Read Mmen Mâk 2 Bible Online

Mâk 2 - Mmen bible

Mâk 2

¹Tuʼmə tsɛ̀ kə m̀shàʼ nyî, Njisə̀s ə kɛsə̂ kwɨlə̂ ndûə ə Kàpanùm, ghɨghe ə zɨə nə è və kwɨlə̂

²ə ndùə zùŋtə̀ fumə ə ndɛ tsɨ̂ə kə nyi, luʼve fɨyn va ə ndɛ nâʼàpî echo ndɛ se tyə̂m, è ve ndâʼà èghɛ ə Fezhə̀zè sê ghənə.

³Kè nyî ghɨ yîghe əkyàʼ ə pɨaʼà pə̂ è wùə mə pâs ewìynke ə kwu sê vəyn.

⁴Kə ghənə pə̂yn, ghɨghe tsɨ̂ə ghaʼə ghənə se tsɛ̀ se ndù è vəyn sê Njisə̀s. Kûmə̀ zamə ghənə kɔʼɔ etûə ndɛ ə chɔʼɔ àpûʼ endomve apàs kɛ ə Njisə̀s tè tyəm ətəyn. Ə pə̀ kə ghənə chɔʼ pûʼ nə kɛ̂, ghənə tsosə̂ wùə ə̀təyn ə fesə̀yn fɛ ə è tè nyɨ̀ŋ ətəyn ə Njisə̀s əshi.

⁵Njisə̀s ə fe èpomə̂ zɛ̂ ə ghɨ nə ghɛ tè kyi, ə pîə sê wùə nə vɛ etûə fèsə̀yn nə, “Mə lɛ̀sè fo pi sɛse ə vayn vɨ̂m.”

⁶Tyə̀ynsè sə alàŋ shîse kə se tè tsɨs fu, e sè nyaʼâ shwinə̂ kə ghənə mndɛ̀ nə,

⁷“Kûmə̀ ghè ə wùə vɨ̀nə wàmnə̀ endom vɨ̂yn ə? È sôylə̀ kə nâʼà ndò Zhə̀fè nyî! Ə̀ nyiə kàʼa ə lɛse fo ndè pi ə̀wùə, ə tsɛ̂ kə va Zhə̀fè ə?”

⁸Kè sə ashìŋə̀, Njisə̀s ə kê èghɛ zɛ ə ghənə tè kwâʼtə̀ ə pfɨf sê ghənə nə, “Ghàyn kwàʼtə̀ nyiə mə kûmə̀ ghè?

⁹Ə̀ pɔynə̂ zɨynzə, se pì nə, ‘Mə lɛ̀sè fo pi sɛse’ mə se pì nə, ‘Ndwi njì sə̂yn fɛfe ə kwi ə?’

¹⁰M nə tyə̀nə̀ sê ghàyn zôyn nə Va wùə kyi ndô tyaʼa fa ə chi se lɛ̀sè fo sepi sə ghɨ̀sè.”

¹¹Kə è pi zâ, ə ke pì sê wùə vɛ pâs ewìynke kwu za nə, “M pîə sê ghò nə ò ndwi nji fèsə̂yn fɛfe ə kwɨlə̂.”

¹²Kè nyi, e və ndwîə kə ə ghənə əshi ə̀kɨ̂m, ə njìə fèsə̂yn fə vəynfe ə zàŋsə̀ ndô. Nâʼà ghənə əkɨ̂m tè nyi èkaynze sè tsîtə̀ Fèzhə̀ pîə nə, “Ghâsènì pâʼà tyə̂m fe ghɛze nyi.”

¹³Njisə̀s ə tè kɛse ndu etipîə ènjwì ə Ngalìlî, nɔ̂yn ə ghɨ̀kè ə pə̂ sê vəyn, è ve sè zaʼlə̂ ghənə,

¹⁴è və piə è tsɛ̀ ndò ə fe wùə è tənə nə̂ sètâks e tɔŋtə nə Levì, ə va Àfeyùs. Levì tè tsɨs ə ndɛ zɛ ə è tè tənə tâksè ətəyn. Njisə̀s ə pìə sê vəyn nə, “Chùmte mi.” Kè sə ashìŋə̀, e və ndwìə ndùə kə vəyn epàm.

¹⁵Epàm ətəyn Njisə̀s ə ndùə zhiə ə Levì ə ndɛ, ghɨ ghɛ ə tè tənə kəpî sètâks è ghɨ ə piə mɔ̀ʼɔ, ghe tsɨ̂ə kə nyi, e chùmtə̀ vəyn. Ghənə ə tsɨ̀yntə̀ tsɨsə̂ yighə̀ chùmtè èpàm sə vəynse elùʼ ezhiəve.

¹⁶Kə tyə̀ynsè sə alàŋ shise mə ə̀ tè nyi əghɨə Falàsîə ə fe kə Njisə̀s zhiə yî ghɨə piə ghɛ, è ghɨ ghɛ ə tənə tâksè ə ke pfɨf sê chùmtè èpàm sə vəynse nə, “Kûmə̀ ghè ə è zhiə yî ghɨ ghɛ ə tənə tâks è ghɨ piə mɔ̀ʼɔghe ə?”

¹⁷Njisə̀s ə zɨə èghɛ zɛ ə ghənə pfɨf, ə pfɨfə sê ghənə nə, “Ə tè piə ndɛ ə̀ ndè, è fɨnə kyiŋə èfu ə? Ə̀ nə̂ ə kyiŋə kə ə̀ghɨ ə zafə. M tè pâʼà pə̀yn ə mbi se tɔŋɔ əghɨ ghɛ ə ghe tyəm chichi ə Zhə̀fè əshi, pîza m tè pə̀yn se tɔŋɔ̂ əghɨ ə piə.”

¹⁸Tuʼve tè zo tuʼ fîfe, chùmtè èpàm sə Njɔyn Fo M̀mòse yî sə ghɨ Falàsîsè e sè pamə ècho, ghɨghe ə pə̀ pfɨfə sê Njisə̀s nə, “Chùmtè èpàm sə Njɔynse pamə ècho, chùmtè sə ghɨ̀ ə Falàsîsè e pamə, sɛse zhiə kə ndò kûmə̀ ghè?”

¹⁹Njisə̀s ə fɨ̀sə̀ ghənə è ngàyn nə, “Ghɨ vayn kàʼa səʼ malə̂ ə nə̂ nə ə pamə ècho, ndom ə̀ wùzhɔyn pa nyi yî ghə̀ ghənə. Ə è pa nyi ke yî ghə̀ ghənə, ghənə vayn pam echo.

²⁰Tuʼ ə təyn tə pə̂, ə nji ndo è ndom ə̀ wùzhɔyn ə ghənə̂ fètəyn, ə ghənə se pam echo.

²¹Wùə vayn kàʼa è nji pâs ə sendzɨs ə feke ə è pa ndzɨse mɨse ətəyn kûmə̀ nə è nə̀yn zâ, ə pâs ə fe nə kɛ̂ pɔ, ə ke pike chɔʼɔ ndo ashìŋə̀ nə kɛ̂, ə ke fɨyn tɔʼ ghaʼsê àpûʼ nə kɛ̂ ə fê pâ.

²²Kè kə pî wùə vayn kàʼa e ndəm lɨ̀m mə pɔ̂m ə tə sà èmɨ ə è kyɨynse, ə è ndə̀m, ə lɨ̀ mə ətəynmè kɔʼ ə sà ə̀təyn pfɨyn, ə è kwule ə lɨ̀ mə tə̂ynmè sɨsə chi nâʼà m̀kɨ̂m. E tsɔ̂fə̀ se ndə̀mə mlɨ̂ me pɔ̂m ə sà èfe.”

²³Ə tè nyi kepî etuʼ endaʼ vîve, Njisə̀s e tɔynə̂ tsɛ̂ epa sesɔ̀fzè yî chùmtè èpàm sə vəynse, ə pə̀ kə ghənə tɔynə tsɛ̂ fumə epa, chùmtè epàm sə vəynse e lɔytə̂ tèpuʼ tə sesɔ̀f shîse.

²⁴Ghɨə Falàsîə ə ke pfɨf sê Njisə̀s nə, “Kûmə̀ ghè ə chùmtè èpàm sɛse nə̂ kyì eghɛ zɨ̂nə̀ etuʼ endaʼ, Saʼze pomə̂ va ə?”

²⁵È və fɨ̀sə̀ ghənə nə, “Ghàyn pâʼà tyə̂m tɔŋɔ ə ŋwàʼlè ə̀ Fèzhə̀ ghɛ zɛ ə Fɔ̀yn Ndàfît tè nəyn etuʼ vɛ ə è tè kyiŋə fɨake se zhi kə chɨ̀ŋ tè zafə vəyn yî ghɨ vəyn ghe ə?

²⁶È və njiə ə ndɛ̂ Fèzhə̀ yî ghɨə vəyn nə ghɛ, ə shɨŋ zɛ Apɨatà tè nyi wùə èkɔʼsə nə èshyə̀ èngaŋtə kwəynə fumə, ə zhiə àpayn emaʼtə Fezhə̀kè, Saʼ ze tyəynə̀ nə ə̀ zhiə kə əghɨ kɔʼsə nə èshyə̀ ndɛ ètsə̀məghe. È və zhiə ə pɔŋɔ fo ə̀ghɨ ghɛ ə yî ghə̀ ghənə tè nyì əmɔʼ.”

²⁷Njisə̀s tè mɨ̀se mə È pi nə, “Zhə̀fè tè pom wùə sə shi tsɔ̀fə Fe ndə̂mə̀ tuʼ endaʼve. È tè pâʼà ndə̀m tuʼ endaʼve tsɔ̀fə È pomə wùə sə zɨ̀tè etuʼ nə vɨ̂yn.

²⁸Ə̀ za nyi eghɛ zɛ ə Vâ wùə kyi tyaʼke ə̂ tuʼ endaʼ ve ətu.”