Read Mmen Lûk 20 Bible Online

Lûk 20 - Mmen bible

Lûk 20

¹Tuʼ fîfe, Njisə̀s e sè zaʼlə̂ əghɨ ə Ndɛ Ètsə̀mə, ndàʼà tom èchùŋ sê ghənə. Ghɨə kɔʼsə nə eshyə̀ engaŋtəghe yî tyə̀ynsè sə alàŋsè, paʼsə̂ è chəʼse ə fɨə pə̂

²ə ke pfɨf sê vəyn nə, “Tsàyn sê ghàs nə ò nə̀ əghɛ ghɨ̀yn è tyaʼa mə ke ndò ghayn zə? Ə̀ fo nde tyaʼa nə kɨ̂yn sê ghò ə?”

³Njisə̀s ə piə sê ghənə nə, “M pɔŋə pfɨfə eghɛ sê ghàyn. Ghàyn tsàyn sê mi nə̂,

⁴ə tè fo Fezhə̀ è tyaʼa sê Njɔyn nə è və fo m̀mo sê ghɨ mə, mə ə̀ fo əghɨ ə?”

⁵Ghənə kayntə̂ eghɛ ətəyn ə ghənə əfètəyn ə piə nə, “Ə ghâsènì pi nə, ‘Ə̀ fo Fezhə̀ è tyaʼa sê vəyn,’ ə è pfɨf nə, ‘Ghàyn tè se tə̂ se pomə eghɛ zɛ ə è tè piə kûmə̀ ghè?’

⁶Pîza ə ghâsènì pi nə, ‘Ə̀ fo əghɨ è tyaʼa sê vəyn,’ ə ghɨghe əkɨ̂m tɨmne zhwi ghâsènì è chîə kûmə̀ nə ghənə ke nə Njɔyn tè nyi fɨ̀aʼtè.”

⁷Kə ghənə kwàʼtə̀ zâ, ə piə kə nə ghənə ke va luʼ vɛ ə tyaʼa ə vəynke tè ndò ətəyn.

⁸Njisə̀s ə se pì sê ghənə nə, “M nə̀ pɔŋə tsâ va luʼ vɛ ə m nji tyaʼke sə̂ nə̂ əghɛ nə ghɨ̂yn ətəyn.”

⁹Kə è wàmnè za ə ke mɛ̀ ngàyn sê ghənə nə, “Wùə è viu tè chwiə àfùʼ ə se lamas ə vəynke ə fo nə ghɨ nə fɨ̂aʼà, chyâtə̀ fo vəyn è fɨa vɛ ə ve fɨə ətəyn. È və fo za ə ndùə ekwî endaʼ zhize se ndam sə aghaf.

¹⁰Shɨ̂ŋə̀ e kɔyntə ke ə kwəyn, è və tomə wufɨ̀aʼa ə̀ vəyn viu nə è ndù pi sê ghɨ ghɛ ə è tè fo fûʼ nə kɛ sê ghənə nə ghe fo twɔm viu sê vəyn. Ghɨ e fɨaʼa nə ghɨyn ə ndùə kyiə vɛ ə è tom za ə pusə vəyn ə chûmə̀, è və kɛse kwɨlə̂ kə è gho e zomə.

¹¹È və fɨnə tomə kwəynsə̂ wufɨ̀aʼa ə̀mɔ̀ʼɔ̂, ghənə fɨnə pusə kə ndo vəyn ə fɨnə nyâplə̀ è vəyn endom e ghoməve ə fɨnə chûmə̀ vəyn, è və ndò kə è gho e zomə.

¹²È və fɨnə tomə vîvè nə ə̀ se nyi əghɨ ə̀ ta, ghənə pusə ndəmsə̂ vəyn ə chiynə fɨsə̂ vəyn afùʼ nə kɛ.

¹³Pɛ̀ àfùʼ ə kwàʼtə̀ nâʼà eghɛ zɛ ə è kàʼa ə è nə̀yn ə piə kə sə və ə ngɨŋ nə, ‘M nə̀ tomə nâʼà vayn èkɔ̀ŋ vɨ̂mè, zho fife ə ghənə ndù fayn vəyn.’

¹⁴Va vəyn nə vɛ ə ndùə, ghənə ə fe vəyn ə pìə nə, ‘Ə̀ vɨ̀nə nyi ke nâʼà zhîndɛ̂ ə̀ pɛ̀ àfùʼ nə vɨ̂yn nyi. Ə ghâsènì kyi zhwi vəyn kə ə kyi fɨa vɛ ə è tè nyi se nə kyî.’

¹⁵Ghənə piə za ə kyiə fɨə è vəyn ə afûʼ fu ə ndùə zhwiə.” Njisə̀s ə ke pfɨf sê ghənə nə, “E za kyàyn nyi, pɛ̀ àfùʼ nə vɨ̂yn kàʼa è nə̀yn nâʼà ghè sê ghɨ nə ghɨyn ə?

¹⁶E nyi za, ə è pə̀yn zhwite əghɨ efɨaʼa nə ghɨyn ə è kɛse nji afûʼ ətəynke ə fo sê ghɨə ndô ghè.” Njisə̀s ə mɨ̀sè ngàyn nə zɨ̀yn, ghɨ ghɛ ə zɨtə̂ nyi ə piə nə kə Zhə̀fè tə pomə nə wùə mɔm kyi eghɛ zɛ ə ghɨə efɨaʼa nə ghɛ tè mɔ̀mə̀.

¹⁷Njisə̀s ə naynə̂ kə ghənə nyi ə pfɨfə nə, “Luʼ ə Ŋwàʼlè ə̀ Fèzhə̀ vɨnə tyə̀nə̀ nə ghe, ə ke pi nə:

¹⁸Ə za tyamte pi ndè ə echi epòlə̀ ə ndɛ nə zɨ̂yn, ə è pfɨ kəmtê ke ə mtimə̀ mtimə̀, mə ə ze pfɨ naʼapi ə ndè ətu, ə ze nyayle ke ndò vəyn.”

¹⁹Njisə̀s ə mɛ̀ mɨ̀sə̀ ngàyn nə̂ zɨ̂yn, tyə̀ynsè sə esaʼse yî ghə̀ ghɨ ekɔʼsə nə eshyə̀ ə ngaŋtəghe ə ke kyiə kə ndò nə è fè mɛ̂ zâ kûmə̀ kə ghənə tè se mɔ̂msə̀ se kyiə vəyn kè ashìŋə̀ nə kɛ ə fɨnə fânə̀ kə əshi ə ghɨ̀ə.

²⁰Ghənə ndə̀mə̀ eshi ə vəyn ewiyn ə fɨnə ndâʼà əghɨ ə tomə ə vəyn epàm nə ghe ə kaŋa kyaʼà kə ghe nyi əghɨ echûŋə̀, sè zɨtə̂ kə è pi ghɛe kə ə ko vəyn ə fo sê wùə endaʼ ə Lûm vɛ ə è tè saʼa pâs endaʼ nə kɛ.

²¹Ghənə ə piə sê vəyn nə, “Tyə̀ynsè, ghàs nə̂ ke nə ò wàmnə̀ kə səmɔʼ, zaʼlə̂ kə əghɛ ghɛ ə ghe nyi səmɔʼ, tyə̂nə̀ va nə wùə tsɛ̂ ndò vîvè, lotə̂ sô zaʼlə̂ kə tèsaʼ tə Fezhə̀tè kə te nyi.

²²Saʼa e nə̂ pomə̂ nə ghâsènì ə mâʼà tâks sê fɔ̀yn è ghaʼa ə endaʼ ə Lûm mə mə ze pomə̂ va ə?”

²³Kè sə ashìŋə̀, Njisə̀s ə ko etɔf ə ghənəè ə se pi nə,

²⁴“Ghàyn tyəyn pə̀yn èkɛ akasve sê mi nyi.” Ghənə ə tyə̂nə̀, è və pfɨfə nə, “Ə nyi anyɨ̂ŋsè ekyàʼ ə ndeke ətəyn nyi è zəze ə?” Ghənə piə nə, “Ə nyi ekyâʼ ə fɔ̀yn e ghaʼa ə endaʼ ə Lûm è zə ə vəynze.”

²⁵Njisə̀s ə se pi nə, “E za nyi nə, ghàyn nə fo kə efɨa ə fɔ̀yn sê fɔ̀yn, fo kə efɨa ə Fezhə̀e sê Zhə̀fè.”

²⁶Ze ə ghaʼa ghənə, ghənə tàʼa fe eghɛ se kyiə vəyn əfetə̂ynè ə̀ ghɨ kûmə̀ zəynze. Choze ə zomə ghənə, ghənə kɨmə̂ kə mɔŋ.

²⁷Ghɨə Sandùsîə ə pə̀ sê Njisə̀s, ə nyi ə̀ghɨ ghɛ ə ghe pomə va nə wùə tə zômə̀, ə pfɨfə sê vəyn nə,

²⁸“Tyə̀ynsè, piə Mosîs tè nyàʼ sê ghâsènì nə, ‘Ə va wùə kwu, kyi zhwi, pîza kyi va ghɔnə, ə ànyìə wùə è kwuə nji zhwìə kwu ətəyn, ə yî vəyn piə ghɔnə sê ànyìə vəyn ve kwuə nə vɛ’ ə?

²⁹Ghɔ nyi əmɔ̀ʼɔ̂ tè nyi, əsɛ̀mbɛ̂, və shi ə njiə zhwi ə kwuə, kyi va ghɔynghe.

³⁰Tsɨ̀m ə̀ vəyn ə njiə wùzhɔyn ətəyn ə fɨnə kwuə kəpi zâ.

³¹Kùmteke ə fɨnə njîə wùzhɔyn ətəyn ə fɨnə pɔŋɔ kwuə kəpi za, kyi va ghɔynghe. Ghənə əkɨ̂m ə tə njiə wùzhɔyn nə vɛ ə kwutə̂ kə nyi ə mɨ̀sə̀ kyi va ghɔynghe,

³²tsɔ̀fə kə nâʼà wùzhɔyn ətəyn pɔŋ kwu.

³³Ə tə nə̂ ə nyi etuʼ nə vɛ ə zômə̀, ə wùzhɔyn ətəyn ə nyi zhwiə ndè, kûmə̀ nə ghɔ nyi nə ghɨ̂yn tè kyi kè vəyn sə zhwìə ghɨ̀ əkɨ̂m ə?”

³⁴Njisə̀s ə piə sê ghənə nə, “Ghɨ mbiə zôyn nə̂ njiə ə̀zəyn, pomə̂ ə̀ndômnè,

³⁵pîza ghɛ ghe kwəynə se nə nə̀yn se ə̀ nyi etuʼ nə vɛ, ezhoghɛ ghɨ zômə̀ va sə nji ezəyn pi se pomə̂ ə̀ndômnè.

³⁶E tə nə̂ ə ze ə nyi nyî kûmə̀ nə ghənə tə nə̂ ə fɨnə kwuə va. Ghənə tə nə̂ ə nyi kepî eghɨ kə setsì, fɨyn nyi ə̀ghɔ Fezhə̀ kûmə̀ nə ghənə ə zòmə̀.

³⁷Naʼapi Mosîs ə tə tyəyn ghɛe nə zɨ̂nə̀ nə ə ndwisə̀ ndò ghɨə ekwu elùʼ ə Ŋwàʼlè ə̀ Fèzhə̀ vɛ ə ve wâmnə̀ kûmə̀ fèkâʼ fɛ ə wuse tè pɛ ətəyn zâ. Ə nyi elùʼ ə ŋwàʼlè nə vɨ̂yn mə è və tɔŋtê Pɛ̂ Zhə̀fè nə Zhə̀ fə ə Aplàghâm è Azɨ̀k è Njàkɔ̂p tè kɔʼsə.

³⁸Zhə̀fè va chi Fèzhə̀ fə ghɨə ekwutəghe, fe nyi Fezhə̀ fə ghɨ̀ ghɛ ə ghe ndamə kûmə̀ nə fe tè nyi Fezhə̀ naʼapi sê ndè, ə wùə nə vɛ nyi mə è və ndam faŋ.”

³⁹Njisə̀s ə wàmnə̀ mɨ̂sè, tyə̀ynsè sə esaʼ shise ə piə sê vəyn nə, “O wàmnè kè nâʼà achûŋ ə tyə̀ynsè.”

⁴⁰Ghənə ə piə za, nâʼà wùə èmɔ̀ʼ ə tàʼa fɨnə mɔ̀msè se pfɨf eghɛ sê vəyn. (Matyò 22.41-46; Mâk 12.35-37.)

⁴¹È və se pfɨf sê ghənə nə, “Wùə za kàʼa ə è fɨyn pi nə wùə vɛ ə nyi mə chɔʼ ndəm tè nyi va Ndàfît ə?

⁴²Piə nâʼà Ndàfît piə ə ŋwàʼlè ə sè Njàŋ nə:

⁴³se zaʼâ ashîŋə̀ kɛ M tə nə̂ ə o tsəle pàyn sɛse è ghol ghɛghe.’

⁴⁴Ə za tè se nyi mə Ndàfît nə̂ tɔŋtə̂ vəyn nə Pɛ̂pɛ, è və fɨyn nyi zàyn vayn sê Ndàfît ə?” (Matyò 23. 1-36; Mâk 12.38-40.)

⁴⁵È və tè piə è wàmnə̀ sê chùmtè epàm sə vəynse ə wàmnə̀ endom kə naʼapi ndè zɨ, ə piə sê ghənə nə,

⁴⁶“Ghàyn e tɔ̂ʼnə̀ ghâynghə̀ tyə̀ynsè sə alàŋ sɨ̂nə̀. Ghənə nə̂ kɔ̂ŋɔ̀ sə̂ kwîə tsɛ̂ è tàlase, se ghaʼlə̂ kə nyi, ə̂ fɨ ndùə afàf ghɨghe nyɨŋə pə̀ tɔŋtə̂ ghənə, ə̂ ndùə ə sendɛ sə atsɨ̀yntese, ghə kɔʼɔ tsɨsə̂ kə əshi, ə̂ ndùə elùʼ azhi, ghə tè kɔ̂ŋɔ̀ kə se kɔʼɔ tsɨsə̂ elùʼ ə engaŋtəu.

⁴⁷Ghənə e kyiə fiə èfɨa ə zhwiə kwuve, kaŋa tsə̂mə̀ tètsə̂m te tyâtè se tyə̀yn ewiyn. Zhə̀fè tə tsə̀fsə̀ ghənə nâʼà sə ŋaŋ.”