Read Mmen Matyò 3 Bible Online

Matyò 3 - Mmen bible

Matyò 3

¹Ə shɨŋ nə zɛ, Njɔyn Foə m̀mò ə ndùə elùʼ endaʼ ashəshəze ə Njòndyâ ə zhə̀tə̀ sə̂ ndàʼà ə eghɛ ə Fezhə̀zè. È tè ndàʼa pîə nə,

²“Ghàyn kəmne ə ghànə sepi, kûmə̀ nə fɔ̂nə Fezhə̀ və paʼsê.”

³Njɔyn tè nyi wùə vɛ ə fɨ̀aʼtè Èsayà tè wàmnə̀ kûmə̀ vəyn kə è pì nə: “Wùə viu ndàʼà elùʼ ashəshəe nə, ‹Ghàyn pɨaʼte sê pə̂yn ə Pɛ̂pɛze. Ghàyn nəyn ə ndom mə vəynve ə nânə̀.›”

⁴Ndzɨsə Njɔynse tè nyi mə ə tɨm è nyuŋsə nyâm zhizè e tɔŋtə̂ nə Kamɛ̀l.[4] È tè kol fekô fə pfɨ̀ə nyàmfè ə və chɨ̀ŋə fèkò. Fɨazhiə ə vəyn tè nyi sepɨyn è ndûvè

⁵Ghɨghe ə pə̀ sê vəyn mə ndo ə Njèlusalɛ̀m, è pɨ̂as endaʼ ə Njòndyâvè ekɨ̂m, è ndaʼ tekɨ̂m etipì ə tsô èghaʼâ ə̀ Njondàyn.

⁶Ə pə̀ kə ghənə tsɛ̂ fɨ̀aʼtè tə ghənə̂tè, è və fo m̀mo sê ghənə ə tsô Njondàyn.

⁷Ə pə̀ kə Njɔyn fe tsɨ̀tsɨ̂ ə̀ ghɨ̀ə Falàsîə è ghɨə Sandùsîə ghe pə̂ nə è fo môm sê ghənə, è və pìə sè ghənə nə, “Mbam sɨ̂nə̀! Ə̀ tɔfse nde ghàynə, kə ghànə mɔ̂msə̀ se tə epɔynsê zɛ ə Zhə̀fè nyi se tom sê ghàyn ə?

⁸Ghàyn nəyn ghɛ ghɛ ə ghe nə̀ chwîtə̀ nə ghàyn ə kə̀mnè ə ghànə sepi.

⁹Kə ghàyn ə kwâʼtə̀ nə ghàyn kàʼa ə ghàyn tə pɔynsə̂ ə Fezhə̀zè kûmə̀ nə ghàyn pìə nə ghàyn nyi əghɔ ghɔnə sê Aplàghâm. M tsâ sê ghàyn nə Zhə̀fè kàʼa ə fe nəyn ə chi ghɨnə kɛse sə ghɔyn sê Aplàghâm.

¹⁰Njàm nyîə nyi è pɨaʼtêzè se kwə̀lə̂m mkâʼ ə te ghàŋ. Ə faŋ pî fèkâʼ fèkè se mu etwɔm echûŋvè, ə kwə mâʼà ewùs.

¹¹M fo m̀mo sê ghàyn è môm mə tsòm se tyə̀yn nə ghàyn ə kwiynê ə ghànə sepi. Pîza vɛ ə è pə̀ ə mì epàm nə̀ fo m̀mo sê ghàyn è Zuʼse Ŋwaʼase è wusve. È tsɛ̂ ndò mi. M kwənə pî va se pɨ̀aʼà sepfɨ sə vəynse.

¹²È kyi ke àshə̀ʼ ə vəynke ə və gho lɨmtə̂ se foptê əsesɔ̀f. Shɨ̂ŋə̀ kɛ ə è shə̀ʼ mɨ̂sè, ə è nji sɔ̀fsè ə è ndəm ə vəyn etwəyn. Pîza nyi se nyɔ̀ʼɔ epfɨ̂ŋ ewùs, mə ve pɛ̂ ndɨmə̂ va.”

¹³Ə̀ tè nyì fumə ashìŋə̀, Njisə̀s ə ndò apàs endaʼa Ngalìlîkè ə pə̀ sê Njɔyn ə tsò Njondàyn nə Njɔyn fo môm sê Vəyn.

¹⁴Pîza Njɔyn e mɔ̂msə̀ se nə̀yn nə Njisə̀s kwiyne kwâʼtè ə Vəynze pîə nə, “Ə̀ kyi ghò se fo m̀mo sê mi, ə pɨlə pə̀ ghò nə m fo môm sê ghò zayn zə?”

¹⁵Pîza, Njisə̀s ə pə̀ynsə̀ sê vəyn nə, “Za ə zə nyi ke zamə kè fa ashìŋə̀. Famə endom, ə ghâsènì nə nəyn ə̀ghɛ ə̀kɨ̂m ghɛ ə Zhə̀fè kyiŋə.” Njɔyn ə se pomə̂ se fo Vəyn è môm.

¹⁶Njisə̀s tè fi mɨsè m̀mo, ə fɨə pə̂ ə tsô. Kwutwəynve ə chwìə, È və fe Sèzuʼ sə Fezhə̀sè se tso pə̂ nyi ke kə akwɨ̀l ə masə̂ ə və atu.

¹⁷Kè sə ashìŋə̀, kyə̀ ə fɨ pə̀ ekwùtwəyn ə piə nə, “Ə̀ vɨ̀nə nyi Va èkɔ̀ŋ vɨ̂m, È nə̀ Mi M saŋnə̂ tsɛ̂sə̀.”