Read Mmen Ətefɨ̂aʼ 18 Bible Online

Ətefɨ̂aʼ 18 - Mmen bible

Ətefɨ̂aʼ 18

¹Ə pə̀ kə zɨnə mə tsɛ̂ Pɔ̂l ə ndò ə Atèn ə ndùə ə Kolìn.

²Fumə, è və kwəynə̂ yî ghə̀ wùə ə̀ Njûs vîvè e tɔŋtə̂ vəyn nə Àkwilà mə nyi wùə endaʼa Pontùszè, mə è kwùʼ pə̂yn ke ndò ə Italì yî zhwîə vəyn Pliskà, kûmə̀ nə ə̀ tè nyi mə Klondiyùs ə tsɛ̀sè lâŋkè nə ghɨ ə Njûs ghəkɨ̂m za ndaʼa Lûmzè. Pɔ̂l ə ndùə se fe ghənə,

³kûmə̀ nə Pɔ̂l tè tàsə kəpi èfɨa è pfɨ̀ sə nyâmsè kə ghənə, e və ke faŋ fɨaʼà yî ghə̀ ghənə.

⁴Pɔ̂l tè kyiə əghɛ ə katə yîghə̀ ghɨə Njûsə̀ è ghɨə Nglêkghè tuʼ tendaʼ tekɨ̂m ə ndɛ àtsɨ̂ynte mɔ̂msə̀ se nə̀yn nə ghənə zɨ ghɛ zɛ ə è tè piə.

⁵Kə Pɔ̂l yî Timotì tè ndò pə̂yn ə Màsèndonyà, Pɔ̂l ə fo àshîŋə̀ ə vəynke akɨ̂m sə ndaʼà tom ə̀ Fèzhə̀, tsâ se ghɨə Njûsə̀ è ghɨə Nglekə̀ nə Njisə̀s nyi vɛ ə chɔʼ ndə̂m.

⁶Ə pə̀ kə ghənə kwiynse ghɛ zɛ ə è pìə, è və pə̀ynsə̀ tsɨ̀m sê ghənə ə pìə nə, “Ə ghàyn njìsè, ə nyi ke ghàyn se ghàm ə sengɨŋ saynse! Gho kɨmke va ətəyn. Se zhə̀tè zôyn se ndù əshi, m nə̀ ndûə se ghɨ ghɛ ə̀ vachi ə̀ghɨ ə Njûsghè.”

⁷È və ke zà ə ghənə ə ndùə ndamə ə wùə vîvè ə ndɛ mə ə tè vachi wùə Njûs zə vəynze nyi Taytùs Njustùs, mə ə̀ nyi wùə ngɨmnə̂ Fèzhə̀, ndɛ ə̀ vəyn è kwuʼ nyi paʼsê ke etipìə ndɛ àtsɨ̂ynte.

⁸Klispùs vɛ ə è tè nyi atu sê ndɛ àtsɨ̂ynte nə zɨnə̀ ə pomə̂ sê Zhə̀fè, paʼsə̂ kə è sas ə ndɛ vəynze kɨ̂m. Ghɨə tsɨə mɔ̀ʼɔghe endaʼa Kolìnzè ə zɨə tom ə̀təyn, ə pomə̂, ə fo m̀mo sê ghənə.

⁹Ə tè nyi ètuʼve tuʼ fîfe, Pɔ̂l ə fe ə̀ghɛ ətelaynəlayn, Pɛ̂pɛ ə pìə sê vəyn nə, “Kə ò fayn ghɨ ghɨ̀yn, ò wâmnə̀ kə ndò sê ghənə,

¹⁰kûmə̀ nə M nyi ghâsè ghò. Wùə vayn nə̀yn eghɛ sê ghò. Ò zaʼlə̂ kə ndò kûmə̀ nə ghɨ ghɨmə tsɨ̂ə kə fayn endaʼ nyi.”

¹¹Pɔ̂l ə ke ndam fu sə pîŋ è pɨaʼke, ndàʼà kə tom ə̀ Fèzhə̀.

¹²Ə tè nyì kə ə ndə̂m Ngalyò nə è və saʼa àpâs endaʼ kɛ ə tè tɔŋtə nə Àkayà, ghɨ Njûs yîghe fumə ə zùŋtə̀ ə kyîə Pɔ̂l ə ndùə è vəyn elùʼ əsaʼ

¹³ə pìə nə, “Wùə vɨ̀nə nə̀ nə ghɨghe ə ngɨmnə̂ Fèzhə̀ endom vîve, saʼ zasze e pomə̂ va.”

¹⁴Pɔ̂l e sè ŋaʼsə pə̀ ècho vəyn se wàmnè, Ngalyò ə fiə kə èghɛ ə vəyn cho, ə pìə sê ghɨə Njûsə̀ nə, “Ghàyn zɨte ə ghɨ Njûsə̀! Ə̂ fè nyi nə Pɔ̂l vɨ̀yn ə nyi mə è kəm esaʼ, kɨ̀sə è nəyn eghɛ epi zhîze, ə m zɨte ghɛ zɛ ə ghàyn pìə.

¹⁵Pîza kə ə̀ se nyi nə ghàyn saʼnə̂ kûmə̀ èzaʼlê zhîze kɨ̀sə ghàyn saʼnə̂ kûmə̀ kə ə̀zə ə ghɨ kɨ̀sə ə̀ nyi èghɛ zhîze əfètəyn èsaʼ zaynze, ə̂ kyi ke ghàyn se fɛtê. M vayn kàʼa m tyəm sə̂ saʼa tèkyì tə ghɛte nyi.”

¹⁶È və wàmnə̀ za ə pìə nə ə chum fɨse ə̀ghɨ Njûs nə ghɛ fumə elùʼ ə saʼ.

¹⁷Ghɨ ətəynghe ə kyîə Sòstinìs vɛ ə è tè nyi tuke ə ndɛ̂ atsɨ̀ynte ə̀ ghɨ Njûsə̀ ə pusə vəyn ashi elùʼ ə saʼke. Pîza zɨnə mə ə tàʼa fɨmsə̂ Ngalyò nâʼà se chi.

¹⁸Pɔ̂l ə ndamtə̂ kɔʼɔ yî ghɨə poməghe ə Kolìn sə mtuʼ me tsɨ̂əm̀ ə ke tɔŋtə ghənə ə ndò yî Pliskà è Àkwilà ə ndùə endaʼ ə Silyàzè ə ke ndùə ə Kànkɨ̀lyà. Pɔ̂l tè nyi mə è və kɔm tu ə vəynke kûmə̀ èkâyntè zɛ ə è tè nyi mə è və kyî yî Zhə̀fè.

¹⁹Ghənə ə kwiə ndûə tânə̀ endaʼ ə Ɛfesùszè, Pɔ̂l ə za Plìsilà yî Àkwilà ə ndùə ə ndɛ̂ atsɨ̀ynte ə kyîə ekâtè əghɛ yî ghə̀ ghɨ Njûsə̀.

²⁰Ghənə e sè chyatə̂ vəyn nə yighə̀ ghənə ndamte kwəynse, pîza Pɔ̂l ə kwiynsə̂.

²¹È və pɨlə pîə se ghənə kə è tè ndo nə, “Ə̂ nyi ekɔ̂ŋ ə Fezhə̀zè, m tə kɛsê pəyn.” È və wàmnə̀ za ə njiə ə ngwùʼ ə ndò zâ Plìsilà è Àkwilà fu.

²²Ə̀ tè nyi kə è ndù tâyn endaʼ ə Kàisalyàzè ə kɔʼɔ ndûə se tɔŋtê anɔ̂yn ə əghɨ̀ ə poməke ə Njèlusalɛ̀m, ə ndò fu ə kɛsə tso ə Antyòk,

²³Ə pə̀ kə è tsɛ̀sè shîŋə̀ kyîke fumə, è və ndò ə tsɛ̀ tɔynə̂ apàs endaʼ ə Ngàleshyàkè è Filinjyà, tsâmtə̀ se nə̀yn nə ghɨ epoməghe ə tɔ̂ʼɔ̀ tɛ ə ghənə epomə̂.

²⁴Ə̀ tè nyì fumə ashìŋə̀, wùə ə Njûs vîvè e tɔŋtə̂ nə Àpolòs mə ə tè piə vəyn endaʼ ə Àlèksandilyà, ə pə̀ ə Ɛfesùs. È tè nyi wùə ke se fɛtə wàmnè, kyi kepî ètɔf ə ŋwàʼlè ə̀ Fèzhə̀zè nâʼà àchûŋ.

²⁵È tè nyi mə ə fɛtê nji kɔʼsê pəyn vəyn ə Pɛ̂pɛ endom, kûmə̀ àtyaʼ nə kɨnə mə, è ve sè ndaʼà fɨnə zaʼlə̂ kûmə̀ Njisə̀s mə è tsasə va. Pî kə è tè ke ke kûmə̀ èfo mmò ə Njɔyn ze.

²⁶È və zhə̀tə̀ se wàmnè è təm ə tɛ ə ndɛ àtsɨ̂ynte. Ə pə̀ kə Pliskà yî Àkwilà zɨ zaʼlê ə vəynze, ə njìə vəyn yîghə̀ ghənə ə kwɨlə̂, ə fɛtə̂ tsâ tèndom tə Fezhə̀tè sê vəyn.

²⁷Àpolòs ə ke chɔʼnê se ndù ə Àkayà, ghɨə poməghe ə Ɛfesùs ə tsàmtə̀ vəyn ə nyàʼà ŋwàʼlè sê ghɨə poməghe ə Àkayà nə ghənə fi vəyn nâʼà àchûŋ. È və tyàŋà ndùə fu ə fo kə nâʼà ètsâmtè e ghaʼâzè sê ghɨ ghɛ ə ghe tè se nyi mə ghe ə pomə kûmə̀ àfùʼ ə Fezhə̀kè.

²⁸Tɔynə̂ èsaʼnê eghaʼâ zɛ ə Àpolòs tè kyi, è tè saʼnə̂ zhiə kə ndò ghɨə Njûsə̀ əfètə̂ ànɔ̀yn esaʼnəke mə è tyə̀ paynsə̂ ə ndayn nə Njisə̀s nyi vɛ ə chɔʼ ndə̂m.