Read Mmen Matyò 5 Bible Online

Matyò 5 - Mmen bible

Matyò 5

¹Kə Njisə̀s tè fe nɔ̂yn ə ghɨ̀ vɛ, ə kɔʼɔ ə pfɨ̀yn ə tsɨsə̂ fumə. Chùmtè epàm sə vəynse ə zùŋtə̀ ə və ngwùŋ.

²È və zhə̀tə̀ sè zaʼlə̂ ghənə pîə nə:

³Pɔsê nyì sê ghɨ ghɛ ə fɨfə ə sezuʼ, kûmə̀ nə fɔ̂yn ekwùtwəynve nyi sê ghənə.

⁴Pɔsê nyì sê ghɨ ghɛ ə ghe chîə kwue, Zhə̀fè tə nə̂ nə ghənə saŋnə̂.

⁵Pɔsêzè nyì sê ghɨ ghɛ ə kyi ngɨmnêzè; ghənə tə kyîə àfɨa kɛ Zhə̀fè tsɨ̀nè.

⁶Pɔsê nyì sê ghɨ ghɛ ə chɨ̀ŋ zafə ghənə sə̂ nə̂ ə̀ghɛ ghɛ Zhə̀fè kyiŋə. Zhə̀fè tə fo sê ghənə kè kə ghənə kyiŋə.

⁷Pɔsê nyì sê ghɨ ghɛ ə ghe kosə səyn sê ghɨə mɔ̀ʼɔ̂, Zhə̀fè tə kosə̂ èsəyn sê ghənə.

⁸Pɔsê nyì sê ghɨ ghɛ təm ə ghənə̂ghè zo, Ghənə tə fe Fèzhə̀.

⁹Pɔsê nyì sê ghɨ ghɛ ə fɨaʼà nə pɔ̂ynè ə nyi, Zhə̀fè tə tɔŋtə̂ ghənə nə ghɔ Və.

¹⁰Pɔsê nyì sê ghɨ ghɛ ə chɔʼɔ gholə ghənə̂ghè kûmə̀ nə ghənə nə̂ èghɛ zɛ ə Zhə̀fè kyiŋə, Fɔ̂ynə̂ Fezhə̀zè nyì sê ghənə.

¹¹Pɔsê nyì sê ghàyn ezhoghɛ ghɨ sòlə̀ ghàyn, chɔʼɔ àghol kaynke, fɨnə wamtə̂ tèkyì tə ekwaŋte tekɨ̂m kûmə̀ ghàyn kè kûmə̀ nə ghàyn nyi əghɨ ghɨmə.

¹²Ghàyn e saŋnə̂ fɨnə tyalə, kûmə̀ nə ə ndə̀m mâʼte eghaʼâvè ekwùtwəyn sê ghàyn. Ə̀ nyì kepî za kə ə tè chɔʼɔ ghol ə sèfɨ̀aʼtè sə shise.

¹³Ghàyn nyiə kɔʼnə̂ sê ndam tə ghɨ̀tè ə mbi kè kə ngwaŋfe kɔʼnə se fɨazhiəve. Mə ə tɔfə fengwaŋ mî, ə kaʼa nəyn zayn nə fə fɨnə tɔfə? Ə fə fɨnə tsɔ̂fə̀ va sê ghɛ zhîze, ə̀ tsɛ̂ kə va nə ə sɨs mâʼà, ə ghɨə tsə̂yle.

¹⁴Ghàyn nyi kə lâm se chwitè sê ghɨ mbi ghə kɨ̂m ndom ə Fezhə̀vè. Ndaʼ zɛ ə è nyi etûə pfɨ̀yn vâyn kàʼa ze ndəte.

¹⁵Wùə tyàynə̀ va lâm è və pfɨsə̂ tɔmə etyə̂ àkɛ̀. Ə pɨlə tɔmə etùə elùʼ engaŋtəu kə è zə panə sê nâʼàpî ndè ə ndɛ.

¹⁶Kèpî endom nə vɨ̂nə̀ mə, payn zaynze kyi sə̂ panə ə ghɨə ghə shi, kə ghənə fe ə̀ghɛ echûŋ ghɛ ə ghàyn nə̀, tsîtə̀ Pɨ̀a vâyn vɛ ə è nyi ekwùtwəyn.

¹⁷Kə ghàyn ə kwaʼtə nə m pə̂ mbi se kəʼsê Alâŋ ə Mosîskè è zaʼlê ə se fɨ̀aʼtè. M pâʼà pə̀yn se kəʼsə̂ təynte, pîza se pɨlə nə̀yn nə zaʼlê ə ghənə̂zè pəyn səmɔʼ.

¹⁸M tsâ sê ghàyn səmɔʼ, kə kwutwəyn è chike tə ndamə zaʼâ pî zàyn, wùə tə kəʼsə̂ va nâʼàpî fèghɛlə̀ fɛ ə fe tətə kwûŋsə̀ əfètə̂ Àlâŋ nə kɛ, ə̀ tsɛ̂ kə va mə ghɛ ə̀kɨ̂m ə kyayn.

¹⁹Zôyn, pîndè vɛ ə è kim lâŋ etətə̂kè amɔ̀ʼ elwɔ̂ŋ ə Fezhə̀ nə vɛ, nâʼàpî kɛ ghənə kwâʼtə̀ nə ke kɔʼnə̂ va, è fɨnə zaʼlə̂ kəpî ə̀ghɨ nə ghə nə̂ eghɨ nyiə mə, kyì ə wûə nə vɨnə tə nə̂ ə è və nyi wùə èkwùŋsə əfètə̂ ghɨ̀ ghɛ ə ghe nyi ekwùtwəyn. Pîza nâʼà pîndè vɛ è nə̀ ghɛ zɛ ə lâŋkè pìə, kɛsə̂ zaʼlə̂ ə̀ghɨ mɔ̀ʼɔ nə ə nə̂ kəpì eghɨ nyiə mə, è tə nə̂ ə è və nyi wùə engɨsə kɔʼnə əfètə̂ ghɨ̀ ghɛ ə ghe nyi ekwùtwəyn.

²⁰M tsâ sê ghàyn nə, ghàyn tə njiə elùʼ efɔ̀yn ə Fezhə̀zè kè ezhoghɛ ghɛ zɛ ə ghàyn nə̀ sê Zhə̀fè tsɨ̀ə zə setyə̀ynsè se elwɔ̀ŋsè è ghɨ Falàsîə.

²¹Njisə̀s ə kwəynsə̂ mə È pìə nə, Ghàyn ə zɨ nə ə tè pì sê ghɨ sə shi nə, “Kə wùə tə zhwi wùə. Ə̂ zhwi pîndè wùə ə pə̂yn è vəyn sê saʼe.”

²²Pîza, zôyn m tsâ sê ghàyn nə: ə nyɔ̀ʼsə̀ pi ndè tɔŋ sê ànyìə vəyn, ə tə pəyn è vəyn sê saʼe. Ə tɔŋte pîndè ànyìə vəyn nə, “Ò tsɔ̀fə kə eshi sə ndô!” Ə tə ndu è vəyn ashi əghɨ̀e saʼake. Ə tɔŋtə̂ pî ndè ànyì nə, “Ngô afɨake!” Ə zə pofə nə è nə̀ ndûə elùʼ ewùs.

²³Ə ò nyì se ndù èmâʼteze sê Zhə̀fè alaŋ efoke, ə kwàʼtə̀ fumə nə ghô ghânə̀ ànɛ̂ nyîə kyi ngəʼ,

²⁴o zà èmâʼte ətəyn ashi alaŋ efoke. O ndùə chîə sə shi ə nə̀ pɔ̂ynè ghâyn ànɛ̂ nə vɛ, tsɔ̀fə ə ò se pə fo efo zɛ sê Zhə̀fè.

²⁵Ə Wùə pə̀yn è ŋwàʼlè esaʼ se ghò ə njì ndùə è ghò elùʼ ə saʼe, o fɛtə̂ èghɛ ətəynze ghâyn vəyn mə shîŋə̀kè pa nyi ndò, ə̀ pu zâ ə è ndu eghò elùʼ ə saʼe. Ghɨ ghɛ ə saʼa pɔŋ fo kepî ghò sê sokə̀ʼ, ə sokə̀ʼ ə̀təyn ndəm gho ə ndɛ̂ chaʼ.

²⁶M pîə sê gho nə, ə e kyàyn zâ, ə ò faŋ ke fu ə ndɛ̂ chaʼ se zaʼâ kə ò ndaʼ mɨ̂sè èkɛ vɛo nâʼà èkɨ̂m.

²⁷Ghàyn ə zɨ nə ə tè pi nə, “Kə wùə tə nyîŋə̀ è zhwîə wùə èkɨsè ndôm ə̀ wùə.”

²⁸Pîza, m tsâ sê ghàyn zôyn nə, ə nayne pi ndè wùzhɔyn ə səmtə̂ se nyɨ̀ŋə̀ è vəyn, ə nyi mə è və nyɨ̀ŋə̀ è vəyn ə və təm.

²⁹Ə shi zɛ ze ekɔyn twɔze nə̂yn nə ò nəyn pi, o pɔ̀ʼɔ̀ fɨsə̂ ə màʼà. E tsɔ̂fə̀ nə ò laʼ shi zɛ ze mɔ̀ʼ tsɛ̂ kə ə màʼa wiyn vɛve ekɨ̂m elùʼ ewûse.

³⁰Ə gho kɛ ke ekɔyn etwɔke nə̂yn nə ò nəyn pi, o tənə màʼà. E tsɔ̂fə̀ nə ò laʼ gho kɛ ke àmɔ̀ʼ tsɛ kə ə maʼa wiyn vɛve ekɨ̂m elùʼ ewùs.

³¹Ŋwàʼlè ə̀ Fèzhə̀ pì kepî nə, “Ə̂ chùm pîndè zhwiə vəyn, ə è və kyi se fo ŋwàʼlè sê vəyn se tyə̀yn nə è və chùm vəyn.”

³²Pîza, M tsâ sê ghàyn zôyn nə: ə wùə chùm zhwiə vəyn, mə è paʼà ko vəyn yî wùndômə̀ ndò, wùzhɔynə ə̀təyn ə ndùə malə̂ wùə endômə̀ ə̀ndo, ə zə nyi nə ndomə̀ vəyn vɛ è chùm vəyn ə nə̀yn wùzhɔynə ə̀təyn nə è nyɨŋə yî wùndômə̀ ndò. Nâʼà pîndè vɛ ə è malə wùzhɔyn mə ə chum vəyn ə ndɛ ə̀ malə̂, ə zə nyi nə wùndômə̀ vɛ è malə vəyn ə nyɨŋə̀ yî zhwiə wùə ndò.

³³Ghàyn ə zɨ kepî nə ə tè tsàyn sê ghɨ sə shi nə, “Kə ò nə kim m̀kâyn, pîza, nə̀yn ghɛ zɛ ə ò kàyn se nə̀yn sê Zhə̀fè.”

³⁴Pîza, m tsâ sê ghàyn zôyn nə: kə wùə tə mɨ m̀kâyn. Kə ò tə mɨ m̀kâyn ezə elùʼ efɔ̀yn ekwùtwəynve kûmə̀ nə ə̀ nyi eluʼ vɛ ə Zhə̀fè kyi kyə̂ fə vəyn fe fɔ̀ynfè.

³⁵Kə ò tə mɨ m̀kâyn ə chike ezə kûmə̀ nə ə̀ nyì fu kə Zhə̀fè nyi mə fə tɔmtê gholə Və. Kə wùə tə mɨ m̀kâyn ə Njèlusalɛ̀m ezə, kûmə̀ nə ə nyi endaʼa ə fɔ̀yn èghaʼâzè.

³⁶Kə ò tə kayn pî ə tu kɛ kə ezə kûmə̀ nə ò vayn kàʼa ò nəyn pî nyuŋ àtu èmɔ̀ʼ nə è zə fɨfə kɨ̀sə è zə fɨ̂mə̀.

³⁷Pîza ə ò pì nə ò nə̀ nə̀ èghɛ, “O pìə nə m nə̀ nə̂ zəynze” kə ò pi nə, “ày m nə̀ nə̂ va zəynze” nâʼà pî èghɛ èkè zɛ ò paʼse ətəyn ndo sê satàyn.

³⁸Ghàyn ə zɨ nə ə tè pì nə, Ə̂ wùə tsuʼ shi wûəzè, ə pɔŋɔ tsuʼə zə vəynze, ə wùə chɔʼ sɔŋ ə wùəzè, ə pɔŋɔ chɔʼɔ zə vəynze.

³⁹Pîza, M tsâ sê ghàyn zôyn nə, “Kə wùə tə pə̂ynsè pi è pi. Ə̂ wùə sayn ghô apɔ̀ŋ ekɔyn etwɔke, o pə̀ynsə̀ tyə̂nə̀ kə mɔ̀ʼɔ̂ke ə è sayn mɨ̂sè.”

⁴⁰Mə ə wùə njì ndû è ghò elùʼ esaʼ se sɔmə̂ ghò se fiə sendzɨs sɛse, o fo paʼsə̂ fepfɨ̂ se vəyn.

⁴¹Ə wùə chiynte ghô nə ò nji ndu è vəyn sə mâyl èmɔ̀ʼ, o ndùə sə se kìlomɛtà sèpɛ̀.

⁴²Ə wùə ndɔnə fɨake sê ghò, o fo sê vəyn. Ə wùə kyiŋə se samsə̂ fi afɨa sê ghò, o samsə̂ fo sê vəyn.

⁴³Ghàyn ə zɨ nə ə tè pì nə, “Kɔ̀ŋ soyn vɛ̂vè ə pànə̀ sèpàyn sɛse.”

⁴⁴Pîza, M tsâ sê ghàyn zôyn nə, ghàyn kɔ̂ŋɔ̀ sèpàyn saynse, tsə̂mə̀ sê ghɨ ghɛ ə chɔʼɔ ghol ghaynghe.

⁴⁵Ə ghàyn nə̀yn zamə, ə ghàyn ə nyi ə̀ ghɔ pɨ̀a vâynvè ekwùtwəyn. Kûmə̀ nə È nə̀ nə chwìə Vəyn ə panə sê ghɨ piə è ghɨ echûŋə̀ kè eghɨ, fo èghol sê ghɨ ghɛ ə nə̂ chùŋ è ghɛ ə nə̂ pi kè eghɨ.

⁴⁶Zhə̀fè nə̀ maʼtə̀ ghàyn sə ghɛ ə ghàyn kɔ̀ŋə̀ kə ghɨ ghɛ ə kɔ̂ŋə̀ ghàyn ə? Piə ə̀ghɨ ghɛ ə tənə tâksè nə̀ kəpî zâ.

⁴⁷Mə ghàyn tɔŋtə kə soyn saynse, ə nyi mə ghàyn nə̀ èghɛ zɛ ə nâʼà tsɨ̀yntsɨ̀ynə̀ wùə kàʼa è nəyn. Pî ə̀ghɨ ghɛ ə ghe keva Zhə̀fè nə̀ kəpî za?

⁴⁸Ghàyn kyi sə̂ nyi chichi kè kə pɨ̀a vâyn ve ekwùtwəyn nyi chichi.