Read Mmen Matyò 27 Bible Online

Matyò 27 - Mmen bible

Matyò 27

¹Tuʼve ə zo è pɨsə̀pɨsə̀, ghɨ kɔʼsə nə eshyə̀ engaŋtəghe nâʼà ə̀kɨ̂m è chəʼse e nə̂ èpɨaʼtê əghənə̂zè kûmə̀ Njisə̀s se zhwiə vəyn.

²Ghənə ə ndzɨsə vəyn ə sechaʼ, ə pàʼlə̀ ndûə fo tsɛsə̀ vəyn ə Paylɛ̀t əgho ə wùə vɛ ə wùə eghaʼâ endaʼa Lûmzè tè ndəm nə è və chisə̂ ə̀ghɨ apàs endaʼa Njòndyâkè fumə ashìŋə̀.

³Kə Njondàs vɛ ə è tè pəʼle Njisə̀s zɨ nə ə tsɛ̀sè saʼze nə ə zhwi Njisə̀s è və kwiynə̂ ə kɛsə̂ njîə ndûə èkɛ ə silvàvè m̀ghɨm ta sê ghɨ èkɔʼsə nə eshyə̀ engaŋtəghe, è chəʼse.

⁴Kə è ndù ə pìə nə, “Mə nə̀yn pi se pəʼlə wùə ndɔ̀ʼɔ è nəyn pofsê nə ə zhwi vəyn.” Ghənə ə pə̀ynsə̀ nə, “saʼ zasze ə təyn nyi ghe?” Ə̀ ke ke ghò.

⁵Njondàs ə màʼa ndzɨsə èkɛ ətəyn ə Ndɛ Ètsə̀mə ə ndò ə ndûə sɨ̂ŋsə̀.

⁶Ghɨ èkɔʼsə nə eshyə̀ engaŋtəghe ə zùŋtə̀ èkɛ ətəynve ə pìə nə, “Ə̀ vɨ̂nə nyi ekɛ ə mndəmve, saʼ ə ghasènìze pomə̂ va nə ə tsɨynte kɛ vɨ̀nə̀ èkɛ ə Ndɛ Ètsə̀məve.”

⁷Ə pə̀ kə ghənə sayne ghɛ zɛ ə kyi se nə̀yn ətəyn, ghənə ə njìə èkɛ ətəynve ə zhɔnə eluʼ ətəyn sê wùə mə è pomə̂ sètɔ̀yn kə eluʼ epfɨmə nə ghɨ̀vè sə pfɨ̂mə̀ ə̀ghɨ etum ghə ətəyn.

⁸Ə̀ za nyi eghɛ zɛ ə pa tɔŋtə kə luʼ ətəyn nə eluʼ ə Mndəm, se zaʼâ ndàyn.

⁹Zɨnə tè kyayn se lwiynsê eghɛ zɛ ə fɨ̀aʼtè Njèlìmayà tè pi nə, “Ghənə ə njìə èkɛ ə silvàvè m̀ghɨm ta, akɔ̂yn kɛ ə ghɨə Isìlâyghè tè pomə se zhɔynə vəyn,

¹⁰ghənə ə njìə èkɛ ətəynve ə zhɔnə eluʼ ətəyn sê wùə, mə è pomə sètɔ̀yn, ə̀ nyi ke èghɛ zɛ ə Pɛ̂pɛ tè pi nə m nəyn.”

¹¹Fumə ashìŋə̀ Njisə̀s ə tyəmə̂ echi ə saʼze ə Paylɛ̀t əshi vɛ ə è tè saʼa pâs endaʼa Njòndyâkè. Paylɛ̀t ə pfɨfə se vəyn nə, “Ə nyì ghô è fɔ̀yn sê ghɨ Njûsghè ə?” Njisə̀s ə pə̀ynsə̀ nə, “E nyi ke za kə ò pì.”

¹²Pîza, ə pâʼà pì eghɛ zhîze ə tə̂ ə̀ghɛ ghɛ ghɨ èkɔʼsə nə eshyə̀ engaŋtəghe, è chəʼse tè ghâmə̀ vəyn sə ətəyn.

¹³Paylɛ̀t ə ke pì sê vəyn nə, “Ò zɨə va ghɛ ghɨ̀nə̀ ə̀kɨ̂m ə ghâmə̀ ghò ətəyn nyi ə?”

¹⁴Pîza, Njisə̀s ə tə nə è pə̀ynsə̀ va nâʼà èghɛ èmɔ̀ʼ, ghɛ ətəynze ə nə̀ Paylɛ̀t e nyi èkaynze.

¹⁵Nâʼàpî zɨyn ə tè nyì se zhi azhi ə zaʼatsɛke, Paylɛ̀t e kyi se fɨsə̂ wùə ə ndɛ ə̀chaʼ èmɔ̀ʼ vɛ ghɨə chɔʼ.

¹⁶Fumə ashìŋə̀, wùə vîvè tè nyîə nyi ə ndɛ ə̀chaʼ e tɔŋtə̂ vəyn nə Pàlapàs. Ə tè nyiə ke vəyn nâʼà àchûŋ kûmə̀ ə̀ghɛ epiə ghɛ ə è tè mɔ̀mə

¹⁷Ə pə̀ kə nɔ̂ynkè pə̀yn zûŋtè ə Paylɛ̀t ə ndɛ, è və pfɨfə sê ghənə nə, “Ghàyn kɔ̂ŋɔ̀ nə m za fɨse ndè ə̀chaʼ sê ghàyn nə? Ə Pàlapàs mə, mə̂ Njisə̀s vɛ ə tɔŋtə nə Klâys ə?”

¹⁸È tè nyîə fɛte ke nə ghɨ atyaʼa Njûsə̀ fo tsɛsè Njisə̀s sê vəyn kè kûmə̀ àghə̀ʼ.

¹⁹Kə Paylɛ̀t tè tsɨs ə fekyə̀ fɛ ə è tè saʼa ghɨghə ətəyn, zhwîə vəyn ə tomə tom sê vəyn ə pìə nə, “Kə ò nəyn nâʼà èghɛ zhîze sê wùə vî ə è tàʼa pofsê eghɛ za, kûmə̀ nə tsə̀m va kyiə mi ndâyn etuʼve kûmə̀ vəyn, ə fɨmsə̂ mi nâʼà sə ŋaŋ.”

²⁰Ghɨ èkɔʼsə nə eshyə̀ engaŋtə, è chəʼse ə chiyntə̂ ànɔ̂yn nə ke pi nə, Paylɛ̀t za fɨsê Pàlapàs ə è tsɛse saʼze nə zhwi Njisə̀s.

²¹Pîza Paylɛ̀t ə pfɨfə sê nɔ̂yn ətəynke nə, “Ə̀ nyi nde əfètə̂ ghɨ̀ ghɨ̀nə̀ ə̀pɛ̀ ə ghàyn kyiŋə nə m za fɨse sê ghàyn ə?” Ghənə ə kɨ̂m ə pə̀ynsə̀ nə, “Pàlapàs.”

²²Paylɛ̀t ə pfɨfə sê ghənə nə, “M se kwi zàyn è Njisə̀s vɛ ə tɔŋtə nə Klâys ə?” Ghənə ə pìə kə ə̀kɨ̂m nə, “Ə paynte vəyn ə awâmnè!”

²³Pîza Paylɛ̀t ə pfɨfə sê ghənə nə, “È nə̀yn pofsê nə ghɛ?” Ghənə ə fɨnə pɨa ndûə kə èshike nə, “Ə paynte vəyn ə awâmnè!”

²⁴Kə Paylɛ̀t tè fe nə ə̀ nyi e njìsè ashìŋə̀zè sə pfɨftə̂ ə̀ghɛ se ghənə fânə̀ nə ghɨ ətə kaʼa ghɨ pəyn ènôzè, è və njìə eluʼ mmòve ə shùə ə̀gho ə vəynghe ə nɔ̂ynkè əshi, ə pìə nə, “M kyi va ghɛze kûmə̀ èkwu ə wùə vɨ̂ynəze. Ə̀ ke ke ghàyn.”

²⁵Nɔ̂yn ətəynke akɨ̂m ə pə̀ynsə̀ nə, “Za, əngəʼ èkwu ə vəyn pfɨ ə ghàs ə tu è kɨsè ə ghɔyn ghasghe ətu!”

²⁶Paylɛ̀t ə zà fɨsə Pàlapàs ə chaʼ ə fo àtyaʼ nə ə pus Njisə̀s, è və fo tsɛsə̀ vəyn nə ghənə ndu paynte vəyn awâmnè.

²⁷Sokə̀ʼse ə Paylɛ̀tsè ə ke njiə nji è Njisə̀s əfètə̂ tɔʼ, nâʼà sokə̀ʼ sekɨ̂m ə pə̀ zûŋtə̀ ka ə Njisə̀s ə ngwùŋ.

²⁸Ghənə ə chɔʼtə̂ sèndzɨs sə vəynse, ə màʼà sàŋ e pàŋə ə vəyn ewìyn è kyâʼà kə sàŋə̀ fɔ̀yn.

²⁹Ghənə ə ke pɛ afɔ m̀sòlèndzɔŋke ə sò ə vəyn atu ə fɨnə ndə̂mə̀ mbàŋ ə̀ fèngɔ ə vəyn agho etwɔke, ə se tɨm əngwuʼ ə vəyn əshi sè nyə̂ʼsə̀. Ghənə tè piə nə, “Ndam e tyâzè ə fɔ̀yn ə̀ ghɨə Njûsghè!”

³⁰Ghənə e tsɨlə̂ m̀tɛ ə vəyn ewìyn ə fiə mbàŋ nə zɛ ə wulə̂ àtu əvəynke ətəyn.

³¹Ə pə̀ kə ghənə nyəʼsè mɨsè vəyn, ə chɔʼɔ sàŋ èpàŋə nə zɛ ə kɛsə̂ maʼà sə vəynse ə vəyn ewìyn. Ghənə ə ke njì ə vəyn se ndùə payntê ə vəyn awâmnè.

³²Kə sokə̀ʼse tè fɨə pə̂ è Njisə̀s endaʼ, ə kwəynə̂ è wùə mə è ndo endaʼa Silênzè e tɔŋtə̂ nə Shimùyn, sokə̀ʼse ə ŋamnə̂ vəyn nə è pɨaʼa wâmnè ə Njisə̀skè.

³³Ghənə ə pə̀ elùʼ e tɔŋtə̂ nə, Ngolngotà, mə ze tyə̂nə̀ nə, Eluʼ ewɔf-atuve,

³⁴Fumə ghənə ə fo Njisə̀s èlɨ̂m nə Njisə̀s mɨ, mə ə ndə̀m fɨa enjwiəke ətəyn. Ə pə̀ kə è mɔ̀m vɨ ə tə nə è mɨ va.

³⁵Ghənə ə tɨmə pə̀ʼ se chyàtè ə sendzɨs sə vəynse. Ə payntə̂ vəyn ə ke chyàtè ə sendzɨs sə vəynse sê ngɨŋ sə ghənə̂sè ə ndə̀mə̀ ə chi sè tɨmə pə̀ʼ ətəyn

³⁶Ghənə ə mɨ̀sə̀ ə tsɨsə̂ fu tsɨ̂ŋnə̀ vəyn.

³⁷Ghənə ə nyàʼtə̀ èghɛ zɛ ə pî nə è pofse ndô, ə payntə̂ ə vəyn etûə àwâmnè ze nyi nə, ‘Ə̀ VƗ̀NƏ NYI NJISƏ̀S, FƆ̀YN Ə̀GHƗ Ə NJÛSGHÈ.’

³⁸Ghənə ə ke payntə̂ paʼsê ə Njisə̀s yî ghɨ echɔŋəghe əpɛ̀, emɔ̀ʼ ə vəyn ekɔyn etwɔve è və mɔʼɔ ə vəyn ekɔyn ekôzè.

³⁹Ghɨghe sè tsɛ̂ endom, nə̀ʼsə̀ ètu, sôylə̀ Njisə̀s,

⁴⁰pîə nə, “Piə ò tè pi nə ò kàʼa ò pɨyte Ndɛ Ètsə̀mə ə ò kɛse pɛ ə fètə̂m mtuʼ mta? Sɔ̀se ngɨŋ zɛzè zôyn! Ə ò nyi ke nâʼà Va Fèzhə̀, o tso pə̂ fɛ etûə awâmnè ə ghàs fe.”

⁴¹Eghɨ kèpi famə endom, ghɨ èkɔʼsə nə eshyə̀ engaŋtəghe è tyə̀ynsè sə alàŋsè è chəʼse e nyə̂ʼsə̀ kəpî vəyn

⁴²pîə nə, “È və tə sɔ̀sè ghɨə mɔ̀ʼɔ, pîza zôyn è vayn kaʼa è sɔse ngɨŋə̂ vəyn. Ə̀ vɨ̀nə va fɔ̀yn ə̀ ghɨə Isìlâyghə? Ə È nyi fɔ̀yn ə̀ghɨ̀ ə Isìlâyghè, è və tso pə̂ zôyn fâ etûə awâmnè. Ə è tso pə̂yn fɛ etuə àwâmnè zôyn, ə ghàs pomə nə è nyi vɛ ə kɨmne ndə̂m.

⁴³È samsə̂ sê Zhə̀fè pîə nə è nyi va Fèzhə̀. Ngəʼ va, ə ghâsènì fe ke ndò ezhoghɛ Zhə̀fè sɔsè vəyn zôyn.”

⁴⁴Pî ə̀ghɨ ə chɔŋɔ ghɛ ə tè paynte yîghə̀ vəyn e sôylə̀ kəpi vəyn zamə.

⁴⁵Ə fètə̂yn èchwì, lɨmke ə kɨlə èndaʼ èkɨ̂m, se zaʼâ ə sechwìə sèta.

⁴⁶Ə̀ nyì famə ashìŋə̀ kə Njisə̀s tè pɨa chi è kyə̀ ètɛ nə, “Èli, Èli, lama sapatanì?” mə è za pîə nə, “Zhə̀ fɨmfe, Zhə̀ fɨmfe, kûmə̀ ghè ə ò zàmaʼà mi ə?”

⁴⁷Ghɨ mɔ̀ʼɔ ghɛ ə tè tyəm fu ə zɨə za ə pìə nə, “È tɔŋɔ Èlanjà nə è pəyn tsâmtè vəyn.”

⁴⁸Kè sə ashìŋə̀, wùə èmɔ̀ʼ ə ghənə əfètəyn ə nyɨŋə ndûə ə njìə kwùynchaʼ ə tsuʼə ə fekàʼ ə tsɨ̀ə m̀lɨ̀ me ngwaŋə̂m ətəyn ə ndə̀mə̀ ə vəyn echo nə è mɨ.

⁴⁹Pîza, ghɨ mɔʼɔ ghe e pîə nə, “Tyəm ə ghâsènì fe nə, Èlanjà pə̀ ndò se sɔ̀sè ə və.”

⁵⁰Njisə̀s ə fɨnə pɨa chîə nâʼà èkyə̀ ètɛ ə kwuə.

⁵¹Kè sə ashìŋə̀, pâs ə sendzɨs kɛ ə ghaŋse ə Ndɛ Ètsə̀mə ə pàsə̀ pɨ̂asvè pɨ̀a se zhə̀tè ə tu se tso fɨ etyə̀, chike ə nəʼə̀, chighe ə kwulə̂,

⁵²shyə̂tè ə chwìə, ghɨə etsɨə Fezhə̀ ghɛ ə tè kwu ə ndwìə endam,

⁵³ə fɨə kɔʼɔ pə̂ fumə ə teshyə̀. Ə pə̀ kə Njisə̀s zômə̀ ekwu, ghɨ nə ghɨ̂nə̀ ə ndùə endaʼ ə Njèlusalɛ̀mzè elùʼ vɛ ə ghɨ etsɨghe tè fe ghənə.

⁵⁴Tuə sesokə̀ʼ kɛ ə ke tè tsɨ̀ŋnə Njisə̀s yî sokə̀ʼ sə mɔ̀ʼɔse ə fe zâ kə chike nəʼə̀ è ghɛ kayntə mɔ̀ʼɔ ghɛ ə ghe kyâyn, fâynzè ə ko ghənə, ghənə ə pìə nə, “Səmɔʼ, wùə vɨ̀nə tè nyì ke nâʼà Vâ Fèzhə̀!”

⁵⁵Zənə tsɨə ghɛ ə tè zhə̀tè se chùmtə Njisə̀s ə Ngalìlî tsâmtə̀ vəyn, ə tyəmə̂ èghafke naynə̂ ə̀ghɛ ə̀kɨ̂m ghɛ ə ghe tè kyàynə.

⁵⁶Ə ghənə fètəyn tè nyi, Mèli və̂ Màkndàlɛ̂n, è Mèli nyìə Njə̂m yî Njosɛ̀f, è zhwiə ə̀ Zepɛndì.

⁵⁷Kə zhwikwɨləve tè kwəyn, wùə èghaʼâ endaʼa Àlimàtiyà ə pə̀. Zə vəynze tè nyi Njosɛ̀f, ə̀ nyi kepî chùmtè èpàm ə̀ Njisə̀s.

⁵⁸È və ndùə sê Paylɛ̀t nə è fo tyaʼa kə zhi nji pfɨnə Njisə̀svè se pfɨ̀mə̀. Paylɛ̀t ə tsɛ̀sə̀ àtyaʼ nə ə fo pfɨyn ə Njisə̀svè sê Vəyn.

⁵⁹Njosɛ̀f ə njìə èpfɨyn ə Njisə̀svè, ə ngolə̂ vəynve è pâŋ ə sendzɨs e feke mə ke fɨfə ndò,

⁶⁰ə ndùə pfɨ̂mə̀ vəyn eshyə̀ mə tɨm ə fètə̂ ànayn. Shyə̂ eghaʼâ ətəynze tè nyi eshyə̂ eghaʼâ efeze kə Njosɛ̀f tè kyi. Epàm ətəyn è və chiynə èchi eghaʼâzè se fìyn echo eshyə̀ eghaʼâ ətəynze ətəyn ə ke ndò.

⁶¹Mèli Màkndàlɛ̂n è Mèli ə nyìə Njə̂m yî Njosɛ̀f tè tsɨs fumə etipìə èshyə̀ eghaʼâzè.

⁶²Tuʼfe komtəfe ə zo pə mə tè nyi etuʼ endaʼ, ghɨə kɔʼsə nə eshyə̀ è ghɨ Falàsîə ə ndùə kwəynə̂ yîghə̀ Paylɛ̀t

⁶³ə pìə sê vəyn nə, “Pɛ̀ àpɨəyn, ghàs kɛsə̂ pɨ̂əytə̀ nə kə wùə àkaŋ vɛ tè pa nyi ètwɔ ə pìə nə, ‘M tə zômə̀ epàm mə̂ m̀tuʼ mta.’

⁶⁴Fo tyaʼa zôyn nə ə fɛtə̂ tsɨ̂ŋnə̀ èshyə̂ eghaʼâ ə vəynze se zaʼâ kə tuʼmè m̀ta pəyn tsɛ, endom kə chùmtè èpàm sə vəynse nə̂ tàʼa kyiə endom se nduə chɔŋ ewiynə vəyn, se tsàyn se ghɨə nə è və zòmə̀ ekwu. Ə kaŋ nə kɨ̂ynə̀ ə ghaʼa tsɛ̂ kɛ ə è tè wam sə shi.”

⁶⁵Paylɛ̀t ə pìə sê ghənə nə, “Ghàyn nji sokə̀ʼse ə se ndu fɛtê tsɨ̂ŋnè èshyə̀ eghaʼâ ətəynze kə ghɛ zhîze taʼa kyàyn.”

⁶⁶Ghənə ə ndùə ə ndə̀mə̀ chwìə fumə etûə echi zɛ ə ze tè nyì fumə echo àpùʼ kə ezhoghɛ ə wùə pə̀yn ŋaʼse, ə ghənə fe kê. Ghənə ə zà sokə̀ʼ fumə nə è zə naynə̂ ndɔ̀ʼɔ pəyn chɔŋ èpfɨyn ə Njisə̀szè.