Read Mmen Njɔyn 4 Bible Online

Njɔyn 4 - Mmen bible

Njɔyn 4

¹Ghɨə Falàsî ghə tə zɨ nə Njisə̀s nyîə kyi sèchùmtè èpàm, fo m̀mo sê ghənə se tsɨ̂ə tsɛ sə Njɔynse.

²(Se lotə pì, Njisə̀s è ngɨŋə̂ vəyn tè paʼà fo môm sê wùə vîvè, pîza ə̀ tè fo kê sèchùmtè èpàm sə vəynse.)

³Kə Njisə̀s zɨ ghɛ zɛ ə tè pìə kûmə̀ Vəyn, È və ndò apàs endaʼ ə Njòdyâkè ə kɛsə̂ ndûə apàs endaʼa Ngalìlîkè,

⁴Kə è tè nduə fumə, ə tɔynə̂ èndomve apàs endaʼ ə Sàmalyàkè.

⁵Ə Sàmalyà, È və pə̀ ə tɔ̂ŋ e tɔŋtə̂ nə Sikà, mə ndaʼ ətəyn tè kwùʼte nyi paʼsê eluʼ vɛ ə Njàkɔ̂p tè fo sê vâ vəyn Njosɛ̀f.

⁶Ə̀ tè nyi mə ə tɨm pûʼà fumə elùʼ sə̂ tuə m̀mo ətəyn. Puʼ mmò ətəynke tè nyì kə Njàkɔ̂pkè. Njisə̀s tè nyi mə È və kwì ə pɔ, ə tsotsɨsə̂ fumə etipì apùʼ mmò nə kɛ. Ə̀ tè nyi mə zhwize ə kɔʼ lo, ə tɛ ə̀ chwì.

⁷Wùzhɔyn ə̀ Sàmalyà vîvè ə pə̀ se tu mmo, Njisə̀s ə pìə se vəyn nə, “Fo Mi è môm ə M mɨ.”

⁸Ə̀ tè nyì famə ashìŋə̀ mə chùmtè èpàm sə vəynse ə nji ndûə ə tɔ̂ŋ se zhɔyn èfɨazhiəve.

⁹Wùzhɔyn ə̀təyn ə pə̀ynsə̀ sê Njisə̀s nə, “Ò nyi wùə ə Njû, m nyi wùə zhɔyn ə̀ Sàmalyà, Ò kwì zayn sə̂ ndɔnə m̀mo sê mi ə?” (Wùə Njûs tè vayn kàʼa è tomne wà kɨ̀sə tɔ̀yn yî wùə Sàmalyà.)

¹⁰Njisə̀s ə pə̀ynsə̀ sê vəyn nə, “Ə ò fè ke fɨa vɛ Zhə̀fè fo sê ghɨə fɨyn ke wùə vɛ è ndɔnə mô nə mɨ̂yn sê ghò, ə ò ndɔyn sê Vəyn, ə È fo ghô è môm mɛ m̀ fo ndamze.”

¹¹Wùzhɔyn ə̀təyn ə pìə nə, “Pɛ apɨəyn, Ò kyi va fɨa kɛ ə tuə mômè ətəyn, puʼ mmò kɨ̂nə̀ e lɔŋɔ. Ò nə̀ njìə ghayn mô mɛ ə m̀ fo ndam zə?

¹²Ə̂ tè nyi pɨ̀a vâs və shi Njàkɔ̂p kə è tè zâ puʼə mmò kɨ̂nə sê ghàs, ə vəyn è ghɔ vəynghe, è nyamsə vəynse tè mɨə kə ə̀kɨ̂m ətəyn. Ò vayn kàʼa ò pi nə ò ngaŋtə̂ tsɛ̂ ndò vəyn, mə ò ngaŋtə̂ tsɛ̂ ndò Njàkɔ̂p ə?”

¹³Njisə̀s ə pə̀ynsə̀ nə, “Ghɨ ghɛ ə mɨə fa apùʼ mmò kɨ̂yn, pfɨ̀ŋ m̀mò tə zafə kwəynsə̂ ghənə.

¹⁴Pîza, ghɨ ghɛ ə mɨ mô mɛ m nə̀ fo sê ghənə tə fɨnə kyîə va pfɨ̀ŋ ə̀ m̀mò. Mo mɛ M nə̀ fo sê ghənə nə̀ nə̂ mə nyi ə ghənə ə fètəyn kə tɔŋ m̀mò zɛ ə è zomə tsɛ̂ va. Mo mə təynmè nə̀ fo ghənə èndam zɛ ə ze tə mîə va.”

¹⁵Wùzhɔyn ə Sàmalyà ə̀təyn ə pìə sê Njisə̀s nə, “Tyə̀ynsè, fo mi èmô mə tə̂m! kə m tə tàʼa fɨnə kyiə pfɨ̀ŋ ə̀ m̀mò, ə m taʼa kɛsə pə̀yn fayn se tuə mmo.”

¹⁶Njisə̀s ə tsà se vəyn nə, “È ndu tɔŋɔ ndom ə̀ vəyn, ə è kɛse pəyn.”

¹⁷Wùzhɔyn ətəyn ə pə̀ynsə̀ nə, “M kyi va ndom.” Njisə̀s ə pìə sê vəyn nə, “Ò pì ke nâʼà səmɔʼ nə ò kyi va ndom.

¹⁸Ò nyi mə ò malə ndom ghe ə tâyn, vɛ ghâyn vəyn ndamə zôyn, ə̀ lote va ndom vɛ̂vè. O tsàyn ke nâʼà se Mi səmɔʼ.”

¹⁹Kə wùzhɔyn ə̀təyn zɨ zâ, ə pìə sê Njisə̀s nə, “Mə fe nə ò nyi Fɨ̀aʼtè.

²⁰Pɨ̀a ghɨm ghə shiə ə Sàmalyà tè ngɨmnə Fezhə̀ fa pfɨyn, pîza ghàyn ghɨə Njûsə̀ ghɛ ə pî nə, Njèlusalɛ̀m nyi eluʼ vɛ ə nə ngɨmnə Zhə̀fè ətəyn.”

²¹Njisə̀s ə pìə sê vəyn nə, “Wùzhɔyn pomə ghɛ zɛ M tsâ sê ghò. Shîŋə̀kè tə pə̂ mə ghɨə tə ngɨmnə̂ va Pɨ̀a fa etûə pfɨ̀yn, pî ə Njèlusalɛ̀m.

²²Ghàyn ghɨ Sàmalyà paynse keva wùə vɛ ə ghàyn ngɨmnə, pîza ghàs ghɨə Njûsə̀ ke ndô wùə vɛ ə ghàs chùmtə̀, kûmə̀ nə ə nyì sê ghɨə Njûsghè kə sɔzaze tè pəyn.

²³Pîza shîŋə̀kè pə̂ ndò, mə kə kâynè pəyn, mə ghɨ ghɛ ə ngɨmnə Zhə̀fè səmɔʼ tə ngɨmnə̂ Fèzhə̀ ə Sezuʼ è kɨsè səmɔʼ. Ə̀ ghɨnə nyi əghɨ ghɛ ə Pɨ̀a kyiŋə nə ə ngɨmnə̂ zhi səmɔʼ.

²⁴Zhə̀fè nyi Sezuʼ, mə ghɨ ghɛ ə kɔʼsə Vəyn kyi sə̂ ngɨmnə̂ Vəyn ə Sezuʼ è kɨsè səmɔʼ.”

²⁵Wùzhɔyn ə̀təyn ə ke pì sê vəyn nə, “M ke ndô nə vɛ ə chɔʼ ndə̂m tə pə̂ ndò se tsâ paynsê əghɛ ə̀kɨ̂m sê ghâsènì.”

²⁶Njisə̀s ə pə̀ynsə̀ nə, “Ə̀ nyi Mi nə vɛ m wamnə̀ sê ghò.”

²⁷Fumə ashìŋə̀, chùmtè èpàm sə Njisə̀sè ə kɛsə̂ pə̂ nyi è kaynze se fe kə È wâmnə̀ yî wùzhɔyn. Pîza wùə vîvè ə tàʼa pì sê vəyn nə, “Ò kyiŋə ghè ə?” Pî se pfɨf nə, “Ghâyn wùzhɔyn vɛ wàmnə̀ nə ghe?”

²⁸Wùzhɔyn ə̀təyn ə ke ndo za fetəm fə vəyn fə mmòfe, ə kɛsə̂ kwɨlə̂ ə tɔ̂ŋ ə pìə se ghɨə fumə nə,

²⁹“Ghàyn pəyn fe wùə vɛ ə è tsàyn nâʼàpî ghè kə m tyəm nə̂yn. È kàʼa è və nyi vɛ ə chɔʼ ndə̂m ə lɨmtə mə?”

³⁰Nyiə mə, ghɨə vəynghe ə ndò fɨə ə tɔ̂ŋ ə ndùə fe Njisə̀s.

³¹Ə̀ tè nyi mə chùmtè èpàm sə Njisə̀sè chyatə̂ Vəyn pîə nə, “Tyə̀ynsè, zhi fɨake.”

³²Pîza È və pə̀ynsə̀ nə, “M nyîə kyi èfɨazhiəve se zhi mə ghàyn keva ghɛ zhîze kûmə̀ vəynve.”

³³Chùmtè èpàm sə vəynse ə ke zhə̀tè se pfɨf sê ngɨŋsə̂ ghənə̂sè nə, “Ə̀ kaʼa ə nyi mə wùə ə pə̀yn è fɨazhiəve sê Vəyn mə?”

³⁴Njisə̀s ə pìə sê ghənə nə, “Fɨazhiə vɨmve nyi se nə̀yn efɨaʼ ə Vɛ ə È tom Mi nə M nəyn è kɨsè se mɨsè efɨ̂aʼ zɛ ə È tom nə M pəyn nəyn.

³⁵Ghàyn nyîə kyi ngàyn ə è pìə nə, ‘Ə ò zho, ə tsɛ̂ kə sènjɔŋ se kyàʼ, o kwiə.’ Pîza M tsâ sê ghàyn nə ghàyn fɛte naynê kə fùʼm̀ kyàʼa; fɨazhiəvə kwəyn se kwì.

³⁶Zôyn ə ndaʼà ndò wùə vɛ ə è kwìə fɨazhiə ətəynve, è zûŋtə̀ èfɨazhiə təynve sê ndam zɛ ə ze tə mîə va. Kə wùə vɛ ə è zho è vɛ ə è kwìə fɨazhiə ətəyn tə pə̂ ə tsɨyntə̀ saŋnə̂.

³⁷Ngàyn nə zɨnə mə nyi səmɔʼ mə è pìə nə, ‘Wùə mɔʼɔ zho, və mɔʼɔ ə kwìə.

³⁸Mə tom ghàyn nə ghàyn səʼ kwi efɨaezhiəve afùʼ ndɔ̀ʼɔ ghàyn zho. Ghɨ ndô fə̀ fumə, pîza ghàyn è zhiə ə ghənə efɨ̀aʼ.”

³⁹Ghɨ Sàmalyà setsɨ̀ fumə ə tɔ̂ŋ ə pomə̂ sê Njisə̀s kûmə̀ nə wùzhɔyn ə tə pì nə, “È və tsàyn nâʼàpî ghè vɛ m tyəm nə̂yn.”

⁴⁰Ə pə̀ kə ghɨə Sàmalyà ghɛ pə̀yn sê Njisə̀s, ə chyatə̂ vəyn nə è faŋ yî ghənə, Njisə̀s ə ndamə fu sə mtuʼ mpɛ̀.

⁴¹Ghɨə se tsɨ̀ ə pomə̂ sê Njisə̀s kûmə̀ kə ghənə zɨ zaʼlê ə Vəynze.

⁴²Ghənə ə pìə sê wùzhɔyn nə vɛ nə, “Ghasə pomə se Njisə̀s zôyn, ə va chi kûmə̀ èghɛ zɛ ə ò pì, kûmə̀ nə ghàs è ngɨŋ sas se ə zɨ zaʼlə ə Vəyn, ə kê səmɔʼ nə È lote nyi Sɔ̀zà ə̀ mbi.”

⁴³Ə pə̀ kə È nə̀yn tuʼmè m̀pɛ̀ fu apàs endaʼ ə Sàmalyàkè, Njisə̀s ə ndò ə ndùə apàs endaʼ ə Ngalìlîkè.

⁴⁴Kûmə̀ nə Njisə̀s è ngɨŋə̂ Vəyn tè nyi mə È və pì nə, “Ə ngɨmnə̂ va Fɨ̀aʼtè ə vəyn endaʼ.”

⁴⁵Kə È ndù fɨ ə Ngalìlî, ghɨghe ə fiə ndzɨsə̂ Vəyn àchûŋ kûmə̀ nə ghənə tè nyi mə ə ndù elùʼ ezhiə ezaʼa tsɛze ə Njèlusalɛ̀m ə fe nâʼàpî ghè vɛ ə È tè nəyn ə shɨŋ àzhi ətəynke.

⁴⁶Njisə̀s ə kɛsə̂ ndûə ə endaʼ ə Kanàzè, apàs endaʼ ə Ngalìlîkè, elùʼ vɛ È tè nəyn mômə kɛsə̂ sə mlɨ̂. Wùtwɔ ə̀ ngômnàyn vîvè e nyi fu mə vâ vəyn zafə ndò ə endaʼ ə Kàpanùmzè.

⁴⁷Kə è tè zɨ nə Njisə̀s ə ndò apàs endaʼ ə Njòndyâkè ə pə̀ apàs endaʼ ə Ngalìlîkè, è və ndùə se vəyn ə chyatə̂ Vəyn nə ə È pəyn ə Kàpanùm ə È tsuʼ vayn vî vɛ ə è nyì ke se kwu.

⁴⁸Njisə̀s ə pìə sê vəyn nə, “Wùə sê ghàyn tə pomə̂ va ə̀ tsɛ̂ kə va mə è və fe chwìə è ghɛ ekayntəghe.”

⁴⁹Wùə ghaʼâ ə̀ ngômnàyn ə pə̀ynsə̀ nə, “Pɛ̀ àpɨəyn, ə zaŋse ndo kə ndɔ̀ʼɔ vayn vɨ̂mè kwu.”

⁵⁰Njisə̀s ə ke pì sê vəyn nə, “Nduə; vayn vɛ̂vè nə̀ tɛ.” Wùə ə̀təyn ə pomə̂ èghɛ zɛ ə Njisə̀s pì ə ndò.

⁵¹Endom kə è tè kwɨlə ndûə, ghɨ fɨaʼa vəynghe ə pə̀ è tom sê vəyn nə vâ ə̀ vəyn ə tɛ.

⁵²È və pfɨfə sê ghənə nə, ə̀ nyi ashìŋə̀ àkè kə wiyn kasə ətəyn fe za və, ghənə ə pə̀ynsə̀ nə, “Ə̀ va nyi ə chwìə emɔ̀ʼ èchwì ə zhɔynghɛ kə wiyn ətəyn va za vəyn.”

⁵³Pɨ̀a vâ ə̀təyn ə ke kwàʼtè nə, ə̀ tè nyì kepî fumə ə chwìə kə Njisə̀s tè pì sê Vəyn nə, “Vayn vɛ̂vè nə̀ tɛ.” Kè sə ashìŋə̀ yî sas ə ndɛ vəynze ə pomə̂ kə ə̀kɨ̂m.

⁵⁴Zɨnə mə tè nyi kòmte èghɛ ekaynə zɛ ə Njisə̀s tè nəyn ə Ngalìlî kə è kɛse pə̂yn ə Njòndyâ.