Read Mmen Njɔyn 20 Bible Online

Njɔyn 20 - Mmen bible

Njɔyn 20

¹Nâʼà pɨsə̀pɨ̂sə̀ ə Sɔndè, lɨmke e pa fɨ̂mə̀, Mèli Màkndàlɛ̂n ə ndò ndûə ə Njisə̀s eshyə̀ eghaʼâzè ə fe mə ə pɨŋsê tsɨ̂sè naynke echo èshyə̀.

²È və ndò pə̀ è nyɨŋe ə pə̀ fe Shimuyn Pità è chùmtè èpàm ə̀ mɔ̀ʼɔ̂ vɛ ə Njisə̀s tè kɔ̀ŋɔ. Mèli ə tsà se ghənə nə, “Ə fɨsê pfɨyn ə Pɛ̂pɛze eshyə̀ eghaʼâzè, ghàse ke va nə ə ndəm ghayn və!”

³Pità è chùmtè èpàm ə̀mɔ̀ʼɔ̂ zɛ ə ndò ndûə eshyə̀ eghaʼâzè.

⁴Ghənə əkɨ̂m tè nyɨŋə ndô pîza chùmtè èpàm ə̀ mɔ̀ʼɔ zɛ ə nyɨŋə tàʼa Pità ə ndùə taynə̀ eshyə̀ eghaʼâzè sə shi.

⁵È və ngɨmtə̂ naynə̂ ndzɨsə ə fètəyn èshyə̀ ə fe àkɨ̂m kɛ ə tè ngole pfɨyn ə Njisə̀svè ətəyn, pîza ə tàʼa nji.

⁶Shimuyn Pità ə pə̀ epàm ə tɔynə̂ njiə ndùə kə əfètəyn eshyə̀ eghaʼâzè ə fe kə àkɨ̂m kə ke nyɨŋ fu.

⁷È və fɨnə kotə̂ àkɨ̂m kɛ ə tè ngole tuə Njisə̀skè ətəyn. Kɨ̂m nə kɨnə tè va luʼve emɔ̀ʼ yî kɨ̂m kɛ ə tè ngole pfɨnə Njisə̀svè ətəyn. Ke tè nyi mə kə ngɛlê elùʼ sə nɨŋ.

⁸Chùmtè èpàm ə̀ Njisə̀s vɛ ə è tè pə̀yn sə shi zâ ə ke pɔŋɔ nji, ə fe ə pomə̂. (

⁹Pi kə ghənə tè nyi ndɔ̀ʼɔ nyiəm kê èghɛ zɛ ə tè nyàʼ ə ŋwàʼlè ə̀ Fèzhə̀ nə Njisə̀s tə zômə̀.)

¹⁰Chùmtè èpàm sə Njisə̀sè ə fe zâ, ə kɛsə̂ kwɨlə̂.

¹¹Mèli ə tyəmə̂ echo eshyə̀ eghaʼâzè sè chîə. Kə è tè chìə, ə ngɨmtə̂ naynə̂ ndzɨsə̂ əfètəyn èshyə̀ eghaʼâzè.

¹²Kə è nayne ndzɨse ə fètə̂ èshyə̀, ə fe sètsì sepɛ̀ mə se ə màʼ ndzɨs se fɨfə̂sè, se tsɨs elùʼ vɛ ə pfɨyn ə Njisə̀svè tè nyɨŋ ətəyn. Tsìə Fèzhə̀ èmɔ̀ʼ tè tsɨs elùʼ vɛ ə tuə vəynke tè nyi ətəyn, zə̂mɔ̀ʼɔ e tsɨs elùʼ vɛ ə gholə tè nyi ətəyn.

¹³Tsì sə təynse ə pfɨfə sê Mèli nə, “Wùzhɔyn, ò chìə ghe?” È və pə̀ynsə̀ ə pîə nə, “M chîə kûmə̀ nə ə njì ndo è pfɨyn ə Pɛ̂pɛ vɨ̂mvè, m ke va nə ə ndəm ghayn Vəyn ə?”

¹⁴È və pìə è kə̀mnə̀ èwiyn ə fe wùə è tyəm fu. Wùə nə vɛ tè nyì Njisə̀s pi kə Mèli tè keva nə ə̀ nyi Vəyn.

¹⁵Njisə̀s ə pfɨfə sê vəyn nə, “Wùzhɔyn ò chîə ghè? Ò kyiŋə ndè?” Mèli e sè kwâʼtə̀ nə ə̀ nyi wùə vɛ ə è fɨ̀aʼà afùʼ fumə, ə pìə sê vəyn nə, “Ə̂ nyi mə ə̀ njì ndô ghò èpfɨyn ə vəynve ə Pɛ̀ apɨəyn, ò tsà eluʼ vɛ ə ò ndù ndə̂m vəyn ətəyn sê mi, kə m kɛse ndu nji.”

¹⁶Njisə̀s ə ke tɔŋtə vəyn nə, “Mèli!” Mèli ə feʼtə̂ naynə̂ Njisə̀s ə pɨa pîə ewàmnè ə Ipilò nə, “Làponi!” (Mə e tyə̂nə̀ nə, “Tyə̀ynsè.”)

¹⁷Njisə̀s ə pìə sê vəyn nə, “Kə ò kom mi kûmə̀ nə m pâʼà nyìəm ndu sê Pɨ̀a Vɨ̂mvè. Pɨl ndù sê chùmtè èpàm sɨmse, ə ghɔnyì ghɨmə ə tsà se ghənə nə M kɛsə̂ ndùə sê Pɨ̀a Vɨ̂m vɛ ə̀ nyì kepî Pɨ̀a vâynvè. È nyi Fèzhə̀ fɨmfe, ə̀ nyi kepî Fèzhə̀ faynfe.”

¹⁸Mèli Màkndàlɛ̂n ə ndùə tsâ se chùmtè èpàm sə Njisə̀sè nə zhi ə fe Pɛ̂pɛ ə tsà èghɛ zɛ ə È pì sê vəyn.

¹⁹Ə̀ tè nyì ke fumə ə fetuʼ, ə Sɔndè ezhwikwɨləke, chùmtè èpàm sə Njisə̀sè ə zùŋtə̀ ə ndɛ ə fà ècho ə ndɛve kûmə̀ nə ghənə tè nyîə fânə̀ ə̀ghɨ Njûsə̀. Njisə̀s ə pfɨ̀ŋə̀ tyəmə̂ kə ə ghənə əfètəyn ə pìə nə, “Ə pɔ̂ynè ə nyi sê ghàyn.”

²⁰Kə è wàmnè zâ ə ke tyə̀yn əgho vəynghe è tipì ə vəyn sê ghənə. Chùmtè èpàm sə Njisə̀sè tè fe Vəyn sè saŋnə̂ nâʼà sə ŋaŋ.

²¹Njisə̀s ə pìə kwəynsə̂ sê ghənə nə, “Ə pɔ̂ynè ə nyi sê ghàyn! M tomə ghàyn kèpî kə Pɨ̀a Vɨ̂mvè tè tom Mi.”

²²È və wàmnə̀ zâ ə fofə sèzuʼ ə ghənə tu, ə pìə nə, “Ghàyn ko Zuʼse Ŋwaʼase.

²³Ə ghàyn lɛ̀sè fo pi piə ndè, ə pi vəyn ə nyi mə ə və lɛ̀sè fo. Ə ghàyn tàʼa lɛ̀sə fo ə piə wùə, ə nyi mə ə paʼà lɛ̀sè fo pi ə̀təyn.”

²⁴Chùmtè èpàm emɔ̀ʼ əfètə̂ sèchùmtè èpàm njòse pɛ̀, mə nyi Tɔ̀mɔ̂s e tɔŋtə̂ kəpî nə, Apɨaʼsè, tè va yîghə̀ ghənə shîŋə̀ kɛ ə Njisə̀s tè pəyn.

²⁵Ə pə̀ kə è pə̀yn, soyn sə vəynse ə pìə sê vəyn nə “Ghàs ə fe Pɛ̂pɛ.” Tɔ̀mɔ̂s ə pìə nə, “M tàʼa fe endwɔ ə sembayn ə və əgho, se ndə̀mə̀ əghɔ əgho ghɨmghə ətəyn, se fɨnə mɔ̀mtè etipì ə Vəynze, m tàʼa pomə̂.”

²⁶Epàmə̂ ngàm, chùmtè èpàm sə Vəynse e sè fɨyn tsɨs kepî ə ndɛ yî ghə̀ Tɔ̀mɔ̂s, mə ə kyɨ̀ŋ fa chondɛve, Njisə̀s ə pfɨ̀ŋə̀ tyəmə̂ ə ghənə əfètəyn, ə pìə nə, “Ə Pɔ̂ynè ə nyi sê ghàyn.”

²⁷È və pìə sê Tɔ̀mɔ̂s nə, “Ndə̀m paŋ fɛfe aghofe fâyn elùʼ ə naynə̂ ə̀gho ghɨmghə. Nɛ̀se pə̀yn gho kɛke ə ndə̀mə̀ ə mi etipì. Pomə, kə ò fɨyn mɛnê kɨsè, pomə.”

²⁸Tɔ̀mɔ̂s ə pìə se Vəyn nə, “Pɛ̂pɛ Vɨm, Zhə̀ fɨmfe!”

²⁹Njisə̀s ə pìə sê vəyn nə, “O pomə̂ zôyn kûmə̀ nə o fe mi ə? Pɔsêzè nyì sê ghɨ ghɛ ə ghe taʼa fe pîza ə pomə̂.”

³⁰Ə̀ tè nyi ə chùmtè èpàm sə Njisə̀sè əshi, È və nə̀ ə̀ghɛ əkayntə setsɨ̀ mə paʼà nyàʼ fa ŋwàʼlè.

³¹Pîza ə tè nyàʼ ghɨ̂nə̀ kə ò pomə nə Njisə̀s nyi vɛ ə chɔʼ ndə̂m, ə Vâ Fèzhə̀. Ə ghàyn pomə sê Vəyn, ə ghàyn tə kyî èndam zɛ ə ze tə mîə va ə Vəyn ezə.