Read Mmen Ətefɨ̂aʼ 25 Bible Online

Ətefɨ̂aʼ 25 - Mmen bible

Ətefɨ̂aʼ 25

¹Festùs tè pə̀yn njî apàs endaʼ ə Kàsalyàkè, epàmə̂ mtuʼ mta, è və ndò ndùə ə Njèlusalɛ̀m.

²Fumə Njèlusalɛ̀m ghɨkɔʼsə nə eshyə̀ e ghɨə Njûs ghɨ chisəghe tè pəyn ə və shi ə tsà èghɛ zɛ ə ghənə piə nə Pɔ̂l nə̀yn pofsê ndò. Ghənə e chyatə̂ Festùs

³nə è tiynse, ə nji pə̀yn è Pɔ̂l ə Njèlusalɛ̀m, kûmə̀ nə ə nyi mə nə̀yn pɨaʼtêzè se zhwiə vəyn endom.

⁴Festùs ə pə̀ynsə̀ nə, “Ə nyi mə fà Pɔ̂l ə Kàsalyà, mə nâʼà mi è ngɨŋ zɨ̂mè nyiə nyi se kwùʼtə ndù fumə.

⁵Ghàyn nəyn ə tu vɛ ə ve chisə ghàyn chumte mi, ə ghasè ghənə ndu ə Kàsalyà, kə ə è nyi mə è və nə̀yn pofsê ghɛze, ə nji ndu è vəyn elùʼ ə saʼve.”

⁶Ə pə̀ kə Festùs ndam kwəynse yî ghə̀ ghənə sə mtuʼ mfamə pi sə mtuʼ mghɨm, ə ke ndù ə Kasalyà. Ə fetuʼ fe komtəfe, è və tsɨsə̂ ə ndɛ èsaʼa ə tsɛ̀sə̀ àlâŋ nə ə nji pəyn è Pɔ̂l.

⁷Ə pə̀ kə ghənə pə̂yn è Pɔ̂l, ghɨ ə Njûs ghɛ ə ghe tè ndò Njèlusalɛ̀m ə tyəmə̂ ə vəyn etipì, ə zhə̀tə̀ se pì əghɛ ə pighe kûmə̀ vəyn mə ghənə vayn kaʼa tyən nə ghe nyi səmɔʼ.

⁸Pîza Pɔ̂l ə pìə nə ghɛ ghɛ ə ghənə pîə ə zhì ə tu nâʼà ə̀kɨ̂m nyi akaŋ. È və pì nə, “M pâʼà nə̀yn pofsê ghɛ zhîze se kyim esaʼ ə ghɨ̀ ə Njûszè, pi se kyim esaʼ ə ndɛ ètsə̀məze, pi zə Kasàzè ə Lûm.”

⁹Pîza Festùs e kyiŋə se kyî ekyàʼ echûŋzè yîghə̀ ghɨə Njûsghè. Ə ke pfɨf sê Pɔ̂l nə, “Ò kyiŋə ndò se ndù ə Njèlusalɛ̀m nə ndu saʼ ghò ə mì ə shi kûmə̀ ə̀ghɛ ghɨ̀nə̀ ə piə fâyn kûmə̀ gho ə̀?”

¹⁰Pɔ̂l ə pə̀ynsə̀ nə, “M fâyn tyəm ə Kasà ə̀ Lûm ə ndɛ ə̀ saʼ, mə ə kaʼa saʼ mi famə. M paʼà nə̀yn pofsê ghɛ zhîze sê ghɨə Njûsə̀, kə nâʼà ghò è ngɨŋ zɛ zè fɛte ke.

¹¹Mə m nyi mə mə kyim lâŋkè, ə nə̀ pofsə̂ èghɛ mə kaʼa zhwi me, m mə kwiynsə̂ va se kwu. Pîza ə ghɛ zɛ ə ghɨə Njûsə̀ pìə nə mə nə̀yn pofsê va səmɔʼ, ə wùə ə kyi va tyaʼa se pì nə ə fo tsɛ̂sè mi sê ghənə. M chyatə̂ nə Kaysà saʼ saʼ zɨ̂mzè.”

¹²Ə pə̀ kə Festùs tsuʼne tuve yî ghə̀ ghɨ ghɛ ə tè təftə̂ vəyn, ə ke pə̀ynsè nə, “O chyatê nə saʼ zɛ̂zè ndù sê Kaysà, ò nə̀ ndûə se vəyn.”

¹³Tuʼmè ə tsɛ̀ se zaʼâ m̀ shyàʼ, Fɔ̀yn Àngɨ̀lipà yî Pènîs ə pə̀ ə Kàsalyà se pə fi Festùs.

¹⁴Ə pə̀ kə yîghə̀ ghənə ndamte sə mtuʼlə̂, Festùs ə tsà kɔʼɔ ngəʼ ə̀ Pɔ̂l sê Fɔ̀yn Àngɨ̀lipà ə pìə nə, “Wùə nyîə nyi fayn kə Felès tè za kə wùə ndɛ ə̀chaʼ.

¹⁵Ə pə̀ kə m ndû ə Njèlusalɛ̀m, ghɨə Njûs èkɔʼsə nə eshyə̀ è chəʼse ə pə̀ èghɛ nə è və nə̀yn pofsê, ə pìə nə m nəyn kə è pfɨ saʼ.

¹⁶Mə piə sê ghənə nə, ‘E pɔynə̂ va sê ghàs, ghɨ Lumə̀ se nə̀yn eghɛ sè wùə ndɔ̀ʼɔ è tyəm kyaʼnè tyâŋsè yî ghɨ ghɛ ə pî nə è və nə̀yn pofsê nə è kyi zhəmke se pì nə è paʼà nə̀yn pofse ə ghɨə təynghə shi ghɛ ə njî ndû è vəyn ə ndɛ ə̀ saʼ.’

¹⁷Ə pə̀ kə ghənə pə̂yn fâyn, mə tàʼa zhwi ashîŋə̀, pîza ə fetuʼ fe komtəfe, mə tsɨsə̂ ə ndɛ ə̀ saʼ ə pìə nə ə nji pəyn è vəyn.

¹⁸Ə pə̀ kə ghɨ ghɛ ə tè njì pəyn è vəyn ə ndɛ ə̀ saʼ ndwi kɔʼ se tsàyn əghɛ ghɛ ə ghənə pîə nə è və nə̀yn, ə tàʼa piə nâʼà eghɛ epi zhîze emɔ̀ʼ zɛ ə ghənə tè pìə nə è və nə̀yn.

¹⁹Ghənə tè pɨlə saʼnə̂ kə ə̀ghɛ yîghə̀ Pɔ̂l kûmə̀ èndom vɛ ə ghənə kɔʼsə Zhə̀fè ətəyn, è kɨsè kûmə̀ wùə vîvè zɨə vəynze e nyi Njisə̀s mə è və tə kwu, pîza e pîə nə è nyi etwɔ.

²⁰E tɛ ghaʼa ndò mi se kê ə səmɔʼ famə ə tə̂ èghɛ, ə̀ za nyi eghɛ zɛ m pfɨf sê Pɔ̂l nə, è kàʼa è və kyiŋə se ndù ə Njèlusalɛ̀m nə ə saʼ saʼ ə̀ vəyn fu ə?

²¹Pîza Pɔ̂l ə chyatə nə ə zàmaʼà ke zhi ə ndɛ̂ chaʼ se zaʼâ kə Kaysà sayne saʼà vəyn.”

²²Àngɨ̀lipà ə piə sê Festùs nə, “M kɔ̂ŋɔ̀ se zɨə ewàmnè ə wùə nə vɨ̂yn è ngɨŋ zɨ̂mzè.” Festùs ə pìə nə, “Ò tə zɨə sê vəyn eyisəʼə.”

²³Tuʼfe komtəfe, Àngɨ̀lipà yî Pènîs ə pə̀ kə nâʼà kə ghɨ e tɛ, ə njiə tsɨsə ə asəyle kɛ ə ghɨ tè pə̀ zûŋtə̀ ətəyn yighə̀ tuə sesôkə̀ʼ eghaʼâvè è ghɨə chisə ghaʼâ ghɛ ə ghənə tè nyì fumə endaʼ. Festùs ə tsɛ̀sə̀ àlâŋ nə ə nji fɨ pəyn è Pɔ̂l.

²⁴Festùs ə piə nə, “Fɔ̀yn Àngɨ̀lipà, è ghɨghe əkɨ̂m ghɛ ə ghe nyi fâyn, ghàyn ə fe wùə vɨnə! Ə̀ vɨ̀nə nyi wùə vɛ ə ghɨ Njûsghè əkɨ̂m ghɛ ə ghe nyi ə Njèlusalɛ̀m è ghɛ ə ghe nyi ə Kàsalyà tè pi nə è və nə̀yn pofsê, puʼə m̀pɔ̂ŋ pîə nə è kyi va se fɨnə ndam.

²⁵Pîza mə tàʼa fe eghɛ zɛ ə è nyi mə è və nə̀yn pofsê kə kaʼa zhwi vəyn, pîza ə pə̀ kə è chyate è ngɨŋə̂ vəyn nə tom zhi sê Kaysà, mə saynə̂ se tom ə vəyn ə Lûm.

²⁶Pîza mə tàʼa kyîə pì atu eghɛke amɔ̀ʼ se nyàʼ se Kaysà kûmə̀ vəyn. Ə̀ za nyi eghɛ zɛ m pə̂yn è vəyn ə ghà shi ə̀kɨ̂m, paynpayn sê ghò ə Fɔ̀yn Àngɨ̀lipà kə m nə̂ nəyn m mə kyi èghɛ se nyàʼ ezhoghɛ ə ghâsènì fɛte zɨte kɔ̂ʼ pə̂yn ghɛ ghɛ ə è pì.

²⁷Kûmə̀ nə m fe nə ze chwîtə̀ va tɔfze se tom ə wùə ə ndɛ ə̀chaʼ mə m paʼà lote tyəyn paynsê tso nə è pofse ghɛ.”