Read Mmen Njɔyn 3 Bible Online

Njɔyn 3 - Mmen bible

Njɔyn 3

¹Wùə è chisə əghɨ̀ ə Njûs vîvè tè nyi e tɔŋtə̂ vəyn nə Nìkòndemùs, ə nyi wùə atsɨ̀ynte ə ghɨə Falàsîə.

²Tuʼ fîfe è tuʼve, è və ndùə sê Njisə̀s ə pìə se Vəyn nə, “Tyə̀ynsè, ghàs ke ndô nə ò nyi tyə̀ynsè mə ə̀ tom Fezhə̀. Wùə vîvè vayn kàʼa è nəyn ghɛ ə kayntə ghɛ ə Ò nə̀ ə̀ tsɛ̂ kə va mə Zhə̀fè nyì yî vəyn.”

³Njisə̀s ə pə̀ynsə̀ sê vəyn nə, “M pîə sê ghò səmɔʼ nə, wùə vayn kàʼa è nji elùʼ efɔ̂yn ə Fezhə̀vè ə̀ tsɛ̂ kə va mə ə kɛsê pîə vəyn.”

⁴Nìkòndemùs ə pfɨfə sê vəyn nə, “Ə nyi kàʼa kɛse pîə zàyn wùə èghaʼâ? È vayn kaʼa è fɨyn nji ə nyì endwɔ̀ kə ə piə vəyn nə ndu shîŋə̀ tepɛ̀!”

⁵Njisə̀s ə pə̀ynsə̀ nə, “M tsâ sê ghò səmɔʼ nə wùə vayn kàʼa è nji elùʼ efɔ̂yn ə Fezhə̀vè, ə̀ tsɛ̂ kə va mə ə pîə vəyn mmò è kɨsè Zuʼse.

⁶Wùə vɛ ə piə è chaʼa wìynke nyi wùə èwàmnə, pîza wùə vɛ ə piə è Zuʼsə Fezhə̀sè nyi Sezuʼ.

⁷Kə ghàyn ə nyi è kaynze kə m pî nə ə kyi se kɛsə piə ghàyn əkɨ̂m sə fe.

⁸Fofa tsɛ̂ nâʼà pî elùʼ èkè vɛ ə ke kɔ̂ŋə̀, ò zɨə kə ke tsɛ̂ pîza vayn tsàyn eluʼ vɛ ə ke ndô pə̂ ətəyn è luʼ vɛ ə ke ndûə ətəyn. E nyi kepî zamə sê nâʼàpî ndè vɛ ə piə vəyn ə Sezuʼ sə Fezhə̀sè.”

⁹Nìkòndemùs ə pfɨfə nə, “Ze kaʼa e kyayn zayn zə?”

¹⁰Njisə̀s ə pə̀ynsə̀ nə, “Ò nyi tyə̀ynsè èghaʼâ endaʼ ə Isìlâyzè, zɨə èghɛ zɨ̀yn kê va ə?

¹¹M pîə sê ghàyn səmɔʼ nə, ghàs wàmnə̀ èghɛ zɛ ə ghàs ke, kɛsə̂ tsâ zɛ ə fe, pîza wùə vîvè ə ghàyn ə fèteyn e kɔ̂ŋə̀ va se pomə̂ tom zâszè.

¹²Mə wàmnè sê ghàyn kûmə̀ ə̀ghɛ ə mbiə, ghàyn ghe tàʼa pomə̂. Ghàyn nə sè pomə zàyn Mi ezhoghɛ m wâmnə̀ sê ghàyn kûmə̀ ə̀ghɛ endaʼa ekwùtwəynghe ə?

¹³Nâʼà wùə èmɔ̀ʼ pâʼà tyəmə̂ kɔʼɔ ekwùtwəyn, ə̀ tsɛ̂ kə va Va Wùə, kə È tè ndò ekwùtwəyn ə tso pə̂ ə chi.

¹⁴Kə Mosîs tè paynte fûsè ə mbamke ə mbàŋ ə ndwìsə̀ tyəmsə̂ elùʼ ashəshəve, ə̀ nyì kepî èghɨ kə kyi se tə ndwîsə̀ tyəmsə Vâ wùə.

¹⁵Zɨnə nə̀ kyânə̀ kə nâʼàpî ndè vɛ è pomə sê Vəyn kyi ndam zɛ ə ze tə mîə va,

¹⁶kə Zhə̀fè tè kɔ̀ŋə tsɛsə̀ mbi, ə fo Vâ ə̀ Vəyn mə è tè nyì ke èmɔ̀ʼ kə nâʼàpî ndè vɛ ə è pomə sê Vəyn tə tàʼa kwu pîza ə è kyi ndam zɛ ə ze tə mîə va.

¹⁷Zhə̀fè tè paʼà tom Vâ vəyn ə mbi nə è pəyn saʼ ə̀ghɨ. Pîza È tè tom Vəyn nə È pəyn Sɔza ə̀ghɨ.

¹⁸Ghɨ ghɛ ə pomə sê Va ətəyn, tə pfɨ̂ə va saʼ, pîza ghɨ ghɛ ə tàʼa pomə kàyne nyi mə ə pfɨ̀ saʼ. Kûmə̀ nə ghənə paʼà pomə se Vâ Fèzhə̀ vɛ ə̀ nyì ke Vəyn.

¹⁹Ə̀ nyi nyiə kə Zhə̀fè tə tsɛsə̀ saʼa Vəynze: paynze ə nji ə mbi, pîza ghɨghe kɔ̂ŋɔ̀ kə àlɨm tsɨ̂ətsɛ̂ kə kɔ̂ŋə̀ paynze kûmə̀ sèpi sə ghənə̂sè.

²⁰Ghɨ ghɛ ə nə̂ ghɛ ə piə kɔ̂ŋə̀ va payn, va se pə̀yn fumə ə fètə̂ èpayn kə fanə̀ nə sas ə ghənə̂zè nə̀ panə.

²¹Pîza ghɨ ghɛ ə nə̂ ghɛ ghɛ ghe nyi səmɔʼ pə̂ se payn ətəynze kə payn ətəynze chwite nə ghənə nyiə zɨə se Zhə̀fè.”

²²Epàm ə zɨnə mə, Njisə̀s è chùmtè èpàm sə vəynse ə ndùə apàs endaʼa Njòndyâkè, ə ndamtə̂ se chə yî ghə̀ ghənə, fo m̀mo sê ghɨə.

²³Ə̀ tè nyì za, Njɔyn e fo kəpî m̀mo endaʼ ə Enònzè, ə va sə aghaf se nduə tàyn endaʼ ə Salìmzè kûmə̀ nə môm tè nyîə tsɨ̂ə fu. Ghɨghe e ndûə fe vəyn, è fo m̀mo sê ghənə.

²⁴Ə̀ tè nyi mə ə pâʼà nyìəm fa Njɔyn ə ndɛ ə̀ chaʼ.

²⁵Chùmtè sə Njɔyn shîse sè saʼnə̂ è wùə Njûs vîvè, kûmə̀ èndom vɛ ə ghɨə Njûsə̀ tè shuə wiynve ətəyn ə ghənə endam endaʼze sə̂ zo kwənə̂ ə Zhə̀fè əshi.

²⁶Ghənə ə ke ndù sê Njɔyn ə tsà se vəyn nə, “Tyə̀ynsè, o kàʼa ò fɨyn kwâʼtè wùə vɛ ə ghâyn vəyn fe nyi engyinə̂ tsô Njondàyn za, ə vɛ ə ò tè wàmnə̀ kûmə̀ Vəyn. È nyîə fo m̀mo sê ghɨə zôyn, nâʼàpî ndè e ndûə se vəyn.”

²⁷Njɔyn ə pə̀ynsə̀ sê ghənə nə, “Wùə vîvè vayn kyi afɨa mə ə̀ paʼà fo Zhə̀fè.

²⁸Nâʼà ghàyn è ngɨŋ saynse nyi se tsɛ̀ èsaʼ sɨmse kə m tè pi nə, Ə̀ vachi mi vɛ ə chɔʼ ndə̂m. Zhə̀fè tom mi əshi se pɨaʼtê əghɨ kûmə̀ è pə̂yn ə vɛ ə kɨmne ndə̂m.

²⁹Wùə vɛ è malə wùə zhɔyn nyi vɛ ə è kyi zhwîə ə̀təyn. Pîza so ə̀ ndom ə̀ wùzhɔyn vɛ ə è tyəm lɨmtə̂ nyîə saŋnə nâʼà sə ŋaŋ ezhoghɛ è zɨ kyə̀ ə̀ ndom ə̀ wùzhɔyn. Ə̀ za nyì kepî zamə kə saŋnê zɨme nyi mə zə lwiyn kwəyn.

³⁰È kyi sə̂ ngaŋtə̂, m tsotə̂.

³¹Vɛ ə è ndò pə̂yn ekwùtwəyn nyîə kɔʼnə̂ tsɛ̂ nâʼàpî ndè vɛ ə piə ə chi nyi ke kə wùə chi, wàmnə̀ kûmə̀ kə ə̀ghɛ ə chîə. Pîza vɛ ə è pə̀yn ekwùtwəyn nyîə ngaŋtə tsɛ nâʼàpî ndè.

³²È tsâ èghɛ zɛ ə È fe ə zɨə, pîza wùə vîvè pomə̂ va Vəyn.

³³Pîza pîndè vɛ ə è fi tom ə̀ Vəyn lotə̂ pîə ndò nə Zhə̀fè nyì səmɔʼ.

³⁴Vɛ ə Zhə̀fè tom wâmnə̀ èwâmnè ə Fezhə̀zè, kûmə̀ nə Zhə̀fè ə fo vəyn è Zuʼsə Vəynse mə sə lwiyn.

³⁵Ə pɨ̀a vayn kɔ̂ŋɔ̀ vayn, è və ndə̀mə̀ ə̀ghɛ ə̀kɨ̂m ə vəyn əgho.

³⁶Ə̀ ndə̀m pîndè təmə və sê vayn nə vɨ̂yn, ə è kyi ndam zɛ ə ze tə mîə va, mə ə̀ tə pîndè se nə̀yn eghɛ zɛ ə è pì, ə è tə tàʼa kyî endam zɛ ə ze tə mîə va, pîza ə Zhə̀fè tə pa poynsê Vəyn.”