Read Mmen Lûk 15 Bible Online

Lûk 15 - Mmen bible

Lûk 15

¹Tuʼfîfe, ghɨ ghɛ ə ghənə tè tənə tâksè yî ghɨ epi əmɔ̀ʼɔ ə tsɨ̀yntə̀ ə̀kɨ̂m sè ndùə kə ə Njisə̀s ə ngwùŋ, kyiŋə se zɨtə̂ ezaʼlê ə vəynze.

²Ghɨ Falàsî yîghe yî ghə̀ tyə̀ynsè sə alàŋsè ə fe za sè tɨmnə̂ zô, piə nə, “Wùə vɨ̀nə pomə̂ nə naʼapi əghɨ pighe ə pə̂ ə və ngwùŋ, fɨnə zhiə nâʼà yî ghə̀ ghənə.”

³Njisə̀s ə se mɛ̀ ngàyn sê ghənə ə pfɨfə nə:

⁴“Ə̂ wùə sê ghàyn kyi ndzèsè wəve, è zə njisə̀, èmɔ̀ʼ ə è ghaynghe? Ə ze kyàyn za, ə è za səmɔ̀ʼɔ sɛ̂ m̀ghɨm poləmɔ̀ʼ njòse poləmɔ̀ʼ əyìyn ə è və kwîə kyiŋə kə ndò zɛ èmɔ̀ʼ se zaʼâ kə è nə fe.

⁵Ə è fe, ə è və saŋnə nâʼà àchûŋ, ə è pɨaʼa ə è ndəm ə və mbɨ̀aʼà

⁶ə è kwɨlə ndù tɔŋne əsoyn ə vəynghe, è kɔtə vəynte ə è pi sê ghənə nə, ‹Ghàyn pə̀yn ə ghâsènì zhi tuʼ vɨnə̀ ndàyn kûmə̀ nə mə fe ndzè zɨ̂mzè kə è tè njisə̀, ghɛ ətəynze e tsɔ̂fə̀ sê mi nâʼà àchûŋ.›

⁷M piə sê ghàyn nə, e tə nə̂ ə ze ə nyi kepî za ekwùtwəyn. Saŋnêzè tə nə̂ ə ze ə nyi ekwùtwəyn kûmə̀ wùə èpi emɔ̀ʼ vɛ ə è pə̀ynsə̀ təm ə və, ə kɛsə̂ pə̀ sê Zhə̀fè tsɛ̂ kə ze nyi kûmə̀ ə̀ghɨ m̀ghɨm m̀pɔləmɔ̀ʼ njòse pɔləmɔ̀ʼ ghɛ ə ghe kwàʼtə̀ nə ghe fɨyn kyi va se pə̀ynsè ətəm.”

⁸“Polə za, ghàyn fɨyn kwaʼtè ke nâʼà nə wùzhɔyn kyi ekɛ vəyn kə è ndəm, və ə njisə̀, ə è ghayn ghe ə? Ə e kyàyn za ə è tyayn lâm, ə è zəs ndɛ ə fɛte kyiŋ ekɛ ətəyn se zaʼâ kə è fe.

⁹Ə è fe pi ashìŋə̀ àkè, ə è tɔŋne soyn sə vəynse è kɔtə vəynte ə è pi sê ghənə nə, ‘Ghàyn pə̀yn ə ghâsènì ə saŋnə kûmə̀ nə mə fe kɛ vɨm vɛ ə ve fè njisə̀.’

¹⁰M piə sê ghàyn nə, ə wùə èpi emɔ̀ʼ pə̂ynsè təm ə vəynghe ə kɛse ndùə sê Zhə̀fè, tsì sə vəynse esaŋnə̂ kəpi zâ.”

¹¹Njisə̀s ə fɨnə tsà kepî nə, “Wùə viu tè kyi əghɔ vəynghe əpɛ̀,

¹²Ve tətə̂ ə piə sê vəyn nə, ‘chyàte fɨae zôyn ə Pɛ̂pɛ ə fo vɨm.’ Pɨ̀a vəyn ə chyàtə̀ fo və ànyìə vəynve, ə fo kəpî və vəyn.

¹³Tuʼlə̂m pâʼà nyìəm tsɛ m̀shyàʼ, vê tətə̂ nə vɛ ə pəʼle efɨa ə vəyn nâʼà èkɨ̂m ə səʼə èkwî endaʼ zhize, ghaf ətəynke e tyàfə̀ kə nyi ə ndùə tânə̀ fumə sè tsɨ̂nə̀ ndamə kə ndò, tsɨ̂nə̀ zhiə ke ndò kɛə vəynve.

¹⁴Ve ə ghaŋə əghɛ ə mìə. Chɨ̀ŋ e pamə zhizè ə ko endaʼ nə zɛ, è fɨyn kyi va fɨake se zhi.

¹⁵È və ndùə chyatə̂ sə̂ fɨ̂aʼà sê wùə endaʼ vî fumə. È və tomə vəyn nə è ndu ə è və naynə èkwùndwuŋ ə vəynve ə mbvɨyn.

¹⁶È və ndùə sè fɨ̂aʼà, wùə e fo va fɨake nə è zhi. È ve sè chîə kə nâʼà nə ndè fo zhi kə è kàʼa ə è zhi liŋ e fɨazhiə vɛ ə ekwùndwuŋve zhiə ə?

¹⁷Tɔf ə vəynze ə kɛse pə̀, è və kwàʼtə̀, ə pfɨfə kə sə və ngɨŋ nə, ‘M nyiə kwuə ndùə nâʼà chɨ̀ŋ fayn nyi kûmə̀ ghè, pɨ̀a vɨm kyi əghɨ efɨaʼa, ghe tsɨ̀ə kə nyi, ghənə zhiə efɨazhiəu ve tsɨ̀ə tsɛ̀ ə?

¹⁸E tsɔ̂fə̀ nə m ndwi ə m kɛse kwɨlə ndù fe pɨ̀a vɨm ə m pi sê vəyn nə, Pɛ̂pɛ, mə nə̀yn pi sê Zhə̀fè, ə fɨnə nə̀ sê gho.

¹⁹M fɨnə kwəynə va sə gho vayn. Njiə kə mi sə wufɨ̀aʼa vɛu.’

²⁰È və wàmnə̀ za ə ndò se kɛsə̂ kwɨlə̂ ndùə sê pɨ̀a vəyn. Pɨ̀a vəyn ə fè vəyn, è pa pə̀ nâʼà sə aghaf, səynze ə ko vəyn, è və nyɨŋə ndùə paŋnə vəyn.

²¹Vayn nə vɨ̂yn ə piə kə kə è fè kwàʼtə za nə, ‘Pɛ̂pɛ, mə nə̀yn pi sê Zhə̀fè, ə fɨnə nə̀ sê ghò. M fɨnə kwəynə va sə gho vayn.’

²²Pɨ̀a vəyn ə piə kə sê ghɨfɨaʼa ə vəynghe nə ghàyn zaŋse pə̀yn è ndzɨs shise ə se tsɔ̂fə̀ kwənə ə lafsê vəyn ətəyn ə ndəm chaʼfe ə və agho ə tuŋ pfɨse ə və ghòl,

²³ə fɨnə piə sê ghənə nə, ‘Ghàyn nə ə ghàyn pə̀yn è zaʼ kɛ ə ke ghaʼa kwûŋsə̀ za ə kàyte, ə ghâsènì zhi tuʼ fɨ̂nə ndàyn, è saŋnêzè.

²⁴Vayn vɨm vɨ̀nə nyi nyî mə m tè se ndəmə̀ kə nə è və kwuə ə̀ kyaʼà vəyn fayn nyi, nyi ke nâʼà etwɔ. M tè se piə kə nə è və njìsè ndu, è vɛ è kɛse pəyn.’ Ghənə ə se zhə̀tə̀ sə̂ zhiə, saŋnə.

²⁵Ghɛ nə zɨ̂nə̀ tè kyàynə za, va wùə nə vɛ ve ndumə e nyi ə mbvɨyn. È ve kwɨlə̂ pə̂, sè pa paʼsə̂ pə̂ kə apɨəyn, ə zɨə kə ə zhəmə njàŋsè, puʼə èfɨa.

²⁶È və tɔŋɔ wâ və ndɛ viu ə pfɨfə nə ə kyàynə̀ ghè apɨəyn ə?

²⁷È və piə sè vəyn nə, ‘Ə kɛse pə̀yn ànɛ̂. Pɛ̂ vɛ è kàytè zaʼ kɛ ə ke ghaʼa kwûŋsə̀ za sê vəyn kûmə̀ nə è və kɛse pə̀yn, nyi ke nâʼà èwiyn e twɔve.’

²⁸Vayn vɛ ə nyɔʼsə̀ kə ètɔŋ ə tə nə e fɨnə njiə va apɨəyn. Pɨ̀a vəyn ə fɨnə ndùə sè chyatə̂ vəyn.

²⁹È və piə sê pɨ̀a vəyn nə, ‘M fe nə mə fə̀ sê ghò sə sepìŋ, ò pìə eghɛ, m chɔʼnə̂ va. Ò pâʼà tyəm fo ke nâʼà va pfɨ nə m kàyte ə ghâsè soyn sɨmse kwɨl.

³⁰Pîza vayn vɛ vɨ̀nə vɛ è ndù kɛse pə̀yn, mə è və tə njiə kɛ vɛve ə ndùə pofsə̂ yî kwàlàe, ò sè nyi mə ò kàytè zaʼ echitə kɛ sê vəyn!’

³¹Pɨ̀a vəyn ə se pi sê vəyn nə, ‹Ò se tsɨs ke ghâsè ghò shîŋə̀ tekɨ̂m ə vayn sê mi; piə naʼapi ghè vɨm nyi, ə̀ kyi ke ghò?

³²E fè nə̂ tsɔ̂fə̀ kə nâʼà se nə̀yn etuʼ e ghaʼa vɨ̀nə, se zhi. E tè se kyaʼà kə ànɛ̂ vɨ̀nə kwu ndo, è nə nyi zôyn nyi, nyi kə nâʼà etwɔ. M tè nyi mə mə ndə̀m ndù ke nə è və njìsè, è vɛ è kɛse pə̀yn. Ò piə nə kə ghâsènì ə saŋnə ə?›”