Read Mmen Njɔyn 10 Bible Online

Njɔyn 10 - Mmen bible

Njɔyn 10

¹Njisə̀s ə mɛ̀ ngàyn zhîzè ə pìə nə, “M pîə sê ghàyn kè nâʼà səmɔʼ nə, ə wùə pə̀yn ə zà ècho mbàyn se nji ətəyn ə ndùə kɔʼɔ njiə ndomve elùʼ ə ndôvè, ə è və nyi ke nâʼà wùə èchɔŋɔ.

²Wùə vɛ ə è njiə ndomve echo mbàyn nyi ngyəynə̀ sèpfɨ.

³Wùə vɛ ə è tsɨ̀ŋnə̀ cho mbàyn nə zɛ ə è chwi cho əndɛve sê vəyn. È tɔŋɔ nâʼàpî ndzè èkè kə zə̂ynzè ezə, è və njìə fɨə è səynse.

⁴Shɨ̂ŋə̀ kɛ ə È njì fɨ è ndzè sə vəynse, È ve ndûə ə ghənə əshi, se chumtə̀ ndûə vəyn, kûmə̀ nə se nyîə ke kyə̀ ə̀ vəyn.

⁵Ndzè sə təynse vayn kàʼa ə se chumte wùə ə̀ mɔ̀ʼɔ; se pɨlə tə ndô ndò ə kyì ə wùə nə vɨ̂nə mə ngwùŋ kûmə̀ nə se ke va kyə̀ ə̀ vəyn.”

⁶Njisə̀s ə mɛ̀ ngàyn nə zɨ̀yn, pîza ghənə ə tàʼa zɨə kê eghɛ zɛ ə È pìə.

⁷Njisə̀s ə pìə kwəynsə̂ nə, “M piə sê ghàyn səmɔʼ nə, Ə̀ nyi Mi cho mbàyn ə se ndzè sə təynse.

⁸Nâʼà ə̀ghɨ mɔ̀ʼɔ ghəkɨ̂m ghɛ ə tè pə̀yn sə shi sê Mi nyi əghɨ chɔŋə è ghɨ ghɛ ə zhwitə ghɨ, pîza ndzèsè zɨtə̂ va sê ghənə.

⁹M nyi echo mbàyn, ghɨ ghɛ ə njiə tɔynə̂ ə Mi tə nə̂ ə nyi mə sɔ̀ fɨ, ghənə tə nə̂ ə njiə fɨnə tsɛ̂ fɨə, fɨyn kyi nâʼàpî ghè vɛ ə ghənə kyiŋə.

¹⁰Wùə chɔŋɔ pə̂ tsɛ̂ kə se chɔŋ, se zhwi è kɨsè se pofsê. M pəyn kə ghɨghe ə kyi èndam zɛ ze lwinə kwəynə.

¹¹M nyi ngyəyn èchùŋ, zɛ È nyi è pɨaʼtêzè se kwu ə ndzèsè elùʼ.

¹²Ə̀ pə̀ ezhoghɛ ə ndàʼà ndô wùə nə è və tsɨ̂ŋnə̀ sèndzè mə è va ngyəynə̀ sèndzè kɨ̀sə pɛ̀ sèndzè, è nə̂ fe kə nyàm àpɛ pə̂, ə è tə za sèndzè, ə nyàm àpɛ ətəyn pə̀yn kotê sèndzè sə təynse ə è nji emɔ̀ʼ, ə sə mɔ̀ʼɔse chyase.

¹³Wùə vɛ ə ndâʼà zâ tə ndô kûmə̀ nə è nyì ke wùə èndaʼa kɔ̂ŋə̀ va se tɔ̀ʼnè è ndzè sə təynse.

¹⁴M nyi ngyəyn èchùŋ. M nyîə ke sèndzè sɨmse, ndzè sɨmse e ke Mi

¹⁵Kèpî èghɨ kə Pɨ̀a Vɨ̂m ke Mi, M ke ndô Vəyn. M kaʼa M kwu kûmə̀ sè ndzè sɨmse.

¹⁶Ndzè sə mɔ̀ʼɔse nyi ndô mə ə̀ kyi Mi mə se va fa mbàynə̀ sèndzè. M kyi se pə kəpì è səynse. Se nə zɨtə̂ kyə̀ zɨ̂mzè, ə se pəyn sə̂ nyi ə mbàyn èmɔ̀ʼ, kyi ke ngyəyn èmɔ̀ʼ.

¹⁷Pɨ̀a Vɨ̂m nyîə kɔ̀ŋɔ̀ Mi kûmə̀ nə M nyîə nyi èpɨaʼtêzè se fo ngɨŋ Zɨ̂mè se kwue, tsɔ̀fə kə M kɛse kyî èndam Zɨmze.

¹⁸Wùə vîvè va ə è kàʼa è nji tsɨsè èndam zɨme se Mi. Ə̀ kɔ̀ŋɔ̀ kə nâʼà Mi se kwu. M nyîə kyi àtyaʼ se fo endam Zɨme, fɨyn kyi àtyaʼ se kɛsə fiə pə̀yn. Ə̀ zɨnə nyi eghɛ zɛ ə Pɨ̀a nyi mə È və fo tyaʼa nə Mə nə̂.”

¹⁹Ghɛ ghɨ̀nə̀ ə Njisə̀s tè wàmne ghə tè pə̀yn èchyasèzè ə ghɨə Njûs ghə fètəyn.

²⁰Ghɨə tsɨəghe e pîə nə, “È nyîə kyi èpamə̂ ə satàynzè, È ndɨŋə zhya kə nâʼà ndò! kûmə̀ ghè ə ghàyn zɨtə sè və?”

²¹Pîza yî ghe pîə nə, “Wùə èpamə̂ ə satàynzè vayn kàʼa è və wâmnə̀ nyi. Pamə̂ ə satàynzè kàʼa se nəyn zayn nə wùə efòfə ə fe tèluʼ ə?.”

²²Shîŋə̀ azhi ə posə nə Ndɛ Ètsə̀məke tè nyiə njîə èlùʼ ə Njèlusalɛ̀m. Ə̀ nyi zâ mə ə̀ nyi è pìŋ fofke nyi tsɛ̂sè.

²³Njisə̀s tè ghanə tsɛ̂ Etipîə Ndɛ Ètsə̀mə mə ə tè tɔŋtə nə Etipì ə Solomùynzè.

²⁴Ghɨ Njûs yîghe ə pə̀ zùŋtə̀ ə Və ə ngwùŋ ə pfɨfə sê vəyn nə, “Tsàyn sê ghàs nə Ò ndə̀mə̀ tânə̀ zàyn ghàs nə ə kwaʼtə̀ kə ndò kê va səmɔʼ ə? Lote tsàyn sè ghàs səmɔʼ nə ə̀ nyi ghô vɛ ə chɔʼ ndə̂m ə?”

²⁵Njisə̀s ə pə̀ynsə̀ nə, “M nyi mə mə kàynè tsayn sê ghàyn pîza ghàyn ghe tàʼa pomə̂. Ghɛ ə kayntə ghɛ ə M nə̂ ə Pɨ̀a Vɨm və ezə, nyi ghəynghe ə ghe tsâ kûmə̀ Mi.

²⁶Pîza ghàyn vayn pomə̂ kûmə̀ nə ghàyn va sendzè sɨmse.

²⁷Ndzè sɨmse nyîə zɨə kyə̀ zɨ̂m M ke səynse, se chumtə̀ Mi.

²⁸M fo ghənə èndam zɛ ə ze tə mîə va, mə ndzè sə təynse tə kwuə va. Mə wùə vayn kaʼa è kyi fi səynse ə Mì əgho.

²⁹Ghɨ ghɛ ə Pɨ̀a Vɨm fo sê Mi nyîə ngaŋtə̂ tsɛ nâʼàpî ghè, mə wùə vayn kyiə fiə ghənə ə Pɨ̀a Vɨ̂mvè ə gho.

³⁰Pɨ̀a è Mi nyi ke sə eghɛ èmɔ̀ʼ.”

³¹Ghɨ nə ghɛ ə se fɨnə komtə̂ əchi se tɨmnə̂ vəyn ətəyn.

³²Njisə̀s ə pìə sê ghənə nə, “Mə nə̀yn ghɛ ə chûŋə̀ setsɨ̀ ə ghanə shi kə Pɨ̀a Vɨm fo tyaʼa nə M nəyn, famə əfètə̂ ə̀ghɛ, ə̀ nyi zɨ̂yn zə ə ghàyn kyiŋə se tɨmnə̂ Mi sə tə?”

³³Ghənə ə pìə sê Vəyn nə, “Ghàs kyiŋə va se tɨmnə̂ ghò kûmə̀ ə̀ghɛ ə chûŋ ghɛ ə Ò nə̀yn. Pîza, ghàs kyiŋə se tɨmnə̂ ghò kûmə̀ nə Ò mɔ̀msə̀ se pì nə Ò nyi Fezhə̀.”

³⁴Njisə̀s ə pə̀ynsə̀ nə, “Ə paʼà nyàʼ ə ghàyn ə ŋwàʼlè àlâŋ nə, Zhə̀fè tè pi nə, ‘Ghàyn nyi mzhə̀?’

³⁵Ghàs ke ndô nə ghɛ zɛ ə ŋwàʼlè ə Fezhə̀ pìə nyì səmɔʼ, nyi se tə ndamə faŋ; ə nyì sê ghɨ̂yn kə Zhə̀fè tè tɔŋte nə mzhə̀ kə Fe tè tsɛ̀sə tom ə̀ Vəyn se ghənə.

³⁶Kè sê Mi, Pɨ̀a ə chɔʼ Mi ə tomə ndzɨsə̂ ə mbi. E se kwî zàyn nə ghàyn ə pîə nə M sôylə̀ Fezhə̀, kûmə̀ nə M pi nə M nyi Vâ ə̀ Fèzhə̀?

³⁷Ə M nə̂ va fɨ̂aʼ zɛ ə Pɨ̀a Vɨm tom nə M nəyn, kə ghàyn pomə sê Mi.

³⁸Pîza, ə M nə̂ fɨ̂aʼ ətəyn, ghàyn ə tàʼa pomə pì sê Mi, ghàyn ə pomə̂ ə̀ghɛ ghɨm ghe nəghe, endom kə ghàyn ke kwəynsê sə eshìŋə̀ ekwuŋsəze nə Pɨ̀a nyì ghasè Vəyn, M nyi ghasè Pɨ̀a kə ghè tə ghayn.”

³⁹Ghənə ə mɔ̀msə̀ kwəynsə̂ se kyîə ə Njisə̀s, pîza È və ndinə fɨə ə ghənə gho.

⁴⁰Njisə̀s ə ke kɛsə tyàŋ apàs endaʼa tsô eghaʼâ ə̀ Njondàynkè, elùʼ vɛ ə Njɔyn Fo M̀mò tè fo môm, ə ndamə fu.

⁴¹Ghɨ tsɨəghe ə pə̀ sê Vəyn ə pìə nə, “Njɔyn tè paʼà tyə̀yn nâʼà chwìə èkayntə zhîzè èmɔ̀ʼ pîza nâʼàpî èghɛ èkè zɛ ə è tè pi kûmə̀ wùə vɨnə̀ tè nyì səmɔʼ.”

⁴²Ghɨghe fumə setsɨ̀ ə pomə̂ sê Njisə̀s.