Read Mmen Lûk 9 Bible Online

Lûk 9 - Mmen bible

Lûk 9

¹Ə̀ tè nyi tuʼfîfe Njisə̀s ə tɔŋɔ ə̀ghɨtom ə vəynghe njò sepɛ̀ ə zùŋtə̀ ghənə lùʼ emɔ̀ʼ ə fo atyaʼ àkɨ̂m sê ghənə kə ghənə ə chûmə̀ fɨsə tèpamə̂ tə satàyntè nâʼà tèkɨ̂m fɨnə tsuʼə tèzaf,

²ə tiynsə̂ ghənə nə ə fɨ ndù ndàʼà əghɛ kûmə̀ èfɔ̂yn ə Fezhə̀e ə fɨyn tsuʼ əghɨ ghɛ ə zafə.

³Ə kɛsə pîə sê ghənə nə, “Ə̂ ghàyn piə ndùə ndò, kə wùə nə̂ nji nâʼà afɨa kyia, kə wùə nə̂ nji mbàŋ kə ə nyi pi shəyn ə̀ àwaf, kə wùə nə nji àfɨa ezhiəke kə ə nyì pî èkɛ, kə wùə nə nji sèndzɨs sepɛ̀.

⁴Ə ghàyn ndù naʼapi ə tə̀ʼ èkè ə ndɛ, ghàyn ndamə kə ətəyn se zaʼâ kə ghàyn tə ndò fuə tɔ̂ŋ.

⁵Ə ghàyn ndù naʼapi ghayn, ghɨə ətəynghe ə tàʼa fiə ghàyn, ghà piə ndô ndò, ghà puʼə sètsɨm saynse[1] sê ghənə kə ghənə ke nə ghənə nə̀yn shwîə.”

⁶Ghɨətom ə vəynghe ə fɨə kwiə ndùə kə ə tə̀ʼ ə tə̀ʼ, ndàʼà ndùə tom èchùŋ, fɨnə tsuʼə ə̀ghɨ naʼapi ghayn ə ghənə fe.

⁷Ɛlɔ̀t Anti pàs vɛ è tè saʼa pâs ə Ngalìlî kyia tè zɨ nâʼà əghɛ ə̀kɨ̂m ghɛ ə ghe kyâyn, ghɛ ətəynze e fɨmsə̂ vəyn, kûmə̀ nə ghɨə mɔ̀ʼɔghe tè piə sê vəyn nə Njɔyn Foə M̀mò ə kɛse zômə̀,

⁸yî ghe e piə nə fɨ̀aʼtè Èlanjà ə fɨyn kɛse pə̀yn, yî ghe e piə nə ə̀ nyi fɨ̀aʼtè èghaʼâ vîvè kèpi kə shise ə se tè nyi etuʼ ə shi kə è kɛse zômə̀.

⁹Ɛlɔ̀t ə zɨtə̂ əghɛ ətəynghe sè kayntə̂ kə nâʼà sə və ə ngɨŋ piə nə, “Mə tə nə̀yn ə tənə àtuə Njɔyn Foə M̀mòke. Ə̀ nyiə se fɨyn nyi ndè nə vɨnə ə piə ghɛ ghɨyn kûmə̀ və ə?” È və se zhə̀tə̀ sə̂ ndamə kyiŋə kə se fe Njisə̀s.

¹⁰Ə tè nyi kə ghɨətom ə Njisə̀sə̀ kɛse kwɨlə pə̀yn sê vəyn ə tsà naʼapi ghè vɛ ə ghənə nə̀yn, è və njìə ghənə, yî ghə̀ ghənə ə zà əghɨ ə ndùə njiə ə tɔ̂ŋ zhîzè, e tɔŋtə̂ nə Pètsayndà.

¹¹Ghɨghe ə kê naʼapi ashìŋə̀ àkè nə ə nyi elùʼ vɛ ə è nyi ətəyn, ə chùmtə̀ ndùə vəyn fu. Njisə̀s ə fiə ghənə nâʼà àchûŋ ə wàmnə̀ sê ghənə kûmə̀ èfɔ̂yn ə Fezhə̀e ə fɨnə tsuʼə ghɛ ə ghənə tè kyi zafte.

¹²Ə nə̀ nə̂ ə̀ nyi ashìŋə̀ ezhwikwɨləke, chùmtè èpàm sə vəyn sɛ njò sepɛ̀ ə pə̀ piə sê vəyn nə, “Pi sê ghɨ ghɨyn nə ghe chyase nji ndù ə setə̀ʼ, è luʼte ə sembvɨnə̀ tɛ ə te nyi paʼse kə ghənə kyiŋ fɨake ə zhi fɨyn kyi elùʼ se pɨəyn, kûmə̀ nə luʼ vɨ̀nə nyi è pame.”

¹³Pîza Njisə̀s ə pə̀ynsə̀ sê ghənə nə, “Nâʼà ghàyn fo fɨake, ə ghənə zhi.” Ghənə piə sê vəyn nə, “Ghàs kyi ke èsene epɨaynve etwɔ̂yn è mbwɔ̀ve èpɨ̀a. Ò kyiŋə nə ghàs ndù zhɔyn èfɨazhiəu sê nɔ̂yn kɨ̂nə̀ àkɨ̂m ə?”

¹⁴Ndômnə̀ tè nyi anɔ̀yn nə kɨ̂yn, zaʼâ ndùə sèkam sètâyn. Njisə̀s ə piə sê chùmtè èpàm sə vəynse nə, “Ghàyn nəyn, ə ghənə tsɨsə ətelùʼ ətelùʼ, naʼapi anɔ̂yn àkè tè kyi əghɨ se zaʼâ m̀ghɨm m̀tâyn.”

¹⁵Ghənə ə piə, ghɨ ətəynghe ə tso tsɨsə ə chi.

¹⁶Njisə̀s ə fiə èsene epɨayn nə vɛ è mbwɔ̀ vɛ èpɨ̀a ə naynə̂ kɔʼsə̂ ekwùtwəyn ə fo àzɔ̀ŋnè sê Zhə̀fè ə pɨaʼlə̂ fo sê chùmtè èpàm sə vəynse nə se chyàtə̀ sê ghɨ nə ghɛ.

¹⁷Ghənə zhiə kolə nâʼà ə̀kɨ̂m, chùmtè èpàm sə vəynse ə komtə̂ èpɨaʼlê vɛ ə ve faŋ, ve ə lwinə ə ekwà njò sepɛ̀.

¹⁸Ə̀ tè nyi tuʼfîfe, Njisə̀s e tsə̂mə̀ elùʼ kè yî chùmtè èpàm sə vəynse ə ke pfɨf sê ghənə nə, “Ghɨ piə nə m nyi ndè?”

¹⁹Ghənə ə piə nə, “Yî ghe piə nə ò nyi Njɔyn Foə M̀mò, yî ghe piə nə ò nyi fɨ̀aʼtè Èlanjà, yî ghe e piə nə ò nyi fɨ̀aʼtè èghaʼâ vîvè kə è kɛse zômə̀.”

²⁰Njisə̀s ə pfɨfə se ghənə nə, “Nâʼà ghàyn piə nə m nyi ndè?” Pità ə piə nə, “Ə̀ nyi gho Klâys, ə vɛ ə Zhə̀fè tom.”

²¹Njisə̀s ə ke kàyn nə kə ghənə nə̂ tsàyn ghɛ nə zɨnə sê wùə,

²²ə fɨnə piə nə, “Va Wùə kyi ke nâʼà se fe ngəʼ èghaʼâ, nə chəʼse yî ghɨkɔʼsə nə eshyə̀ engaŋtəghe è tyə̀ynsè sə alàŋsè tə vəyn, ə zhwi vəyn, ə sè nyi sə mtuʼ mta, ə è kɛse zômə̀.”

²³Njisə̀s ə wàmnə̀ za ə se pi sê nɔ̂yn ə ghɨ kɛ ə ke pə̀yn nə, “Ə̂ kɔ̀ŋɔ̀ pìə ndè se chùmtè ə mi, è və màʼà ngɨŋ ə vəyn, ə è pɨ̀aʼà awâmnè ə vəynke kè tuʼ mè m̀kɨ̂m chûmtə̀ mi.

²⁴Ə̂ mɔ̀msə̀ piə ndè se sɔ̀ ngɨŋ ə vəyn ə è kwu, mə ə̂ kwu pi ndè kûmə̀ mi, ə è ndam faŋ.

²⁵Wùə nyi kàʼa ə è zhi nâʼà ghè ezhoghɛ è kyi ke mbi èkɨ̂m pîza ə njisə̀ ngɨŋ ə və ə?

²⁶Naʼapi ndè vɛ ə è ghomə kûmə̀ mi è zaʼlê zɨme, ə è və ke nə Vâ wùə tə pɔŋɔ ghomə kûmə̀ vəyn ezhoghɛ ə è kɛse pə̀yn əfètə̂ èpomsê zɛ ə è kyi, ə̀ nyi èpomsê ə Pɨ̀aze è tsi sə vəyn sə eŋwaʼase.

²⁷M tsâ sê ghàyn səmɔʼ nə, ghɨə mɔʼɔ tyəm ke nâʼà fayn zôyn, va se tə kwu nâʼà səkɔs se zaʼâ kə ghənə fe fɔ̂yn ə Fezhə̀e.”

²⁸Ə̀ tè se kɔʼɔ ndùə m̀tuʼ mfamə kə Njisə̀s wàmnè ghɛ nə ghɨ̂nə̀, è və njiə Pità, è Njɔyn, è Njə̂m, yî ghə̀ ghənə ə kɔʼɔ ə pfɨ̀yn se tsə̀m.

²⁹Kə Njisə̀s tè tsə̂mə̀, kyâʼ ə vəynze ə pfɨ̀ŋə̀ kwiynə̂, ndzɨs sə vəynse e sè fɨfə kə nyi, ŋwâŋtə̀.

³⁰Kè nyi, ghɨghe ə pɛ̀ ə tyəmə sè kâtə̀ əghɛ è vəyn. Ə̀ tè nyi Mosîs yî Èlanjà.

³¹Ghənə tè nyi nâʼà əfètə̂ epomsê eghaʼazè, wàmnə̀ kûmə̀ èkwu zɛ Njisə̀s tè nyi se kwu ə Njèlusalɛ̀m se lwiynse eghɛ zɛ ə Zhə̀fè tè ndəm.

³²Ə tè nyi za, Pità yî ghɨə mɔʼɔ ghɛ̂ e pɨənə nâʼà sə ŋaŋ. Ghənə ə zə̀mə̀ ə fe èpomsê ə Njisə̀szè è ndômnèghè əpɛ̀ ghɛ ə tè tyəm yîghə̀ Njisə̀s.

³³Ghɨ ətəynghe ə pə̀ kə ndô, Pità ə se pi sê Njisə̀s nə, “Ze ə tsɔ̀f ə Pɛ̀ apɨəyn kə ghàs nyi fâyn. Ghàs nə̀ pɛ m̀pfɨ̀ə m̀ta, ə ò kyi fèmɔ̀ʼ, Mosîs e kyi fèmɔ̀ʼ, Èlanjà e kyi fə mɔ̀ʼɔfe.” È tè wàmnə̀ za, ke pi va ghɛ zɛ ə è piə.

³⁴Kə Pità pa wâmnə̀, mbàʼsè ə tso kɨlə ghənə, fâynzè ə ko ghənə fuə fètə̂ sèmbàʼ.

³⁵Kyə̀ ə fɨə fu əfètə̂ sèmbàʼ ə piə nə, “Ə̀ vɨ̀nə nyi Vayn vɨm vɛ ə m chɔʼ. Ghàyn zɨ sê vəyn!”

³⁶Kə kyə̀ nə zɛ wàmnè mɨ̂sè, ghənə ə fe mə Njisə̀s se nyi ke fu vəyn ènɨŋ. Ghənə kɨmə̂ kə mɔŋ ə tàʼa tsàyn eghɛ zɛ ə ghənə fe nâʼà sê wùə èmɔ̀ʼ ə mtuʼ nə mɛ.

³⁷Tuve ə zo, Njisə̀s yî chùmtè èpàm sə vəyn shise se ta ə kɛse tso ə pfɨ̀yn, nɔ̂yn ə ghɨ̀kè ə pə̀, tsɨ̀ə kə nyi se fè vəyn.

³⁸Wùə viu əfètə̂ ànɔ̀yn nə kɛ ə pɨa nâʼà è kyə̀ etɛ ə piə sê Njisə̀s nə, “Tyə̀ynsè, mə tə chyate chùmtè epàm sɛse nə se tsamte vayn è ndômə̀ vɨ̂m vɨ̀yn kûmə̀ nə ə̀ nyi kè vəyn sê mi.

³⁹Zuʼse pise faŋa va se ko vəyn nə è shɨŋ pɨa è chie ə è pfɨə ə chi, pfɨpfɨke e fɨə ə vəyn echo. Ke nə̂ ke nə̂ za, fo ngəʼ sê vəyn, zâ kə vəyn mə è və pɔ nâʼà sə ŋaŋ.

⁴⁰Mə tə chyate chùmtè epàm sɛse nə se chùm fɨse, pîza se ə tɛ ghaʼa ghənə.”

⁴¹Njisə̀s ə pə̀ynsə̀ piə nə, “Ə̀ nyi anɔ̂yn a pi àkè kɨ̂yn ə ke ke va se pomə nyiə, m ndamə tânə̀ zàyn ghâsènì tsɔ̀fə kə ghàyn pomə ə?” È və wàmnə̀ za ə se pi sê wùə təyn nə, “Pə̀yn è vayn vɛ nə vɛ fayn.”

⁴²È və pi fɨə se ndù è vəyn, pamə̂ ə satàyn zɛ ə màʼà va ətəyn ə chi, è ve sè shiŋə. Pîza Njisə̀s ə kàyntə̀ ə̀ghɛ sê zuʼ se pi nə sɛ, se ə fɨə, va ətəyn ə tɛ. È və kɛse fo vəyn sê pɨ̀a vəyn.

⁴³Nâʼà ghɨ əkɨ̂m fu e sè nyi è kayn kûmə̀ atyaʼ ə Fezhə̀a. Ghɨə tè pa kayntə̂ kə ndò ghɛghe əkɨ̂m ghɛ ə Njisə̀s tè nə, Njisə̀s ə piə sê chùmtè èpàm sə vəynse nə,

⁴⁴“Ghàyn tɔʼ zɨ eghɛ zɛ m kyiŋə sê pi sê ghàyn. Ə nə̀ fo Va Wùə sê ghɨə.”

⁴⁵Pîza ghənə ə tàʼa zɨə kê eghɛ nə zɨ̂yn kûmə̀ nə ə tè nyi za mə ghɛze ə nə̀yn nə kə ghənə zɨ kê. Ghənə e sè fànə̀ ghaʼa se pfɨf sê vəyn nə ghɛ ətəynze tyə̂nə̀ tso nə ghe ə?

⁴⁶Saʼnêzè ə ndwìə əfètə̂ sè chùmtè èpàm nə, ə̀ nyi nde wùə vɛ ə è ngaŋtə tsɛ̂ ə ghənə fètəyn ə?

⁴⁷Njisə̀s ə kê eghɛ zɛ ə ghənə kwâʼtə̀ ə njiə vayn ə tɔmə paʼsə̂ ə və ngwùŋ

⁴⁸ə piə sê ghənə nə, “Ə̂ tɔ̀ʼnə̀ pi ndè è vayn nyiə kə vɨ̀nə kûmə̀ mi, ə nyi mə è tɔ̀ʼnə̀ è mi. Ə vɛ ə è tɔ̀ʼnè è mi ə ke nə è və tɔ̀ʼnè è vɛ ə è tom mi. Ghàyn ke nə wùə vɛ ə è tətə kwûŋsə̀ ə ghàyn əfètəyn əkɨ̂m nyi vəyn vɛ ə è ngaŋte tsɛ̂.”

⁴⁹Njɔyn ə piə zə vəynze nə, “Pɛ̀ apɨəyn, ghàs fè fe wùə, è və chûmə̀ fɨsə tèpamə̂ tə satàyntè ə ghò ezə, ghàs ghɛ ə pi nə kə è fɨyn mɔ̀m kûmə̀ nə è va chi wùə èmɔ̀ʼ ə ghàs əfètəyn.”

⁵⁰Njisə̀s ə piə sê ghənə nə, “Kə ghàyn fɨyn tam vəyn kûmə̀ nə wùə vɛ ə è nò va ghàyn nyi ə ghàyn apàs.”

⁵¹Njisə̀s ə tə ndə̀m nə è kɔʼɔ ə Njèlusalɛ̀m kûmə̀ nə shîŋə̀kè tè se paʼsə̂ pə̀ kə ə nji kɔʼ è vəyn ekwùtwəyn.

⁵²È və tomə ə̀ghɨ nə ghe ndù əshi ə tə̀ʼ ə̀ Sàmalyà zhîzè ə pɨaʼte naʼapi ghè sê vəyn fu.

⁵³Pîza ghɨə Sàmalyà nə ghɛ ə tə nə ghe fiə va Njisə̀s kûmə̀ nə e tè nyi səmɔʼ nə è tè kyàʼà ndùə kə ə Njèlusalɛ̀m.

⁵⁴Chùmtè epàm sə vəynse, mə za nyi Njə̂m yî Njɔyn ə zɨə eghɛ nə zɨ̂nə̀ ə piə nə, “Pɛ̂pɛ, ò kyiŋə nə ghàs tɔŋɔ wuse, ə ve tso ekwùtwəyn ə ve zhwite ghənə mə?”

⁵⁵Pîza Njisə̀s ə pə̀ynsə̀ ewiyn ə naynə̂ ghənə ə kànə̀ nə kə ghənə mɔm.

⁵⁶Nyi, Njisə̀s yî chùmtè èpàm sə vəynse ə ndò ə ndùə ə tə̀ʼ zhize.

⁵⁷Kə̂ Njisə̀s yî chùmtè èpàm sə vəynse tè kwìə ndùə endom, wùndômə̀ viu ə pə̀ piə sê Njisə̀s nə, “M chùmtə̀ gho m ndù naʼapi ghayn kə ò ndùə.”

⁵⁸Njisə̀s ə pə̀ynsə̀ nə, “Sɔ̀ŋɔ̀m nyîə kyi èpûʼ ə ghənə̂vè, nɨ̂ŋmè e kyi sendɛ, pîza Vâ Wùə e kyi va luʼu se nyɨ̀ŋsè atu ə vəynke ətəyn se zɨ̀tè.”

⁵⁹Njisə̀s ə nə̀ ə fɨnə piə sê wùə mɔ̀ʼɔ nə, “Chùmte mi.” Pîza wùə nə vɛ ə piə sê vəyn nə, “Pɛ̂, za m kwɨlə ndu pfɨ̂mə̀ pɨ̀a vɨ̂m tsɔ̀fə kə m pə̀yn chûmtè ghò.”

⁶⁰Njisə̀s ə piə sê vəyn nə, “Za, əghɨ ghɛ ə ghe nyi kepî kə ghɨe kwutəghe ə pfɨ̂mə̀ əghɨe kwutə ə ghənə. Pîza sê ghò, ò ndâʼà ndùə saʼghe kûmə̀ èfɔ̂yn ə Fezhə̀e.”

⁶¹Wùə mɔ̀ʼɔ ə fɨnə piə nə, “M chùmtə̀ ghò ə Pɛ̂pɛ, pîza za m ndù tɔŋtê əghɨ ghɨmə.”

⁶²Njisə̀s ə piə sê vəyn nə, “Nâʼàpî ndè vɛ ə è zhə̀tə̀ fə̂zè kɛsə̂ naynə̂ epam kwənə va ghɛe ə efɔ̀yn ə Fezhə̀e.”