Read Mmen Njɔyn 9 Bible Online

Njɔyn 9 - Mmen bible

Njɔyn 9

¹Kə Njisə̀s tè tsɛ̂ ndûə, ə fe wùə vîvè mə ə tè piə vəyn mə è və fòf.

²Chùmtè èpàm sə vəynse ə pfɨfə sê vəyn nə, “Tyə̀ynsè, ə̀ nə̀yn pi ə ndè nə ə piə wùə vɨ̀nə mə è və fòfə? Ə̀ nyi pi ə̀ vəyn mə zə pɨ̀a, mə zə nyìə?”

³Njisə̀s ə pə̀ynsə̀ nə, “Fôf ə vəynze kyi va ghɛ zhîze se nə̀yn è pisə vəynse, pî zə pɨa, pî zə nyì. Zɨnə kyayn kə tyaʼa Fezhə̀kè fɨ̂aʼ tɔynə̂ ə vəyn ewìyn.

⁴Kè kə tuʼve pa panə, ghâsènì kyi se nə̀yn efɨaʼa ə Vɛ zə È tom Mi; tuʼe chîə pə̂ ndò mə wùə vayn kàʼa è fɨyn fɨ̂aʼ.

⁵Kè kə M nyi ə mbi, M nyi epayn sê mbi.”

⁶Ə pə̀ kə Njisə̀s wàmnə̀ nyi, È və tsɨə m̀tɛ̂ ə chi, ə taynə̂ àchaʼ ətəyn, ə zɔʼlə̂ ə wùə èfòfə nə vɛ əshi,

⁷ə pìə sê vəyn nə, “Nduə shù kyâʼ zɛze andɨ̀l ə Silùomə̀.” (Silùom nə zɨ̀yn tè nyi ewàmnè endaʼze nə, “Tom.”) Wùə ə̀təyn ə ndùə, ə shùə èkyaʼa vəyn ə kɛsə̂ pə̂ mə è fe ndò.

⁸Kɔtə vəynte è ghɛ ə ghe tè ndamə fe vəyn è ve ndɔnə e sè pfɨfə nə, “Ə̀ vɨ̀nə va wùə vɛ ə è tsɨs tsɛ ndɔnə̂?”

⁹Ghɨə mɔ̀ʼɔghe ə pîə nə “Ə̀ nyi vəyn” Pîza ghə mɔ̀ʼɔghe ə pîə nə, “Ngâŋngaŋ, ə̀ vachi vəyn, è fuse ndô vəyn.” Wùə ə̀təyn è ngɨŋə̂ vəyn ə pìə nə “Ə̀ nyi mi wùə ə̀təyn.”

¹⁰Ghənə ə pfɨfə sê vəyn nə, “Ò kwì zayn sə̂ fe tèluʼ zôyn ə?”

¹¹È və pə̀ynsə̀ nə, “Wùə vɛ ə tɔŋtə nə Njisə̀s fə tayne achaʼ ə zɔʼɔ ə mì əshi, ə pìə nə m ndu shu ekyâʼ zɨmze andɨ̀l ə Silùomə̀, m vɛ m ndû, ə shù mɨ̂sə̀ tso kə nyî ə zhə̀tə̀ se fe!”

¹²Ghənə ə pfɨfə sê vəyn nə, “Wùə ə̀təyn vàyn zə?” È və pìə nə, “M ke va.”

¹³Ghənə ə ke njiə ndù è wùə nə vɛ ə è tè nyi mə è və fòf sè ghɨə Falàsî.

¹⁴Tuʼ fɛ ə Njisə̀s tè tayne chaʼke, ə tsuʼə wùə èfòfə nə vɛ ətəyn tè nyi etuʼ endaʼ.

¹⁵Ghɨə Falàsîə nə ghɛ ə pfɨfə kwəynsə̂ sê wùə nə vɛ nə è kwì zayn sə̂ fe tèluʼ ə? È və pìə nə, “È fə tayne achaʼ ə zɔʼlə̂ ə mì əshi, m vɛ m ndû shû kyâʼ zɨme, se nyi zôyn fe.”

¹⁶Ghɨə Falàsî yîghe ə pìə nə, “Wùə vɛ ə È nə̀yn zɨnə vayn kaʼa ə nyi wùə mə ə̀ tom Fèzhə̀, kûmə nə è paʼà kɔʼsê tuʼ endaʼve.” Pîza yîghe e pîə nə, wùə ə̀ghɛ piə vayn kàʼa è və nə̂ ə̀ghɛ ə kayntə nyi. Kè sə ashìŋə̀, chyâsè ewìynze ə fɨə ə ghənə ə fètəyn.

¹⁷Ə môtə̀ kə nyi, ghənə ə kɛsə̂ pfɨfə sê wùə vɛ ə Njisə̀s fè tsuʼ za nə, “Ò pi nə È fe tsuʼ ghô ə gho efòf, nâʼà ghò ò kwâʼtə̀ nə ghe kûmə̀ və?” Wùə ə̀təyn ə pə̀ynsə̀ kə nə, “È nyi fɨ̀aʼtè.”

¹⁸Ghɨ chisə è ghɨə Njûsə̀ tè pomə̂ va nə wùə nə vɨ̂yn tè nyi mə è və tə fòf tsɔ̀fə kə è və kɛse fe zôyn. Zɨnə ə nə̂ nə ghənə tɔŋɔ pɨ̀a yî nyì ə̀ wùə èfòfə ə̀təyn.

¹⁹Ə pfɨfə sê ghənə nə, “Ə̀ vɨnə nyi vayn vâyn və? Ghàyn pi nə ə tè piə vəyn mə è və fòf, è kwì zayn sə̂ fe tèluʼ zo?”

²⁰Ghənə ə pomə ə piə nə, “Ghàs ke ndô nə è nyi vayn vâsvè, ke nə ə tè piə vəyn mə è və fòf.

²¹Pîza ke va nə, è kwì zayn sə̂ fe tèluʼ zôyn ə, ke va nə, ə̀ tsuʼ ndè vəyn ə. Ghàyn pfɨf sê vəyn, è fɨyn va vâyn èpɔ. Nâʼà vəyn kàʼa è tsayn ghɛ zɛ ə ze kyâyn.”

²²Pɨ̀a vəyn yî nyì ə̀ vəyn tè wàmnə̀ nyî kûmə̀ kə ghənə tè fànə ghɨə chisə ghɨə Njûsghè. Ghənə tè nyi mə ə ndə̀m nə ə̀ tɔ̀ʼ pi ndè nə Njisə̀s nyi wùə vɛ ə nyi mə chɔʼ ndəm, ə chum vəyn, ə è və fɨnə njiə va ə ndɛ̂ atsɨ̀ynte.

²³Ə̀ za nyi eghɛ zɛ ə pɨ̀a vəyn yî nyìə vəyn tè pə̀ynsə̀ nə, “È fɨyn va vâyn èpɔ. Ghàyn pfɨf sê vəyn.”

²⁴Ghənə ə fɨnə tɔŋɔ wùə vɛ Njisə̀s tè tsuʼ nə ə nyi teshìŋə̀ tèpɛ̀, ə pìə sê vəyn nə, “Pì səmɔʼ ə Zhə̀fè ezə, ghàs nyîə ke nə wùə vɛ ə È tsuʼ ghô nyi wùə ə̀ghɛ epighe.”

²⁵È və fɨnə pə̀ynsə̀ kə nə, “M ke va nə È nyi wùə ə̀ghɛ piə mə È va: Ghɛ ze mɔ̀ʼ m ke nyi nə m tè nyi mə mə fòf sè fe zôyn.”

²⁶Ghənə ə fɨnə pfɨfə nə, “È fè nə̀yn nâʼà nə ghe sê ghò? È kwì zayn se tsuʼ afòf kɛ kə?”

²⁷Wùə ətəyn ə pìə nə, “M nyi mə mə kàynè tsayn sê ghàyn, ghàyn e kɔ̀ŋɔ̀ va se zɨ. Ghàyn fɨnə kyiŋə se zɨ kûmə̀ ghè? Zho fîfe ə ghàyn è ngɨŋ saynse ə kɔ̀ŋə̀ kəpî sə nyi sè chùmtè èpàm sə Vəynse.”

²⁸Ghənə e sè sôylə̀ vəyn pîə nə, “Ò nyi chùmtè èpàm ə̀ wùə nə vɛ! Ghàs nyi sechùmtè èpàm sə Mosîsè.

²⁹Ghàs nyîə ke nə Zhə̀fè ə tə wàmnə̀ sê Mosîs, pîza kepî va nə wùə vɨ̀nə ndò ghayn zə!”

³⁰Wùə ətəyn ə pə̀ynsə̀ nə, “Ə̀ nyi eghɛ ekaynəze nə ghàyn ke va nə è ndò ghayn, pîza mə È və tsuʼ mi ə mìə afòf!

³¹Ghâsènì nyîə ke nə Zhə̀fè zɨtə̂ va tsə̂m ə ghɨ̀ə epighe, pîza È zɨtə̂ kə è tsə̂m əghɨ̀ ghɛ ə fo kɔʼsêzè sê Vəyn nə̂ èghɛ zɛ ə È kyiŋə.

³²Nâʼà kə mbi tè zhə̀te, wùə pâʼà tyə̂m zɨ nə wùə vîvè nyì ndô mə è kàʼa è nəyn nə wùə ə fe mə ə tè piə vəyn mə è və fòf.

³³Ə wùə vɨ̀nə fe va nə È ndò pə̀yn sê Zhə̀fè, ə è və vayn kàʼa è nəyn ghɛ kə zɨ̂nə̀.”

³⁴Ghɨ ətəyn ghe ə pə̀ynsə̀ sə̂ vəyn nə, “Ə tè piə ghô ə pi ə njìə kɔʼsə̂ kə ghò ə fètə̂ təyn, ô sè kyiŋə se zaʼlə ghàs zo?” Ghənə ə ke chùmə fɨsə vəyn ə ndɛ atsɨ̀ynte.

³⁵Kə Njisə̀s zɨ nə ə chùm fɨse wùə vɛ ə è tè tsuʼ za ə ndɛ̂ atsɨ̀ynte, È və kyiŋə wùə ə̀təyn. Ə pə̀ kə È fe vəyn ə pfɨfə sê vəyn nə, “Ò pomə ndò sê Vâ wùə ə?”

³⁶Wùə ə̀təyn ə pə̀ynsə̀ nə, “Vâ wùə nə vɛ nyi nde ə Pɛ̀ àpɨəyn? Tsàyn sê mi kə m pomə sê vəyn.”

³⁷Njisə̀s ə pîə sê vəyn nə, “Ò nyi mə ò kàynè fe vəyn, Ə̀ nyi ke nâʼà vəyn ə È wàmnə̀ sê ghò zôyn.”

³⁸Wùə ə̀təyn ə ke pì nə, “Mə pomə ə Pɛ̂!” È və tɨmə ə ndzɨs ə Njisə̀s əshi sè pɔmsə̂ Vəyn.

³⁹Njisə̀s ə ke pì sê vəyn nə, “M pəyn fâ mbi se saʼ əghɨ, se nə̀yn nə ghɨ ghɛ fe va ə fe, ə ghɛ ə ghe fe, ə ghe fof.”

⁴⁰Ghɨ ə Falàsîə yîghe ə ghe tè nyì fu yî ghə̀ Njisə̀s ə zɨə èghɛ zɛ ə È pì ə pfɨfə sê vəyn nə, “Ghàs ke ndô nə Ò pìə va nə ghàs ə pɔŋ fof ə?”

⁴¹Njisə̀s ə pə̀ynsə̀ sê ghənə nə, “Ə ghàyn fè pomə̂ nə ghàyn fe va, mə pi saynse fɨyn va ə ghàyn ətu. Pîza, zôyn kə ghàyn sè ndə̂mə̀ kə nə ghàyn fe ndò, pi saynse ə faŋ ke ndò.”