Read Mmen Njɔyn 16 Bible Online

Njɔyn 16 - Mmen bible

Njɔyn 16

¹“M tsâ ə̀ghɛ ghɨ̀nə se ghàyn kə ghàyn tə tàʼa kɛsə zà epomə̂ zaynze.

²Ə tə chûmə̀ fɨsə ghàyn ə sendɛ sə atsɨ̀yntese, mə shîŋə̀kè tə pə̂ ə ghɨ ghɛ ə zhwitə ghàyn ə kwàʼtə̀ kə nə ghənə fɨaʼà sê Zhə̀fè.

³Ghɨ tə nə̂ ə̀ghɛ nə ghɨyn sê ghàyn kûmə̀ nə ghənə paʼà kê Pɨ̀a Vɨ̂m ə tàʼa ke Mi.

⁴M tsâ ə̀ghɛ nə ghɨ̂yn sê ghàyn kə ə ghe tə kyâyn, ə ghàyn kwaʼte nə mə tè tsàyn sê ghàyn. M tè paʼà tsàyn ghɛ ghɨ̀nə se ghàyn ə zhə̀te, kûmə̀ nə M tè nyì ghâsènì.

⁵Pîza zôyn, M kɛsə ndûə se vɛ ə è tom Mi, pîza wùə se ghàyn e pfɨfə va sê Mi nə, ‘Ò ndûə ghayn zə?’

⁶Zôyn kə M tsâyn ghɛ nə ghɨ̂yn sê ghàyn, ghe sè fo ngəʼ ə ghàyn ə təm.

⁷Pîza, m pîə sê ghàyn səmɔʼ nə, ə̀ nyi chùŋ sê ghàyn kə m ndô. Ə M taʼa ndò, Tsàmtè vayn pə̀yn sê ghàyn. Pîza mə m ndô, ə m ndu tom vəyn sê ghàyn.

⁸Shîŋə̀ kɛ ə È nə̀ pə̂, ə Vəyn è ngɨŋə̂ Vəyn, tyəyn nə kwâʼtè tɛ ə ghɨ mbiə kyi kûmə̀ ə̀ghɛ ə piə, vachi za, ə è tyə̀yn ndom tə chichite, ə è fɨyn tyəyn èndom vɛ ə Zhə̀fè tə saʼa ghɨghe ətəyn.

⁹È nə tyə̀nə̀ nə, kwâʼtè tɛ ə ghɨ mbiə kyi kûmə̀ ə̀ghɛ ə piə, vachi za, kûmə̀ nə ghɨ pomə̂ va sê mi.

¹⁰Ə è tyəyn ndom tə chichite, kûmə̀ nə m sè ndùə ə Pɨ̀a vɨ̂mvè ə ngwùŋ, ə ghàyn tə tàʼa fɨnə fe mi nâʼà səkɔs.

¹¹Ə è fɨyn tyəyn èndom vɛ ə Zhə̀fè tə saʼa ghɨghe ətəyn, kûmə̀ nə fɔ̀ynə̀ mbi vɨ̀nə nyi mə ə kàynè saʼ vəyn.

¹²M nyîə pa kyi ə̀ghɛ se pì sê ghàyn ghe tsɨ̀ə kə nyi, pîza mə ghàyn zɨ zôyn, ə ghə tsɨə tsɛ̂ ghàyn.

¹³Pîza, shîŋə̀ kɛ ə Zuʼsə səmɔʼse nə̀ pə̂, ə se chise ghàyn, ə ghàyn ə ke ə̀ghɛ əkɨ̂m ghɛ ə ghe nyi səmɔʼ. È pə̀ va sə̂ wàmnə̀ èghɛ vəyn zə ngɨŋe; è pə̀ se tsâ kə əghɛ mə ə pì ndô sê vəyn, ndàʼà ə̀ghɛ, ghe pa nyi se tə kyàyn.

¹⁴È nə̀ fo mi èpomsêzè kûmə̀ nə è nə njiə èghɛ zɛ m piə, ndaʼà zəyn sê ghàyn.

¹⁵Nâʼà èfɨa ə Pɨ̀a vɨmvè ekɨ̂m ə̀ nyi Vɨm. Ə̀ za nyi eghɛ zɛ ə m pi nə Zuʼse nə̀ pə̂, ə sə njîə ə̀ghɛ ghɛ ə nyi ghɨmə ndâʼà sê ghàyn.”

¹⁶“Ghàyn mòtə̀ kə nyi, ə tàʼa fɨnə fe Mi, ə mote sə fendîŋə̀ nyi ə fɨyn fe Mi.”

¹⁷Chùmtè èpàm sə vəyn shîse e sè pfɨfə sê ngɨŋ sə ghənə sè nə, “Zɨnə tyə̀nə̀ nə ghe? ‹È pi nə ghàyn mòtə̀ kə nyi, ə tàʼa fɨnə fe mi, ə mote ke nyi ə fɨyn fe Mi,› è kɨsè nə, ‹Kûmə̀ nə M ndûə se Pɨ̀a vɨ̂mvè.›”

¹⁸Ghɛ zɨ̀nə nə, “Sə fendiŋə̀ fə ashìŋə̀fè tyə̀ynə̀ nə ghe? Ghâsènì ke va nə È wàmnə̀ nə ghe ə.”

¹⁹Njisə̀s tè nyîə ke nə ghənə kyiŋə se pfɨf eghɛ se Vəyn, È və pìə se ghənə nə, “M pi nə sə fendîŋə̀ fə ashìŋə̀fè ə ghâ fɨnə fe va Mi, ə mote tso ke nyi, ə ghàyn fɨyn fe Mi. Ə̀ zɨnə nyi eghɛ zɛ ə ghàyn pfɨfə sê ngɨŋ saynse ə?

²⁰M pîə sê ghàyn kè nâʼà səmɔʼ nə, ghàyn nə̀ nə̂ ə chîə nâʼà sə ŋaŋ, mbi e saŋnə̂ kə ndò. Ghàyn nə nə̂ ə nyi è kosê esəyn, pîza ə kosê esəyn zaynze tə kɛse sə esaŋnê.

²¹Shîŋə̀ kɛ ə wùzhɔyn kyiŋə se pîə, è nyi èkosê esəyn kûmə̀ nə shîŋə̀ ə vəynke zɨə nə etɨ̀mkè ə pə̀yn, pîza shîŋə̀ kɛ è piə vayn, è və lɛ̀sə̀ ètɨ̂m ətəyn kûmə̀ nə è nyîə saŋnə̂ nə è və pîə vayn ə fètə̂ mbi.

²²Ə̀ nyi zamə kə ze nyi sê ghàyn, zôyn ghàyn nyîə nyi èkosê esəyn, pîza M nə fe kwəynsə̂ ghàyn, ə təm ghaynghe ə nyi mə ghə lwiyn èsaŋnêzè, e kyì esaŋnê zɛ ə wùə vayn kàʼa e fi tsɨ̂sè se ghàyn.

²³Shîŋə̀ kɛ ə tuʼfə təynfe tə pə̂, ə ghàyn tàʼa pfɨf afɨa kyîke sê Mi. M tsâ se ghàyn nâʼà səmɔʼ nə, Pɨ̀a Vɨ̂m tə fo nâʼàpî ghè vɛ ə ghàyn pfɨf sê Vəyn ə Mì ezə.

²⁴Se zaʼâ zôyn, ghàyn pâʼà pfɨf fɨa kyîke ə Mì ezə. Ghàyn pfɨf, kə ə fo sê ghàyn, kə saŋnê zaynze ə nyi mə zə lwiyn kwəyn.”

²⁵“M wâmnə̀ ə sengàyn se pì əghɛ ghɨ̀yn se ghàyn. Pîza shîŋə̀kè pə̀ ndò mə M tə nə̂ ə Mə wàmnə̀ va ə sengàyn, pîza M lote wâmnè ə ndayn sê ghàyn kûmə̀ Pɨ̀a Vɨ̂m.

²⁶Shɨ̂ŋə̀ kɛ ə tuʼfə təynfe tə pə̂, ə ghàyn pfɨf sê Vəyn ə Mì ezə. Ə̀ tə pfɨfə va Mi se Vəyn ə ghàyn elùʼ,

²⁷kûmə̀ nə Pɨ̀a Vɨ̂m è ngɨŋə̂ Vəyn nyîə kɔ̂ŋɔ̀ ghàyn. È kɔ̀ŋɔ̀ ghàyn kûmə̀ nə ghàyn nyîə kɔ̂ŋə̀ Mi, pomə̂ nə M tè ndò pə̂yn se Zhə̀fè.

²⁸M tè ndò sê Pɨ̀a Vɨ̂m ə pə̀ ə mbi, zôyn M zâ mbi kɛsə̂ ndûə se Pɨ̀a Vɨm.”

²⁹Chùmtè èpàm sə vəynse ə pìə se vəyn nə, “Ò wàmnə̀ kə nâʼà ə ndayn zôyn, fɨnə wâmnə̀ va ə se ngàyn.

³⁰Ghàs ke ndô zôyn nə Ò nyîə ke ə̀ghɛ əkɨ̂m, mə Ò fɨnə kyiŋə va nə wùə pfɨf ndô ghɛze se ghò. Zɨnə mə nə̂ nə ghàs pomə nə ò ndò sê Zhə̀fè.”

³¹Njisə̀s ə pə̀ynsə̀ sê ghənə nə, “Ghàyn pomə̂ ndò zo?

³²Shîŋə̀kè pə̀ ndò, mə kâynè nyi zôyn, mə ghàyn əkɨ̂m tə chyasə̀, ə nâʼàpî ndè ə ndûə kə və ndɛ, ə za Mi Mî nɨŋ. Pîza M lote vachi Mi nɨŋ kûmə̀ nə Pɨ̀a nyì ghâsè Vəyn.

³³M tsayn əghɛ nə ghɨ̂yn sê ghàyn nyi kə ghàyn faŋ sê Mi, ə kyi pɔ̂ynè. Mbi tə nə̂ ə ghàyn zɨ ngəʼ, pîza ghàyn kol təmə, Mə tɛ ghaʼ mbi.”