Read Mmen Ətefɨ̂aʼ 11 Bible Online

Ətefɨ̂aʼ 11 - Mmen bible

Ətefɨ̂aʼ 11

¹Ghɨətom ə Njisə̀sghè è ghɨə pomə əmɔ̀ʼɔ̂ ghɛ ə ghe tè nyi epɨ̀as endaʼ vekɨ̂m ə Njòndyâ, ə tə zɨ nə ghɨatumə ə pɔŋ fi ndzɨsê ghɛ ə Fezhə̀zè.

²Ə tè nyi kə Pità kɛse kɔʼ ə Njèlusalɛ̀m, ghɨə ghɛ ə ghe tè pìə nə ə kyi sə̂ se ə̀nam ə ghɨ̀ə ətumə, ghənə ə zhə̀tə̀ se pì nə è və nə̀yn pofse piə nə,

³“Kûmə̀ ghe ə ò ndùə sê ghɨ ghɛ ə vachi ə̀ghɨ Njûsghè, ə̀ghɨ ndɔ̀ʼɔ se nam ə ghənə̂ghè, ghâynghə̀ ghənə e zhiə paʼsə̂ kə nâʼà luʼve emɔ̀ʼ ə?”

⁴Pità ə tsà nâʼà ə̀ghɛ ə̀kɨ̂m ghɛ ə ghe tè kyâyn kè ə zhə̀te. È və tsà se ghənə nə.

⁵“M tè nyi endaʼ ə Njopàzè tsə̂mə̀, ə fe ə̀ghɛ ə telaynəlayn. Fɨa kyîke ə tso pə̂ ekwùtwəyn nyi ke kə apâŋ ə se ndzɨs eghaʼakè kə piə ə kyi pɨ̂asvè kwàʼ tsosə̂ pə. Ə tsosə̂ pə̂ kəynke ə mì əshi.

⁶Mə pìə m tɔ̂ʼɔ̀ naynə ndò ə fe sènyam sə ndɛse è nyam sə mbvɨynse, è fɨa e ŋaŋnəve, è nɨ̂ŋmə mbvɨ̂ynmè.

⁷Mə zɨə kyə̀ è pîə sê mi nə, ‘Pità, ndwi kɔʼ, zhwi nyam sɨ̀yn, ə kwɨlə.’

⁸Pîza mə pìə nə, ‘Pɛ̂pɛ m vayn kàʼa m mɔm ghɛ nə zɨ̂yn. Kûmə̀ nə fɨa pâʼà tyəmə njiə ə mi echo, lâŋ endaʼ kaske e pamə.’

⁹Zhə̀fè ə fɨnə pîə kə nə, ‘Kə M ndə̂m nə fɨake nyîə zo kwəynə se zhi, kə ò pi nə lâŋ endaʼ kaynke nyîə pamə pî àfɨa mə ke zo kwəynə̂ va ə Zhə̀fè shi.’

¹⁰È və wàmnə̀ nyi se zaʼâ shîŋə̀ teta, ə kɛse shînə̀ kɔʼsə èfɨa ətəynve ekwùtwəyn nâʼà èkɨ̂m.

¹¹Kè sə ashìŋə̀, ghɨghe ə pə̀ ə̀ ta ə ndɛ zɛ ə m tè ndamə ətəyn, mə ə tom pə̂yn endaʼ ə Kaysalyàzè nə ghənə pəyn fe mi.

¹²Zuʼse Ŋwaʼase ə pìə sê mi nə kə m məʼne se ndù ghâsè ghə̀ ghənə. Ghɨə pomə ghɨyn ə̀ tufə kə m njî ə Njopà ə pə̀, ghasè ghənə ə ndùə əmɔʼ ə Kàysalyà ə njiə ə wùə vîvè ə ndɛ e tɔŋtə̂ nə Kɔ̀nilùs.

¹³È və tsà sê ghàs kə è fè fe tsì, e tyəm ə vəyn ə ndɛ. Tsì ətəyn ə pîə sê vəyn nə, ‘Tom wùə ə è ndu tɔŋɔ wùə ə Njopà, mə zətə vəyn tekɨ̂m nyi Shimuyn Pità.

¹⁴Shɨ̂ŋə̀ kɛ ə è pə̀yn ə è tsayn tom sê ghàyn, ə tom ə̀təyn nəyn ə Zhə̀fè sɔza ghàyn, è sas ə ndɛ zɛze.’

¹⁵Mə zhə̀tə̀ pî ashìŋə̀ àkè se wàmnè sê ghənə, Zuʼse Ŋwaʼase ə pə̀ sê ghənə kèpi kə se tè pə̀yn sê ghâsènì ə zhə̀te.

¹⁶Mə ke pɨ̀əytè eghɛ zɛ Pɛ̂pɛ tè pi. È tè pi nə, ‘Njɔyn tè fo mmo sê ghɨ è mô mə̂ tsòm, pîza ə tə fo mmo sê ghàyn è Zuʼse Ŋwaʼase.’

¹⁷Mə ke fe səmɔʼ nə Zhə̀fè ə fo foze sê ghɨ ghɛ ə̀ vachi ə̀ghɨ ə Njûsghè kèpi kə fe tè fo sê ghâsènì kə ghâsènì tè pomə sê Pɛ̂pɛ Njisə̀s Klâys. M nyiə tè nyì nâʼà ndè se tàm eghɛ zɛ ə Zhə̀fè tè kyi se nə̀yn ə.”

¹⁸Ə pə̀ kə ghɨ Njûsə̀ zɨte ghɛ zɛ ə Pità pì, ghənə tàʼa fɨnə piə pofsê eghɛ kûmə̀ vəyn, ə zhə̀tə̀ tsîtə̀ Fèzhə̀, “Ghənə tè piə nə, ghâsènì ə fe nə Zhə̀fè ə pɔŋ fo kèpi ndom sê ghɨ ghɛ ə̀ vachi ə̀ghɨ ə Njûsghè nə ghənə kwiyne ə za ghɛ epiə ghənə ə kɛse pəyn se Zhə̀fè, ə kyi ndam zɛ ə ze tə mîə va.”

¹⁹Ghɨə pomə ghɛ ə ghe tè sàŋne kûmə̀ ngəʼ zɛ ə è tè nyi kə tè zhwi Shìtifɨ̀yn, yîghe ə tə ndûə tâ endaʼ ə Fònisiyàzè, yîghe ə ndùə endaʼ ə Sàypulòszè, ghəmɔ̀ʼɔghe ndûə endaʼa Antyòkzè. Ghənə tè tsâ ndûə tom èchùŋ kè sê ghɨ Njûsə̀.

²⁰Pîza ghɨə pomə əmɔ̀ʼɔghe ə fɨə pə̂ endaʼ Sàypulòsè èndaʼa Silènzè ndûə kəpi ə Antyòk sè pɔŋɔ ndâʼà tom èchùŋ sê ghɨə Nglêkghè kûmə̀ Pɛ̂pɛ Njisə̀s.

²¹Tyaʼa Pɛ̂pɛ ke tè nyîə nyi yighə̀ ghənə. Ghɨ tsɨəghe ə pomə ə fo ə̀təm ə ghənə̂ghè sê Pɛ̂pɛ.

²²Ghɨə ghɛ ə ghe tè nyi ə ndɛ ə Fèzhə̀ ə Njèlusalɛ̀m ə zɨə saʼghe kûmə̀ èghɛ nə zɨ̂yn ə tomə Pànapàs nə è ndu ə Antyòk.

²³Ə pə̀ kə è ndù fɨ fu, ə fe endom vɛ ə Zhə̀fè nyi mə Fe pɔsê ghɨghe, è ve saŋnə̂ nâʼà sə ŋaŋ ə təftə̂ ghənə nə ghənə ə chumtə̀ Fèzhə̀ è təm ə ghənə̂ ghəkɨ̂m.

²⁴Pànapàs vɛ ə tiynse fu tè nyì ke nâʼà wùə èchùŋ, fɛte kyi èpomə, mə è və lwiyn è Zuʼ se Ŋwaʼase. Ghɨghe ə pomə Fèzhə̀ kûmə̀ vəyn tsɨ̀ə kə nyi.

²⁵Pànapàs ə fɨnə ndò ndùə ə endaʼa Tasùszè se kyiŋə Sɔ̂l.

²⁶Ə̂ pə̀ kə è kyiŋ fe vəyn, è və njiə ndûə è vəyn ə Antyòk. È və ke ndam yî vəyn fu sə pîŋ èfɨ̀plè, ghənə əpɛ̀ e tsɨ̂yntə̀ yighə̀ ghɨ ndɛ ə̀ Fezhə̀ghe. Ghənə ə zaʼlə̂ ə̀ghɨ pomə fu ghe tsɨ̂ə kə nyi. Ə tè nyi Antyòk kə tè zhə̀te se tɔŋtə sechùmtè sə Njisə̀s sè nə əghɨ ə Klâysghè.

²⁷Ə̀ tè nyi kepî ə mtuʼ nə mɛ, fɨ̀aʼtè shîse ə ndò ə Njèlusalɛ̀m ə tso ə Antyòk.

²⁸Zhizè e nyi ə ghənə əfètəyn, zə vəynze e nyi Àngapùs. È və ndwìə tyəmə̂, tyaʼa Sezuʼ e Ŋwaʼake ə nə̀ nə è tsayn nə, “Chɨ̀ŋ e kayntə tə ko mbi èkɨ̂m.” Zɨnə mə tè kyayn ə shɨŋ zɛ ə Klondiyùs tè nyi fɔ̀yn èghaʼâ.

²⁹Chùmtè èpàm shîse ə se tè nyi fu ə ke ndə̀m nə nâʼà pîndè nyîə kyi se tiynsə̂ etsâmtè sê ghɨpomə ghɛ ə ghe tè nyi apàs endaʼ ə Njòndyâkè kè kə nâʼà pîndè tè kaʼa ə è kyi tayn.

³⁰Ə nyi zamə kə ghənə tè nəyn. Ə zùŋtə̀ èfɨa ətəyn ə tomə Pànapàs yî Sɔ̂l nə ghənə nji ndu fo sê chəʼsə ndɛ ə̀ Fèzhə̀sè fu.