Read Mmen Lûk 17 Bible Online

Lûk 17 - Mmen bible

Lûk 17

¹Njisə̀s ə tə pi sê chùmtè epàm sə vəynse nə, “Ghɛ ghɛ ə ghe nə̂ nə ghɨghe ə nə̂ pi vâyn kàʼa faŋ se kyàyn, pîza ngəʼ nyi sê wùə vɛ ə è nə ghɨghe e njisə̀ èndom!

²E kàʼa ə ze ə tsɔ̂fə̀ nə ə kolə chize ə vəyn emì, ə ndù màʼa vəyn ə enjwì ə fengwaŋve tsɛ̂ kə è nə̀yn ə ghɔyn femɔ̀ʼ əfètə̂ ə̀ ghɔyn ghɨyn nə̀yn pi.

³Ghàyn tɔ̂ʼnə̀ è ngɨŋ saynse! Ə ànɛ̂ nə̀yn pi, ghàyn ə zɔ̀ vəyn, mə è kwiyne, ghàyn ə lɛ̀sə̀ fo vəyn

⁴Ə è nə̀yn ghɛ pi sê gho naʼapi shîŋə̀ te shyàʼ ə fetuʼ, nə̂ naʼapi ashìŋə̀ àkè, pə̀ chyatə̂ ghò, piə nə, zhi tə fɨnə mɔ̂mə̀ va, ò lɛ̂sə̀ fo kə ndò vəyn.”

⁵Ghɨətomə ə se pi sê Pɛ̂ nə, “Nə̀ ə ghàs tɔʼ kyi èpomə̂ sê Zhə̀fè!”

⁶Pɛ̂pɛ piə sê ghənə nə, “Ə ghàyn kyi pomə̂ e tətə̂ pi kə eshi ə ngwàʼ ə mostàe, ghàyn kàʼa ghàyn pi sê kâʼ fɨnə nə fe muʼə ə fe nji tyəm ə fə ndəmə̂ əfètə̂ ènjwì ə fengwaŋve, ə fe nəyn ke za.

⁷Ghàyn ndə̀m tso nə wùə ə ghayn ə fètəyn kyi wùə, è ve fɨaʼà sê vəyn ə mbvɨyn kɨ̀sə è tsɨ̀ŋnə̀ sepfɨ. È və ke kɛsə̂ kwɨlə pə̀ afùʼ, ə ò pi sê vəyn nə è zaŋse tsɨsə̂ zhi mə?

⁸Piə è kwɨlə̂ pə̂ nyi, ə ò pì ke nə è kwiynê ndzɨse, ə è kwunə fɨake ə è fo ə ò zhi ə è fɨyn fo afɨa ə ò mɨ tsɔ̀fə kə nâʼà vəyn zhi ə è fɨnə mɨ ə?

⁹wufɨ̀aʼa ətəyn vâyn kàʼa è və naynə̂ piə nə ə fo zɔ̀ŋnèkè kûmə̀ nə è nə̀yn ke eghɛ zɛ ə fè pi.

¹⁰Ə za nyì kepî kə ze kyi sə̂ nyi sê ghàyn. Ə fo fɨ̂aʼè, ghàyn ə nə̀ mɨ̂sè, ghàyn ə ndə̀mə̀ nə ghàyn fɨ̀aʼa ke kə ekɔ̂s, ghàyn nə̀yn ke efɨ̂aʼ zɛ ə ghàyn kyi se nə̀yn.”

¹¹Njisə̀s ə ndo se fɨnə ndùə ə Njèlusalɛ̀m ə fɨ ə njiə endom vɛ ə ve tɔynə ekwàŋ ə Sàmalyà yî Ngalìlî,

¹²ə nə̀ pə̀ sè njiə ndùə kə ə tə̀ʼ zhize nyi, ghɨ akwùs yîghe eghɨm ə fe vəyn fu ə tyəmə kə sə aghaf

¹³ə pɨa piə sê vəyn nə, “Kose səyn sê ghàs ə Pɛ̂, Njisə̀s.”

¹⁴Njisə̀s ə fe ghənə ə piə nə, “Ghàyn ndù, ə ghɨ kɔʼsə nə eshyə̀ ndɛ Fèzhə̀ nayne ghàyn.” Ghənə fɨə tânə̀ endom ə tsɨ̀nə̀ kə mə ghənə ə tɛ.

¹⁵Vîvè ətəyn, mə nyi wùə Sàmalyà, ə fe nâʼàpî ashìŋə̀ àkè nə zhi ə tɛ ə kɛsə kə ndò pɔmsə̂ ndùə Fèzhə̀ nâʼà è kyə̀ ètɛ

¹⁶ə ndùə, fe pə̀ kə Njisə̀s nyi ə pfɨ̀ə ə və shi èkyâʼè ə fo àzɔ̀ŋnè sê vəyn.

¹⁷Njisə̀s ə ke pfɨf nə, “M fè tsuʼ əghɨ eghɨm, ghɨ mɔ̀ʼɔ ghe epoləmɔ̀ʼ ndù ghayn zə?

¹⁸Pi e za nyi nə wùə sê ghənə fè pâʼà kwàʼtè se kɛsə̂ pə̀ fo àzɔ̀ŋnè se kɔʼsə̂ Fezhə̀, ə tsɛ̂ kəva wùə àtum vɨ̀nə ə?”

¹⁹Kə è wàmnè za ə ke pi sê wùə Sàmalyà nə vɛ nə, “Ndwi ə ò ndùə ə gho elùʼ. Ə nə̀yn epomə̂ zɛze, ò vɛ ò tɛ.”

²⁰Ghɨ Falàsî yîghe ə pfɨfə sê Njisə̀s nə, “Zhə̀fè tə zhə̂tə̀ se saʼ efɔ̂yn ə vəyn etuʼ è kwə̀?” È və piə sê ghənə nə, “Chwiə zhizè va se nə tyə̀yn nə ə̀ vɨnə nyi efɔ̂yn ə Fezhə̀u ə ve sè zhə̂tə̀ pə̀ nyi.

²¹Wùə tə piə va nə fekə, ə̀ vɨnə pə̀ vəyn nyi, ə vîə pə̀ vəyn za! Ghàyn ke nə Zhə̀fè saʼa èfɔ̂yn ə vəyn ə ghàyn əfètəyn ke nâʼà zôyn.”

²²È və se kɛsə pi sê chùmtè epàm sə vəynse nə, “Tuʼə̀m nə̂ pə̂ kə ghàyn tə nə̀yn ə chîə se fe Va Wùə ke nâʼà sə fendiŋə̀ fə ashìŋə̀fè nyi, pîza fe va.

²³Ə̀ tə nə̂ nyi ə mtuʼ nə mɛ, ə ghɨghe ə piə nə, ‘È vîə fɛ̂, è vɨ̀nə fayn!’ Ə ghàyn zɨ, kə wùə nə ndù fu.

²⁴Pə̂yn ə Va Wùə è tə nə̂ ə ze ə kyaʼà kə ndayn kèpi eghɨ nyiə kə gholze pi ze mɨ̂anə̀ ndò, e fe kə̂ ze pànə̀ kə tâŋ tə mbi tekɨ̂m.

²⁵È kyi se fe ngəʼ ə tendom te tsɨ̀ə kə nyi nə ghɨə mbi zo fɨyn tə vəyn tsɔ̀fə kə ghɛ nə ghɨnə kyayn.

²⁶Va Wùə tə piə è pə̀ ndò, ə ghɛghe ə kyànə̀ kepî kə ghe tè kyànə̀ etuʼə və Nuwàvè.

²⁷Ghɨ tè zhiə, mɨə, njiə ə̀ zhi, pomə̂ ə̀ndom, fɨnə fo əghɔyn sê ndomə se kɔʼɔ zaʼâ etuʼ vɛ ə Nuwà tè nji ə ngwùʼ èghaʼâ, kwuŋke ə pə̀ ə zhwitə̂ ə̀ ghɨ ghɛ ə ghe faŋ nâʼà əkɨ̂m.

²⁸Ghɛ tə nə̂ ə kyànə̀ etuʼ vɛ Vawùə pə̀ kè kə ghe tè kyànə etuʼ ə Lôtè. Ə tè nyi etuʼ nə vɛ, ghɨghe e zhiə, mɨə, zhɔnə èfɨa, pəʼlə̂ èfɨa, zho èfɨa, pɛ sendɛ.

²⁹Ə tè nyi etuʼ vɛ kə Lôt fɨ ə Sondòm, Zhə̀fè ə fɨsə̂ tsosə̂ èwus ə ekwùtwəyn è chîə, ve fɨə kə mkâyn, ə zhwi tə̂ ə̀ ghɨ ghɛ ə Lôt tè ndò za, nâʼà ə̀kɨ̂m.

³⁰Ə̀ za nyi kə ghɛ tə nə̂ ə ghe ə nyi etuʼ vɛ ə Va Wùə pə̀ ətəyn.

³¹Ghɛ nə ghɨnə tə piə ghe kyànə̀ ndò, wùə e nyi pi etûə ndɛ, kə è fɨyn tso se nji afɨa əfètə̂ ndɛ. Wùə e nyi pi afùʼ, kə è fɨyn kɛse kwɨlə̂ ə ndɛ.

³²Kə wùə tə lɛ̀sè eghɛ zɛ ə ze tè kyàyn sê zhwiə Lôt.

³³Ə za mɔ̀msə̀ pi ndè se ndamə faŋ, ə è kwu, ə màʼà pi ndè ngɨŋ ə vəyn, ə è ndam faŋ.

³⁴M piə sê ghàyn nə ə tə nə̂ ə nyi etuʼu etuʼ nə vɛ, ə ghɨghe əpɛ̀ ə nyɨŋ èkwî, ə pə̀yn nji èmɔ̀ʼ ə za vîvè.

³⁵Zənə tə nə̂ ə kwûə àpayn echi, əpɛ̀, ə pə̀yn nji èmɔ̀ʼ ə za vîvè.”

³⁷Chùmtè epàm sə vəynse ə se pfɨf sê vəyn nə, “Ghɛ nə ghɨyn tə kyànə̀ ghayn, ə Pɛ̂pɛ?” È və piə sê ghənə nə, “Ə fɨake kwuke nyi pi ghayn, ə ŋɔ̂ŋɔve ə ke, zûŋtə̀ fu.”