Read Mmen Ətefɨ̂aʼ 10 Bible Online

Ətefɨ̂aʼ 10 - Mmen bible

Ətefɨ̂aʼ 10

¹Wùə Lûm vîvè tè nyi ə endaʼ ə Kàysalyàzè, zə vəynze e nyi Kɔ̀nilùs. È tè nyi atu sê nɔ̂yn ə sesokə̀ʼ ke ewə̀, mə ə tɔŋtə̂ nə, “Nɔ̂yn ə se sokə̀ʼke wəve mə nyi kə Italìkè.”

²Kɔ̀nilùs tè nyi wùə chumtə̀ ə̀ghɛ ə Fezhə̀ghè epàm. Vəyn è sas ə ndɛ vəynze ekɨ̂m tè nyîə nə̂ èfɨaʼa Fezhə̀zè. Kɔ̀nilùs tè fo ètsâmtè sê ghɨ afɨfə Njûsghè, fɨnə tsə̂mə̀ sê Zhə̀fè shîŋə̀ tekɨ̂m.

³Ə tè nyi tuʼ fîfe, ə sechwìə sèta mə chwi ə pɔ, è və fe ətelaynəlayn, fumə ə telaynəlayn è və fe paynsə̂ tsì ə̀ Fèzhə̀. E zə tɔŋɔ̂ vəyn nə, “Kɔ̀nilùs.”

⁴È və naynə̂ ndûə tsì ə̀təyn kè efàyn efàyn, ə pìə nə, “Pɛ̂pɛ ə̀ nyi ghe?” Tsì nə zɛ ə pə̀ynsə̀ nə, “Zhə̀fè ə zɨ tsə̂m zɛze ə fɨnə fe ètsâmtè zɛ ə ò fo sê ghɨ afɨfə, sè nyi èpɨaʼtêzè se pomə̂ ə etsə̂m zɛze.

⁵Tiynse ghɨə zôyn, endaʼ ə Njopàzè nə ndu tɔŋɔ wùə vîvè mə zə vəyn nyi Shimùyn e tɔŋtə̂ nə Pità.

⁶È ndamə yî wùə, è ve fɨ̂aʼà èfɨaʼ ə se pfɨ̀ sə nyâmsè, zə vəynze e nyi Shimùyn, è ve ndamə paʼsə̂ ə etipìə ènjwì ə fengwaŋve.”

⁷Tsì ə̀təyn ə wàmnə̀ mɨ̂sə̀ sê Kɔ̀nilùs ə ndò. Kɔ̀nilùs ə tɔŋɔ̂ ə̀ghɨ fɨaʼa ə vəynghe əpɛ̀, paʼsə̂ è sokə̀ʼ èmɔ̀ʼ è chûmtə̀ èghɛ ə Fezhə̀zè epàm mə ə̀ nyi sokə̀ʼ vɛ ə è tè tsɨ̀ŋnə Kɔ̀nilùs.

⁸Ə tsà nâʼà ə̀ghɛ ə̀kɨ̂m sê ghənə ghɛ ə tsiə Fèzhə̀ fe pì sê vəyn, ə ke tomə ghənə ə Njopà.

⁹Tuʼve ə zo, ghənə ə kwìə sè paʼsə̂ ndûə ə Njopà mə chwì ə payn tɛ, Pità ə kɔʼɔ etûə ndɛ se tsə̀m.

¹⁰Chɨ̀ŋ ə zafə vəyn, è ve sè kyiŋə àfɨa se zhi, ə pə̀ kə sè pɨaʼtə fɨazhiəve nə è zhi, è və fe ə̀ghɛ ətelaynəlayn.

¹¹È və fe kə wuləke chwî, e tsosə̂ pə̀ àfɨa ə chi nyiə kə apâŋ ə sendzɨs eghaʼâkè, mə ghaŋsê pɨ̂asvè ekwàʼ.

¹²Əfètə̂ təyn tè nyi tekyì tə senyàm sekɨ̂m; sɛ ə se shinə əchi, è nyam sɛ ə se kwîə èfɨəynte kyàʼ, è nɨŋ mə mbvɨ̂ynmè.

¹³È və zɨə kyə̀, è zə tsâ se vəyn nə, “Pità, ndwi zhwi nyam sɨ̀yn ə kwɨlə.”

¹⁴Pîza Pità ə pìə nə, “M vayn kàʼa m mɔm ə Pɛ̂pɛ, kûmə̀ nə m pâʼà tyəm zhi fɨake, saʼ endaʼ zasze e pamə kɨ̀sə kɛ ə ke zo va ə Zhə̀fè shi.”

¹⁵Kyə̀ ətəyn ə fɨnə pîə se vəyn nə, “Kə ò tə ndəm nə fɨake zo va mə Zhə̀fè ə nə̀yn ke zo kwəynə̂.”

¹⁶Zə kyànə̀ zamə shîŋə̀ teta, ə kɛsə̂ njiə kɔʼsə àpâŋ afɨa nə kɛ ekwùtwəyn.

¹⁷Pità e sè kayntə nə, ghɛ ə telaynəlayn nə ghɨnə mə fe kyiŋə se tyə̀yn nə ghɛ sê zhiə. Kə è pa kayntə kə ndô, ghɨ ghɛ ə Kɔ̀nilùs fè tom za ə kyiŋə fe ndɛ Shimùyn ə pə̀ tyəmə echô mbàyn,

¹⁸ə tɔŋɔ pfɨfə nə, “Wùə èmòtə pə nyi ndô fayn ndɛ zə vəynze e nyi Shimuyn Pità ə?”

¹⁹Pità tè pa kwâʼtə̀ kə nə ghɛ zɛ ə zhi fə fe ə telaynəlayn fe tyə̀nə nə ghe ə, Zuʼse Ŋwaʼase ə pìə sê vəyn nə, “Zɨte ə Pità, ghɨ nyi fâyn ə̀ ta, kyiŋə ghò.

²⁰Pɨaʼte, ə tso ndûə, kə ò məʼne se ndù ghâyn ghənə kûmə̀ nə ə̀ tom Mi ghənə.”

²¹Kè sə ashìŋə̀, Pità ə tso ndùə kotə̂ ə̀ghɨ təynghe ə piə sê ghənə nə, “Ə̀ nyi mi vɛ ə ghàyn kyiŋə. Ghàyn pə̀ se gha ghe?”

²²Ghɨ ə təynghe ə pìə nə, “Ghàs nyi mə ə̀ tom Kɔ̀nilùs, àtuə sesokə̀ʼa. È nyì ke nâʼà wùə chichi, fɨaʼà se Zhə̀fè, ghɨ Njûsghè əkɨ̂m nyîə ngɨmnə̂ vəyn. Tsì ə̀ Fèzhə̀ zhîzè pì sê vəyn nə, è tom tɔŋɔ ghò ə ò pəyn ə və ə ndɛ kə è zɨ ghɛ zɛ ə ò kyi se tsàyn se vəyn.”

²³Pità ə pìə nə ghənə nji pəyn ə yighə̀ ghənə pɨəyn. Tuʼve ə zo, Pità ə ndò yî ghənə paʼsə̂ è ghɨ pomə əmɔ̀ʼɔghe ə Njopà.

²⁴Ə fetuʼ femɔ̀ʼɔfe mə zɛ mə tsɛ̀, ghə̀ Pità ə kwìə ndûə njiə ə Kàysalyà. Kɔ̀nilùs è ngɨŋə̂ vəyn è sas ə ndɛ vəynze, è soynsə vəyn sɛ ə è tè ndàmne tè nyîə lɨmtə̂ ghə̀ Pità.

²⁵Kè kə Pità tè kyiŋə se nji ə ndɛ, Kɔ̀nilùs ə ndùə kwəynə̂ è vəyn ə ngwuʼtə̂ ə vəyn əshi se fo vəyn è kɔʼsê ə vəynze.

²⁶Pità ə ndwìsə tyəmsə̂ vəyn ə pìə sê vəyn nə, “Ndwi tyəm è gholə m pɔŋ nyi kepî wùə m̀sɔ̀ŋ.”

²⁷Pità ə wàmnə̀ yî Kɔ̀nilùs zâ, ə njiə ndûə ə ndɛ ə fe mə ghɨghe ə zùŋtè ətəyn, tsɨ̀ə kə nyî.

²⁸È və pîə sê ghənə nə, “Ghàyn ke ndô nə saʼ əghɨ̀ ə Njûszè pomə̂ va nə ghàs ə mô ètum ə ghənə sendɛ, pomə̂ va nə ghàs ə kwîə ghasè tum ə təynve. Pîza Zhə̀fè ə tyə̀yn sê mi nə, m kyi va se pì nə wùə zo kwəynə̂ va kɨ̀sə nə è nyîə fɨ̂mə̀ ə Zhə̀fè shi.

²⁹Ə̀ za nyi eghɛ zɛ ə Kɔ̀nilùs fè tom tɔŋɔ mi, m tàʼa pfɨf eghɛ nâʼà səkɔs, pîza ə pə̀ kə ndò. Tsa ə Kɔ̀nilùs nə, ò tom tɔŋɔ mi sə ghe ə?”

³⁰Kɔ̀nilùs ə pìə nə, “Ə̀ tsɛ̀ ke m̀tuʼ mta zôyn kə m ma tsə̂mə̀ fâ mìə ndɛ ashìŋə̀ ə sechwìə sèta èchwì, ə pfɨ̀ŋə̀ fe wùə kə è tyəm ə mì əshi mə è və màʼ ndzɨse, se fɨfə nyaynə̂ kə nyî,

³¹ə pìə sê mi nə, ‘Kɔ̀nilùs, Zhə̀fè ə zɨ tsə̂m zɛze ə fɨnə fe ètsâmtè zɛ ə ò fo sê ghɨ afɨfə.

³²Tiynse wùə ə Njopà, ə ghənə ndu tɔŋɔ wùə fu, zə vəyn ze nyi Shimùyn mə ə tɔŋtə̂ vəyn nə Pità. È nyi wùə èmòtə pə ə wùə ə ndɛ mə è nə̀ efɨaʼ è pfɨ̀ sə nyâmsè e tɔŋtə̂ vəyn nə Shimùyn. Shimùyn ə̀təyn ndamə paʼsə̂ etipìə ènjwì ə fengwaŋve.’

³³Mə ke tiynsə̂ tom kè ashìŋə̀ nə kɛ nə ə pəyn ghò, ò vɛ o nə̀yn achûŋ ə pə̀. Zôyn se nyi, ghâsènì e tsɨ̂yntè nyi ke ə Zhə̀fè əshi, lɨmtə̂ se zɨə əghɛ ə̀kɨ̂m ghɛ ə Pɛ̂pɛ Zhə̀fè pi nə ò tsayn sê ghàs.”

³⁴Pità ə pìə nə, “Ə̀ nyì zôyn kə kê səmɔʼ nə Zhə̀fè njìə ə̀ghɨ ə̀kɨ̂m eghɨ.

³⁵Ə ò fɨ nâʼà pi endaʼ èkè, ò kɔʼsə Fəynfe, fɨnə nə̂ ə̀ghɛ ghɛ ə fe kyiŋə, ə Fe fi njisê ghò.

³⁶Ghàyn nyiə ke tom zɛ ə Zhə̀fè tè tom sê ghɨə Isìlâyghè, ə̀ nyi tom èchùŋ zɛ ə è pə̀ è pɔ̂ynè tɔynə̂ ə Njisə̀s Klâys. Njisə̀s nə vɨ̂yn nyi Pɛ̂pɛ sê ghɨghe əkɨ̂m.

³⁷Ghàyn ke ndò ghɛ ghɛ ə ghe tè kyayn əkɨ̂m tɔynə̂ apàs endaʼ ə Njòndyâkè akɨ̂m kè se zhə̀tə̀ ə Ngalìlî. Zɨnə mə tè kyayn mə Njɔyn ə kàynè tsayn se ghɨghe kûmə̀ èfi mmòze.

³⁸Ghàyn kyi sə̂ ke nə Zhə̀fè ə tə kɨmnê Njisə̀s, ə wùə Nazalɛ̀t, ə fo Sezuʼ se Ŋwaʼase sê Vəyn è tyaʼa. Njisə̀s tè kwiə ka kə luʼ tekɨ̂m, nə̂ əghɛ echûŋə̀. Kə Zhə̀fè tè nyì yî Vəyn, È tè tsuʼə nâʼà pîndè vɛ ə è tè nyi ə ndə̂plè etyə̂ àtyaʼ.

³⁹Ghàs nyi setsɛ̀ èsaʼ sê ghɛ əkɨ̂m ghɛ ə È tè nə̀yn ə Njèlusalɛ̀m è luʼtə mɔ̀ʼɔte endaʼ ə Isìlâyzè. Ə tè zhwi Vəyn mə ə paynte awâmnè.

⁴⁰Pîza epàmə m̀tuʼ mta, Zhə̀fè ə nə̀ È və zômə̀, ə nə̀ nə ghɨə fe Vəyn.

⁴¹Ə̀ vachi ə̀ghɨ ə̀kɨ̂m ə tè fe Vəyn. Ə̀ nyi əghɨ ghɛ ə Zhə̀fè tè nyi mə Fə kàynè chɔʼ ndəm ə ghe tə fe Vəyn. E za tyə̀nə nə ə̀ nyi ghàs ghɛ ə tè zhi ə mɨə è Vəyn kə è tè zòmə.

⁴²È və fo sə alàŋ nə ghàs tsayn tom èchùŋ nə zɨ̂yn se tyə̀n səmɔʼ nə È nyi ke nâʼà wùə vɛ ə Zhə̀fè chɔʼ ndə̂m nə È və saʼa ə̀ghɨ ghɛ ə pa ndamə è ghɛ nyi mə kwutê.

⁴³Ə̀ nyi kûmə̀ Vəyn ə fɨ̀aʼtè sekɨ̂m tè wàmnə̀ pîə nə, ə̂ pomə pi ndè sê Vəyn, ə Zhə̀fè lɛ̀sè fo əghɛ ə piə vəynghe. Zɨnə mə tə kyanə̀ atyaʼ kɛ ə ke nyi ə Vəyn ezə.”

⁴⁴Kə Pità tè pa wâmnə̀, Zuʼse Ŋwaʼase ə tso pə ə nâʼà pî ndè ətu vɛ ə è tè zɨtə wâmnè ə vəyn.

⁴⁵Ghɨ Njûs ə pomə ghɛ ə yîghə̀ Pità tè ndò pə̀yn ə Njopà əmɔʼ e sè nyi èkaynze kə Zhə̀fè fo Zuʼse Ŋwaʼase sê ghɨ ghɛ ə̀ tè va ə ghɨ ə Njûsghè.

⁴⁶Kûmə̀ nə ghɨ Njûs nə ghɨyn ə tə zɨ kə ghɨ nə ghɨnə ə̀ tè va əghɨ ə Njûghè wàmnə̀ wâmnè tə tendaʼ tə ndôtè ndɔ̀ʼɔ zaʼle, pɔmsə̂ Fèzhə̀ kûmə̀ ə̀ghɛ ə kayntə ghɛ ə Fe nə̀yn. Pità ə ke pì nə,

⁴⁷“Ghɨ ghɨnə nyi mə Zuʼse Ŋwaʼase ə pə̀yn sê ghənə kèpi kə se tè pə̀yn sê ghàs. Ə̀ nyiə kàʼa ə fɨyn tâsè ghè nə kə ghənə fi môm mə?”

⁴⁸È və wàmnə̀ za ə ke pì nə ə fo môm sê ghənə ezə Njisə̀s Klâyszè. Ghənə ə pìə sê Pità nə è ndamte yîghə̀ ghənə sə mtuʼlə̂.