Read Mmen Mâk 10 Bible Online

Mâk 10 - Mmen bible

Mâk 10

¹Njisə̀s ə ndò elùʼ nə vɛ ə tyàŋà ndûə apàs ə Njòndyâkè engyinə̂ tsô èghaʼâ ə Njondàynzè. Nɔ̂nə ghɨ̀kè ə fɨə pə̂ sê vəyn, è ve zaʼlə̂ ghənə kè kə è ndamə zaʼlə.

²Ghɨə Falàsîə yîghe ə pə̀ se zɨte echo vəyn, ə ke pfɨf nə, “Saʼze pomə̂ ndò nə wùə chùm zhwîə vəyn ə?”

³È və pə̀ynsə̀ ə pfɨfə sê ghənə nə, “Mosîs tè pi nə ghe sê ghàyn ə?”

⁴Ghənə ə pìə nə, “Mosîs ə tè pomə nə wùə kàʼa ə è chum zhwîə vəyn ə è nyaʼ ŋwàʼlè, ə è fo sê vəyn, ə zə tyə̂ynə̀ nə è və chùm vəyn.”

⁵Njisə̀s ə pìə sê ghənə nə, “Mosîs tè nyaʼ esaʼ nə zɨ̂nə̀ sê ghàyn kûmə̀ nə ghàyn zaʼlə̂ èghɛ, ghàyn e tɛ ghaʼa se zɨ.

⁶Pîza, mə ə tè nyi kə mbi zhə̀tè, ‘Zhə̀fè ə fɛtə̂ wùə endômə̀ è wùzhɔyn,’ ə ke pì nə,

⁷‘Kûmə̀ nyî, wùə e ndômə̀ tə ndò ə pɨ̀a vəyn è nyìə vəyn ə ngwùŋ, ə è ndu tsɨ̂yntè yî zhwîə vəyn,

⁸ə ghənə ə pɛ̀ kɛse ə nyi ke se afɨa àmɔ̀ʼ,’ wùə e fɨyn kyi va ghɛ vəynze ə ngɨŋze

⁹E za tyə̀nə̀ nə Zhə̀fè kol nâʼàpî ghè, kə wùə nə̂ fɨyn zhəyn.”

¹⁰Ə pə̀ kə ghənə kɛse kwɨlə ə ndɛ, chùmtè èpàm sə vəynse ə fɨnə pîə sê vəyn nə è wàmne paynsê ètu ə ghənəvè kûmə̀ èghɛ ə malə̂ nə zɨ̂yn.

¹¹È və pìə sê ghənə nə, “Ə̀ chùm pîndè zhwîə vəyn ə ndùə se və ndò, ə nyi mə è və nə̀yn pi sê wùzhɔyn ə̀shi,

¹²mə wùzhɔyn fɨə ndom, ə̀ pomə̂ və ndò, ə nyi mə è və kɨm lâŋa malə̂kè.”

¹³Ghɨ tè njiə pə̂ è mɨ̂ətə̀m sê Njisə̀s tuʼ fîfe nə è kom ghənə ə è pɔse ghənə, pîza chùmtè èpàm sə vəynse ə fe zâ sè zɔ̂ sê ghɨ ətəynghe.

¹⁴Ə pə̀ kə Njisə̀s fe ghɛ zɛ ə ghənə nə̂, è və nyɔ̀ʼsə̀ ètɔŋ ə pìə sê ghənə nə, “Ghàyn za mɨ̂ətə̀m, ə ghənə pəyn sê mi. Kə ghàyn fɨyn tâmtè ghənə kûmə̀ nə fɔ̂yn ə Fezhə̀vè kyi əghɨ ghɛ ə ghe nyi kə ghənə.

¹⁵M pîə sê ghàyn səmɔʼ nə, ə faŋ pîndè se pomə efɔ̂yn ə Fezhə̀vè kə̂ vayn èpɔ, ə è tə tàʼa nji elùʼ efɔ̀yn nə vɨ̂yn.”

¹⁶È və wàmnə̀ za ə tolə ghənə ə ndə̀mə̀ ə̀gho ə vəynghe ə ghənə etu, ə pɔsə̂ ghənə.

¹⁷Njisə̀s ə nə̀ ndo sè ndùə endom, wùə vîvè ə nyɨŋə pə̂ tɨmə ə̀ndzɨs ə və shi ə pfɨfə sê vəyn nə, “Tyə̀ynsè èchùŋ, m nyiə kàʼa ə m nəyn nâʼà ghè se tə kyîə endam zɛ ə ze tə mîə va ə?”

¹⁸Njisə̀s ə pfɨfə sê vəyn nə, “Kûmə̀ ghè ə ò tɔŋtə mi nə wùə èchùŋ ə? Nâʼà wùə èchùŋ va, ə̀ tsɛ̂ kə va Zhə̀fè.

¹⁹Ò ke ndô saʼ tɨnə ə te pîə nə, ‹Kə wùə nə zhwi, kə wùə nə nyîŋə̀ è zhwîə wùə kɨ̀sə ə̀ nyì pî yî ndom ə̀ wùə, kə wùə nə chɔŋ, kə wùə nə tyəm tsɛ̀ èsaʼ àkaŋ, kə wùə nə zhi wùə se tɔf, kɔʼse pɛ̂ yî nɛ̂.›”

²⁰Wùə ə̀təyn ə pìə sê vəyn nə, “Tyə̀ynsè, mə ndə̀m saʼ nə tɨnə nâʼà tèkɨ̂m kè mə m pa nyi sə vâyn èpɔ.

²¹Njisə̀s ə naynə̂ vəyn nyi, sè kɔ̀ŋɔ̀ vəyn ə ke pì sê vəyn nə, Ghɛze nyîə nyi emɔ̀ʼ ə ò pa kyi se nə̀yn. Nduə pəʼle fɨa vɛ ə ò kyi nâʼà èkɨ̂m ə fo èkɛ ətəyn sê ghɨ afɨfə, kə ò kyi ghaʼ ekwùtwəynze. Ə ò nə̂yn nyî, o pə̀ chûmtə̀ mi.”

²²È və zɨə èwâmnè ə Njisə̀s nə zɨ̂nə̀, kyâʼzè ə pofə ə və atu, è və ndò, saŋnə̂ va kûmə̀ nə è tè kyi eghaʼ, ze tsɨ̂ə kə nyî.

²³Njisə̀s ə naynə̂ ka ə ghɨ ə və ə ngwùŋ nyî ə ke pì sê chùmtè èpàm sə vəynse nə, “E tə nə̂ ə ze ə tɛ nâʼà sə ŋaŋ kə ghɨ ghaʼâghè nji endaʼ efɔ̂yn ə Fezhə̀zè!”

²⁴Cho ə chùmtè èpàm sə vəynse ə zomə ə vəyn ezaʼlê. Njisə̀s ə ke fɨnə pì nə, “E tɛ nâʼà àpi ə ghɔyn ghɨmə se nji elùʼ efɔ̂yn ə Fezhə̀vè!

²⁵E pɔynə̂ kə nyi sê nyàm ə̀ kwaŋ se tɔynê apùʼ ə saʼke tsɛ̂ kə wùə èghaʼâ nji endaʼ efɔ̂yn ə Fezhə̀vè.”

²⁶Ghɛ ətəynze ə kwûəmnə̀ ghaʼa sèchùmtè èpàm sə vəynse, se sè pfɨfə kə sə ghənə sengɨŋ nə, “E za nyi zâ, ə tə sɔ̂ fɨ nâʼà ndè?”

²⁷Njisə̀s ə naynə̂ ghənə nyi ə ke pi nə, “Ghɛ nə zɨ̂nə̀ tɛ ghaʼə kə ə̀ghɨ, pîza tɛ ghaʼa va Zhə̀fè kûmə̀ nə ghɛ ghəkɨ̂m pɔynə̂ kə nyî sê Zhə̀fè.”

²⁸Pità ə pìə sê vəyn nə, piə è və fe kə ghənə za nâʼàpî ghè və ghənə sè chûmtə̀ kə vəyn ə.

²⁹Njisə̀s ə pìə sê ghənə nə, “M pîə sê ghàyn səmɔʼ nə, wùə va ə è zà pɨəyn ə vəynke, kɨ̀sə è zà pî ə̀ghɔ nyìə kɨ̀sə sètsâmtè, kɨ̀sə nyì, kɨ̀sə pɨ̀a, kɨ̀sə əghɔyn, kɨ̀sə mfûʼ kûmə̀ mi è tom èchùŋ,

³⁰ə è tə̂ faŋə se kyî mpɨəyn èkwùtwəyn è ghɔ nyiə, è tsâmtèsè, è ghə̀nyì, è ghɔynghe è fùʼm̀, kèpî zâ. È nə̀ kyîə èfɨa nə vɨ̂yn ke nâʼà ə mbiə zôyn, ə ghɨghe ə fɨnə nyâplə̀ è vəyn, ə tuʼe tə pəyn, ə è kyi ndam zɛ ə ze tə mîə va.

³¹Ghɨ tsɨə nyi zôyn, nyi əshi pîza nyi se tə pə̀yn sə̂ nyi epàm, ghɨ̀ etsɨghe kə ghàyn zôyn e nyi epàm nyi se tə pə̀yn sə̂ nyi əshi.”

³²Njisə̀s yî ghɨghe ə ndò sè kɔʼɔ ndùə ə Njèlusalɛ̀m, Njisə̀s ə ndùə əshi, chùmtè èpàm sə vəynse shîse njòse pɛ̀ ə kayntə ndùə ə̀ghɛ, mə fâynzè ə fɨyn pɔŋ ko nâʼà ghɨ ghɛ ə ghe tè chùmtə ghənə. Njisə̀s ə fɨnə shîyntə̀ sèchùmtè sə vəyn shîse njòse pɛ̀ epàm ə tsà èghɛ zɛ ə ze fè kyàyn sê vəyn.

³³È və nə ə pìə nə, “Ghàyn ke nə ghâsènì kɔʼɔ ndûə ə Njèlusalɛ̀m zôyn nyî, e kyi se ndùə fo Va Wùə sê ghɨ kɔʼsə nə èshyə̀ ndɛ̂ Fèzhə̀ e ghaʼa, è tyə̀ynsè sə alàŋsè nə ghənə tsɛse lâŋkè nə è kyi se kwu, ə fɨyn nji fo vəyn sê tumve,

³⁴ə ghənə nyəʼse vəyn, ə tsɨle tɛ̀m ə vəyn ewìyn, ə pus vəyn è wàynsè, ə fɨyn kyî zhwi vəyn, ə nyi mtuʼ mta, ə è kɛse zômə̀.”

³⁵Njə̂m yî Njɔyn, mə nyi ə ghɔ Zepɛndîə ə fɨtə̂ pə̂ əshi ə pìə sê Njisə̀s nə, “Tyə̀ynsè, ghàs kyiŋə nə ò nəyn nâʼàpî èghɛ èkè zɛ ə ghàs pfɨfə sê ghò.”

³⁶È və pfɨfə sê ghənə nə, “Ghàyn kyiŋə nə m ghayn ghe sê ghàyn ə?”

³⁷Ghənə ə pìə sê vəyn nə, “Pomə nə ə tə nə̂ ə nyi etuʼ vɛ ə ò saʼa fɔ̂yn e Ŋwaʼa vɛve, ə ghâsènì ə tsɨs, wùə èmɔ̀ʼ e tsɨs ə ghò ekɔyntwɔve, vîvè e tsɨs ekɔyn ekôvè.”

³⁸Pîza, Njisə̀s ə pìə sê ghənə nə, “Ghàyn ke va ghɛ zɛ ə ghàyn pìə,” ə fɨnə pfɨfə sê ghənə nə, “Ghàyn kàʼa ə ghàyn fe ngəʼ zɛ ə m nyi se fe se fɨnə kwu ə?”

³⁹Ghənə ə pomə. Njisə̀s ə pìə sê ghənə nə, “Səmɔʼ ghàyn nə̀ fe ngəʼ zɛ ə m nyi se fe ə ghàyn fɨyn kwu.

⁴⁰Pîza, ə vachi eluʼ vɨmve se pì nə wùə tsɨsə ə mì ekɔyntwɔve è kɨ̀sè ə mì ekɔyn ekôvè. Luʼ ətəyn nyi, mə ə̀ kyi əghɨ ghɛ ə tè fɛte ndəm sê ghənə.”

⁴¹Ə tè nyi kə chùmtè èpàm sə vəyn shîse eghɨm zɨ ghɛ ətəynze, sè nyɔ̂ʼsə̀ ètɔŋ sê Njə̂m yî Njɔyn.

⁴²Njisə̀s ə zùŋtə̀ ghənə ə pìə sê ghənə nə, “Ghàyn ke nə fɔ̂yn tə mbite nyîə kyi àtyaʼ, saʼa zəʼtə̂ ndò ghɨ ə ghənə̂ghè.

⁴³Pîza, e kyi va sə̂ nyi za sê ghàyn. Nâʼàpî ndè vɛ ə è kyiŋə sə̂ nyi wùə èngaŋtə ə ghàyn əfètəyn kyi sə̂ nyi wùə èfɨaʼa sê ghàyn.

⁴⁴Ə nâʼàpî ndè vɛ ə è nyi sə̂ nyi wùə èchisə ə ghàyn əfètəyn ə pɨl nyi àkɔ̂s sê ghɨghe əkɨ̂m.

⁴⁵Kûmə̀ nə Vâ wùə tè pâʼà pə̀yn nə ə fɨ̂aʼ sê vəyn. È tè pə̀yn sə̂ fɨ̂aʼà sê ghɨghe, se fɨnə fo ngɨŋə̂ vəyn se kwu se zhɔyn atu ə ghɨ tsɨəke.”

⁴⁶Ghənə ə pə̀ fɨə ə Njèlikò. Ə nə̀ nə̂ sè nyi kə̂ Njisə̀s yî chùmtè èpàm sə vəynse, paʼsə̂ è nɔ̂yn ə ghɨ e ghaʼa kyîke sè ndô, wùə èfòfə vîvè e nyi, e tɔŋtə̂ nə Pàtìmayùs, mə nyi va Tìmayùs, e tsɨs ə etipìə èndom, ndɔnə.

⁴⁷È və zɨə nə ə nyi Njisə̀s ə va wùə ə̀ Nazalɛ̀t kə è tsɛ̀, ə pɨa pîə nə, “Njisə̀s, Va Fɔ̀yn Ndàfît, kose səyn sê mi!”

⁴⁸Ghɨ e tsɨə ghe e sè kɨ̂ytə̀ vəyn pîə nə è kɨme mɔŋ, è ve pɨlə pɨa ndûə kə èshike, pîə kə nə, “Va Fɔ̀yn Ndàfît, kose səyn sê mi!”

⁴⁹Njisə̀s ə tyəmə̂ ə pìə nə, “Ghàyn tɔŋɔ pəyn vəyn sê mi.” Ghənə ə tɔŋɔ wùə èfòfə ə̀təyn ə pìə sê vəyn ashìŋə̀ nə kɛ nə, “Kə ò fayn. Ndwi pə. È tɔŋɔ ghò.”

⁵⁰È və sɔ̀ zâ fèpfɨ̂ fə vəynfe ə nyɨŋə ndûə sê Njisə̀s.

⁵¹Njisə̀s ə pfɨfə sê vəyn nə, “Ò kyiŋə nə m ghayn ghe sê ghò ə?” È və pìə nə, “Tyə̀ynsè, nə̀yn nə ə mə kɛsə̂ fe tèluʼ.”

⁵²Njisə̀s ə pìə sê vəyn nə, “Kɛse ə ò kwɨlə̂. Pomə zɛze ə nə̀yn ò vɛ ò tɛ.” Kè sə ashìŋə̀, è və kɛsə fe tèluʼ ə ndò sè chûmtə̀ ndùə vəyn.