Read Mmen Mâk 12 Bible Online

Mâk 12 - Mmen bible

Mâk 12

¹Njisə̀s ə zhə̀tə̀ sè mɛ̀ sengàyn pîə nə, “Wùə vîvè tè chwî afûʼ etwɔm ə ngɨ̀lêp ə vəynke, ə tɨmə kyîŋə̀ nga è mbàyn, ə tɨmə èpə eghaʼâzè kə ə nûʼə̀ ètwɔm ətəyn fɛtə m̀lɨ̂, ə fɨnə tɨmə àpâŋ ə tsi əfètə̂ àfùʼ ə ke fo afûʼ ətəynke nə ghɨghe ə fə̂, chyâtə̀ fo vəyn è fɨa vɛ ə ve fɨə ətəyn. È və fo za ə ndò ndûə èkwî endaʼ zhîze.

²Shîŋə̀ e kwiəke ə kwənə, è ve tomə wufɨ̀aʼa ə̀ vəyn vîve nə è ndu pi sê ghɨ fɨaʼa ghɛ ə è tè fo fûʼ nə kɛ sê ghənə nə ə fo twɔm vîve sê vəyn.

³Ghɨ e fɨaʼa nə ghɨ̂yn ə ndùə, ə kyîə vɛ ə è tom za, ə pusə ə chûmə̀, è ve kɛsə kwɨlə kə è gho zomə.

⁴Pɛ̀ àfùʼ nə vɨ̂yn ə fɨnə tomə kwəynsə̂ wùə èfɨ̀aʼa vîvè, ghənə ə fɨnə pusə ə pùʼə̀ àtuə vəynke ə fɨnə nyâplə̀ è vəyn nâʼà endom e ghoməve.

⁵È və fɨnə tomə vîvè, nə ə sè nyi ə̀ghɨ ə̀ ta, ghənə ə kyîə ə zhwiə. Pɛ àfùʼ ə̀təyn ə tomə kwəynsə̂ ə̀ghɨ tsɨə. Ghɨə fɨaʼa ətəynghe ə kyîə pusə yîghe ə zhwitə̂ ghəmɔ̀ʼɔ.

⁶Wùə èmɔ̀ʼ vɛ ə è tè faŋ kə è tom tè nyi va vəyn vê kɔ̀ŋ. È və tomə kwûŋsə̀ vəyn pîə sê ngɨŋə̂ vəyn nə, ‘Ghənə nə̀ ndùə fânə̀ vayn vɨ̂m.’

⁷Pîza ghɨfɨaʼa nə ghɛ ə fe ə pì sê ngɨŋ sə ghənə̂sè nə, ‘Ə̀ vɨ̂nə nyi ke nâʼà zhîndɛ̂ ə̀ pɛ̀ àfùʼ. Ghâsènì kyi zhwi vəyn kə fɨa vəyn və nyi və ghasènìve.’

⁸Ghənə ə kyîə va ə̀təyn, ə zhwiə ə Lâŋə̀ fɨsə̂ èpfɨyn ə vəyn fu afùʼ.”

⁹Njisə̀s ə pfɨfə sê ghənə nə, “Ə ze kyâyn nyî, ə pɛ̀ àfùʼ pi zayn? Ə è pəyn zhwitê ə̀ghɨ efɨaʼa ətəynghe, ə è fo fûʼ nə kɛ sê ghɨ ndôghè.

¹⁰Ghàyn pâʼà tyə̂m tɔŋɔ ghɛ zɨ̂nə̀ ə Ŋwàʼlè ə̀ Fèzhə̀ nə: ‘Chi zɛ ə ghɨfɨaʼa tè tə ə kɛsê sə echi epòlə̀ ə ndɛze.

¹¹Ə̀ nyi efɨ̀aʼ ə Pɛ̂zè nyî; ze nyîə tsɔ̂fə̀ ə ghâsènì əshi.”

¹²Tu ə ghɨ̀ə Njûs nə vɛ ə mɔ̀msə̀ se kyiə Njisə̀s kûmə̀ nə ghənə tə zɨ kê nə è mɛ ngàyn nə zɨ̂yn kûmə̀ ghənə. Pîza ghənə ə fânə̀ ànɔ̂yn ə ghɨ̀ kɛ ə ke tè nyì fu, ə zà vəyn ə ndò.

¹³Epàm ətəyn, ghənə tomə ə̀ghɨə Falàsîə yî ghɨ Ɛlɔ̀t yîghe nə ndu nəyn ə Njisə̀s wamne tsas, ə kyi vəyn ə vəyn ewàmnè.

¹⁴Ghənə ə pə̀ sê Njisə̀s ə pìə nə, “Tyə̀ynsè, ghàs ke ndô nə ò nyîə wâmnə̀ səmɔʼ. Ò tɔ̀ʼɔ̀ va wùə vîvè. Ò fànə̀ va wùə vîvè, Ò wàmnə̀ kə chichi. Pîza Ò ndɨŋə zaʼlə̂ ə̀ghɨ èghɛze kûmə̀ Fèzhə̀. Tsàyn sê ghàs, ə̀ nyi alâŋ nə kə maʼà tâks sê Kaysà, fɔ̀yn èghaʼâ ə Lûm mə? Ə mâʼà mə, kə nə maʼa?”

¹⁵Njisə̀s ə fe kê m̀nàŋ mə ghənə̂m, ə pfɨfə sê ghənə nə, “Ghàyn kyiŋnə̂ ècho zɨm kûmə̀ ghè? Ghàyn pəyn èkɛ akasve ə ghàyn tyəyn ə m fê.”

¹⁶Ghənə ə njî pə̂ è vəyn, è və pfɨfə nə, “Ə̀ zɨnə nyi ekyàʼ ə ndeze ə? Ə zɨnə nyi ezə nde zə?” Ghənə ə pə̀ynsə̀ nə, “Ə̀ nyi ekyâʼ ə Kaysàzè.”

¹⁷Njisə̀s ə ke pì nə, “Ghàyn fo sê Kaysà fɨa kɛ ə̀ kyi Kaysà, ə fo se Zhə̀fè fɨa kɛ ə̀ kyi Fezhə̀.” Wâmnè ə vəynze ə nə̀, choze ə zomə ghənə.

¹⁸Ghɨ Sandùsîə ghɛ pomə nə ghɨ nə zômə̀ va, ə pə̀ sê Njisə̀s ə pìə nə,

¹⁹“Tyə̀ynsè, Mosîs tè nyâʼ alâŋ kɨ̀nə sê ghàs nə, ‘Ə̂ wùə njì zhwi ə kwu ndɔ̀ʼɔ è piə vayn yî vəyn, ə ànyìə wùə èkwuə nji zhwiə kwu ə̀təyn, ə yî vəyn piə ghɔnə sê ànyìə vəyn.

²⁰Zôyn, ndômnə̀ tè nyi ə sɛ̀mbɛ mə fɨ kê ndwɔ̂vè emɔ̀ʼ. Və shi ə njìə zhwi ə kwuə ndɔ̀ʼɔ yî vəyn piə ghɔnə.

²¹Tsɨ̀m ə̀ vəyn ə njìə zhwîə kwu ə̀təyn. È və pa kwuə ndɔ̀ʼɔ yî vəyn piə ghɔnə. Ghɛ ətəynze ə fɨnə kyanə̀ sê vɛ è kòmtə̀ sê vɛ mə.

²²Ghənə ə̀kɨ̂m za èsɛ̀mbɛ ə njìə zhwîə kwu nə vɛ ə kwutə̂ mɨ̂sə̀ ndɔ̀ʼɔ ə piə ghɔnə. Zhwîə kwu ə̀təyn ə pɔŋə kwuə.

²³Ə̀ tə pə̂ əfetuʼ fe zoməfe, ə wùzhɔyn nə vɛ ə nyi zhwîə ndè? Kə ghənə za èsɛ̀mbɛ tè nyi mə njì vəyn sə zhwi ə.”

²⁴Njisə̀s ə pìə sê ghənə nə, “Ghàyn ə wàmnè pofsê! Ghàyn zɨə kê va ghɛ zɛ ə Ŋwàʼlè ə̀ Fèzhə̀ pìə, fɨyn tɔʼ kê va tyaʼa Fezhə̀kè.

²⁵Ə̀ tə pə̂ ashìŋə̀ kɛ ghɨə zômə̀, ə fɨnə malə̂ va. Ghɨ tə nə̂ ə nyi kə setsì ekwùtwəyn, malə̂ va.

²⁶Zôyn, eghɛ kûmə̀ èzômə̀ ə ghɨ kwuze: ghàyn pâʼà tyə̂m tɔŋɔ ə Ŋwàʼlè ə̀ Mosîs ndiŋ kɛ ke wâmnə̀ kûmə̀ fèkaʼtə̀ fɛ ə wusve tè pɛ ə tə? Ə nyaʼ fumə nə, Zhə̀fè tè pi sê Mosîs nə, ‘M nyi Fezhə̀ fə Aplàghâmfè, nyi Fezhə̀ fə Azɨkfè, nyi Fezhə̀ fə Njàkɔ̂pfè.’

²⁷Zhə̀fè nyi Fezhə̀ fə ghɨ ghɛ ə ndamə, ə va fə ghɨə kwutəghe. Ghàyn ə tsas nâʼà sə ŋaŋ.”

²⁸Tyə̀ynsè alâŋ vîvè tè nyì fu ə zɨə kə ghənə saʼnə̂ ghɛ. È və fe nə Njisə̀s ə tɔ̀ʼ pə̂ynsè ghɨə Sandùsîə, ə ke pfɨf sê Njisə̀s nə, “Ə̀ nyi alâŋ àkè əfètə̂ èlwɔ̀ŋ èkɨ̂m ə ke tsɛ̂ lwɔ̂ŋvè ekɨ̂m ə?”

²⁹Njisə̀s ə pə̀ynsə̀ nə, “Lâŋ kɛ ə ke tsɨ̂ə tsɛ̂ pìə nə, ‹Ghàyn zɨte ə ghɨə Isìlâyghè, Pɛ̂pɛ Zhə̀fè ghasènìfe, ə̀ nyì ke Vəyn Pɛ̂.

³⁰Kɔ̀ŋ Pɛ̂pɛ Zhə̀ fɛfe è təm ghɛghe əkɨ̂m, è zuʼ sɛ sekɨ̂m, è kwâʼtè zɛ zekɨ̂m, è tyaʼ kɛke akɨ̂m.›

³¹Kòmtèke nyi kɛ ə ke pîə nə, ‹Kɔ̂ŋ ànɛ̂ kè eghɨ kə ò kɔ̀ŋɔ̀ ngɨŋ zɛ̂zè.› Saʼ zhîze fɨyn va ə ze tsɛ̀ tɨnə tè pɛ̀.”

³²Tyə̀ynsè àlâŋ nə vɛ ə pìə sê Njisə̀s nə, “Ò pə̀ynse ke nâʼà eghɨ ə Tyə̀ynsè. Ò pì ke nâʼà səmɔʼ nə Zhə̀fè nyì ke fèmɔ̀ʼ, Zhə̀ fîfe fɨyn va ə̀ tsɛ̂ kə va vəyn.

³³Sə̂ kɔ̂ŋɔ̀ Fèzhə̀ è təm ghɛghe əkɨ̂m, è kwâʼtè zɛze ekɨ̂m, è tyaʼ kɛke akɨ̂m, fɨnə kɔ̂ŋɔ̀ èkɔ vɛve kè eghɨ kə ò kɔ̀ŋɔ̀ ngɨŋ zɛ̂zè, tsɨə tsɛ̂ ndò fote nyɔʼtəte, è fo təmɔ̀ʼɔ tɛ ə fo sê Zhə̀fè.”

³⁴Njisə̀s ə fe nə tyə̀ynsè èsaʼ nə vɨ̂yn ə pə̀ynsè ètɔfe, ə pîə sê vəyn nə, “Ghaf efɔ̀ynə Fezhə̀kè fɨnə tyâfə̀ va sê ghò.” Epàm ətəyn, wùə ə tàʼa fɨnə mɔ̀msè se pfɨf eghɛ sê Njisə̀s.

³⁵Kə Njisə̀s tè zaʼle ə Ndɛ Ètsə̀mə, ə pfɨfə nə, “Kûmə̀ ghè ə tyə̀ynsè sə alàŋsè pìə nə Vɛ ə Zhə̀fè chɔʼ ndə̂m fɨ etɔ̀ŋ ə ndɛ fɔ̀yn Ndàfîtzè ə?

³⁶Zuʼse Ŋwaʼase ə nə̀ nə Ndàfît pi nə: ‘Pɛ̂ Zhə̀fè pi sê Pɛ̂pɛ vɨm nə, Tsɨsə ə̂ mi ekɔyn etwɔve se zaʼâ kə m ndəm pàyn sɛse ə ghò etyə̂ ə̀ghòl.’

³⁷Ə Ndàfît è ngɨŋə̂ vəyn tɔŋtə Vəyn nə Pɛ̂pɛ, ə Vɛ ə Zhə̀fè chɔʼ ndə̂m ə sè nyi zàyn vâyn ètɔ̀ŋ ə ndɛ ə̀ Ndàfît ə?” Nɔ̂yn əghɨ̀kè e zɨtə̂ sê Njisə̀s è saŋnêzè.

³⁸Kə Njisə̀s zaʼlə ghənə, ə pìə nə, “Ghàyn e tɔ̂ʼnə̀ è tyə̀ynsè sə alàŋsè. Ghənə kɔ̀ŋɔ̀ sə̂ kwîə tsɛ̂ mə màʼ sàŋsè, se ghaʼlə̂ kə nyi, fɨə ndûə ə te lùʼ tepəʼləte, ghɨghe pə̂ tɔŋtə̂ ghənə è ngɨmnêzè,

³⁹kɔ̂ŋə̀ se tsɨsə̂ ə teluʼ te ngaŋtə tɛ te kɔʼnə ə sendɛ sə atsɨ̀yntese, è kɨ̀sə telùʼ tə azhite.

⁴⁰Ghənə e kyîə fiə èfɨa ə zhwiə əkwuve, kaŋa tsə̂mə̀ tètsə̂m te tyâtè se tyə̀yn ewiyn. Zhə̀fè tə tsə̀fsə̀ ghənə nâʼà sə ŋaŋ.”

⁴¹Njisə̀s tè tsɨs paʼsê eluʼ vɛ ə tè fo fote ətəyn ə Ndɛ Ètsə̀mə naynə̂ kə ghɨ ndə̂mə̀ fo tə ghənə̂tè. Ghɨ mkɛ ə tsɨəghe e pə̂ mâʼtə̀ m̀kɛ me tsɨ̂əm̀.

⁴²Pîza, zhwiə kwu afɨf vîvè ə pə̀ mâʼtə̀ èkɛ akas ə vəynve, mə ve nyi ke sètolə sepɛ̀.

⁴³Njisə̀s ə tɔŋɔ sèchùmtè èpàm sə vəynse ə pîə sê ghənə nə, “M pîə sê ghàyn səmɔʼ nə, zhwîə kwu àfɨf vɨ̀yn ə fo kɛve, ve tsɨ̂ə tsɛ̂ nâʼà tə ghɨ̀ mkɛ tekɨ̂m.

⁴⁴Ghɨə mkɛ ghɨnə fo mkɛ mê tsɛ̂ fɨ̂əm̀ ə ghənə mkɛ, pîza zhwîə kwu àfɨf vɨ̀yn ə fo mɨ̂sè pî fèkɛtə̀ fɛ ə è kyi sə̂ zhiə.”