Read Mmen Njɔyn 8 Bible Online

Njɔyn 8 - Mmen bible

Njɔyn 8

¹Pîza Njisə̀s ə ndò ndûə ə pfɨ̀nə̀ Sèolìf.

²Nâʼà pɨsə̀pɨsə̀ ə fetuʼ fəmɔ̀ʼɔfe, È və fɨnə ndûə ə Ndɛ Ètsə̀mə. Ghɨ ghəkɨ̂m ə zùŋtə̀ kyîŋə̀ nga Vəyn, È və tsɨsə̂ əchi ə zhə̀tə̀ se zaʼlə ghənə.

³Tyə̀ynsè sə alàŋsè è ghɨə Falàsîə ə njiə pə̂ è wùzhɔyn mə ə ko vəyn, è ve nyɨ̂ŋə̀ yî wùə ə̀ va ndômə̀ vəyn. Ghənə ə pə̀ tɔmə wùzhɔyn ə̀təyn ə ghɨghə əshi ə̀kɨ̂m.

⁴Ghənə pìə sê Njisə̀s nə, “Tyə̀ynsè, ə ko wùzhɔyn vɨ̂yn, è ve nyɨŋ yî wùndômə̀, ə̀ va ndômə̀ vəyn.

⁵Ə ghàs ə alàŋ, Mosîs tè nyaʼ nə ə kyi se tɨmnə̂ zhwiə kyì ə wùzhɔyn nə vɨnə mə è chighe. Ghàyn pìə nə ghɛ sê ghànə?”

⁶Ghənə tè pìə zɨnə se tam echo ə Njisə̀szè, endom kə ghənə pi nə È və nə̀yn pofsê. Pîza È və ngɨmtə̂ nyàʼtə̀ èghɛ è paŋfə agho fə Vəynfe əchi.

⁷Ə pə̀ kə ghənə tyəm ke fu pfɨfə tèpfɨf sê Vəyn, È və ndwìə tyəmə̂ ə pìə se ghənə nə, “Ə wùə nyi ə ghàyn əfètəyn mə è paʼà tyə̂m nəyn pi, è və tɨmə vəyn è chi sə shi.”

⁸È və ke kɛsə ngɨmə̂ sè nyâʼà əchi.

⁹Kə ghənə tè zɨ zɨnə mə, ə ndò nâʼà ə̀kɨ̂m femɔ̀ʼ femɔ̀ʼ, se zhə̀tə̀ kə ə ndumne sə shi. Njisə̀s ə faŋə fumə Və̂yn nɨŋ yî wùzhɔyn ə̀təyn, è pa tyəm ke fumə.

¹⁰Njisə̀s ə ndwìə kɔʼɔ ə pfɨfə sê wùzhɔyn ə̀təyn nə, “Wùzhɔyn ghɨ ghɛ ghâyn ə pə̂yn è ghò fâ? Vîvè paʼà faŋ pî èmɔ̀ʼ se pì nə ə zhwi ghô?”

¹¹Wùzhɔyn ətəyn ə pə̀ynsə̀ nə, “Nâʼà wùə èmɔ̀ʼ pâʼà faŋ ə Pɛ̀ apɨəyn.” Njisə̀s ə pìə sê vəyn nə, “Nâʼàpî Mi nə̀ pɔŋɔ pîə va nə ə zhwi ghô. Ndo kwɨlə pîza kə ò kɛse nəyn pi.”[2]

¹²Njisə̀s ə fɨnə wâmnə̀ sê ghɨə Falàsîə pîə nə, “M nyi epayn ə mbize. Ə chùmtè pîndè Mi, ə è tə tàʼa kwì alɨm pîza ə è tə kyî èpayn zɛ ə ze fo ndame.”

¹³Ghɨə Falàsîə nə ghɛ ə pìə sê Vəyn nə, “Ò fɨyn tyəm kepî tsɛ̀ èsaʼ sê ngɨŋ Zɛ̂zè; pîza ə paʼà pomə tsɛ̀ esaʼ Zɛ̂zè.”

¹⁴Njisə̀s ə pìə sê ghənə nə, “Ngaŋ. Pî kə m wâmnə̀ kûmə̀ ngɨŋ Zɨ̂mzè, ghɛ zɛ ə M pîə nyi ke nâʼà səmɔʼ, kûmə̀ nə M ke ndô luʼ vɛ ə M ndô ətəyn, ke eluʼ vɛ ə M ndùə ətəyn. Ghàyn ke va luʼ vɛ M ndô ətəyn kɨ̀sə eluʼ vɛ M ndûə ətəyn.

¹⁵Ghàyn saʼa è tɔf ə wûə m̀sɔ̀ŋze, M saʼa va wùə vîvè.

¹⁶Pîza, mə M nyi se saʼa wùə, M mə saʼa kə səmɔʼ kûmə̀ nə M saʼa va Mî nɨŋ. M saʼa ghasè Pɨ̀a Vɨm Vɛ ə È tom Mi.

¹⁷Ə̀ nyi mə nyàʼ ə ghàyn alàŋ nə ə ghɨghə pɛ̀ tyəm choze mɔ̀ʼ ə tə̂ èghɛ èmɔ̀ʼ, ə ghɛ zɛ ə ghənə pî ə nyi səmɔʼ

¹⁸Ghàyn ke nə M kyi setsɛ̀ èsaʼ sèpɛ̀, ə ngɨŋ Zɨ̂mè, è Pɨ̀a Vɨm vɛ ə È tom Mi.”

¹⁹Ghɨ ə Falàsî ghə ke pfɨf sê Vəyn nə, “Pɨ̀a Vɛ̂ vàyn?” Njisə̀s ə pə̀ynsə̀ sê ghənə nə, “Ghàyn ke va Mi, ke va Pɨ̀a vɨm. Ə ghàyn fe ke Mi, mə ghàyn ke kepî ndò Pɨ̀a vɨ̂mè.”

²⁰Njisə̀s tè piə əghɛ nə ghɨ̂yn ə̀kɨ̂m mə è zaʼlə̂ ə Ndɛ Ètsə̀mə, etipì elùʼ vɛ ə tè ndə̀mə kɛve ətəyn. Nâʼà wùə vîvè ə tàʼa ko Vəyn kûmə̀ nə shîŋə̀ Vəynke tè nyi ndɔ̀ʼɔ ke kwəyn.

²¹Njisə̀s ə pìə kwəynsə̂ se ghənə nə, “M nə̀ ndô, ə ghàyn ə kyiŋə mi, pîza ə ghàyn tàʼa fe Mi, ə ghàyn kwu ə ghàyn ə sepi. Luʼ vɛ M nə̀ nə̂ M mə nyi ətəyn, ghàyn vayn kàʼa ə pəyn fu.”

²²Ghɨə Njûs ə chisəghe e sè pîə nə, “È pi nə ghâsènì vayn kàʼa ə ndu elùʼ vɛ È ndùə, ze kaʼa zə nyi nə è kyiŋə se zhwiə ngɨŋə̂ Vəyn mə?”

²³Njisə̀s ə pìə sê ghənə nə, “Ghàyn nyi əghɨ mə ghàyn ndò fa chi, pîza M ndo pə̂yn ekwùtwəyn. Ghàyn nyi əghɨ mə ə ndo pə̂yn fa mbi, pîza M vachi wùə ə̀ mbi zɨ̀nə̀.

²⁴Mə pì sê ghàyn nə ghàyn nə̀ kwuə ə ghàyn ə sepi. Ghàyn kyi se kwu ə ghàyn tàʼa pomə nə, ‹M nyi wùə vɛ ə M nyi Vəyn.›”

²⁵Ghənə ə pfɨfə sê Njisə̀s nə, “Ò nyi nâʼà ndè?” Njisə̀s ə pə̀ynsə̀ nə, “M nyi wùə vɛ ə M fe tsàyn sê ghàyn ə zhə̀te nə M nyi Vəyn.

²⁶Ghɛ tsɨ̀ə kə nyi kə M kàʼa ə M pi kûmə̀ ghàyn, fɨnə tsɨ̀ə kəpi kə M kaʼa M pi nə ghàyn ə nə̀yn pofsê. Vɛ ə È tom Mi nyi Wùə səmɔʼ. Ghɛ ghɛ M tsâ sê ghàyn fa mbi nyi ke ə̀ghɛ ghɛ M zɨ sê Vəyn.”

²⁷Ghənə tè paʼà zɨ kê nə Njisə̀s wàmnə̀ se ghənə kûmə̀ Pɨ̀a ə̀ Vəyn.

²⁸Njisə̀s ə pìə sê ghənə nə, “Ghàyn tə kɔʼsə̂ Va wùə ə awâmnè, ə paynte Vəyn, ə ke nə, ‘M nyi wùə vɛ M pîə nə M nyi Vəyn,’ Ə fɨyn kê nə M nə̂ va ghɛ sə mìə ngɨŋ, pîza piə kə èghɛ zɛ Pɨ̀a nyi mə È və pì nə M pi.

²⁹Vɛ ə È tom Mi nyi ghasè Vəyn, È paʼà zà Mi Mî nɨŋ kûmə̀ nə M zâŋsə̀ nə̂ kə èghɛ zɛ ə È kɔ̀ŋə̀.”

³⁰Ghɨ ə tsɨə ghɛ ə tè zɨ kə Njisə̀s wâmnə̀ ghɛ ghɨ̀nə̀ ə pomə̂ se Vəyn.

³¹Njisə̀s ə pìə sê ghɨ ə Njûs ghɛ ə ghe tè pomə sê vəyn nə, “Ə ghàyn chùmtè zaʼlê zɨme, ə ghàyn ə lote nyi sèchùmtè èpàm Sɨmse.

³²Ghàyn nə̀ kê èghɛ zɛ ə ze nyi səmɔʼ, ə səmɔʼ ə̀təyn tə zhəyn za ghàyn.”

³³Ghənə ə pə̀ynsə̀ nə, “Ghàs nyi fe ghâŋfə Aplàghâmfè mə ghàs paʼà tyəm pəyn nyi àkɔs sê wùə vîvè. E tyə̂nə̀ nə ghe kə Ò pì nə, ‹Ə tə zhə̂nə̀ za ghàyn ə?›”

³⁴Njisə̀s ə pìə sê ghənə nə, “M tsâ se ghàyn səmɔʼ nə, nâʼàpî ndè vɛ è nə̀ pi nyi àkɔ̂s sê pi.

³⁵Kɔ̂sà pâʼà tyəmə̂ kɛsə̂ sə wùə è esas ə ndɛ, pîza vâ ndɛ ndamə faŋə ndò esas ə ndɛ.

³⁶E za tyə̀nə̀ nə, ə Vâ wùə zhə̀yn zâ ghò, ò ke nə ò fɨyn va àkɔ̂s səmɔʼ.

³⁷M ke ndò nə ghàyn nyi fe ghâŋfə Aplàghâmfè, pîza kyiŋə se zhwiə Mi kûmə̀ nə ghàyn kɔ̂ŋɔ̀ va se zɨə ezaʼlê Zɨme.

³⁸M tsâ kə èghɛ zɛ ə Pɨ̀a Vɨm tyə̀yn sê Mi, ghàyn nə̂ kə zɛ ə pɨ̀a vâyn tsàyn sê ghàyn.”

³⁹Ghənə ə pə̀ynsə̀ nə, “Aplàghâm nyi pɨ̀a vâsvè.” Njisə̀s ə pìə sê ghənə nə, “Ə ghàyn tè lote nyi ə̀ghɔyn Aplàghâmə̀, mə ghàyn nə̂ kə ə̀ghɛ ghɛ ə Aplàghâm tè nə̂.

⁴⁰Nâʼà ə̀ghɛ ə̀kɨ̂m ghɛ M nyi mə mə tyə̂m nəyn nyi nə m tsayn səmɔʼ sê ghàyn zɛ m zɨ sê Zhə̀fè, pîza ghàyn e mɔ̂msə̀ se zhwiə mi. Ə̀ zɨnə vachi èghɛ zɛ Aplàghâm tè nəyn.

⁴¹Ghàyn nə̂ kə ə̀ghɛ ghɛ ə pɨ̀a vayn nə̂.” Ghənə ə pə̀ynsə̀ nə, “Zhə̀fè È ngɨŋə̂ Vəyn nyi ke Pɨ̀a vɛ ə ghàs kyi, ghàs e nyi ə̀ghɔ Vəynghe səmɔʼ.”

⁴²Njisə̀s ə pìə sê ghənə nə, “Ə Zhə̀fè tè lote nyi Pɨ̀a vâyn, mə ghàyn kɔ̂ŋɔ̀ ndò Mi kûmə̀ nə M ndo pə̂yn se Zhə̀fè nyi zôyn fàyn. M tè paʼà pə̀yn chi sə Mì ə ngɨŋ pîza È tè tom ndô Mi.

⁴³Kûmə̀ ghè ə ghàyn zɨə ke va ghɛ zɛ ə M piə ə? Ə nyi kûmə̀ nə ghàyn kɔ̀ŋɔ̀ va se zɨ ewâmnè Zɨmze.

⁴⁴Ghàyn nyi əghɔ pɨ̀a vâynvè, ndə̂plè, kɔ̂ŋɔ̀ kə sə chûmtə̀ tè kwaʼtè tə vəynte. È tè zhwiə əghɨ kè ə zhə̀te, wàmnə̀ va ghɛze səmɔʼ kûmə̀ nə è kyi va səmɔʼ. Shîŋə̀ kɛ ə è wamə kaŋke, è lotə̂ wamnə̀ kə èwâmnè ə vəynze, kûmə̀ nə è nyi wùə àkaŋ, nyi pɨ̀a sê kwaŋve.

⁴⁵Pîza kûmə̀ nə M wâmnə̀ kə səmɔʼ sê ghàyn, ə̀ za nyi eghɛ zɛ ə ghàyn kɔ̀ŋɔ̀ va se pomə̂ sê Mi.

⁴⁶Ə̀ nyi nde ə ghàyn ə fètəyn ə è kàʼa è tyəyn nə Mə nə̀yn pi ə? Ə M tsâ səmɔʼ sê ghàyn, kûmə̀ ghè ə ghàyn pomə va sê Mi ə?

⁴⁷Nâʼàpî ndè vɛ ə è ndò sê Zhə̀fè, zɨə ndò wâmnè ə Fezhə̀zè. Ghɛ zɛ ə ze nə̂ nə kə ghàyn ə zɨə nyi kûmə̀ nə ghàyn va əghɔ Fezhə̀.”

⁴⁸Ghɨ Njûs ghè ə ke pì sê Njisə̀s nə, “Ghàs tè paʼà nə̀yn àchûŋ se pì nə Ò nyi wùə Sàmalyà, kyi èpamə̂ ə satàynzè ə?”

⁴⁹Njisə̀s ə pìə sê ghənə nə, “M kyi va pamə̂ ə satàynzè. M ngɨmnə̂ Pɨ̀a Vɨm, pîza ghàyn ngɨmnə̂ va Mi.

⁵⁰M kyiŋə va nə ə kɔʼsə̂ Mi. Pîza wùə e nyi kə è kyiŋə nə ə kɔʼsə̂ Mi, mə ə̀ nyi Vəyn vɛ ə È tsɛ̀sə̀ saʼze səmɔʼ.

⁵¹M pîə sê ghàyn səmɔʼ nə, nâʼàpî ndè vɛ ə è nə̀ ghɛ zɛ M zaʼlə, kwuə va.”

⁵²Ghɨ Njûs nə ghɛ ə pìə sê Vəyn nə, “Zôyn ghàs lote ke ndò nə ò nyiə kyi èpamə̂ ə satàynzè! Aplàghâm ə tè kwu, fɨ̀aʼtèsè ə kwuə, pîza Ò pîə nə nâʼàpî ndè vɛ ə è nə̀ ghɛ zɛ ə Ò zaʼlə, ə è tə taʼa kwu.

⁵³Ò tsɨ̀ə tsɛ ndò pɨ̀a vâsvè Aplàghâm vɛ ə è tè kwuə? Fɨ̀aʼtè sə tè kwu kepî, Ò kwàʼtə̀ nə Ò nyi nde?”

⁵⁴Njisə̀s ə pə̀ynsə̀ nə, “Ə M fe kɔʼsə ngɨŋ Zɨ̂m, mə kɔʼsê ətəynze tyə̂nə̀ va ghɛ zhîze. Ə̀ nyi Pɨ̀a Vɨm kə È nə̀ nə Mə kyi èkɔʼsê, ə Vɛ ə ghàyn pìə nə ə̀ nyi Pɨ̀a vàyn.

⁵⁵Pî kə ghàyn ke va Vəyn, pîza M ke Vəyn. Ə M pi nə M ke va Vəyn, ə Mə nyi kepî wùə àkaŋ kə ghàyn. Pîza M ke ndô Vəyn nə̂ ə̀ghɛ ghɛ ə È pìə.

⁵⁶Pɨ̀a vâyn Aplàghâm tè nyiə saŋnə̂ nə è tə fe fètuʼ fɛ M tə pə̂ ətəyn. Ə fe fəynfe sè saŋnə̂.”

⁵⁷Ghɨ ətəynghe ə pìə se Vəyn nə, “Ò paʼà nyìəm zaʼâ pî pìŋ m̀ghɨm m tâyn, mə O kàynè fe Aplàghâm ə?”

⁵⁸Njisə̀s ə pə̀ynsə̀ sê ghənə nə, “M piə sê ghàyn səmɔʼ nə, ə tè piə piə Aplàghâm mə ‹M nyîə nyi!›”

⁵⁹Ə pə̀ kə ghɨə tə zɨ zamə, ghənə ə komtə̂ ə̀chi se tɨmnə̂ Vəyn ətəyn, pîza Njisə̀s ə ndə̀ytə̀ ngɨŋə̂ Vəyn ə ndò fu ə Ndɛ Ètsə̀mə.