Read Mmen Njɔyn 5 Bible Online

Njɔyn 5 - Mmen bible

Njɔyn 5

¹Epàm mə zɨ̂nə̀, Njisə̀s ə ndùə ə Njèlusalɛ̀m ə fetuʼ fə azhi ə ghɨə Njûsfè.

²Etipìə echondɛ ə mbàyn ə̀ sèpfɨ ə Njèlusalɛ̀m, ndɨla tè nyîə nyi fumə è luʼte kwiə tsɛ te tâyn. Ewàmnè ə Ipilòzè, e tɔŋtə̂ nə Pɛtzatà.

³Nɔ̂yn ə ghɨ̀ ezafəke tè nyîə nyɨ̂ŋtè fumə ə telùʼ te kwiə tsɛte; è ghe efofəghe, è ghə̀ kèngɛchi, è ghɛ pɨas ewìyn əmɔ̀ʼɔve nyi mə və kwu. [1]

⁴

⁵Wùə tè nyì fu mə è və zaf sə sepìŋ m̀ghɨm mta njòse famə.

⁶Njisə̀s ə fe è nyiŋ fu, ə kê nə è nyi mə è və zaf sə se pìŋ se tsɨse. È və ke pfɨf sê vəyn nə, “Ò kɔ̂ŋɔ̀ ndò se tɛ ə?”

⁷Wùə è zafə nə vɛ ə pə̀ynsə̀ nə, “Tyə̀ynsè, m kyi va wùə vîvè fàyn kə è ndəm mi andɨ̀l nâʼàpî ashìŋə̀ àkè kɛ ə tsò nə̂ʼə̀. M mɔ̂msə̀ se ndù fu, wùə ə ndùə sê mi sə shi.”

⁸Njisə̀s ə pîə sê vəyn nə, “Ndwi, ə njìə fèghâm fɛfe ə kwìə.”

⁹Kè sə ashìŋə̀, wùə ə̀təyn ə tɛ, ə ngɛtə̂ fèghâm fə vəynfe ə zhə̀tə̀ se kwì. Zɨnə mə tè kyàyn etuʼ endaʼ.

¹⁰Ghɨə chisə ghe è ghɨə Njûs yîghe ə fe za, ə ke pì sê wùə ə̀təyn nə, “Ə nda nyi etuʼ endaʼ, mə lâŋà pomə̂ va nə ò kwîə tsɛ̂ è ghâmfè.”

¹¹Wùə ə̀təyn ə pìə sê ghənə nə, “Ə̀ pi wùə vɛ ə è tsuʼ mi nə m nji ghâm fɨmfe ə m kwi.”

¹²Ghənə ə pfɨfə sê vəyn nə, “Ə̀ nyi nde wùə nə vɨnə ə è pì nə ò nji ghâm fɛfe ə ò kwiə?”

¹³Pîza, wùə nə vɛ tè lote keva wùə vɛ ə Njisə̀s tè nyi Vəyn kə Njisə̀s tè se nyi mə è və nji ə fètə̂ ànɔ̀yn kɛ ə ke tè nyì fumə.

¹⁴Ə mòtə̀ tso, Njisə̀s ə fɨnə fe vəyn ə Ndɛ Ètsə̀mə ə pìə sê vəyn nə, “Zɨte, o tɛ zôyn. Kə ò fɨyn nəyn pi, ə va za ə ghɛ e kyayn sê ghò, ə zə kwûəmnə̀ kə nyi.”

¹⁵Wùə ə̀təyn ə ndûə tsâ sê ghɨ Njûs echisə ghɛ nə, ə fe tsuʼ Njisə̀s è zhi.

¹⁶Ghənə zhə̀tə̀ se tsə̀fsè ə Njisə̀s, kûmə̀ nə È tsuʼ wùə ə̀təyn etuʼ endaʼ.

¹⁷Njisə̀s ə pə̀ynsə̀ sê ghənə nə, “Pɨ̀a Vɨ̂m ndamə fɨaʼa kə ndò, mə M pɔŋ kyi se fɨ̀aʼà kə zamə.”

¹⁸Wâmnè zɨnə ə nə̀, ghɨə Njûs ghe chisəghe è kyiŋə èndom se zhwiə Njisə̀s, kûmə̀ nə È paʼà kəm chike lâŋ etuʼ endaʼke, pîza ə pa pîə nə Zhə̀fè tè nyi Pɨ̀a Vəyn, famə endom, È və nə̀yn ngɨŋə̂ Vəyn sə̂ nyi èghɨ yî Zhə̀fè.

¹⁹Njisə̀s ə ke pə̀ynsə̀ ghənə nə, “M pîə sê ghàyn səmɔʼ nə Vâ Fèzhə̀ vayn kàʼa è nəyn ghɛze sə və ngɨŋ, È nə̀ kə èghɛ zɛ È fe Pɨ̀a e nə̂. Ghɛ zɛ ə Pɨ̀a nə̀, ə̀ nyì kepî zəynze ə Vayn nə̂.

²⁰Kûmə̀ nə Pɨ̀a nyiə kɔŋə̀ Vayn, È chwìtə̀ Vəyn è ghɛghe əkɨ̂m ghɛ ə È nə̀ È ngɨŋə̂ Vəyn. È tə chwîtə̀ Vəyn è ghɛ ghaʼâghè ghe tsɛ̂ pîə ghɨnə zôyn ə ghàyn əkɨ̂m ə nyi èkaynze.

²¹Kè kə Pɨ̀a zòmsə̀ ghɨghe, È və fo ghənə è ndamze, eghɨ kèpî famə endom, Vayn fo kəpî èndam sê nâʼàpî ndè vɛ È kɔ̀ŋɔ̀ se fo endam.

²²Kèpî famə endom, Pɨ̀a saʼa kəpî va wùə. È və fo tyaʼa sê Vâ Vəyn nə È və saʼa ə̀ghɨ.

²³È nəyn nyi kə ghɨghe əkɨ̂m ə ngɨmnə̂ Vayn kè eghɨ kə ə ngɨmnə Pɨ̀a. Nâʼàpî ndè vɛ ə è ngɨmnə va Vayn, vayn kàʼa è ngɨmne Pɨ̀a vɛ ə È tom Vâ ə̀təyn.

²⁴M pîə sê ghàyn səmɔʼ nə nâʼàpî ndè vɛ ə è zɨə ghɛ zɨme ə pomə̂ sê Vəyn vɛ ə È tom Mi, kyi ndam zɛ ə ze tə mîə va. Ə tə saʼa va vəyn, pîza mə e və kàynè tsɛ elùʼ ekwu ə njiə elùʼ endam.

²⁵M pîə sê ghàyn səmɔʼ nə shîŋə̀ kè pə̀ ndò, mə kə kàynè kwəyn, kə ghɨə ekwuəghe tə zɨə wâmnè ə Va Fèzhə̀zè, ə ghɨ ghɛ ə zɨ zəyn ə ndamə.

²⁶Kè kə Pɨ̀a è ngɨŋə̂ Vəyn nyi eluʼ vɛ ə ndame ndô ətəyn, ə̀ nyì kepî famə endom ə È nə̀yn nə Vayn ə nyi eluʼ vɛ ə ndame ndô ətəyn.

²⁷È və fo kepî Vayn ètyaʼke nə È və saʼa ə̀ghɨ kûmə̀ nə Vâ ə̀təyn nyi Vɛ ə tɔŋtə nə Va Wùə.

²⁸Kə ghàyn ə nyi è kaynze kûmə̀ zɨ̂nə mə; shîŋə̀kè nyiə pə̂ mə ghɨ ekwuə nâʼà ə̀kɨ̂m tə zɨə èwâmnè ə Vəyn,

²⁹ə fɨ pəyn ə ghənə ə tè shyə̀: ghɨ ghɛ ghe nyi mə ghə nə̀yn ghɛ ə chûŋə̀ tə zômə̀ ə ndam, ə ghɨ ghɛ ghe nyi mə ghə nə̀yn pi tə zômə̀ ə poynse ghənə.

³⁰M vayn kàʼa m nəyn ghɛ zhîze ə Mì atyaʼ. M saʼa kə kə Pɨ̀a Vɨ̂m pì nə M saʼ, saʼ Zɨmze nyi səmɔʼ kûmə̀ nə M saʼa chîəva kə M kɔŋə̀ sə Mì ə ngɨŋ, pîza M saʼa kə kə Vɛ È tom Mi kɔ̂ŋɔ̀ nə mə saʼa.

³¹Ə M wamnə̀ kûmə̀ ngɨŋ zɨ̂mè, ə ghɛ zɛ M pî, ə gha vayn kàʼa pomə nə ə̀ nyi eghɛ səmɔʼ.

³²Pîza, wùə nyì ndô kə È wàmnə̀ ə Mì azhəm, M ke nə ghɛ zɛ ə È pìə kûmə̀ Mi nyi mə ə pomə̂.

³³Njɔyn nyi wùə vɛ ə ghàyn tom ndùətom saynse se vəyn, è və wàmnə̀ elùʼ ə səmɔʼve.

³⁴E va chi nə M kyi sə̂ kyi wùə m̀sɔ̀ŋ nə è və nyi tsɛ èsaʼ Vɨ̂mvè. Pîza, M tsâ sê ghàyn kûmə̀ ètsɛ̂ esaʼa Njɔynze kə ghàyn pomə sê Mi ə ghàyn kyi sɔzaze.

³⁵Njɔyn tè nyi kə lâm, ə è fuə fɨnə panə, ghàyn tè nyîə saŋnə̂ se chùmtè epayn ə vəynze kè sə fendiŋə̀ fə ashìŋə̀fè nyî.

³⁶Pîza, M kyi ndô tsɛ̀ èsaʼ è tsɨ̂ə tsɛ vɛ Njɔyn tè kyi. Fɨ̂aʼ tɛ M nə̂, mə nyi tefɨaʼ tɛ ə Pɨ̀a Vɨ̂mvè tè fo nə Mə nə̂, fɨ̂aʼ tə təynte wâmnə̀ ndò ə Mì azhəm chwîtə̀ nə ə̀ Mi tè tom Pɨ̀a.

³⁷Pɨ̀a vɨ̂m vɛ È tom Mi, wâmnə̀ kə pî ə Mì azhəm. Ghàyn paʼà tyəmə̂ zɨə kyə̀ ə̀ Vəyn, ghàyn paʼà tyə̂m fe Vəyn.

³⁸Ghàyn ndə̀mə̀ va tom ə̀ vəyn ə ghàyn ətəm, kûmə̀ nə ghàyn pomə̂ va sê Vɛ ə È tom.

³⁹Ghàyn fɛtə̂ zaʼlə̂ Ŋwàʼlè ə̀ Fèzhə̀ kûmə̀ nə ghàyn kwàʼtə̀ nə ə fètə̂ ə̀təyn ghàyn nə̀ fe endam zɛ ə ze mîə va. Ŋwàʼlè ə̀ Fèzhə̀ nə zɨ̂yn è wàmnə̀ kəpî kûmə̀ Mi.

⁴⁰Pîza, ghàyn e kɔ̂ŋə̀ va se pə̀yn se Mi kə ghàyn ə kyî èndam zɛ ə ze tə mîə va.

⁴¹M kyiŋə va nə wùə m̀sɔ̀ŋ ə tsîtə̀ Mi.

⁴²Pîza M ke ndô kyì əghɨ̀ ghɛ ə ghàyn nyi ghəynghe, pa ke nə ghàyn kyi va kɔ̂ŋ ə Fezhə̀zè ə ghàyn ə təm.

⁴³M pəyn è tyaʼa Pɨ̀a Vɨ̂mkè pîza ghàyn ghe tàʼa fiə mi, mə shîŋə̀ kɛ ə wùə pə̀yn è kə vəynke nə atyaʼ, ghàyn ə fiə vəyn.

⁴⁴Ghàyn kɔ̂ŋɔ̀ sə̂ fiə ètsîtè sê ngɨŋ saynse, pîza kɔŋə̀ va se fiə etsîtè sê Vɛ È nyì və̂yn mɔ̀ʼ, nyi Fèzhə̀, ə ghàyn ə nyi kàʼa pomə zayn sê Mi ə?

⁴⁵Kə ghàyn nə kwaʼtə̀ nə ə̀ nyi Mi vɛ ə M tə ghâmə̀ ghàyn sê Pɨ̀a Vɨ̂mvè nə ghàyn tè pâʼà fi Mi. Mosîs, ə vɛ ghàyn ndə̀m kwaʼtè zaynze ə vəyn ewìyn nyi vɛ ə è tə lotə pîə nə ghàyn nə̀ pofsə̂ ndò.

⁴⁶Ə ghàyn tè pomə sê Mosîs mə ghàyn ə pomə sê Mi kûmə̀ nə è və tə nyàʼ kûmə̀ Mi.

⁴⁷Pîza kə ghàyn tàʼa pomə̂ eghɛ zɛ ə è tè nyâʼ, ghàyn kàʼa ə ghàyn pomə zayn ghɛ zɛ M piə ə?”