Read Mmen Lûk 14 Bible Online

Lûk 14 - Mmen bible

Lûk 14

¹Ə̀ tè nyi etu endaʼ vîve, Njisə̀s ə ndùə ə ndɛ ə̀ wùə vîvè, ə nyi kepî àtu sê ghɨ Falàsîə se zhi, ghɨ ghɛ ə ghe tè nyi fumə ə ndə̀mə̀ èshi ə vəyn ewiyn nâʼà sə ŋaŋ.

²Wùə viu tè tsɨs ə və shi zafə è mòl.

³Njisə̀s ə se pfɨf sê tyə̀ynsè sə alàŋsè paʼsə̂ kə è ghɨə Falàsîə nə, “Saʼe pomə̂ ndò nə ə tsuʼ wùə etuʼ endaʼ mə, mə ze kwiynsə̂ ndò ə?”

⁴Pîza ghənə kɨ̂m ə tsɨsə kə mɔŋ. Njisə̀s ə kûmə̀ wùə ətəyn ə tsuʼə vəyn ə piə nə è ndò kwɨlə̂,

⁵ə kɛsə pfɨfə sê ghənə nə, “Ə̀ nyi nde ə ghàyn əfètəyn ə va vəyn kɨ̀sə ə nyi pi nyàm ə̀ vəyn pfɨə epə mmòze etuʼ endaʼ, ə è tàʼa fɨsə kə sə ashìŋə̀ ə?”

⁶Ghənə e kyi va nâʼà eghɛ se pi.

⁷Njisə̀s ə piə è fe, ghɨ ghɛ ə ndâmnè nə ghe pə̀yn fumə elùʼ ezhiəe e sè pə̂ njiə kə m̀kyə̂ mə èngaŋtə̂m. È və təftə̂ ghənə ə ngàyn nə,

⁸“Ə̂ wùə ndàm ghò nə ò pə̀yn elùʼ ezhiə nə malə̂e, ò pə̀, kə ò tsɨsə elùʼ engaŋtəe kûmə̀ nə è kàʼa ə è və nyi mə è və ndàm wùə è kɔʼnə̂ tsɛ̂ ghò.

⁹Ə wùə vɛ ə è ndàm ghàyn əkɨ̂m pə̀yn pi sê ghò nə, ‘Ndwi fo luʼve sê wùə vɨ̀yn.’ Nyi, ə tu kɛke ə sè tɨ̂lə̀ se ndùə tsɨsə əfekyə̀ fe tətə̂fè.

¹⁰Pîza ə wùə ndàm ghò, ə ò ndùə, o pɨlə tsɨsə̂ kə elùʼ e tətə̂vè kə wùə vɛ ə è ndàm ghò pə̀yn pi sê gho nə, ‘Soyn vɨ̂mè, kɔʼte pə̀ tsɨsə elùʼ engaŋtəe fâyn.’ Nyi, ə ò kɔʼnə̂ ə̂ ghɨ ghɛ ghâyn ghə̀ ghənə nyi əshi.

¹¹Nâʼàpî ndè vɛ ə è kɔʼsə ngɨŋ ə vəyn ekwùtwəyn, Zhə̀fè nə̀ tsosə̂ vəyn əchi, ə naʼapi ndè vɛ ə è njiə ngɨŋ ə vəyn əchi, ə Zhə̀fè nə kɔʼsê vəyn ekwùtwəyn.”

¹²Njisə̀s ə kɛsə̂ pîə sê wùə vɛ ə è fè ndàm vəyn nə, “Ə̂ ò kyi ghɛze se ndâmnè əghɨ naʼapi ashìŋə̀ àkè, kə o ndàm soyn sɛse pi əghɔ nɛ̂ghè pi ə̀ghɨ esas ə ndɛ ghɛghe è ghɨ ghaʼâ ghɛ ə ghâynghə̀ ghənə ndamə paʼsə̂, kûmə̀ nə ezhoghɛ ə ghənə pɔŋ kyi èghɛ ə ghənə̂zè, ghənə ə pɔŋɔ ndâmə̀ ghò, ə nyi mə ə kɛsê ndaʼ ghô.

¹³Ə ò kyi ghɛe ezhize, o pɨlə ndâmnə̀ əghɨ afɨfə è ghə̀ kèngɛchi è m̀ngə̂s è fòfvè.

¹⁴Ə ò nə̀yn za, ə pɔsêzè pə̀yn sê ghò kûmə̀ nə ghənə tə kɛsə̂ ndâʼà va gho. Ə Zhə̀fè tə ndàʼ ghò etuʼ vɛ ghɨ ghɛ ghe nyi chichi ə və shi kɛse zômə̀.”

¹⁵Ə pə̀ kə wùə viu fumə əfètə̂ ànɔ̀yn nə kɛ zɨ ghɛ nə zɨ̂yn, è və pìə sê Njisə̀s nə, “Saŋnêzè tə nə̂ ə ze ə nyi sê ghɨ ghɛ ə ghe tè zhiə elùʼ efɔ̀yn ə Fezhə̀u!”

¹⁶Njisə̀s ə piə sê vəyn nə, “Wùə viu tè kyi ezhi eghaʼazè ə ndàmə̀ əghɨ, ghe tsɨ̀ə kə nyi.

¹⁷Shîŋə̀kè ə nə̀ kwənə, è və tomə wufɨ̀aʼa ə̀ vəyn ə piə nə è kwi tsàyn sê ghɨ ghɛ ə è tè ndàm nə ghənə pə̀yn kûmə̀ nə ə pɨaʼtê mɨ̂sè nâʼàpî ghè.

¹⁸Pîza ghənə ə ndùə zhə̀tə̀ kə fèmɔ̀ʼ femɔ̀ʼ se ndɔnə endom. Wùə ə̀shi ə piə nə, ‘Mə zhɔyn fûʼà, kyi se ndùə nayne. Ndùə chyate pɛ̂ nə kə è və nyɔʼsə̀ ètɔŋ sê mi.’

¹⁹Wùə mɔ̀ʼɔ ə piə nə, ‘Mə zhɔyn mbɔ̀ŋ seghɨm, nə se ə fə̂ àfùʼ kɨma, sè ndùə se mɔ̀m ə fe. Ndùə chyate pɛ̂ nə kə è və nyɔʼsə̀ ètɔŋ sê mi.’

²⁰È və piə è ndùə sê wùə mɔ̀ʼɔ, è və piə nə, ‘M pə̀ va kûmə̀ nə ghâsè zhwi vɨ̂mvè kwùʼ malə̂ kêndò.’

²¹Wufɨ̀aʼa nə vɨ̂yn ə kɛsə̂ kwɨlə tsà əghɛ nə ghɨ̂yn sê pɛ̀ èfɨ̀aʼ ə̀ vəyn. Tɔŋve ə zafə vəyn, è və piə sê va ətəyn nə, ‘Zàŋse fɨ ndù ə tendom tetɛte è te tətə̂tè ə tɔ̂ŋ ə kumtə̂ pə̂ ə̀ghɨ afɨf ghɛ ə ghe nyi fumə è ghe ngəplə è ghe fofə è m̀ngə̂s.’

²²Wufɨ̀aʼa ətəyn ə ndùə kɛsə pə̀ ə piə sê vəyn nə, ‘Pɛ̀ apɨəyn, mə nə̀yn naʼapi ghè vɛ ə ò pi, pîza ndɛ pâʼà nyìəm lwiyn.’

²³Nyi, pɛ̀ èfɨ̀aʼ ə fɨnə piə sê vəyn nə, ‘Fɨ ndù fâ endaʼ ə ndùə ə mndômnə̀ mə̂ afùʼə̀m è luʼ təmɔ̀ʼɔ tɛ ə ghɨ nyi kepî ətəyn ə nə̀ ə ghənə pə̀yn kə ndɛ zɨ̂m lwiyn.

²⁴M piə sê ghàyn nə, nâʼà wùə nə̂ mɔ̂mə̀ va fɨa ə ezhiə kɨmke əfètə̂ ə̀ghɨ ghɛ ə m tè ndàm, ghe ə tə.’”

²⁵Ə̂ pə̀ kə̂ Njisə̀s ndò kwiə ndùə, nɔ̂yn ə ghɨ̀kè e chûmtə̀ ndùə vəyn. È və kɛsə̂ pə̀ynsə̀ èwiyn ə piə sê ghənə nə,

²⁶“Wùə vâyn kàʼa ə è kwəyne sə̂ nyi chùmtè zɨ̂m, ə̀ tsɛ̂ kəva mə è kɔ̀ŋɔ̀ ndò mi tsɛ̂ kə è kɔ̀ŋɔ̀ pɨ̀aə vəyn è nyiə vəyn è zhwiə vəyn è ghɔə vəynghe è ghɔnyiə vəynghe, nâʼàpî è ngɨŋ ə vəyn.

²⁷Ə̂ faŋ naʼapi ndè se pɨàʼà awâmnè ə vəynke se chùmtè ə mi, è vâyn kàʼa ə è və nyi chùmtè zɨ̂m.

²⁸Ə̀ nyiə nyi nâʼà ndè ə ghàyn əfètəyn ə è kàʼa ə è və kyiŋə se pɛ ndɛ èghaʼâ ə e tàʼa tso tsɨsə se naynə fe nə è vɛ è kyi kɛe ve tsɨ̀ə kwənə kə è nə̂ mɨ̂sè pɛ ətəynze ətəyn ə?

²⁹Ə̂ è tàʼa nə̀yn za, ə ndə̀mə̀ achi ə ndɛa, ə tàʼa pɛ mɨ̀sè, ə̂ sè tsɛ̂ naʼapi ndè endom fe za, chaʼa ndùə vəyn,

³⁰piə nə, ‹Wùə vɨ̀nə tè zhə̀te epɛ, sè va se mɨ̀sè.›

³¹Ə̀ va za, ə̀ nyiə kàʼa ə nyi fɔ̀yn è kwə̀ ə è pɨaʼtə se səʼ ə nò fɔ̀yn ə̀mɔ̀ʼɔ̂, kyi ke ə̀ghɨ ghɔ̀ŋə kam seghɨm, ə è tàʼa tso tsɨsə se naynêə fe nə ghɨ nə ghɨnə ghɛ ghe tɛ kwənə se nò əghɨə fɔ̀yn ə̀mɔ̀ʼɔ̂ vɛ ə è kyi kamse m̀ghɨm m̀ pɛ ə?

³²Ə è fe nə è vâyn kàʼa è mɔ̀m, ə è tom ndùətom sə vəynse nə ghənə ndu fe fɔ̀yn ə̀mɔ̀ʼɔ̂ vɛ, nâʼà sə aghaf, ə chyate vəyn nə è kɔ̀ŋɔ̀ se fo naʼapi ghè kə yî vəyn pɨaʼte ghɛ ətəyn.

³³E za nyi kepî eghɨ kə naʼapi ndè ə ghàyn əfètəyn tàʼa za naʼapi ghè vɛ ə è kyi, è vâyn kàʼa ə è və nyi chùmtè zɨ̂m.”

³⁴“Ghàyn ke ndô nə ngwaŋfe nyiə tsɔ̂fə̀, pîza mə ə fe fɨnə tɔfə va, ə fɨyn ghayn ghè è fəynfe nə fe ə fɨnə tɔfə ə?

³⁵Ə fe ə tsɔ̂fə̀ va kə ə nə̀yn nâʼà eghɛ zhize ətəyn ə̀ tsɛ̂ kəva nə ə sɨs mâʼà. Ə̀ tɔfə pi ndè, è və tɔ̀ʼɔ̀ zɨtə̂.”