Read Mmen Lûk 6 Bible Online

Lûk 6 - Mmen bible

Lûk 6

¹Tuʼve ə zo pə̀ etuʼ endaʼ vîve, Njisə̀s yî chùmtè èpàm sə vəynse e tɔynə̂ tsɛ̂ epa ə saŋ əpɔ̂ zhie, se sè lɔytə̂ etu viu, fəʼsə̂ kwɨlə̂.

²Ghɨ Falàsî yîghe ə pfɨfə sê ghənə nə, “Kûmə̀ ghè ə ghàyn nə̀ ghɛze etuʼ endaʼ, Saʼze e pomə̂ va ə?”

³Njisə̀s ə pfɨfə sê ghənə nə, “Ghàyn pâʼà tɔŋɔ zɨ ghɛ zɛ ə Ndàfît tè nə̀yn kə chɨ̀ŋ tè zafə vəyn yî ghɨ vəyn ghə̂?

⁴È və tə nji ə ndɛ̂ Fèzhə̀, ə njiə zhiə àpayn ə kwaŋ ə Fezhə̀kè yî ghɨ vəyn nə ghɛ, Saʼze e tyə̂nə̀ nə ə̀ zhiə kə əghɨ kɔʼsə nə eshyə̀.”

⁵È və wàmnə̀ nyi ə ke pi sê ghənə nə, “Va Wùə kyi atyaʼ se nə̀ naʼapi ghè etuʼ endaʼ.”

⁶Ə tè fɨyn nyi kepî etuʼ endaʼ viu, Njisə̀s ə ndùə njiə ə ndɛ̂ atsɨ̀ynte sè zaʼlə, wùə vîvè e nyi fu mə gho ekɔyn etwɔ ə vəynke ə kwu.

⁷Tyə̀ynsè sə alàŋsè è ghɨə Falàsîə ə ndə̀mə̀ eshi ə vəyn ewiyn se fe nə, è nyiə nə̀ tsuʼə ndò wùə etuʼ endaʼ kə ghənə kyi ghɛe se ghàm ə vəyn.

⁸Pîza è və kê èkwâʼtè ə ghənəè ə piə sê kwu akɔyn nə vɛ nə, “Ndwi tsɛ pə̀ tyəm ə ghɨghe əshi.” È və ndwìə ndùə tyəmə.

⁹Njisə̀s ə pfɨfə sê ghənə nə, “Saʼe pomə̂ ndò nə ə nə̀yn chùŋ etuʼ endaʼ mə pi ə, nə ze pomə nə ə sɔza ndò wùə mə mə zhwi ndo o?”

¹⁰È və wàmnə̀ za ə kɛsə̂ naynə ka ghənə nâʼà ə̀kɨ̂m ə ke pi sê wùə nə vɛ nə, “Nɛ̀se kɔyn vɛu.” È və nɛ̀sə̀, kè sə ashìŋə̀, gho təynke ə tɛ kə ndò.

¹¹Pîza ghɛ ətəynze ə zafə əghɨ nə ghɛ nâʼà sə ŋaŋ, ghənə e sè saynə̂ eghɛ zɛ ghənə kàʼa ə nə̀yn è Njisə̀s.

¹²Njisə̀s ə kwɨlə̂ ə kɔʼɔ ə pfɨ̀yn tuʼfîfe ə pɨənə tsə̂mə̀ kə sê Zhə̀fè nyiə, tuʼve ə zo.

¹³Tuʼve ə kwənə, è və tɔŋɔ sechùmtè èpàm sə vəynse ə chɔʼtə̂ ghɨ njò sepɛ̀ ə ndə̀mə̀ kəpi ghənə sə ghɨətom ə vəynghe.

¹⁴Ə̀ tè nyi Shimùyn vɛ è tè fo kwəynsê ezə sè vəyn nə Pità, ə nyi ànyìə Pità vɛ ə tè tɔŋtə nə Andɨ̀lò, è Njə̂m è Njɔyn è Filìp è Pàtòlòmiyà

¹⁵è Matyò è Tɔ̀mɔ̂s è Njə̂m ə va Àfeyùs è Shimùyn ə wùə àlwù è ghɨə Njûsə̀

¹⁶è Njondàs ə vâ Njə̂m yî Njondàs Èskalɔ̀t vɛ è tè kɛse pəʼle Njisə̀s.

¹⁷Njisə̀s ə kɛsə̂ tso ə pfɨ̀yn nə zɛ yî ghənə ə tyəmə elùʼ epa paʼsə̂ è nɔ̂yn ə sechùmtè epàm sə vəyn shise, se tsɨə kə nyi. Nɔ̂yn ə ghɨ̀kè e nyi kepî fu ghaʼa kə nyi mə ghe fɨ pə̀yn ke tâŋ tekɨ̂m ə Njòndyâ, è Njèlusalɛ̀m, ghɨə mɔ̀ʼɔ̂ ghe e nyi kepî fu mə ghe fɨ pə̀yn ə Tayà è Sindɔ̀n ətelùʼ mə te nyi paʼse ə etipì ə tso èghaʼâ.

¹⁸Ghɨ ətəynghe tè nyi mə ghe fɨ pə̀yn ke ə̀kɨ̂m kè se zɨtə̂ ezaʼlê ə Njisə̀szè nə è fɨyn tsuʼ tèzaf tə ghənə̂tè. Naʼapi ghɛ ghe tè zafə kûmə̀ sèzuʼ se pise.

¹⁹Ə tè nyi za naʼapi ndè anɔ̀yn nə kɛ e nô kə se kòm əvəyn kûmə̀ nə tyaʼa tè fɨə ə vəyn ewiyn, tsuʼə kə əghɨ ə̀kɨ̂m.

²⁰È və naynə̂ ndùə sèchùmtè èpàm sə vəynse ə piə sê ghənə nə: “chùŋ nyì sê ghàyn ghɛ ə pɔylə kûmə̀ nə chùŋ ə̀ èfɔ̂yn ə Fezhə̀e kyi ghàyn.

²¹Chùŋ nyi sê ghàyn ghɛ ə chɨŋse zafə zôyn kûmə̀ nə ghàyn tə zhiə kolə kə kə ghàyn kɔ̀ŋɔ̀. Chùŋ nyi sê ghɨ ghɛ ə ghe chîə zôyn kûmə̀ nə ghàyn tə nə̂ ə ghàyn ə chaʼa.

²²Chùŋ nyi sê ghàyn ezhoghɛ ghɨ pânə̀ ghàyn, chûmə̀ ghàyn ə etsɨ̀ynte, sôylə̀ ghàyn fɨnə pofsə̂ əzə ghaynghe kè kûmə̀ kə Va Wùə.

²³Ə ghɨ piə nə̂ za sê ghàyn, ghàyn pɨlə saŋnə kə ndò kûmə̀ nə mâʼte eghaʼe lɨmtə̂ ghàyn ekwùtwəyn. E nyi kepî eghɨ kə pɨ̀aə ghənə tè nə̂ sê fɨ̀aʼtè seghaʼâsè.

²⁴Pîza ngəʼ èghaʼâ nyi sê ghàyn ghɨ èghaʼâ kûmə̀ nə chùŋ zâyn se nyi ke ə ghàyn əgho.

²⁵Ngəʼ èghaʼâ e nyì sê ghàyn ghɛ ə ghàyn zhiə kolə zôyn kûmə̀ nə chɨŋse tə fɨnə zafə ghàyn. Ngəʼ èghaʼâ e nyi sê ghàyn ghɛ ə ghàyn chaʼa zôyn kûmə̀ nə ghàyn tə nə̂ ə ghàyn ə nyi ekômə̀ èwiyn fɨnə chîə.

²⁶Ngəʼ èghaʼâ nyi sê ghàyn ezhoghɛ naʼapi ndè wàmnə̀ kə chûŋ kûmə̀ ghàyn kûmə̀ nə ə nyi kepî eghɛ zɛ pɨ̀aə ghənə tè nə̂ sê fɨ̀aʼtè sə akaŋse.

²⁷Pîza sê ghàyn ghɛ ə ghàyn zɨtə sê mi zôyn, m piə nə, ghàyn kɔ̂ŋɔ̀ sèpàyn saynse, nə̂ chùŋ sê ghɛghe panə̀ ghàyn.

²⁸Ghàyn pɔsə̂ ghɛghe sòylə̀ ghàyn, tsə̀mə̀ sê ghɛghe nyâplə̀ è ghàyn.

²⁹Ə wùə pus ghoke ə ghò apɔ̀ŋ, o pə̀ynsə̀ tyə̂nə̀ kəmɔ̀ʼɔa, ə è pus mɨ̂sè. Ə wùə fi pfɨ̂ fɛfe, kə̂ ò təse fèshɨŋngɨle.

³⁰Ə̂ ndɔyn naʼapi ndè fɨa sê ghò, o fo kə ndò sê vəyn. Ə wùə kyi fi fɨa vɛu sə atyaʼ, kə̂ ò fɨyn pfɨf.

³¹Ghàyn nə̂ kə əghɛ ghɛ sê ghɨə kè kə ghàyn kɔ̀ŋɔ̀ nə ə nə nə̂ sê ghàyn.

³²Ə ghàyn za se kɔ̂ŋɔ̀ kə ghɨ ghɛ ə ghe kɔ̂ŋɔ̀ ghàyn, nâʼà chùŋ ə̀təyn ə nyi ghè ə Zhə̀fè əshi ə? Kûmə̀ nə naʼapi ə̀ghɨ epighe kɔ̂ŋɔ̀ kə ə ghɨ ghɛ ə ghe kɔ̂ŋɔ̀ ghənə.

³³Ə ghàyn se nə̂ kə chùŋ sê ghɨ ghɛ ə ghe nə̂ achûŋ sê ghàyn, ə Zhə̀fè fe zayn chùŋ ətə ə? Kûmə̀ nə naʼapi ghɨ piə nə̂ kəpi zâ.

³⁴Ə ze se nyi nə ghàyn kàʼa ə ghàyn samse fɨa sê wùə kè kûmə̀ nə ghàyn kwàʼtə̀ nə è nə̀ kɛsə̂ fo, nâʼà chùŋ ətəyn ə nyi ghè ə Zhə̀fè əshi ə? Kûmə̀ nə naʼapi ghɨ piə nə̂ samsə̂ èfɨa sê ghɨ ghənə kè kûmə̀ nə ghənə ke nə ə tə kɛsə̂ kyîə kə àfɨa kɛ ə ghənə tè fo.

³⁵Pîza m piə sê ghàyn nə, ghàyn kɔ̂ŋɔ̀ sèpàyn saynse, nə̂ chùŋ sê ghənə, samsə̂ èfɨa sê ghənə naʼapi ezhoghɛ ə ke va nə ghənə tə kɛsə̂ fo. Ə ghàyn nə̀ zâ, ə mâʼte vaynve tə nə̂ ə və ghaʼa kə nyi, ə ze ə fɨnə tyə̂nə̀ nə ghàyn nyi ke nâʼà əghɔə Fezhə̀ fɛ fe ngaŋte kwəyn kûmə̀ nə fe tɔ̂ʼnə̀ è ghɨ piə è ghɛ ə ghe ndamə fe kê va chùŋ.

³⁶Ghàyn e kosə̂ èsəyn sê ghɨ kè kə Pɨ̀a vâynvè.

³⁷Kə ghàyn nə saʼa ghɨə, kə ə tə tàʼa saʼa ghàyn. Kə ghàyn nə pofsə̂ ghɨə, kə ə tə tàʼa pofse ə ghàyn. Ghàyn lɛ̂sə̀ fo ə̀ghɨ, kə ə tə lɛ̂sè fo ghàyn.

³⁸Ghàyn e fo ə̀ghɨ èfɨau, kə ə tə fo ghàyn, ə piə fo ndò ə tɔʼ ndəm seshəyn saynse, sə̂ʼsə̀, zəʼtə̂ fɨnə lwiynsə̂ nâʼà nyi, ə se lwiyn ə se ə pɨ̂ə fɨə. Kûmə̀ nə ə ghàyn fo fɨae sê ghɨə naʼapi əfɨ̀aʼ èkè, ə Zhə̀fè tə fo sê ghàyn kèpi əfɨ̀aʼ nə zɛ.”

³⁹Kə è wàmnè zâ ə fɨnə mɛ̂ ngàyn zhizè sê ghənə nə, “Fòfà vâyn kàʼa ke ə tyə̂nə̀ endom sê kəmɔ̀ʼɔa kûmə̀ nə ə ke mɔ̂m, ə ghənə pfɨ epə ke əkɨ̂m.”

⁴⁰È və fɨnə mɛ̂ kepî ngàyn ə̀ mɔ̀ʼɔ nə, “Vayn zaʼlə vayn kàʼa è tsɛ tyə̀ynsè ə vəyn pîza mə ə fɛte zaʼle naʼapi ndè, ə è və se nyi kepî kə tyə̀ynsè ə vəyn.”

⁴¹È və ke fɨnə pfɨf nə, “Kûmə̀ ghè ə ò naynə kə fɨ̂atə̀ fɛ ə fe nyi ə ànɛ̂ eshi, pîza fe va fûŋə ə fekàʼ kɛ ə ke nyi ə gho eshi ə?

⁴²Ò kàʼa ò pi zayn sê ànɛ̂ nə, ‘tyəʼ m fɨse saʼlə̀ fə fe kâʼfè ə ghò eshi,’ mə ò kyi akûm ə gho e shi ə? Ghɨ ekaŋkaŋə nə ghɨ̂yn! Fɨse chì kôm ə fekàʼ kɛ ə ghò eshi, ə o nyi kàʼa ò fɛte fe se njiə fɨsê esaʼ ə fe kàʼ zə ànɛ̂ eshi.”

⁴³“Ghàyn nə ke nə kâʼ fe chûŋfè pâʼà tyəmə pə̀ muə etwɔm epive, fepife muə va twɔm echûŋ.

⁴⁴Ə fe kê kə fèkâʼ kûmə̀ etwɔm vɛ ə fe muə. Ə pâʼà tyəmə pə̀ kɔ̂nə̀ sèfîk ə afûʼ ə m̀sòlèndzɔŋke kɨ̀sə ə nyi pi andàm ə setàŋ sə m̀sòlèsè.

⁴⁵Wùə èchùŋ nə̀ chùŋ, ə nyi mə è fɨ kê əfètə̂ əghɛ chûŋ ghɛ ə è pɨaʼte ndəm ə və ətəm, wùə èpi e nə̀ kə pi zɛ ə è se nyi mə è və pɨaʼte ndəm ə və ətəm. Kûmə̀ nə kyə̀ echo ə̀ wùə nyi nyî, piə kə eghɛ zɛ ə e se nyi ə və ətəm, mə ze ə lwiyn.

⁴⁶Kûmə̀ ghè ə ghàyn tɔŋtə kə mi nə ‘Pɛ̂, Pɛ̂pɛ,’ shîŋə̀ tèkɨ̂m, nə̂ va ghɛ zɛ m piə sê ghàyn ə?

⁴⁷M tyə̂nə̀ kə wùə vɛ ə è pə̀yn sê mi, zɨə kyə̀ zɨ̂m, nə̂ kə kə̂ m piə, nyi.

⁴⁸È nyi kə wùə vɛ è tè piə è pɛ ndɛ vəyn ə fɛtə̂ tɨmə àchi ətəynke nâʼà àchuŋ ə ndə̀mə̀ àchiə ndɛ təynke è chîə, kwuŋke ə tə pə̀ ə chiynə ndɛ ətəyn, e zə tàʼa nə̀ʼlè kûmə̀ nə è tè nyi mə ə fɛte pɛ.

⁴⁹Pîza wùə vɛ è zɨ kyə̀ zɨm, ə tàʼa nə̀yn kə m piə è nyi ke kə̂ wùə vɛ è tè piə è pɛ ndò ə tàʼa ndəm àchi ə ndɛa, kwuŋke ə tə tso ə pâʼà ndɛ təyn, è zə pfɨ̀ə ə pɨ̀ytə̀ nâʼà èkɨ̂m.”