʼ əfètə̂ ə̀ghɨ̀ ghɛ ə chûmtə̀ wùə vɛ. “Epàm ə ghɛ ətəynghe əkɨ̂m, ndom vɛ ò wàmnə̀ ətəyn tyəynə̀ ndò nə ò nyi wùə mə ò ndò pə̂yn apàs endaʼa Ngalìlîkè.”

⁷⁴Pità ə pìə nə, “M kâynə̀ nə m pîə səmɔʼ! Ə Zhə̀fè tsəfse mi ə zho m pîə va səmɔʼ! M keva wùə vɛ!” Kə è wàmnè mɨsè zâ, ndom ə̀mbvɨ ə tɔŋə.

⁷⁵Pità ə ke kɛse ə kwàʼtè eghɛ zɛ Njisə̀s fè pì sê vəyn nə, “Ndom ə̀mbvɨ nə̀ piə è tɔŋɔ ndò mə o mɛ mi shîŋə̀ teta.” Pità ə fɨ ə ndûə əpɨəyn ə chîə nâʼà sə ŋaŋ.