Read Mmen Ətefɨ̂aʼ 28 Bible Online

Ətefɨ̂aʼ 28 - Mmen bible

Ətefɨ̂aʼ 28

¹Ə tè nyi kə ghàs pə̀yn fɨ etipì ə tsô ndɔ̀ʼɔ ghɛ zhîze kyayn sê wùə vîvè ə ghàs ə fètəyn, ə nyi ashìŋə̀ kɛ ə ghàs tè ke nə ndâʼlə̀ nə fɨnə mə ə fètə̂ tsò tè nyi Maltà.

²Ghɨ endaʼ ətəyn ghɛ ə ghàs tè kote ə tsâmtə̀ ghàs. Gholze ə zhə̀tə̀ se tso, fofke e kwɨlə ghàs, nyiəmə, ghənə ə fɛtə̂ èwus nə ghàs zɨte, nə̀ pə̀yn achûŋ sê ghàs.

³Pɔ̂l ə komtə̂ m̀sɛ kə m̀ kàʼa m̀ lwiyn gho vəynghe əpɛ̀, kə è kwà ndûə kàʼ mə təyn mè echi, mbam ə fɨə ətəyn kə wusve chûm zə̂ynzè, ə ndomə àgho ə vəynke ə ghaŋnə̂ faŋə.

⁴Kə ghɨ endaʼ nə ghɛ tè fe zhò ə̀təyn e ghaŋnə̂ ə Pɔ̂l agho, kyì e pîə se kyì nə, “Wùə vɨ̀nə nyîə zhwiə ə̀ghɨ. È və tə fɨ ke nâʼà ə tsô mə è paʼà kwu, pîza tsôsvè nə̀ za va vəyn nə è ndam.”

⁵Pîza Pɔ̂l ə sə̀ʼə̀ àgho ə vəynke, zhò ə̀təyn ə tânə̀ ewùs ndɔ̀ʼɔ è ndəmse vəyn nâʼà səkɔs.

⁶Ghənə tè lɨmtə nə wiyn ə vəyn mol, ə̀ va zâ, ə è pfɨ̀ŋə̀ pfɨ kwu. Ə mòtə̀ nâʼà sə aghaf pîza ə tàʼa fe kə ghɛ zhîze kyâyn sê vəyn. Ghənə ə ke kwiyne ekwâʼtè e ghənə̂zè, sè piə nə, “È kàʼa è və nyi kepî Fèzhə̀ fîfe!”

⁷Wùə èghaʼâ endaʼ nə zɛ ə ze tè nyi ə fètə̂ tsò tè kyi mfùʼ etipì ə enjwì ə fengwaŋve. Zə vəynze tè nyi Pupiyùs. È və fiə ghàs nâʼà àchûŋ ə pfɨtə̂ ghàs sə mtuʼ mta.

⁸Ə̀ tè nyi zâ, pɨ̀a Pupiyùs e nyɨŋ ekwì è wiyn ekasəve, fɨnə ndûə eluʼ. Pɔ̂l ə njiə ndùə əfètəyn ndɛ zɛ ə è tè nyìŋ ətəyn ə tsə̀mə̀ se vəyn, ə ndə̀mə̀ ə̀gho ə vəyn ə ewìyn, zaf ətəynze ə mìə.

⁹Ə̀ tè nyi kə ghɛ nə zɨ̂nə̀ mə kyàyn, nâʼà əghɨ zafəghe əkɨ̂m ghɛ ə ghe tè nyì fu endaʼ ə fɨə pə̂, Pɔ̂l ə tsuʼə kəpî ghənə.

¹⁰Ghɨ endaʼ nə ghɛ ə màʼtə̀ ghàs èfɨave ve tsɨ̂ə kə nyî. Ə pə̀ kə ghàs kyiŋə se ndò, ghənə ə ndə̀mə̀ efɨa èkɨ̂m vɛ ə ghàs tè kyiŋə ə ngwùʼ èghaʼâ kwəynə, kə ghàs ndùə kwîə ətəynze.

¹¹Ghàs tè ndam ə Maltà sə senjɔŋ seta ə piə ə ndô ndò ə njiə ə ngwùʼ èghaʼâ kwəynə mə è tè ndò ə Àlèksandilyà. Ə tè tɔŋtə̂ ngwùʼ èghaʼâ kwəynə ə̀təyn nə, “Epɨâʼsè ə Mzhə̀vè.” Ngwùʼ ə̀təyn ə pə̀ tyəmə̂ fu àshɨŋə̀ kɛ ə fofke nyi tsɛ̂sè, fof e tɛke e tsɛ̂.

¹²Ghàs ə kwìə ə pə̀ fɨə endaʼ ə Silakùszè. Ghàs tè ndamtə̂ fumə sə mtuʼ mta.

¹³Ə ndò fumə endaʼ ə ndùə pɨənə ə endaʼ eghaʼâzè e tɔŋtə̂ nə Lengòm. Tuʼve ə zo, fofke ə zhə̀tə̀ sè tsɛ̂, pə̂ èndomve apàs ə etyə̀ke. Ghàs ə kwìə sə mtuʼ ə m pɛ̀ ə pə̀ fɨə ə tɔ̂ŋ ə Pùtulì.

¹⁴Kə ghàs nji ndû fumə ə kotə ə̀ghɨə pomə fu, ghənə ə chyatə̂ nə ghâsè ghə̀ ghənə ndamte sə ngâm, ghàs ə ke tsɛ ndù ə Lûm.

¹⁵Ə̀ tè se nyi mə ghɨe poməghe ə Lûm ə zɨ nə ghàs pə̂ ndò, ə pə̀ se lɨmtə ghàs ə setɔ̂ŋ sə Ezhɔynə Apiyùsvè, yîghe e lɨmtə̂ kəpi ghàs elùʼ vɛ ə ghɨ e motə pə tè pə njiə ətəyn, e tɔŋtə̂ nə, Ndɛ sə ghɨ̀ ə Motə pə seta. Ə pə̀ kə Pɔ̂l fe ghənə, ə fo àzɔ̀ŋnè se Zhə̀fè ze ə nə̀ vəyn è və kyi ə̀təm ə tɛghe.

¹⁶Ə tè nyi kə ghàs pə̀yn tâyn endaʼ ə Lûmzè, ə zà Pɔ̂l nə è və ndamə kə nâʼà sə və ngɨŋ ə fo sokə̀ʼ nə è və tsɨ̂ŋnə̀ vəyn.

¹⁷Tuʼmè ə tsɛ̀ m̀ta, Pɔ̂l ə tɔŋɔ̂ àtsɨ̂ynte yighə̀ tu ə ghɨ̀ ə Njûs vɛ ə ve tè nyi ə Lûm. Kə ghənə ə pə̂yn, Pɔ̂l ə pìə sê ghənə nə, “Ghɔnyì ghɨm ghə Isìlâyghè, m tè paʼà nə̀yn pi zhîzè se ghɨ ghɨ̀nə̀, ə tàʼa nə pofsê eghɛ zhîze kûmə̀ ètsɨsə̂ endaʼ zɛ ə pɨ̀a ə ghâsènì ghəshiə tè zà sè ghâsènì. Pîza kə ghɨ ə ghasènìghe tè ko mi Njèlusalɛ̀m ə fo mi sê tu ə ghɨ̀ ə Lûmvè. Nyiəmə, ze tyə̂nə̀ nə m zo fa nyi kə wùə ndɛ ə̀chaʼ.

¹⁸Ghɨ saʼa nə ghɨ̂yn ə pfɨftə̂ ə̀ghɛ sê mi sè kyiŋə se zà mi kûmə̀ nə ghənə tè pâʼà fe nə mə ə nə̀yn ghɛze kə ə zhwi mi.

¹⁹Ə tè se nyi kə ghɨ Njûsə̀ kwiynse nə kə ə za mi, m kyi se pə̀ ə Lûm fayn nə Fɔ̀yn Kaysà zɨ ghɛze kûmə̀ saʼ zɨ̂mè nâʼà pì kə m tè kyi va ghɛ epi zhîze se pì kûmə̀ ə̀ghɨ ghɨmə nâʼà səkɔs.

²⁰Ə̀ za nyi eghɛ zɛ m tɔŋə ghàyn nə ghâsènì kate ghɛghe. Se pì səmɔʼ, m kyiŋə nə ghàyn ke nə ə chaʼse nyi ə mì ekɔyn, ə ze ə nyi kûmə̀ wùə vɛ ə ghɨ Isìlâyghè tè nyi mə ndə̀m ə ghənə ətəm nə è tə pə̂.”

²¹Tu nə vɛ mə ə ke pì sè Pɔ̂l nə, “Ghàs pâʼà fe ŋwàʼlè kə è ndò ə Njòndyâ ə pə̀ sê ghàs kûmə̀ ghò. Nâʼàpî ə̀ghɔnyì ghàs ghɛ ə ghe ndô fu ə pə̀ fayn pâʼà pì ghɛ epi zhîze kûmə̀ ghò.

²²Pîza, ghàs nyiə kyiŋə se zɨ ekwâʼtè zɛze kûmə̀ nə ghàs tsɛ̂ nâʼàpî ghayn, zɨə kə ghɨ wàmnə̀ ghɛ ghe tsɔ̂fə̀ va kûmə̀ èkyî anɔ̀yn kɨ̂nə̀ ə ò nyi ətəyn nyi.”

²³Ghənə ə ndə̀mə̀ etuʼ se pə zɨtê se Pɔ̂l. Tuʼ ətəynve ə kwəynə, ghənə ə fɨə nâʼà setsɨ̀ ə pə̀ elùʼ vɛ ə Pɔ̂l tè ndamə ətəyn. È və pɨsə̂ zhə̀tə̀ se wàmnə̀ sê ghənə, ə nə̀ wàmnə̀ kə nyi ə ndùə tânə̀ ashìŋə̀ ezhwikwɨləke, ə fɛtə̂ tsâ paynsə̂ èghɛ zɛ ə è tè kyi se tsàyn sê ghənə kûmə̀ èfɔyn ə Fezhə̀vè. È və mɔ̀msə̀ se nə̀yn nə ghənə ke Njisə̀s. È və fɨnə pîə ə̀ghɛ ghɛ ə ghe fɨ ə ŋwàʼlè Àlâŋ zɛ ə Mosîs tè pə̀yn è zə̂yn è kɨ̂sè ə ŋwàʼlè ə̀ sèfɨ̀aʼtè kə ghənə pomə nə Njisə̀s nyi Klâys.

²⁴Ghɨ yîghe ə pomə nə è piə kə nâʼà səmɔʼ, yîghe ə tàʼa pomə̂ nə ghɛ zɛ ə è tè pìə tè va səmɔʼ.

²⁵Nyiəmə, ghənə ə zhə̀tə̀ se saʼnê əghɛ kə ghənə tè ndù. Tsɔ̀fə kə ghənə ndo, Pɔ̂l ə tsà sê ghənə nə, “Zuʼse Ŋwaʼase tè nyi ke nâʼà chichi kə se tè tsàyn ghɛghe se Fɨ̀aʼtè Èsayà nə è tsayn sê pɨ̀a ə ghâsènì ghəshiə nə,

²⁶‹Nduə pì sê ghɨ ghɨyn nə, ghàyn tə nə̂ ə zɨə, fɨnə zɨə, pîza ə ghàyn ə zɨə kêva, ə ghàyn ə naynə̂ tèluʼ, fɨnə naynə̂ pîza fe va nâʼà səkɔs.

²⁷M piə nyiəmə kûmə̀ nə təm ə ghɨ nə ghɨ̂ynə mə nyîə tɛ, mə ghənə ə fɨ̀yntè tûŋne ə ghənə̂vè, ə fɨnə kɨmtə̂ ə̀shi. Ə zə fe va nyiəmə, mə shi ə ghənə̂ghè fe ndò, mə tûŋne ə ghənə̂vè zɨə ndò, təm ə ghənə̂ghè e zɨə kê kə ghənə kɛse pəyn sê Mi, ə M tsuʼ ghənə.›”

²⁸Pɔ̂l tè wàmne ə piə è mɨ̂sə̀ ndò ə piə nə, “Ghàyn e ke nə, tom èsɔza zɛ ə Zhə̀fè tom, È və tom zə̂ynzè zôyn se ghɨ etumə, mə ghənə nə̀ zɨtə̂ zə̂ynzè. [3]

³⁰Pɔ̂l ə ndamə fu sə sepìŋ sèpɛ̀, ndaʼà zə vəyn nə ndɛ. È tè fiə nâʼà pî ndè vɛ ə è pə̀yn se môtə̀ vəyn è saŋnêzè.

³¹È tè ndàʼa tom ə̀ Fèzhə̀ kûmə̀ èfɔ̀yn ə Fezhə̀vè, zaʼlə̂ ə̀ghɨ kûmə̀ Pɛ̂pɛ Njisə̀s Klâys mə è ndə̀ʼə̀ fànə̀ va, wùə vîvè ə tàʼa mɔ̀msè se tàsə vəyn nə kə è wamne.”