Read Mmen Matyò 9 Bible Online

Matyò 9 - Mmen bible

Matyò 9

¹Njisə̀s ə njiə ə ngwùʼ èghaʼâ ə tyàŋà ènjwî ə kɛsə̂ ndùə ə tɔ̂ŋ zɛ ə È tè ndamə ətəyn.

²Ndômnè yîghe ə pə̀ è kèngɛchi sê vəyn è nyɨŋ ə feghàm. Kə Njisə̀s tè fe pomə̂ zɛ əghɨ ghɛ tè kyi, È və pìə sê kèngɛchi kɛ nə, “Kyi təmə ə vayn vɨ̂m! Ə lɛ̀sè fo pi sɛse.”

³Tyə̀ynsè sə alàŋ shise ə zɨə za sè shwinə̂ pîə nə, “Wùə vɨnə̀ sòylə̀ Fèzhə̀.”

⁴Njisə̀s ə kê èghɛ zɛ ə ghənə kwâʼtə̀, ə pìə sê ghənə nə, “Kûmə̀ ghè ə ghàyn kwàʼtə̀ ghɛ epiə nyiə.?

⁵Ə̀ pɔynə̂ zɨyn zə, se pì nə, ‘Mə lɛ̀sè fo pi sɛse,’ mə se pì nə, ‘Ndwi, ò kwìə?’

⁶M nə̀ tyə̀nə̀ sê ghàyn zôyn nə Vâ Wùə kyi ndô tyaʼa fâ chi se lɛ̀sè fo sepi sə ghɨ̀sè.” È və ke pì sê kèngɛchi kɛ nə, “Ndwi, njì ghâm fɛfe ə ndò kwɨlə̂.”

⁷Kèngɛchi ətəynke ə ndwìə ə kɛsə̂ kwɨlə̂.

⁸Ghɨghe ə fe za fâynzè ə ko ghənə. Ghənə ə zhə̀tə̀ se tsìtə Fèzhə̀ Fɛ ə Fe fo tyaʼa sê ghɨə nə ə nə̂ ə̀ ghɛ ghɨ̀yn.

⁹Njisə̀s ə ndò fumə ə piə è ndùə ndò ə fe wùə è tənə nə̂ sè tâks, zə vəynze e nyi Matyò. Matyò tè tsɨs apfɨ̀ə kɛ ə tənə tâksè ətəyn. Njisə̀s ə pìə sê vəyn nə, “Chùmte mi.” Matyò ə ndwìə ə chùmtə̀ Njisə̀s.

¹⁰Epàmə̂ zɨ̂nə̀, Njisə̀s ə ndùə ə Matyò ə ndɛ se zhi. Ghɨ e tənə nə sètâksə̀ setsɨ̀ è ghɨ piə ə pə̀ paʼsə̂ sê zhiə yî ghə̀ Njisə̀s è chùmtè èpàm sə vəynse.

¹¹Kə ghɨ Falàsî əmɔʼɔ fe kə Njisə̀s tsɨsə yîghə̀ kyì ghɨ̀ ghɛ, ə pfɨf sê chùmtè epàm sə Njisə̀sè nə, “Kûmə̀ ghè ə tyə̀ynsè vâyn zhiə yî ghɨ ghɛ ə ghe tənə tâksè è ghɨ epi ghə?”

¹²Njisə̀s ə zɨə eghɛ zɛ ə ghənə piə ə pə̀ynsə̀ sê ghənə nə, “Ghɨ ghɛ ə nyi wiynve twɔ kyiŋə va wùə èfù, ghɨ ghɛ ghe zafə nyi ghɛ ghe kyiŋə wùə èfù.

¹³Pîza, ghàyn ndu kyiŋ kə ghàyn zɨ kê ə̀ghɛ ghɨ̀ynə ə nyâʼ ə ŋwàʼlè ə̀ Fèzhə̀ nə, ‘Ə̀ nyi ekosê esəyn kə M kyiŋə sê ghɨə, ə̀ vachi è se ə se nyàmzè sê zhə̀tə̀m.’ M tè pâʼà pə̀yn ə mbi se tɔŋə̂ əghɨ ghɛ ə ghe se tyəm chichi, pîza M tè pəyn kûmə̀ ə̀ghɨ piə.”

¹⁴Chùmtè epàm sə Njɔyn Foə m̀mòse ə pə̀ sê Njisə̀s ə pfɨfə sê vəyn nə, “Kûmə̀ ghè ə ghàs è ghɨ Falàsîə pamə choe, chùmtè èpam sɛse pamə va ə?”

¹⁵Njisə̀s ə pə̀ynsə̀ ghənə è ngàyn nə, “Ghɨ ghɛ ghe pə̂yn elùʼ ezhiə nə malə̂vè kàʼa ghə chîə zàyn ndom ə̀ wùzhɔyn e pa nyi yî ghə̀ ghənə? Ze vayn kyàyn! Tuʼve tə pə̂, ə nji tsɨ̂sè ndom ə̀ wùzhɔyn ə̂ ghənə əfètəyn. Ə̀ tə nə̂ ə nyi fumə fetuʼ kə ghənə pam choe.”

¹⁶“Ghàyn kê nə ə wùə fɛtə ndzɨsə vəynse, è vâyn kàʼa è nji pâs ə sendzɨs efeke ə è fɛte ndzɨse mɨse ətəyn, kûmə̀ nə ə ndzɨse fɛsə təynse zhə̂tè se sàʼtè, ə se chyase ngɨŋə̂ səynse ə tə se mɨse. Ə puʼə təynke ə ghaʼa tsɛ̂ kə ke fə̂ nyì sə shi.

¹⁷E za nyì kepî èghɨ kə wùə vayn kàʼa è nji lɨ̀ mefɛ̂m ə è ndɔm ə fètə̂m fe mɨfe. Ə è nə̀yn za, ə lɨ̀ mə təyn mè kɔʼ ə təm fə təynfe payte, ə laʼ lɨ̀m m̀kɨ̂m, ə təmfe pof kepî. Pîza ə pɨlə njîə m̀lɨ̂ me fɛ̂m ə ndɔ̀mə̀ mtəm mê fɛ̂m. Zɨnə mə nə̀ nə̂ nə lɨ̀ mə tsɔ̂fə̀, təmfe tsɔ̂fə̀ kəpiə.”

¹⁸Kə Njisə̀s tè pìə zɨnə mə, wùə èchisə ə̀ ghɨ Njûs viu ə pə̀ tɨmə ə̀ndzɨs ə və shi è ngɨmnê zekɨ̂m ə pìə nə, “Vayn vɨ̂m vê zhɔyn kwûʼ kwu kê zôyn; pîza pə pase gho kɛke ə vəyn ewìyn ə è kɛse ndwî.”

¹⁹Njisə̀s ə ndwìə è chùmtè èpàm sə vəynse ə chumtə̀ wùə ə̀təyn.

²⁰Ke ghənə tè ndûə, wùzhɔyn vîvè mə è və tə fe ndûŋtè shîŋə̀ vəynke sə sepìŋ njòse pɛ̀ ə pə̀ ə Njisə̀s epàm, ə kòmə̀ ècho esɔ̀ŋ ə sendzɨs ə vəynze.

²¹Wùzhɔyn nə̂ təyn ə pìə sê ngɨŋə̂ vəyn nə, “Ə m kôm ke ndzɨs sə vəynse ə m tɛ.”

²²Njisə̀s ə kə̀mnə̀ èwiyn ə fe vəyn ə pìə nə, “Kə ò fayn ə vayn vɨm. Pomə zɛze ə nə̀yn ò vê tɛ.” Kè sə ashìŋə̀, wùzhɔyn ə̀təyn ə tɛ.

²³Njisə̀s ə ndùə tâynə̀ ə wùə èchisə nə vɛ ndɛ. Kə è nji ə ndɛ, ə fe ə̀ghɨ setsɨ̀ ghe puʼlə̂ m̀pɔ̂ŋ, è ghɨə ghe tɔŋə sèndɔŋ zhəmə sènjàŋ se kwuse.

²⁴Njisə̀s ə ke pì nə, “Ghàyn fɨ nâʼà ə̀kɨ̂m. Vayn vɨnə paʼà kwu, è pɨənə̂ ndò.” Ghənə əkɨ̂m ə zhə̀tə̀ se chaʼa vəyn.

²⁵Kə nɔ̂yn ətəynke tè fɨ mɨ̂sè əpɨəyn, Njisə̀s ə njiə ndûə ə ndɛ fètəyn zɛ ə nyɨ̂ŋsè vayn èzhɔyn ətəyn ə kyîə àgho ə vâ ətəynke, è və ndwìə kə sə ashìŋə̀.

²⁶Tom kûmə̀ èghɛ nə zɨnə mə ə waŋə kə luʼ tekɨ̂m fumə apàs endaʼke.

²⁷Njisə̀s ə ndò fumə sè kwîə ndûə, ghɨ e fofə ghə pɛ̀ ə chùmtə̀ vəyn, pɨ̀a tɔŋɔ piə nə, “Kose səyn sê ghàs ə Va fèghàŋ ə ndɛ Ndàfîtfè!”

²⁸Kə Njisə̀s tè ndù njiə ə ndɛ, ghɨ e fofə ətəynghe ə pɛ̀ ə pə̀ kotə̂ vəyn fu. È və pfɨfə sê ghənə nə, “Ghàyn kyi ndô pômê nə M kaʼa M tsuʼ ghayn ə?” Ghənə pə̀ynsə̀ nə, “Èn! Ghàs pomə ndò ə Pɛ̂pɛ.”

²⁹Njisə̀s ə pasə̂ ə̀ghɔ vəynghe ghənə əshi ə pìə nə, “Ə ze kyayn sê ghàyn kè kə pomə̂ zaynze nyi.”

³⁰Shiə ghənə̂ ghə kɛsə̂ fe tèluʼ. Njisə̀s ə ke fo fɨ̀as sê ghənə pîə se ghənə nə, “Kə ghàyn tsayn sê wùə ghɛ zɛ ze kyâyn.”

³¹Pîza, ghənə fɨə ndûə ə waŋə èghɛ ətəynze kè luʼ tekɨ̂m fumə apàs endaʼke kə Njisə̀s nyi mə è və nə̀yn ghɛ ekayntəze.

³²Kə ndômnè ghɛ Njisə̀s tè tsuʼ mə ghənə ə fòf tè ndo ndûə, ghɨ yîghe ə pə̀ è wùə sê Njisə̀s è ve wamnə̀ va kûmə̀ nə è tè nyîə kyi èpamə̂ ə satàynzè.

³³Pîza, kè kə Njisə̀s chùm fɨse pamə̂ ə satàyn ətəynze, wùə ətəyn ə zhə̀tə̀ se wàmnè, nâʼà pîndè ə è tè nyì fu e nyi è kaynze piə nə, “Ghàs paʼà tyə̂m fe kyì eghɛ nyî fàyn endaʼ ə Isìlâyzè.”

³⁴Pîza ghɨ Falàsîghè ə pìə nə, “Ə̀ fo fɔ̀yn ə̀ tèpamə̂ tə satàyntè è tyaʼa nə è və chûmə̀ fɨsə̂ tèpamə̂ tə satàyn nə tɨ̂yn.”

³⁵Njisə̀s e kwîə ka môtə̀ sètɔ̂ŋ sèkɨ̂m è tə̀ʼse, zaʼlə̂ èghɛ Fezhə̀zè ə se ndɛ sə atsɨ̀yntese, ndaʼà tom èchùŋ kûmə̀ èfɔ̂yn ə Fezhə̀vè, tsuʼə ə̀ghɨ zafə ghəkɨ̂m è kyì tə tezaf tekɨ̂m.

³⁶Kə è tè fe nɔ̂yn ə ghɨ̀kè, təm ə vəynghe ə lwinə è kosê esəyn sê ghənə. Təmə vəynghe tè lwiyn èkosê esəyn kûmə̀ nə ghənə tè nyiə kyi èfɨmsê, kyi va tsâmtèzè. Ghənə tè nyi kə sendzè ə se kyi va ngyəyn.

³⁷È və pìə sê chùmtè èpàm sə vəynse nə, “Fɨazhiəu nyi se kwì, tsɨ̀ə kə nyi, pîza ghɨe kwiəghe tətə̂ kə nyi.

³⁸Ghàyn tsə̂m nə pɛ̀ àfùʼ tom ghɨə əkwiəghe.”