Read Mmen Matyò 6 Bible Online

Matyò 6 - Mmen bible

Matyò 6

¹Ghàyn e tɔ̂ʼnə̀! Sə̂ nə̂ va ghɛ Fezhə̀ ghaynghe chûŋə̀ kè nə ghɨ fe. Ə ghàyn nə̀ ghɛ nə ghɨ ghə fe, ə ghàyn tə tàʼa kyiə emâʼte sê Pɨ̀a vâynvè ekwùtwəyn.

²“E za nyi nə ə ò fo fɨake sê wùə vɛ ə è kyiŋə, kə ò ghaŋsə̂ èwiyn, kèpî kə ghɨ e kaŋkaŋə nəghe ə sendɛ sə Fezhə̀sè è cho tefàfghè nə̀ nə ghɨ ghə fe ghənə. M tsâ sê ghàyn səmɔʼ nə ghɨ nə ghɨ̂yn ə kyi mɨ̂sè mâʼte ə ghənəè.

³Ə ò fo fɨake sê wùə vɛ è kyiŋə, kə ò nəyn nə wùə vɛ ə è nyì paʼsê pî əghò etipì fe.

⁴Zɨnə mə nə̀ nə̂ ə wùə vîvè tàʼa ke afɨa kɛ ò fo sê veyn. Zhə̀fè pɨ̀a vâyn vɛ ə è fe nâʼà pî ghè andə̀te nə̂ maʼte ghô.”

⁵Ə ghàyn piə tsə̂mə̀, kə ghàyn ə tsə̂mə̀ kə ghɨ ghɛ ə kaŋkaŋə nə̂. Ghənə kɔ̂ŋə̀ sə̂ ndwìə tsə̀mə̀ ə sendɛ sə atsɨ̀yntese tsəməse è kɨsè echo fàfə̀, kə nâʼà pîndè fe ghənə. M tsâ sê ghàyn səmɔʼ nə kyì əghɨ̀ ghɨ̂yn ə kàynè kyî maʼte ə ghənə̂zè ekɨ̂m.

⁶Ə ò nyì se tsə̀m, ndù ə ndɛ fètəyn, kyɨ̀ŋ pâʼà ndɛke, ə tsə̂mə̀ sê pɨ̀a ve vɛ ə fe va vəyn. Ə pɨ̀a ve vɛ È zɨə ghɛ ghɛ ò tsə̀mə̀ andə̀te, tə mâʼtè gho.

⁷Ə ghàyn tsə̂mə̀, kə ghàyn ə piə tsɛsə ghɛghe se tsɨ̀ mə ghe kiva tɔfe, kə ghɨ ghɛ ə keva Zhə̀fè tsə̀mə̀. Ghənə zàŋsə̀ kwâʼtə̀ nə Zhə̀fè nə̀ zɨə ghənə kûmə̀ kə ghənə tsə̂mə̀ tyafsə̀.

⁸Kə ghàyn ə nyi kə ghənə kûmə̀ nə Zhə̀fè Pɨ̀a vâyn nyîə kâynè ke àfɨa kɛ ə ghàyn kyiŋə tsɔ̀fə ə ghàyn pfɨf.

⁹Ə̀ vɨnə nyi endom vɛ kə ghàyn ə tsə̂mə̀ ətəyn: Zhə̀fè, Pɨ̀a vâs vɛ ə è nyi ekwùtwəyn: Ə kɔʼsêzè ə nyi èzə zɛze,

¹⁰ə tyaʼ kɛke fɔ̀ynkè pəyn nji eluʼ, ə ghɨ ghɛ ə ghe nyi ə chi ə nə̂ ə̀ghɛ ghɛ ə Ò kɔ̀ŋə̀ kè eghɨ kə nə̂ ekwùtwəyn.

¹¹Fo sê ghàs ndâyn fɨazhiə vɛ ghàs kyiŋə.

¹²Lɛ̀se fo pi sɛ ghàs nyi mə nə̀yn, kèpi eghɨ kə ghàs lɛ̂sə̀ fo ghɨ ghɛ nə̂yn pi sê ghàs.

¹³Kə ò zâ nə ghàs pfɨə nji emɔ̀m pîza kɨ̀ŋte ghàs sê satàyn. [5]

¹⁴Ə ghàyn lɛ̂sə̀ fo ghɛ ə pi ghɛ ə ghɨ nə̂yn sê ghàyn, Zhə̀fè, ə Pɨ̀a vâyn vɛ è nyi ekwùtwəyn pɔŋ lɛ̂sè fo sèpi saynse.

¹⁵Pîza ə ghàyn tàʼa lɛ̀sə fo əghɨ mɔ̀ʼɔ, Zhə̀fè, ə Pɨ̀a vâyn tə tàʼa pɔŋɔ lɛ̂sə fo saynse.

¹⁶“Ə̂ ghàyn pamə choze, kə ghàyn ə kosə̂ kyâʼà kə ghɨə kaŋkaŋə nə̂. Ghənə piə pamə ècho, e kosə̂ kyâʼà kə ghɨ fe nə ghənə pamə ècho. M pîə se ghàyn səmɔʼ nə ghənə kàynè kyî mâʼtè ə ghənə̂zè.

¹⁷Ə̂ ghàyn pamə choze, ghâ shûə tèkyâʼ taynte, ə shɔ̀ʼè ètu vâynvè.

¹⁸Ghàyn nəyn zɨnə mə kə ghɨghe ə keva nə ghàyn pamə ècho, ə̀ tsɛ̂ kə va Zhə̀fè pɨ̀a vâyn vɛ ə fe va vəyn ke nə ghàyn pamə ècho. È fe ə̀ghɛ ghɛ ə ghe nyi andə̀te, mə nyi Vəyn vɛ ə È tə mâʼtə̀ ghàyn.”

¹⁹“Kə ghàyn ə ndə̂mə̀ èghaʼ zayn ze fa chi, elùʼ vɛ ə shɔʼshɔʼe, è chaʼè kaʼa ve pofse, mə ghɨ echɔŋə kaʼa kəm nji kepî ə ndɛ ə chɔŋ vəynve.

²⁰Ghàyn pɨl pɨaʼtê ndəm èghaʼ zayn ze ekwùtwəyn, eluʼ mə shɔʼshɔʼe, è chaʼè vâyn kàʼa ve pofse, ghɨ echɔŋəghe e vayn kàʼa kəm nji ə ndɛ se chɔŋ ə vəynve.

²¹Kûmə̀ nə luʼ vɛ ghaʼ zɛze nyi ətəyn, ə̀ nyì kepî fu kə təm ghɛghe nyi.”

²²“Shiə wûə nyi lâm sè wiynə vəynve. Ə shi ghɛ nyi achûŋ, ə wiyn vɛve ekɨ̂m ə nyi mə ə̀ lwiyn kê èpayn;

²³Pîza, mə shi ghɛghe va achûŋ, ə wiyn ve və nyi əfètə̂ àlɨm. Ə fɨa kɛ ə ke nyi se chwìtè epayn se ghò pɨl nyi àfɨa kɛ ə ke ndə̂mə̀ ghò alɨm, ə nyi nə lɨm kɛ ə ò nə̀ nə̂ ə ò nyi əfètə̂ ətəyn nə̀ nə kə fɨ̂mə̀ àfɨa!”

²⁴“Ò vayn kaʼa ô nyi àkɔ̂s sê ghɨghə pɛ̀; ò nə̀ kɔ̂ŋə̀ èmɔ̀ʼ ə ò payn və mɔʼɔ. Ò nə̀ nə̂ ə o nyi ghâyn wùə èmɔ̀ʼ ə ò tə vɛ mɔ̀ʼɔ. Ò vayn kàʼa ò nyi wùə efɨ̀aʼa sê Zhə̀fè, kɛsè nyi wùə èfɨaʼa sê kɛve.”

²⁵“Ə̀ za nyi eghɛ zɛ m tsâyn sê ghàyn nə: kə ghàyn ə kyi èfɨmsê nə ghàyn nə̀ zhiə ghɛ̀ ə mɨ ghɛ endom sə̂ ndamə, pî kə se ndzɨs sê wiyn vɛve. Nâʼà sə kàyn, ndam zayn tsɨ̂ə tsɛ va fɨazhiə və? Wiyn vaynve kɔʼnə̂ tsɛ̂ va ndzɨse ə?

²⁶Ghàyn naynə̂ kə nɨ̂ŋ mə: ghənə zho va fɨave, ghənə kwîə va fɨave, zûŋtə̀ va fɨazhiəve se ndə̀m etwəyn. Pîza Zhə̀fè pɨ̀a vâyn vè ekwùtwəyn e tɔ̂ʼnə̀ è ghənə! Ghàyn kɔʼnə̂ tsɛ va nɨ̂ŋmè ə̀?

²⁷Ə̀ nyi nde ə ghàyn ə fètəyn ə è kàʼa è kwəynse tuʼm̀ ə vəyn ndam kûmə̀ nə è kyi efɨmsê ə?”

²⁸“Kûmə̀ ghè ə ghàyn kyi fɨmsêzè kûmə̀ sèndzɨs sɛ ə ghàyn nə̀ maʼa? Ghàyn naynə̂ ke kə̂ ndwɔ̂ŋ azhìvè ndəmə: ve fɨ̂aʼà va fɛtə̂ va ndzɨse sè ngɨŋsə ghənə̂sè.

²⁹M tsâ sê ghàyn nə, naʼapî fɔ̀yn Sòlomùyn è ghaʼa vəyn ze kɨ̂m tè màʼa va ndzɨse se tsɔ̂fə̀ zaʼâ kə sə endwɔ̀ŋ sɨ̂yn.

³⁰Ə̂ Zhə̀fè nyi kàʼa Fe lafse tayn èwə̂yn nyî mə ve nyi ndâyn mə ezhwisəʼə ə və nyi mə nyɔ̀ʼ ewùs, ə È tə tàʼa lafsə̂ tsɛ ghàyn nyiə mə mə? Ghàyn kyi epomə̂ e tətə̂ zè.”

³¹“E za nyi nə kə ghàyn ə kyi èfɨmsê pîə nə, ‘Ghàs nə̀ zhiə ghɛ̀ ə? Ghàs nə̀ mɨə ghɛ ə?’ Pî nə, ‘Ghàs nə̀ maʼà ghɛ̀ ə?’

³²Ghɨ ghɛ ə ke va Zhə̀fè nyi ghɛ ə nyɨŋə epàmə̂ ə̀ghɛ nə ghɨ̂nə̀. Pîza Pɨ̀a vâyn ekwùtwəyn ke ndô nə ghàyn kyiŋə ndò fɨa nə vɨ̂yn èkɨ̂m.

³³Pîza, ghàyn nayne chi ə̀ghɛ efɔ̂yn ə Fezhə̀e sə shi ə ghàyn nəyn ghɛ ghɛ ə Zhə̀fè kyiŋə nə ghàyn nəyn. Ə ghàyn nə̀yn nyiə mə, ə Zhə̀fè nə fo fɨa mɔ̀ʼɔve nâʼà ekɨ̂m se ghàyn.

³⁴È za nyi nə kə ghàyn ə kyi è fɨmsə̂ kûmə̀ ezhwisəʼəve. Kûmə̀ nə zhwisəʼəve tə nə̂ ə və kyi zə vəyn nə tefɨmsê. Naʼapî ètuʼ èkwə̀ kyi tètsôs te tsɨəte te kwəynə kə sê tuʼ nə fɛ.”