Read Mmen Ətefɨ̂aʼ 3 Bible Online

Ətefɨ̂aʼ 3 - Mmen bible

Ətefɨ̂aʼ 3

¹Ə̀ tè nyi tuʼ fîfe, Pità yî Njɔyn ə ndùə ə ndɛ̂ ètsə̀mə ə sechwìə sèta mə zhwize ə pɔ, ashìŋə̀ kɛ ə ghɨ tsə̂mə̀ tsɛ̂ ətəyn.

²Wùə tè nyîə nyi echo mbàyn ə̀ ndɛ ə̀ Fèzhə̀. Ə tè tɔŋtə echo mbàyn ətəyn nə Echo Mbàyn Etsofəve. Wùə təyn tè nyi kèngɛchi mə piə ke vəyn zamə. Ə tè pɨ̀aʼà vəyn tuʼmè m̀kɨ̂m pə̂ ndə̂mə̀ fumə echo ə̀ mbàyn, è ve ndɔnə èkɛ sê ghɨ ghɛ ə tè njiə ndûə ə ndɛ ètsə̀mə.

³Kèngɛchi nə kɨ̂yn ə fe kə Pità yî Njɔyn njiə ndûə ə ndɛ̂ Fèzhə̀ sè ndɔnə èkɛ sê ghənə.

⁴Ghənə ə naynə̂ ndùə vəyn kè ekyàʼ, Pità ə pìə sê vəyn nə, “Nayne pə̀yn ghàs nyî.”

⁵È ve naynə̂ ndûə Pità yî Njɔyn, kwàʼtə̀ nə ghənə nə̀ fo àfɨa sê vəyn.

⁶Pîza Pità ə pìə sê vəyn nə, “M kyi va kɛve nâʼà səkɔs se fo sê ghò, pîza nyi se fo kə afɨa kɛ ə m kyi. M piə sê ghò ə Njisə̀s Klâys və Nazalɛ̀t ezə nə ò ndwi ə̂ ò kwi.”

⁷Pità ə kyiə ekɔyntwɔ ə vəyn ə tsàmtə̀ vəyn nə è ndwi tyə̂m. Fɨəyntə vəynte è kɨŋnete ə tɛnə̂ kə sə ashìŋə̀.

⁸È və tânə̀ ndwîə, ə tyəmə̂ ekwùtwəyn ə zhə̀tə̀ kwîə. È və ndùə njiə ə ndɛ̂ ètsə̀mə yî Pità è Njɔyn sè tàyntə̀ ka fu, saŋnə̂, pɔmsə̂ Fèzhə̀.

⁹Ghɨghe əkɨ̂m ə ndɛ̂ Fèzhə̀ ə fe kə è kwiə tsɛ̂, pɔmsə̂ Fèzhə̀,

¹⁰ə kê nə ə̀ nyi wùə vɛ ə è tè ndam tsɨs kə Echo ə Mbàyn e Tsɔfəve, ndɔnə èkɛ. Choze ə zomə ghənə, ghənə e nyi èkaynze kûmə̀ èghɛ nə zɛ ə ze kyâyn sê kèngɛchi nə kɛ.

¹¹Nâʼà pîndè vɛ ə è tè nyi ə ndɛ ə̀ Fèzhə̀ tè nyi èkaynze. Ghənə ə ke nyɨŋə nduə kotə Pità yî Njɔyn atɔyne ə ndɛ ə̀ Fèzhə̀kè e tɔŋtə̂ nə, Atɔyne ə Sòlomùynkè. Ə tè nyì fumə ashìŋə̀, wùə vɛ ə Pità yî Njɔyn tè tsuʼ e pa chûmtə̀ ghənə.

¹²Pità ə fe əghɨ nə ghɨ̂yn ə pfɨfə sê ghənə nə, “Ghɔnyì ghɨmghə Isìlâyghè, kûmə̀ ghè ə ghàyn nyi èkaynze ə? Ghàyn tùŋə̀ naynə̂ kə ghàs nyî sə ghe? Ghàyn kwàʼtə̀ nə ghàs nəyn nə wùə vɨ̂yn ndwi ə è və kwîə kûmə̀ àtyaʼ kas kə ngɨŋke mə, mə kûmə̀ nə ghàs tsɔ̀fə̀ nâʼà achûŋ ə Zhə̀fè əshi ə?

¹³Zhə̀ fɛ ə Aplàghâmfè, è Azɨ̀k è Njàkɔ̂p kɔʼsə, mə za nyi Fezhə̀ fə pɨ̀a ghâsènì ghəshiə ə tyə̀yn pomsê ə wùə èfɨ̀aʼa ə Vəyn Njisə̀s. Ghàyn tè fo Vəyn əghɨ ghayn ghə sesaʼghə gho, ghàyn ə kwiynsə̂ Vəyn ə Paylɛ̀t əshi. Ə pə̀ pi kə Paylɛ̀t tè kyiŋə se zà ə Vəyn ghàyn ə kwiynsə̂ Vəyn

¹⁴Njisə̀s tè nyi wùə èŋwaʼa, fɨyn nyi wùə ə̀ chichi, pîza ghàyn ə kwiynsə̂ Vəyn ə chyatə̂ Paylɛ̀t nə è pɨl za wùə, mə è zhwiə ə̀ghɨ.

¹⁵Ghàyn ə nə̀, ə zhwiə wùə vɛ ə è pə̂ endam ə səmɔʼze sè ghɨghe, pîza Zhə̀fè ə nə̀, È və zòmə̀. Ghàs nyi setsɛ̀ èsaʼ eghɛ nə zɨ̂yn.

¹⁶Wùə vɨ̀nə ə ghàyn fe nyi, fɨyn fɛte ke, ə̀ nyi atyaʼ ezə Njisə̀szè è pomə̂ zɛ ə è kyi ezə təynze, nyi eghɛ zɛ ə ze fo tyaʼa sê kèngɛchi kɨ̀nə̀ ə nə̀ nə è tɛ. Ghàyn ghe fe sə ghàyn ə ngɨŋ.

¹⁷M pîə sê ghàyn ə ghɔnyì ghɨmə nə, nâʼàpî èghɛ èkè zɛ ə ghâynghə̀ ghɨ ghayn ghe chisə tè nəyn sê Njisə̀s, tè kyàyn nyî kûmə̀ nə ghàyn tè keva ghɛ zɛ ə ghàyn tè nə̂.

¹⁸Pi kə ze tè kyayn za, Zhə̀fè ə lwiynsə̂ èwâmnè ə Vəynze, nâʼà sə mɨ kə È tè tsàyn sê fɨ̀aʼtè sekɨ̂m nə ə pi nə, vɛ ə chɔʼ ndə̂m tə fe ngəʼ.

¹⁹M pîə sê ghàyn nə, ghàyn kwiyne təm ghanə ə ghàyn əghɛ ə pighe, ə ghàyn kɛse pəyn sê Zhə̀fè, kə Fe shu tsɨ̂sè ə̀ghɛ pi ghaynghe.

²⁰Ə ghàyn nə̀yn nyi, ə shîŋə̀kè tə pəyn, ə Pɛ̂pɛ zɨnə təm ghaynghe. Ə̀ nyì fumə ashìŋə̀ ə È tə tomə vɛ ə kɨmne ndə̂m, mə nyi Njisə̀s, vɛ È chɔʼ ndə̂m sê ghàyn.

²¹È kyi ke se faŋ ekwùtwəyn se zaʼâ kə shîŋə̀kè kwəyn, ə nâʼà pi ghè pəyn sə fe, mə za nyi ashìŋə̀ kɛ ə Zhə̀fè tè wàmne etuʼ əshi tɔynə̂ ə fɨ̀aʼtè sə Vəynse echo.

²²Mosîs è ngɨŋə̂ vəyn tè pi nə, ‹Pɛ̂pɛ vɛ ə È nyi Vəyn Zhə̀ faynfe tə chɔʼɔ fɨ̀aʼtè ə ghàyn ə fètəyn kèpî kə È tè chɔʼ mi. Ghàyn kyi sə̂ nə̂ ə̀ghɛ ə̀kɨ̂m ghɛ ə è pì nə ghàyn ə nə̂.

²³Ə̀ za faŋ pi ndè se zɨ sê fɨ̀aʼtè nə zɨ̂yn, ə saŋse vəyn ə əfètəyn ànɔ̀yn ə ghɨə Fezhə̀kè.›

²⁴Fɨ̀aʼtè sèkɨ̂m sɛ ə Zhə̀fè tè tom nə se pəyn wâmnè, ə tè wàmnè ghɛ ghe ə̀kɨ̂m kûmə̀ ə̀ghɛ ghɛ ə ghe kyàyn kɔʼ pəyn ə mtuʼ mɨ̂yn. Fɨ̀aʼtè sə təynse tè nyì paʼsə̂ è Samwèl è sə mɔ̀ʼɔ sɛ ə se tè pəyn ə vəyn epàm.

²⁵Ghɛ zɛ ə Zhə̀fè tè pi tɔynə̂ ə se fɨ̀aʼtè tè nyì sê ghàyn, ghàyn e kyi kepî èghɛ əfètə̂ m̀kàyn mɛ ə Zhə̀fè tè zhi yî pɨ̀a ghayn ghəshiə. Zhə̀fè tè pi sê Aplàghâm nə, ‹M tə pɔsə̂ ə̀ghɨ ə̀kɨ̂m fa mbi tɔynə̂ əghò etɔ̀ŋ ə ndɛve.›

²⁶Zhə̀fè ə ke chɔʼə Wufɨ̀aʼa ə̀ Vəyn ə tomə sê ghàyn sə shi, nə È nəyn kə nâʼàpî ndè ə ghàyn əfètəyn za ndomte pite ə è kyi pɔsê nə zɨ̂nə̀.”