Read Mmen Njɔyn 2 Bible Online

Njɔyn 2 - Mmen bible

Njɔyn 2

¹Tuʼ mè ə tsɛ̀ m̀pɛ̀, malə̂ e nyi ə tɔ̂ŋ ə̀ Kanà apàs endaʼ ə Ngalìlîkè, nyìə Njisə̀s e nyi fu.

²Njisə̀s è chùmtè èpàm sə vəynse e nyi mə ə tɔŋə̂ kepî ghənə fumə ə malə̂.

³Kə lɨ̀m tè mi, nyìə Njisə̀s ə pə̀ se Vəyn ə pìə nə, “Lɨ̀ mə ghənə mə mì.”

⁴Njisə̀s ə pə̀ynsə̀ nə, “Ə̀ tsà chîva gho ghɛ zɛ M kyi se nə̀yn. Shîŋə̀ kɨmke pâʼà nyìəm kwəyn.”

⁵Nyìə Njisə̀s ə se pì sê ghɨ ghɛ ə ghe fɨ̂aʼà fu elùʼ ə malə̂vè nə, “Ə è pì pî nə ghe, ghanə nə̀ kə zamə.”

⁶Tɔ̀ynsè tè nyì paʼsê fumə elùʼ mə ə tsof ə tə̂ chi. Ə tè nyì fumə ekyì ə sètɔ̀yn ə ghɨə Isìlâyghè tè ndə̀mə môm sə shûə èwiyn ə ghənəvè ətəyn ashìŋə̀ ə tsəməke. Nâʼàpî tɔ̀yn èkè tè kaʼa è kyi sɔ̀ʼ sə mmòse ewə̀.

⁷Njisə̀s ə pìə sê ghɨ fɨaʼa ghɛ nə, “Ghàyn lwiynse môm fa sètɔ̀yn.” Ghənə ə lwiynsə̂ m̀ mə kɔʼɔ fɨə echo.

⁸È və fɨnə pîə sê ghənə nə, “Ghàyn tute mîmè ə ndu fo sê wùə vɛ ə è chisə ghɛ ə malə̂ ghɨ̂nə̀.” Ghənə ə tutə̂ ə ndùə fo.

⁹Wùə ə̀təyn ə mòmə̀ m̀mo mə təynm̀ mə m̀ mə kɛsê sə mlɨ̂. È tè ke va luʼ vɛ ə lɨ̀ mɨ̂nə̀ ndò ətəyn. (Pîza, ghɨ fɨaʼa ghɛ ə tè tu môm mə ətəyn e ke.) È və ke tɔŋɔ wùə vɛ ə è tè malə,

¹⁰ə se pì sê vəyn nə, “Nâʼàpî ndè vɛ ə è chyà pɨl fo chi m̀lɨ̂ mɛ ə m tsɔ̂fə̀ kwənə nə ə mɨ sə shi, ə pə̀ ashìŋə̀ kɛ ə ghɨ motə pə mɨ kwəyn, è və ke pə̀yn e mɛ ə m tɔ̀ʼɔ̀ tsɔ̂fə̀ va. Ò kwì zayn se ndə̀mə zà mlɨ̂ me èchùŋmè sə̂ pə̂yn è mə̂ynə̀m zô ə?”

¹¹Njisə̀s tè nə̀yn eghɛ e kaynte ə vəyn zə shi nə zɨ̂nə̀ endaʼ ə Kanà apàs endaʼ ə Ngalìlîkè. Ə̀ nyì fumə kə è tè tyə̀yn paynsê èpomsê ə vəynze, chùmtè èpàm sə vəynse ə pomə̂ sê vəyn.

¹²Epàm ə̂təyn, Njisə̀s è nyìə vəyn, è ànyìə vəyn è chùmtè èpàm sə vəynse ə ndùə endaʼ ə Kàpanùmzè ə ndamtə̂ kɔʼɔ fu sə mtuʼlə̂.

¹³Ə tè se paʼsə̂ pə̂ ashìŋə̀ kɛ ə ghɨ ə Njûsə̀ tè nə̂ e zhiə è zaʼâ tsɛ zə ətəyn, Njisə̀s ə ke ndo ndù endaʼ ə Njèlusalɛ̀mzè.

¹⁴Kə È ndù tâyn fu, ə njiə ə Ndɛ Ètsə̀mə. È və fe ə̀ghɨ ghe pəʼlə̂ sènyàm sə mbɔ̀lɔʼse, è pfɨsə ndzèsè, è kwɨ̀lə̂m, è kèpî èghɨ ekwiynə nə ekɛve ghe tsɨs ə ghənə etûə èlwɔ̂ŋ.

¹⁵È və pɛ wàyn è kwɨ̀l ə pusə chûmə̀ fɨsə̂ nâʼà ə̀ghɨ əkɨ̂m paʼsə̂ è ndzè sə ghənə̂sè è mbɔ̀lɔʼse. È və pə̀ŋsə̀ maʼà èlwɔ̂ŋ əghɨ̀ vɛ ə tè kwiynə kɛve,

¹⁶ə tsɛ̀sə̀ àlâŋ sê ghɨ ghɛ ə tè pəʼlə kwɨ̀lə̂m nə, “Ghàyn nji fɨ è mənə̀m fàyn! Ghàyn ə kə̀mnè ndɛ ə̀ pɨ̀a vɨ̂m sə elùʼ ezhɔyn!”

¹⁷Chùmtè èpàm sə vəynse ə ke Pɨ̀əytè nə ə nyàʼ ə Ŋwàʼlè ə̀ Fèzhə̀ nə, “Kɔ̂ŋ zɨm sê ndɛ Zɛ̂zè ə Zhə̀fè fuə ə mì ətəm kə ewus.”

¹⁸Ghɨ Njûs ə ghaʼâ ghɛ ə kɛsə̂ pə̂ sê Vəyn ə pfɨfə nə, “Ò kàʼa ə ò nəyn ghɛ ekaynə èkè se tyə̀yn sê ghàs nə ò kyi ndô tyaʼa se nə̀yn əghɛ ghɨ̀ynə.”

¹⁹Njisə̀s ə pə̀ynsə̀ sê ghənə nə, “Ghàyn pɨyte Ndɛ Ètsə̀mə zɨ̂yn, ə M kɛse pɛ zə̂yn sə m̀tuʼ mta.”

²⁰Ghənə pfɨfə sê vəyn nə, “Ò nyiə nə̀ njîə kə m̀tuʼ mta se pɛ zə̂yn? Ə tè nji pìŋ m̀ghɨm mkyàʼ njòse tufə se pɛ ə Ndɛ Ètsə̀mə zɨ̂yn!”

²¹Pîza ndɛ ètsə̀mə zɛ ə Njisə̀s tè wàmnə̀ kûmə̀ zə̂yn tè nyì ke nâʼà èwiynə vəyn.

²²Kə Njisə̀s tè kwu Zhə̀fè ə kɛsə̂ zômsə̀ Vəyn, chùmtè èpàm sə vəynse ə kwàʼtə̀ nə è və tè pì ke nâʼà nyi ə ke pomə eghɛ zɛ ə Ŋwàʼlè ə̀ Fèzhə̀ pìə, è ghɛ ghɛ ə Njisə̀s tè pìə.

²³Ə tè nyi kə Njisə̀s nyi ə Njèlusalɛ̀m ashìŋə̀ azhi ə zaʼatsɛke, ghɨ etsɨəghe ə pomə̂ sê Vəyn, kûmə̀ ə̀ghɛ ə kayntə ghɛ ə ghənə fe kə è nə̀yn.

²⁴Pîza, Njisə̀s ə tàʼa fo ngɨŋ ə Vəyn sê ghənə kûmə̀ nə è tè ke ndô ghənə achûŋ.

²⁵Wùə tè va sə̂ fɨnə tsâ ndò fɨa kɛ ə wùə nyi kəynke sê vəyn kûmə̀ nə è tè se ke ndô kwâʼtè tə̂ ghɨ̀tè.