Read Mmen Lûk 19 Bible Online

Lûk 19 - Mmen bible

Lûk 19

¹Njisə̀s ə ndùə njiə ə Njèlikò sè tɔynə̂ tsɛ̂.

²Wùə viu e nyi fuə tə̀ʼ, e tɔŋtə̂ nə Sàkyə̂, ə̀ nyi àtu ə ghɨ̀ ghɛ ə ghe tənə tâksè, kyi ekɛ nâʼà àchûŋ.

³È və sè mɔmsè se fe Njisə̀s, fɨmə se fe kûmə̀ nə ghɨə tè tsɨ̀ə, è və fɨnə tɨmsə̂.

⁴È və nyɨŋə ndùə əshi ə kɔʼɔ etûə fèkàʼ fə sycamòfè kə Njisə̀s pə̀yn ə è piə è tsɛ̀ ndò ə è fe kûmə̀ nə Njisə̀s tè ndùə se tsɛ̀ èndom fu.

⁵Njisə̀s ə pə̀ tânə̀ fu ə naynə̂ kɔʼsə̂ etûə fèkàʼ fɛ ə Sàkyə̂ tè nyi ətəyn ə piə sê vəyn nə, “Sàkyə̂, zàŋse tso pə, m kyi se pɨəyn ə ghò ndɛ ndàyn.”

⁶È və zàŋsè tso ndùə nyi è saŋnê ə se njiə ndù è Njisə̀s ə və ndɛ.

⁷Ghɨghe ə fe sè tɨmnə̂ zɔ̂, piə nə, “È kotə̂ pìə wùə əghɛ piə, səʼə kə èmô ə və ndɛ.”

⁸Sàkyə̂ ə nə̀ ə ndwìə tyəmə̂ ə pìə sê Pɛ̂pɛ nə, “Fekə, Pɛ̂pɛ, m chyâtə̀ èfɨa vɛ ə m kyi ghasè ghɨafɨfə kè eghɨ, ə̀ fɨyn nyi mə mə lesê wùə ə fiə àfɨa ə vəynke amɔ̀ʼ, ə m kɛse fo ekwàʼ.”

⁹Njisə̀s ə piə sê vəyn nə, “Ghɨə ndɛ fâ ə zhi fɨ ndàyn. Ə̀ vɨ̀nə nyi kepî va Aplàghâm.

¹⁰Va Wùə te pə̀yn se kyiŋə əghɨ ghɛ ə ghe njise se sɔ̀sè əghənə.”

¹¹Ghɨ tè pa zɨtə̂ kə èwâmnè ə Njisə̀s nə zɛ, è və mɛ̀ ngàyn sê ghənə kûmə̀ nə è tè se paʼsə̂ ndùə ə Njèlusalɛ̀m, ghənə tè kwâʼtə̀ kə nə Zhə̀fè nə̂ zhə̂tə̀ se saʼ efɔ̂yn ə fəynfe kè sə ashìŋə̀ nə kɛ.

¹²Njisə̀s ə mɛ̀ ngàyn nə zɛ̂ ə piə nə, “Va tɔʼ vîvè tè ndùə elùʼ viu, ghaf ətəynke e tyàfə̀ kə nyi, nə ə fo tyaʼa ə è kɛse pə̀yn ə è və saʼa àpâs endaʼ ə ghənə̂kè,

¹³ə tɔŋnə̂ əghɨ efɨaʼa ə vəyn ghe eghɨm se chyâtè ndùə ə kam ekɛ èmɔ̀ʼ èmɔ̀ʼ sê ghənə ə piə nə ghənə nə nə̂ pə̂ʼlè è ekɛ nə vɛ se zaʼâ etuʼ vɛ kə zhi kɛse pə̀yn.

¹⁴Ə̀ tè nyi za, ghɨ apàs endaʼ fu e panə̀ vəyn. È və ndò za, ghənə tomə nə ə ndù pi elùʼ vɛ ə è tè ndùə zə ətəyn nə ghənə kɔ̂ŋɔ̀ va nə è və saʼa ghənə.

¹⁵È və kɛsə̂ pə̀ mə ə ndù fo tyaʼa nə è və saʼa əghɨə vəyn ghe ə ke pi nə ə tɔŋne ghɨə efɨaʼa ə vəyn ghɛ ə è fo kɛu sê ghənə za, ə ghe pə̀yn ə è zɨ nə ghənə te zɨse nə̀yn pə̂ʼlè, pòlofis e nyi ghè ə.

¹⁶Və shi ə pə̀ ə piə nə, ‘Pɛ̂, kam zɛ̂ zɛ èmɔ̀ʼ ə tə pə̀ è pòlofis, ə nyi sèkam èghɨm.’

¹⁷È və piə sê wufɨ̀aʼa ətəyn nə, ‹Ò nə̀yn kè nâʼà àchûŋ! Ò nyi ke nâʼà wufɨ̀aʼa ə èchùŋ! Ò tə nə̂ ə ò saʼa sètə̀ʼ seghɨm zôyn kûmə̀ nə mə fe nə ò nə̂ ke se tɔ̀ʼnə̀ è fɨ̂atə̀ mə ètətə̂m.›

¹⁸Kùmtè ə wùə fɨaʼake ə pə̀ ə piə nə, ‘Pɛ̂, kam zɛ zɛ èmɔ̀ʼ ə tə pə̀yn è pòlofis, ə nyi sèkam sè tâyn.’

¹⁹È və piə sê vəyn nə, ‘Ò nə saʼa sètə̀ʼ se tâyn.’

²⁰Vəmɔ̀ʼɔ ə pə̀ ə piə nə, ‘Pɛ̂, ə̀ nyiə nyi kam zɛ zɛ m tè koyte ndəm ke apàs afɨa,

²¹kûmə̀ nə m tè nyîə fànə̀ ghò. Ò nyi za kwə̂mə̀, ke se nji afɨa ndɔ̀ʼɔ ò ndəm, ke se kwiə mə ò tè pâʼà zho.’

²²Va tɔʼ vɛ ə piə sê vəyn nə, ‹M saʼa ghò ke e ndom vɛ ə ò wàmnè ətəyn. Ò nyi ke nâʼà wufɨ̀aʼa ə pi! Ò za tè se ke ke nâʼà nə m kwə̂mə̀ ndò, njiə ndɔ̀ʼɔ m ndəm, kwiə ndɔ̀ʼɔ m zho,

²³ə̀ za tè nə̀yn ghè nə kə ò ndə̀m kɛ vɨmve ə ndɛ ekɛ, m nə piə m pə̂ se nji, m nji paʼsê è pòlofis ə?›

²⁴È və se pi sê ghɨ ghɛ ə ghe tè tyəm paʼsê fu nə, ‘Ghàyn fi kam ətəyn sê vəyn ə fo kwəynsê sê wùə vɛ ə è kyi kam seghɨm zâ.’

²⁵Ghənə pfɨfə sê vəyn nə, ‹Kepî sê vəyn ə pɛ̂, mə è se kyi sekam eghɨm ə?›

²⁶‹M piə sê ghàyn nə, ə̂ kyi pi ndè, ə fo kwəynsê sê vəyn, ə lâʼà pî ndè, ə fi naʼapi ketətə̂ kɛ ə è kyi.

²⁷Sê pàyn sɨmse sɛ ə se kyîə tə nə kə ə fo tyaʼa nə mə saʼa ghənə zâ, ghàyn nji pə̀yn è ghənə, ə zhwite ke ə mìə shi fayn.›”

²⁸Njisə̀s ə wàmnə̀ nyi ə tsɛ̀ ghɨghe əshi sè kɔʼɔ ndùə ə Njèlusalɛ̀m,

²⁹ə nə̀ ndùə paʼsə̂ ə sètə̀ʼ sɛ ə tè tɔŋtə nə Petfàs è Petanì, ə pfɨ̀ynə̀ sè Olìfs ə tomə chùmtè epàm sə vəynse, se pɛ̀,

³⁰ə piə nə, “Ghàyn nji ndù əfètə̂ tə̀ʼ fayn ə ghàyn əshi. Ghàyn nə piə njiə ndùə ndò, ə ghàyn fe va njàkâs kə ə faŋa, mə wùə pâʼà tyəm kɔʼ etu ətəyn. Ghàyn fe, ə ghàyn zhə̀yn pə̀yn è zə̂yn fayn.

³¹Ə ghàyn piə zhə̂nə̀ ndò, ə pfɨfə pîndè nə ghàyn zhə̀nə̀ se ghaghe è zə̂ynzè ə, ghàyn ə pìə nə, ‹Pɛ̂pɛ kyi eghɛ se nə̀yn è zə̂yn.›”

³²Ghɨ nə ghɛ ə è tom zâ ə ndo ndùə, naʼapi ghè ə kyanə̂ kə za kə è fè pì.

³³Ghənə ə ndùə ə piə zhə̀nə̀ ndò, ghɨ ghɛ ə ghe tè kyi nyàm ətəyn ə pfɨfə sê ghənə nə, “Kûmə̀ ghè ə ghàyn zhə̀nə̀ njàkâs ətəyn ə?”

³⁴Ghənə piə nə, “Pɛ̂pɛ kyi eghɛ se nə̀yn è zəyn.”

³⁵Kə ghənə pi zâ ə njìə pə̀ è zə̂yn sê Njisə̀s ə se lafsê ə zə̂ynzè è laf ə ghənə̂vè, ə kɔʼsə̂ Njisə̀s etu ətəyn.

³⁶Njisə̀s e sè ndùə etûə nyàm nə zɛ, ghɨghe chɔʼtə̂ àlaf ə ghənə̂kè maʼà ndùə endom, è və tyàŋà ətu.

³⁷È və paʼsə̂ ndùə ə Njèlusalɛ̀m sè tso ndùə ə pfɨ̀ynə̀ sè Olìfs, nâʼà anɔ̂yn ə chùmtè epàm ə vəynke àkɨ̂m e sè saŋnə̂ kə ndo, tsìtə̀ Fèzhə̀ nâʼà è kyə̀ se tɛse kûmə̀ əghɛ e kanə ghɛ ə ghənə tè se nyi mə ə fe.

³⁸Ghənə tè piə nə, “Pɔsê e nyi sê fɔ̀yn vɛ ə è pə̀yn sə ezə ə Pɛ̂pɛze. Pɔ̂ynè e nyi ekwùtwəyn. Zhə̀fè kyi epomsê elùʼ vɛ ə ve ngaŋte kwəyn!”

³⁹Ghɨ Falàsî əmɔ̀ʼɔ̂ kə ghe tè kwiə kəpi anɔ̀yn nə kɛ ə piə sê Njisə̀s nə, “Kɨmse chùmtè epàm sɛ sɨ̂nə̀ ə Tyə̀ynsè.”

⁴⁰È və piə sê ghənə nə, “Ə ghənə kɨme pi ndò, ə nâʼà əchi ə kɔʼsə̂ kə Fèzhə̀ nyi.”

⁴¹È və nə̀ ndùə sè paʼsə̂ mɨ̂sə̀ ndùə ə tə̀ʼ ə̀ Njèlusalɛ̀m ə naynə̂ ndùə tə̀ʼ ətəyn, səynze ə ko vəyn, è və chîə pə̀ kə ndò,

⁴²ə piə nə, “Ə fo ndè ghàyn, ghɨə Njèlusalɛ̀mə̀ ə ke eghɛ zɛ ə ze pə̀ è pɔ̂ynè ndàyn ə, zôyn nyi mə ghàyn vâyn kàʼa ə ghàyn fe!

⁴³Tuʼ mê pîəm paʼsə̂ pə̀ ndò sê ghàyn. Pàyn saynse nə̀ tɨmə mbàyn, ə è kyɨ̀ŋ ngɨa ghàyn ə fɨyn ghàyn kə epɨ̀as èkɨ̂m, kɨyte ke ndo ghàyn.

⁴⁴Ghənə tə kəʼsə̂ ghàyn kè əkɨ̂m paʼsə̂ kəpî è ghɔyn ghɛ ə ghe nyi ə ghàyn ə sendɛ. Chie tə faŋa va etuə zhize fâyn kûmə̀ nə ghàyn pâʼà fe ke shîŋə̀ kɛ ə Zhə̀fè nə̂ pə̀ se pɔsê ə ghàyn ətəyn.”

⁴⁵È və nə̀ ə ndùə njiə apɨəyn ə Ndɛ Ètsə̀məke sè chûmə̀ fɨsə əghɨ ghɛ ə ghe tè pəʼlə fɨau əfètə̂ ətəyn,

⁴⁶piə sê ghənə nə, “Ə nyaʼ ə Ŋwàʼlè ə̀ Fèzhə̀ nə, ‘Ndɛ zɨmè tə nə̂ ə nyi Ndɛ̂ Ètsə̀mə’; pîza ghàyn ghe ə kɛse zôyn sə elùʼ ə ghɨ chɔŋɔghe.”

⁴⁷Njisə̀s ə zhə̀tə̀ sè zɨsə̂ zaʼlə̂ ə Ndɛ Ètsə̀mə kè tuʼmè m̀kɨ̂m. Ngàŋ sə ndɛ Fèzhə̀ seghaʼâsè yî tyə̀ynsè sə esaʼse è chəʼ sə endaʼse e sè kyiŋə endom se zhwiə vəyn,

⁴⁸pîza ə tàʼa fe eghɛ zɛ ə kə ghənə tsɛ̀ epam ətəyn se ko vəyn kûmə̀ nə ghɨ tè zɨə kə eghɛ zɛ ə è pi.