Read Mmen Lûk 12 Bible Online

Lûk 12 - Mmen bible

Lûk 12

¹Ə̂ pə̀ kə Njisə̀s tè wàmnè ghɛ nə ghɨ̂nə̀, ghɨghe e zûŋtə̀ pə̀ kə setsɨ̀ setsɨ̀, e sè nyi kə ə kàʼa ə nyayle yiə, è və zhə̀tə̀ sè wàmnə̀ sê chùmtè èpàm sə vəynse piə nə, “Ghàyn tɔ̂ʼnə̀ kûmə̀ ghɨə Falàsîə ghɨ̂yn ə kaŋkaŋa nə̂ ghɛ nyi, ndam tə ghənə̂tè njiə əfètə̂ ə̀ ghɨ kè kə fèsə̀ʼ njiə əfètə̂ àpayn ə kwaŋa.

²Ghàyn ke nə fɨake va ə kɨyte mə ə tə ŋaʼsə̂ va, kɨ̀sə ə ndəte ndô ə tə faŋa se kê.

³Naʼapi ghè vɛ ə ghàyn nyaʼtə piə ndô zôyn tə fɨə ə ndayn, ə tə tɔŋɔ naʼapi ghè vɛ ə ghàyn nyaʼtə tsɨ̂mtə̀ piə ezhɔyn.

⁴M piə sê ghàyn ə soyn sɨmse nə, kə ghàyn ə fanə ghɨ ghɛ ə kàʼa ə zhwi ke àchaʼ ewiyn a wûəkè, pîza kyi va nâʼà èghɛ e tətə̂e se fɨnə nə̀yn èpam ətəyn.

⁵M nə̀ tsâ vɛ ə ghàyn kyi sə̂ fânə̀. Ghàyn pɨlə fânə̀ kə Fèzhə̀. Fe kyi atyaʼ se zhwi ə ghàyn, fɨyn kyi atyaʼ se ndə̀m ə ghàyn elùʼ ewùs. M tsâ sê ghàyn nə, ghàyn fânə̀ kə fəynfe!

⁶Piə ə pəʼlə̂ m̀nɨŋtə̂ m̀ tâyn kè sə fekɛ̂tə̀ nyi, pîza mə Zhə̀fè vâyn kàʼa fe lɛ̀sè nâʼà fèmɔ̀ʼ.

⁷Pîza, sê ghàyn Zhə̀fè ke ndô kɔ̂yn ə se nyuŋ kɛ ə ke nyi ə ghàyn atu. E za nyi nə ghàyn kyi va sə̂ fânə̀ kûmə̀ nə ghàyn nə̂ kɔʼnə̂ tsɛ̂ m̀nɨŋ me tsɨ̂əm̀.

⁸M piə sê ghàyn nə, ə tyə̂nə̀ piə ndè ə ghɨghe əshi nə è nyi wùə vɨ̂m, ə Vâ wùə tə pɔŋ pomə ə tsì sə Fezhə̀sè əshi nə è nyi wùə vəyn.

⁹Pîza vɛ ə è mɛne mi ə ghɨghe əshi, ə Vâ wùə tə pɔŋ mɛne vəyn ə̂ tsì sə Fezhə̀sè əshi.

¹⁰Zhə̀fè tə lɛ̂sə̀ fo naʼapi ndè vɛ ə è pi ghɛ epize kûmə̀ Va Wùə, pîza ə è tàʼa lɛ̀sè ə fo wùə vɛ ə è pi ghɛ epize kûmə̀ Sezuʼ se Ŋwaʼase.

¹¹Ə tə kyiə ndù è ghàyn ə ghɨ saʼaghe əshi ə ndɛ̂ atsɨ̀ynte, kə ghàyn nə kayn mbi nə ghàyn nə̀ piə nə ghe, kə ghàyn nə kayn naʼapi nə ghàyn nə̀ piə zayn zə,

¹²kûmə̀ nə Zuʼ se Ŋwaʼase nə̀ tsâ eghɛ zɛ kə ghàyn pi kè ashìŋə̀ nə kɛ.”

¹³Wùə vî əfètə̂ ànɔ̀yn nə kɛ ə piə sê Njisə̀s nə, “Tyə̀ynsè, pi sê ànyìə vɨ̂m nə è chyate fɨa vɛ pɨ̀a vâs tè zà sê ghàs, ə è fo vɨm.”

¹⁴Pîza Njisə̀s ə piə sê vəyn nə, “Nə mbɛ̀ ə vɨ̀yn, ə tè pâʼà chɔʼ mi nə m tyəm ə ghàyn ə fètəyn sə wùə èchyàtə,”

¹⁵ə fɨnə piə sê nɔ̂yn nə kɛ nə, “Ghàyn tɔ̂ʼnə̀ kûmə̀ əshi ə fɨə kûmə̀ nə ndam ə wùəe va ke kûmə̀ efɨa e tsɨə vɛ ə è kyi, ə kɔ̀ŋ ə è və kyi naʼapi zàyn.”

¹⁶Njisə̀s ə mɛ̀ ngàyn zɨ̀yn sê ghənə nə, “Wùə èghaʼâ viu tè kyi afûʼ mə fɨazhɨəve ə kɔʼ ətəyn nâʼà àchûŋ,

¹⁷ə pfɨfə kə sə və ngɨŋ nə, ‹M nyiə nə̀ ghaghè è fɨazhiə vɨnə, kyi va luʼ e ndəməve ə?›

¹⁸ə ke fɨnə piə kə sê ngɨŋ nə, ‹Mə kê ghɛ zɛ kə m nəyn. M nə̀ sâʼà sendɛ se fɨazhiə sɨmse ə m pɛ se ghaʼâsè ə m ndəm fɨazhiə nə vɨ̂yn naʼapi èkwə̀ vɨmve ətəyn

¹⁹ə m ke pi sê ngɨŋ zɨm nə, Tsɔ̀f àtu, ò se kyi efɨa e chûŋ se zhi nâʼà sə aghaf. Ò tsɔ̂ynsə̀ ndamə kə ndò. Ò zhiə, mɨə fɨnə saŋnə.›

²⁰Pîza Zhə̀fè ə piə sê vəyn nə, ‹Ngo afɨa kyîke, ò nə̀ kwuə ndàyn ètuʼu. Ò nyiə nə̀ kwuə, ə zhi nde fɨa vɛ nə vɨnə?›”

²¹Njisə̀s ə wàmnə̀ mɨ̂sè nyi ə piə nə, “Ə̀ nyi nyiə kə ze nyi sê wùə vɛ ə è tuʼ ndəm fɨae sê ngɨŋ ə vəyn, kwənə va nâʼà èghɛ ə Zhə̀fè əshi.”

²²Njisə̀s ə wàmnə̀ nyi ə ke pi sê chùmtè epàm sə vəynse nə, “M piə sê ghàyn nə, kə ghàyn nə kanə mbi kûmə̀ endam zayn. Kə wùə sê ghàyn ə kanə mbi nə e nə̀ zhiə ghè ə, kɨ̀sə è nə̀ maʼà ghè ə zhi ewiyn ə.

²³Kûmə̀ nə ndam ə wùəe tsɛ̂ ndò fɨazhiəve, wiyn ə wûəvè e tsɛ̂ sendzɨs.

²⁴Ghàyn fe kə ŋɔ̂ŋɔve ə. Ve zho tsɛ̂ va fɨazhiəve, kwiə va, kyi va fɨ̂ltè kɨ̀sə mtayn sə̂ zanə̂ èfɨa ətəyn, pîza Zhə̀fè e pfɨtê vəynve. Nâʼà ghàyn pâʼà fe nə ghàyn kɔʼnə tsɛ̂ ndò nɨ̂ŋmè ə?

²⁵Ə̀ nyi nde ə ghàyn ə fètəyn ə è kàʼa è kwəynse tuʼm̀ ə vəyn ndam kûmə̀ nə è kyi efɨmsê ə?

²⁶Ghàyn nyiə se nyi mə ghàyn vâyn kàʼa ghàyn nə̀yn ghɛlə̀fè nyiə kə fɨ̂nə mə, ə ghàyn ə kanə nâʼà mbi kûmə̀ əghɛ mɔ̀ʼɔ nə ghɨ̂yn kûmə̀ ghè?

²⁷Ghàyn nayne ke kə ndwɔ̂ŋ azhìvè ndəmə kɔʼɔ fɨnə pusə̀ ə. Ve pâʼà tyəmə fɨ̂aʼà àfɨa kɨ̀sə se tas ə sendzɨs sə̂ maʼà. M piə sê ghàyn nə, naʼapi fɔ̀yn Sòlomùyn è ghaʼ zɛ ə è tè kyi nâʼà èkɨ̂m pâʼà tyəm laf tayn kə andâŋ amɔ̀ʼ əfètə̂ endwɔ̂ŋ nə vɨ̂yn.

²⁸Ə̂ Zhə̀fè nyi kàʼa Fe lafse tayn èwə̂yn nyî mə ve nyi ndâyn mə ezhwisəʼə ə və nyi mə nyɔ̀ʼ ewùs, ə È tə tàʼa lafsə̂ tsɛ ghàyn nyiə mə mə? Ghàyn kyi epomə̂ e tətə̂ zè.

²⁹Kə ghàyn fɨyn fɨmsê tèkwâʼtè taynte kûmə̀ nə ghàyn nə zhiə ghè, ə ghàyn mɨ ghe.

³⁰Ə̀ nyiŋə əghɨə mbiə epàm efɨa nə vɨ̂yn, pîza Pɨ̀a vâynvè e ke nə ghàyn kyiŋə ndò fɨa nə vɨ̂yn.

³¹Ghàyn pɨl mɔ̀mse ke sə̂ ndamə kə ghɨ ghɛ ə nyi etîə esaʼ ə Fezhə̀e kə fe nə̂ fo kwəynse efɨa nə vɨ̂yn sê ghàyn.

³²Kə ghàyn ə fânə̀, nâʼàpî kə nɔ̂nə̀ faynfe tətə, kûmə̀ nə Pɨ̀a vâynvè ə kɔ̀ŋ se fo eluʼ əfètə̂ èfɔ̀yn ə vəynve sê ghàyn.

³³Ghàyn pəʼle fɨa vaynve ə ghàyn fo kɛ ətəyn sê ghɨ afɨfə. Ghàyn fɛte shəyn saynse kə sə vayn kàʼa ə se pof kə ndəm ghaʼ zɛ ə wùə vâyn kàʼa è zhi mɨ̂sè ətəyn, ə ndəm ekwùtwəyn sê ghàyn, elùʼ vɛ ə wùchɔŋɔ vâyn kàʼa è tayn ətəyn se nji, mə shɔshɔʼve vâyn kàʼa ə ve tayn fu se kwɨlə pofse.

³⁴Kûmə̀ nə luʼ vɛ ghaʼ zɛze nyi ətəyn, ə̀ nyi kepî fu kə təm ghɛ nyi.”

³⁵Njisə̀s ə fɨnə piə sê chùmtè epàm sə vəynse nə, “Ghàyn pɨate ngɨŋ saynse se nə̀ efɨ̂aʼ, ə ghàyn tyayn lâm saynse ə pfɨ̂tə̀

³⁶kə ghɨ e fɨaʼa ghɛ ə ghe lɨmtə pɛ̀ èfɨ̀aʼ ə̀ ghənə nə è kɛse kwɨlə̂ elùʼ ə malə̂ kə ghənə chɔʼ cho ndɛe nâʼà pi ashìŋə̀ kè kɛ ə è ngɔʼte.

³⁷Ə pɛ̀ èfɨ̀aʼ kɛsə̂ kwɨlə̂ ə fe əghɨ fɨaʼa vəyn nə ghɨyn ghe kyâʼà, ə saŋnêzè ə nyi sê ghənə. M piə sê ghàyn səmɔʼ nə, kè nâʼà vəyn sə və ngɨŋ nəyn, ə ghənə tsɨsə elùʼ e zhiəe, ə è pɨaʼte ngɨŋ ə vəyn ə è tsɛ̂se fɨazhiəe sê ghənə.

³⁸Ə è ndù se pə̀ pi ətəyn ə̀ shi kɨ̀sə ə nyi pi epɨsə̀pɨsə̀ ə fe ghənə e kyâʼà, ə saŋne eghaʼazè ə nyi sê ghənə!

³⁹Ghàyn ke nə, ə pɛ̀ ndɛ ke shîŋə̀ kɛ ə wùchɔŋɔ nyi se pə̀ ətəyn, ə è tàʼa zà nə è pə̀yn kyim ndɛ̂ vəyn.

⁴⁰Nâʼà ghàyn kyi sə̂ tsɨs naʼapi ashìŋə̀ àkè, lɨmtə̂ kepî zâ kûmə̀ nə Va Wùə tə kɛsə̂ pə̂ ashìŋə̀ kɛ ghàyn kwàʼtə̀ va nə è kàʼa è pə̀yn ətəyn.”

⁴¹Pità ə pfɨfə sê Njisə̀s nə, “Pɛ̂pɛ, ò mɛ̀ ngàyn zɨ̀yn ke sê ghàs mə, mə ò mɛ̀ sê ghɨghe əkɨ̂m ə?”

⁴²Pɛ̂pɛ ə pə̀ynsə̀ nə, “Wufɨ̀aʼa vɛ ə è zɨə pɛ̀ èfɨ̀aʼ ə̀ vəyn fɨnə tɔfə nyi vɨ̂yn? Ə̀ nyi vɛ ə pɛ̀ èfɨ̀aʼ ə̀ vəyn piə è ndùə èkwî, ə è ndəm vəyn əshi, ə è fo tyaʼa kə è və tɔ̂ʼnə̀ è ndɛ vəyn, fo efɨazhiəve sê ghɨ ashìŋə̀ kɛ ə ghənə kyiŋə ətəyn.

⁴³Wufɨ̀aʼa ə̀təyn nə̀ nə̂ ə è və saŋnə̂ ashìŋə̀ kɛ pɛ̀ èfɨ̀aʼ ə̀ vəyn kɛse pə̀yn, è və nə̂ eghɛ zɛ ə è tè pi.

⁴⁴M piə sê ghàyn səmɔʼ nə, ə ze kyàyn nyi ə pɛ̀ èfɨ̀aʼ nə vɛ ndəm vəyn nə è və tɔ̂ʼnə̀ èfɨa vəyn nâʼà èkɨ̂m.

⁴⁵Pîza ə wufɨ̀aʼa nə vɨ̂yn tsɨsə ə kwàʼtə̀ kə sə və ngɨŋ nə, pɛ̀ èfɨ̀aʼ nə̀ ndamə tsɔ̀fə kə è kɛse kwɨlə, ə zhə̀tə̀ sə̂ pusə mmɨ̂ətə̀ me fɨ̀aʼam, pusə əghɔyn e ndômnə̀, pusə əghɔyn zəyn ghɛ ə ghe fɨ̂aʼà ə ndɛ, fɨnə zhiə tsɛ̂ andiŋ, mɨə m̀lɨ, m̀ ko vəyn,

⁴⁶ə pɛ̀ èfɨ̀aʼ ə̀ vəyn tə kɛse pə̀yn tuʼfîfe, ashìŋə̀ kɛ ə è kwàʼtə̀ va nə è kàʼa è kɛse pə̀yn ətəyn, ə è fo ngəʼ sê vəyn nâʼà sə ŋaŋ, ə è fɨyn ndəm vəyn anɔ̀yn ə ghɨ̀ kɛ ə ke pomə va sê Zhə̀fè.

⁴⁷Ə wufɨ̀aʼa se ke eghɛ zɛ ə pɛ̀ èfɨ̀aʼ ə̀ vəyn kyiŋə, ə tàʼa fɛte ə ngɨŋ ə vəyn se nə̀yn, ə pus vəyn nâʼà sə ŋaŋ.

⁴⁸Pîza vɛ ə è ke va ə nə̀ eghɛ kə ə kàʼa ə pus vəyn sə ŋaŋ, ə pus kè vəyn se chə. Ə̂ fo naʼapi sê ndè setsɨ̀, ə kɛsə̂ kyiŋə kepî nə è fo setsɨ̀. Ə samse nâʼàpî sê ndè setsɨ̀, ə kɛsə̂ kyiŋə kepî se fi sê vəyn setsɨ̀.”

⁴⁹Njisə̀s ə piə sê chùmtè epàm sə vəynse nə, “M pə̀yn se kwà ewùs əfètə̂ ə̀ghɨ̀. Ndè fo ə və sè pɛ̂!

⁵⁰M kyi se kyiə mtsəfle sə shi. Ghɛ ətəynze e fo ngəʼ sê mi nâʼà sə ŋaŋ, m tsə̂mə̀ nə m̀ pə̀yn tsɛ!

⁵¹Ghàyn kwàʼtə̀ nə m pəyn fâ ə chi se nə̀yn nə ghɨghe ə ndamə è pɔ̂ynè ə? E va chiza. M pɨl pə̀yn è chyâsèzè.

⁵²Se zhə̀tə̀ zôyn, sas ə ndɛ zɛ ə ze kyi ghɨghe ətəyn ə tâyn nə̀ chyâsə̀, ə ghɨghe ə ta ə nô əghɨ ə̀ pɛ̀, ghɨghe ə pɛ̀ e nô əghɨ ə̀ ta.

⁵³Ghənə nə chyâsə̀, ə pɨ̀a ə nô yî vâ ə̀ vəyn ve ndômə̀, nyì e nô yî vâ vəyn və èzhɔyn, nyìə ndom e nô yî zhwiə vayn.”

⁵⁴Njisə̀s ə se pi sê ghɨghe əkɨ̂m nə, “Ghàyn fe kə̂ mbàʼsè fɨə kɔʼɔ apàs kɛ ə zhwie sâŋà ətəyn, naʼapi ashìŋə̀ àkè, ghà piə nə ghol zɛ ə ze pə̂, ze ə pə̀ kə zâ,

⁵⁵fɨnə zɨə kə̂ fofa fɨə pə̀ ndomve apàs etyə̀ke, kè sə ashìŋə̀, ghà piə nə tɨ̀mà nə̀ nə̂ ə kə nyi, ke nyi ke zâ.

⁵⁶Ghàyn ghɨ ghɨ̀nə̀ ə ghàyn kaŋkaŋa nə̂ ghɛ nyi! Ghàyn ke sə̂ fɨə tyəmə naynə̂ kə àpɨəyn, ghà tsà eghɛ zɛ ə ze nyi se kyàyn, ze ə kyànə̀ kə zâ. Kûmə̀ ghè ə ghàyn fe kê va ghɛ ghɛ ə Zhə̀fè nə̀ zo ə?

⁵⁷Pɔ̀m ghè ə ghàyn fe kê va sə̂ ghàyn ngɨŋ nə ghàyn kyi sə̂ nə̂ eghɛ èchûŋ èkè e?

⁵⁸Ə wùə nji ghò, ndùə è ghò elùʼ ə saʼ, o mɔ̀msə̀ nə ghâyn vəyn pɨaʼte endom, polə zâ, ə è nji ndù è ghò sê wùə sèsaʼ, ə è saʼ ghò ə è fo ghò sê wùə vɛ ə è fà ghɨghe ə chaʼ, ə è ndəm ghò ə ndɛ̂ chaʼ.

⁵⁹M piə sê gho nə, ə̂ e kyàyn zâ, ə ò faŋ ke fu ə ndɛ̂ chaʼ se zaʼâ kə ò ndaʼ mɨ̂sè èkɛ vɛ nâʼà èkɨ̂m.”