Read Mmen Ətefɨ̂aʼ 14 Bible Online

Ətefɨ̂aʼ 14 - Mmen bible

Ətefɨ̂aʼ 14

¹Ə Ìkonyùm, Pɔ̂l yî Pànapàs ə ndùə ə njiə ndɛ̂ atsɨ̀ynte ə̀ ghɨ Njûsə̀ kè kə ghənə tè ndamə nə̂ nâʼàpî ghayn, ə ndàʼà tomə̀ Njisə̀s fumə, ghɨ Njûsghè è ghɛ ə̀ tè vachi əghɨ ə Njûsghè ə pomə sê Pɛ̂pɛ, tsɨ̀ə kə nyi.

²Pîza ghɨ Njûs ghɛ ə ghe tè tə nə ghe pomə̂ va, ə ndwìsə̀ ə̀ təm əghɨ̀ ghɛ ə̀ tè vachi ə̀ghɨ ə Njûsghè nə ghənə ə nyɔʼsə̀ ètɔŋ sê ghɨ ghɛ ə ghe pomə Njisə̀s.

³Pɔ̂l yî Pànapàs ə ndamə kɔʼɔ fumə nâʼà sə aghaf etyâkè, wàmnə̀ əghɛ ə chûŋ ghɛ ə Pɛ̂pɛ nyi mə è və nə̀yn se ghɨ fànə va nâʼà səkɔs. Pɛ̂pɛ Njisə̀s ə nə̀ ghənə ə tyə̀nə̀ chwìə, ə nə̀ ə̀ghɛ əkayntə ə tsɨəghe, se tyə̀yn nə ghɛ ghɛ ə chùmtè èpàm sə vəynse piə kûmə̀ èfo eghaʼ Vəynze nyi səmɔʼ.

⁴Pîza ghɨ ghɛ ə ghe tè nyì fu endaʼ ə kyîə echyâsè ewìynze, ghɨə mɔ̀ʼɔghe e tɔ̀ʼɔ̀ ə̀ghɨ Njûsə̀, yîghe e tɔ̀ʼɔ̀ ə̀ghɨtomə.

⁵Ghɨ yîghe ə tè vachi ə̀ghɨ ə Njûsghè è ghɨ Njûs yîghe, è ghɨ ghɛ ə ghe tè chisə ghənə ə ndə̀mə̀ nə ghənə nə̀ nyâplə̀ è Pɔ̂l è Pànapàs, ə tɨmne ghənə e chighe.

⁶Pɔ̂l yî Pànapàs ə zɨə èghɛ ətəynze ə tə ndûə apàs endaʼ ə Likonyàkè ə njiə endaʼa Lisɨtɨ̀là è endaʼa Ndepì, è luʼ tɛ ə te tè nyì paʼsê.

⁷Ghənə tè ndàʼà tom èchùŋ pâs ətəynke akɨ̂m.

⁸Ə̀ tè nyi endaʼ ə Lisɨtɨ̀là, wùə vîvè e nyi fu mə ə tè piə vəyn mə è nyi kèngɛ əchi, mə è pâʼà tyəmə̂ kwîə.

⁹Wùə nə vɨ̂yn e zɨtə̂ kə Pɔ̂l tè ndàʼa tom èchùŋ sê ghɨ. Pɔ̂l ə naynə̂ ndùə vəyn ə fe nə è nyîə kyi epomə̂ mə ze kàʼa ə ze nəyn ə è tɛ,

¹⁰ə pìə sê vəyn ə kyə̂ è tɛ nə, “Ndwi ə tyəmə̂.” Wùə ətəyn ə tâynə̀ ndwîə ə zhə̀tə̀ se kwì.

¹¹Ə pə̀ kə nɔ̂yn ə ghɨ̀kè fe ghɛ zɛ ə Pɔ̂l nə̀yn ə zhə̀tə̀ sè pɨa pîə ə ghənə ewàmnè ə Lìkonyàzè nə, “Zhə̀mè ə kə̀mnè sə ghɨ̀, ə ndò tso pə̂ ekwùtwəyn sê tsàmtə ghâsènì!”

¹²Ghənə ə tɔŋtə Pànapàs nə è nyi Fezhə̀ fɛ ə tɔŋtə nə Zûs, ə tɔŋtə̂ Pɔ̂l nə è nyi Fezhə̀ fɛ ə tɔŋtə nə, Ɛlmìs, kûmə̀ nə ə̀ tè wàmnə̀ kə vəyn se ghənə əpɛ̀.

¹³Fam zɛ ə tè kɔʼsə zhə̀ fɨ̂nə ə tè tɔŋtə nə Zûs əfètəyn tè nyì fɨ ndu etipìə tɔ̂ŋ. Wùə èkɔʼsə nə̂ èshyə̀ ə̀ zûs ə ke pə̀yn è mbɔ̀ŋsè è mbulese echo ə̀ mbàyn zɛ ə è njiə pə̂ endaʼ. È tè nə̀yn za kûmə̀ nə vəyn, è nɔ̂yn nə kɛ tè kyiŋə se fo efo sê Pɔ̂l yî Pànapàs.

¹⁴Ə pə̀ kə Pɔ̂l yî Pànapàs zɨ ghɛ zɛ ə ghɨə təynghe tè kyiŋə se nə̀yn, ghənə pàytə̀ sendzɨs sə ghənə̂sè ə nyɨŋə njiə anɔ̀yn nə kɛ ə fètəyn, ə zhə̀tə̀ pɨa piə nə,

¹⁵“Kûmə̀ ghè ə ghàyn nə̀ ghɛ zɨ̀nə? Ghàs nyi ə̀ghɨ, kèpi kə ghàyn. Ghàs pə̀ è tom èchùŋ sê ghàyn se nə̀yn nə ghàyn za zhə̀ mə àkaŋ mɨ̂yn ə kɛse pəyn sê Zhə̀ fɛ ə fe ndamə, ə̀ nyi Fèzhə̀ fɛ ə fe pom wuləke è chike, è njwî ə fengwaŋve è pî àkè kɛ ə ke nyi ətəyn.

¹⁶Ə tè nyì sə shi, Zhə̀fè ə zà ə̀ghɨ ə̀kɨ̂m nə ghənə ə nə̂ nâʼàpî èghɛ èkè zɛ ə ghənə kɔ̂ŋɔ̀.

¹⁷Pîza faŋa va sə̂ tyə̂nə̀ paynsə̂ ngɨŋ ə vəyn tɔynə̂ əghɛ əchûŋ ghɛ ə è nə̂. È nə̂ gholze e tso, fɨazhiəve e fɨnə ndəmə̂ ə mbvɨyn kè nâʼà ashìŋə̀ echûŋkè. È və fo fɨazhiəve sê ghàyn, nə̂ təm ghaynghe saŋnə̂.”

¹⁸Pî kə Pɔ̂l yî Pànapàs tè wàmne ghɛ ghɨ̂nə̀, ə tàʼa pa kyîə endom se nə̀yn nə kə nɔ̂ynà fo mâʼteze sê ghənə.

¹⁹Ghɨ Njûs yîghe ə ndò pə̀ ə endaʼ ə Antyòkzè apàs endaʼ ə Pìsindyàkè, ə ndò pə̂ kəpi endaʼ ə Ìkonyùm ə pə̀ fɨə Listɨ̀là, ə nə̀ nə nɔ̂yn ə ghɨ nə kɛ ə zɨə kə èghɛ zɛ ə ghənə tè pìə, ə tɨmnə̂ Pɔ̂l è chîə ə shìnə̀ fɨə è vəyn fumə ə tɔ̂ŋ, kwaʼtə̀ nə è və kwu.

²⁰Ə pə̀ kə ghɨ ghɛ ə tè nyi mə pomə pə̀yn ə zùŋtə̀ ka Pɔ̂l, è və ndwìə ə kɛsə njiə ndùə əfètəyn ə̀ tɔ̂ŋ. Tuʼve ə zo, yî Pànapàs ə ndò ndûə endaʼ ə Ndepìzè.

²¹Pɔ̂l yî Pànapàs ə ndàʼà tom èchùŋ endaʼ ə Ndepì, ghɨghe ə pomə sè nyi sèchùmtè epàm sə Njisə̀sè, tsɨ̀ə kə nyî. Epàmə̂ təyn, ghənə ə kɛsə ndô ndûə əte ndaʼà tə Lisɨtɨ̀làtè è Ìkonyùm ə pə̀ fɨə ə Antyòk apàs endaʼ ə Pesindyàkè.

²²Nâʼà pi elùʼ èkè vɛ ə ghənə tè nduə fɨə, ghənə ə nə̀ nə ghɨ poməghe tɔʼ kyî èpomə̂ ə ghənə̂zè ə fɨyn ndəm ətəm ə ghənə̂ eghɛ zɛ ə ghənə pomə. Ghənə tè zaʼlə nə, “Ghâsènì kyi se tsɛ tɔynê əfètəyn tètsòs te tsɨ̂ə kə nyi tsɔ̀fə ə se nji elùʼ efɔ̀yn ə Fezhə̀vè.”

²³Ə̀ tè nyì nâʼàpî ndɛ ə̀ Fèzhə̀ ə ghɨ̀ ə pomə èkè, Pɔ̂l yî Pànapàs ə chɔʼtə̂ ə̀ghɨ ghɛ ə nə̀ nə̂ ə chisə̂ ndɛ ə̀ Fə̀zhə̀. Ghənə tè tsə̂mə̀ fɨnə pamə ècho, kə se fo əghɨ nə ghɨnə ə Pɛ̂pɛ əgho vɛ ə ghənə tè samsə̂ vəyn.

²⁴Ə pə̀ kə ghənə kwî tɔyne ə apàs endaʼ Pìsindyàkè ə ndùə fɨə apàs endaʼ ə Pàmfilyàkè.

²⁵Ghənə ə ndàʼà tom ə̀ Fèzhə̀ endaʼ Pengà ə kɛsə̂ tso endaʼ ə Àtaliyàzè.

²⁶Ə fɨnə ndô fu ə njiə ə ngwùʼ ə kɛsə ndûə ə Antyòk, elùʼ vɛ ə tè fo ghənə ə Zhə̀fè əgho nə Fe tɔ̀ʼne è ghənə, kûmə̀ èfɨaʼ zɛ ə ghənə tè nyi mə ə nə̀yn mɨ̂sè.

²⁷Ə̀ tè nyi kə ghənə pə̂yn fɨ ə Antyòk, ə zùŋtə̀ ànɔ̂yn ə əghɨ̀ ə ndɛ ə̀ Fezhə̀kè ə tsà kɔʼɔ ə̀ghɛ əkɨ̂m ghɛ ə Zhə̀fè nə̀yn tɔynə̂ ə ghənə, ə fɨnə tsâ kəpî kə Zhə̀fè fo ndom nə ghɨ ghɛ ə̀ vachi ə̀ghɨ ə Njûsghè pɔŋ pomə̂ Njisə̀s.

²⁸Ghənə ə ndamə fu sə aghaf etyâkè yî ghə ghɨ ghɛ ə tè pomə.